Luda yã takada kũ Bisã yão Esekiɛli 18

Gusunɔ u rɑ bɑɑwure siriwɑ

nge mɛ win dɑɑ yɑ nɛ

1 Yinni Gusunɔ u geruɑ u nɛɛ, 2 Esekiɛli, mbɑn sɔ̃nɑ Isirelibɑ bɑ rɑ mɔn teni ko bu nɛɛ,

bɑɑbɑbɑ bɑ resɛm birenu di,

mɑ ben bibun nɔsu yɑɑyɑ.

3 Adɑmɑ nɛ, Yinni Gusunɔ, nɑ bɛɛ sɔ̃ɔmɔ mɑ sere kɑ nɛn wɑ̃ɑru, i ǹ mɑɑ mɔn teni gerumɔ Isireliɔ. 4 Geemɑ, nɛnɑ nɑ bɑɑwuren wɑ̃ɑru nɛni, bɑɑbɑ kɑ bii. Yen sɔ̃, wi u torɑ wiyɑ u koo gbi.

5 Su tɛ̃ nɛɛ, goo u wɑ̃ɑ u geɑ mɔ̀, win dɑɑ yɑ wɑ̃. 6 U ku rɑ de gungunɔ u bũu sɑ̃. U ku rɑ mɑɑ bũu yɑ̃kunu di. U ku rɑ kɑ goon kurɔ mɛnnɛ. Mɛyɑ u ku rɑ mɑɑ kɑ tɔn kurɔ mɛnnɛ sɑnɑm mɛ u yɑsɑ mɔ̀. 7 U ku rɑ goo gbɛni. U ku rɑ mɑɑ goo sɔmburu koosie kɑm. U rɑ wi u win dibu nɛni win tɔrubɑ wesie. U rɑ wi gɔ̃ɔrɑ mɔ̀ dĩɑnu wɛ̃. Kpɑ u wi u tereru sĩimɔ yɑ̃nu wɛ̃. 8 U ku rɑ tɔnu gobi bɔkure u nim doke. U ku rɑ n mɑɑ wɑ̃ɑ weesun swɑɑ sɔɔ. U rɑ siriwɑ dee dee, u bɑɑwure nùn win gem wɛ̃. 9 U rɑ nɛn woodɑbɑ mɛm nɔɔwɛ mɑm mɑm. Tɔnu win bweserɑ nɛ, Yinni Gusunɔ nɑ rɑ soku gemgii. Win wɑ̃ɑrɑ tɑ koo dɑkɑɑ dɑ.

10 Su mɑɑ tɛ̃ nɛɛ, durɔ wi, u bii mɔ wi u rɑ tɔmbu wɔri u go, u ben yɑ̃nu gurɑ, ǹ kun mɛ u rɑ dɑɑ kɔ̃sɑ gɑɑ ko. 11 N deemɑ win bɑɑbɑ ku rɑ yen bweseru ko. Bii wi, u rɑ bũu yɑ̃kuru de gungunɔ. U rɑ kɑ gɑbun kurɔbu mɛnnɛ. 12 U rɑ bwɛ̃ɛbwɛ̃ɛ sɔmburu koosie kɑm. U rɑ tɔmbu gbɛni. U ku rɑ be u tɔrubɑ mwɑɑri ye wesie. U rɑ bũnu sɑ̃, kpɑ u n kom bɛrɛtɛkɛ mɔ̀. 13 U rɑ tɔmbu gobi bɔkure u nim doke. N weenɛ tɔnu win bweseru u n wɑ̃ɑ? Aɑwo, u koo gbiwɑ. Domi u dɑɑ kɔ̃sɑ kuɑ. Win yɛm mu koo wɔriwɑ win tii sɔɔ.

14 Su tɛ̃ nɛɛ, bii wi, u seewɑ u mɑrɑ. Mɑ win bii u seewɑ u win tundon torɑnu kpuro wɑ. Adɑmɑ u ǹ win tundon yirɑ ye swĩi. 15 U ku rɑ bũu yɑ̃kunu de gungunɔ. U ku rɑ bũnu sɑ̃ ni Isirelibɑ bɑ sɑ̃ɑmɔ. U ku rɑ kɑ goon kurɔ mɛnnɛ. 16 U ku rɑ goo sɔmburu koosie kɑm. U ku rɑ be bɑ win dibu nɛni tɔrubɑ mwɑɑri. U ku rɑ gbɛni. U rɑ wi gɔ̃ɔrɑ mɔ̀ dĩɑnu wɛ̃. Kpɑ u wi u tereru sĩimɔ yɑ̃nu wɛ̃. 17 U ku rɑ n wɑ̃ɑ weesun swɑɑ sɔɔ. U ku rɑ tɔnu gobi bɔkure u nim doke. U rɑ nɛn woodɑbɑ mɛm nɔɔwɛ. Bii wi, u ǹ gbimɔ win tundon torɑnun sɔ̃. U ko n wɑ̃ɑwɑ kɑ gem. 18 Adɑmɑ tundo wiyɑ u koo gbi win torɑnun sɔ̃ domi u tɔmbu tɔ̃yɑ kuɑ u gbɛnɑ.

19 I bikiɑmɔ i mɔ̀, mbɑn sɔ̃nɑ bii kun win tundon durum ɑre sɔɔmɔ. Geemɑ, bii kun ye sɔɔmɔ yèn sɔ̃ u geɑ kuɑ. Mɑ u sĩɑ dee dee nɛn yirɑ sɔɔ, u nɛn woodɑbɑ mɛm nɔɔwɑ mɑm mɑm. Yen sɔ̃nɑ u ko n wɑ̃ɑ. 20 Wi u torɑ, wiyɑ u koo gbi. Bibu bɑ ǹ ben bɑɑbɑbɑn torɑnun ɑre sɔɔmɔ. Mɛyɑ bɑɑbɑbɑ bɑ ǹ mɑɑ ben bibun torɑnun ɑre sɔɔmɔ. Kon gemgii nùn win ɑre wɛ̃ yèn sɔ̃ u kom gem kuɑ. Kpɑ n mɑɑ tɔn kɔ̃so sɛɛyɑsiɑ yèn sɔ̃ u kɔ̃sɑ kuɑ.

Kɔ̃sɑn kirɔ

21 Tɔn kɔ̃so ù n win dɑɑ kɔ̃sɑ deri, mɑ u gem swĩi nge mɛ nɛn woodɑ yɑ geruɑ kpuro, u ǹ mɑɑ gbimɔ. 22 Kon win torɑnu kpuro duɑri, kpɑ n de u n wɑ̃ɑ geɑ ye u mɔ̀n sɔ̃. 23 I tɑmɑɑ nɛ, Yinni Gusunɔ nɑ kĩ tɔn kɔ̃so u gbi? Aɑwo. Ye nɑ kĩ, yerɑ u gɔ̃ru gɔsiɑ kpɑ u n wɑ̃ɑ. 24 Adɑmɑ wi u gem deri, mɑ u dɑɑ kɔ̃sɑ mɔ̀ nge tɔn kɔ̃so, i tɑmɑɑ u ko n wɑ̃ɑ? Aɑwo. Kon win yellun dɑɑ geɑ ye duɑriwɑ kpɑ n de u gbi win dɑɑ kɔ̃sɑ kɑ win mɛm nɔɔ sɑrirun sɔ̃. 25 Bɛɛ Isirelibɑ, i mɔ̀, nɛn gere ye, yɑ ǹ sɑ̃ɑ dee dee. I swɑɑ dɑkio i nɔ. Nɛn gerewɑ yɑ ǹ sɑ̃ɑ dee dee? Nge bɛɛyɑ i sɑkɑ sɑrɑmɔ. 26 Gemgii ù n geɑ deri, mɑ u kɔ̃sɑ mɔ̀, u koo gbiwɑ kɔ̃sɑ yen sɔ̃. 27 Tɔn kɔ̃so ù n mɑɑ win dɑɑ kɔ̃sɑ deri, mɑ u dɑɑ geɑ mɔ̀, u win wɑ̃ɑru wɔrɑmɔwɑ. 28 U ko n wɑ̃ɑ, domi u giɑ mɑ kɔ̃sɑ u rɑɑ mɔ̀, mɑ u ye deri. Ǹ n mɛn nɑ, u ǹ mɑɑ gbimɔ. 29 Bɛɛ Isirelibɑ i mɔ̀, nɛn gere yɑ ǹ sɑ̃ɑ dee dee. Adɑmɑ n ǹ mɛ, bɛɛyɑ i sɑkɑ sɑrɑmɔ. 30 Yen sɔ̃, kon bɑɑwure siriwɑ nge mɛ win dɑɑ yɑ sɑ̃ɑ. Ǹ n mɛn nɑ, i bɛɛn dɑɑ kɔsio i kɔ̃sɑ deri. I ku de bɛɛn dɑɑ kɔ̃sɑ yu bɛɛ kɑm koosiɑ. 31 I bɛɛn dɑɑ kɔ̃sɑ derio kpɑ i bɛɛn gɔ̃run bwisikunu gɔsiɑ. Mbɑn sɔ̃nɑ i ko i tii go. 32 I yɛ̃ mɑ nɛ, Yinni Gusunɔ, nɑ ǹ goon gɔɔ kĩ. Ǹ n mɛn nɑ, i gɔ̃ru gɔsio kpɑ i wɑ i n wɑ̃ɑ.