3
Ufan waw bugaa jangu yay
1 Firim faufe mifiumay faah me : An ni buru amaŋ me áni ni fuhow jangu yay, an ahumu namaŋe ekan burok babaje hámma.
2 An aam ni fuhow jangu naate áni an o mati bugan bugagu gubaj waf wáhojie gulob guya ni o ; naate ayab anaare anur, naate áni an ájue ejogoro, an o nd’akan gáaĉ, an ájebie, an ájue ealen bugan yaŋol wári, an ájue eligen bugan bugagu.
3 Aatut áni áhalla, aatut ᵽoᵽ áni an ala fiiñ, bare til naate áni an abubie, an ala gásumay ; jambi ní an amaŋe síralam nár.
4 Naate may áni an ájue ejoh yaŋol wári, an o guñolol gúttune firimol ni gákanum dó.
5 Maagen mamu, an ájuut me aogen yaŋol faŋaol, bu ñer ᵽan áju me acokor Jangu yay yal Aláemit ?
6 Jambi ᵽoᵽ áni an ajue éinen ni Yésu Kirista ; let mo, ᵽan ateben ubandol nár ban may Aláemit ᵽan ategol ti nateh me Seytane.
7 An aam ni fuhow jangu naate ᵽoᵽ áni an o bugan bugagu galet me ejangara may gúkanume, mamu jambi bugan bugagu gulalol ban nalo ni fumbal fafu faa Seytane.
Urambenaaw bugaa jangu yay
8 Urambenaaw ni burok babu baa jangu yay guote may gúni bugan bugo gufiume, guotut gubaj gurim gúuba ; guotut nihi gurem bunuh iki gúgatten, hani may eliᵽ ebut bugan min gubaj síralam.
9 Guote nánonan gujoh liŋ m’biinum bakure maagen mamu mo Aláemit agitenolal me min úinenal.
10 Ᵽan gáinenil gumundum gúlingeni ; mbi bajut me maarat majugi ni bugo, no ñer ᵽan gúju me gúni urambena bugaa jangu yay.
11 Waareaw urambenaaw may guote gúni bugan bugo ésuh yay gufiume, ban may guotut nihi gulob n’ujow bugan. Guote gúni bugan gájue ejogoro ban ni gúni bugan gufiumay ni waf waw ᵽe.
12 Arambena ala jangu ánoan naate ayab anaare anur ; naate áju eogen jon yaŋol ᵽooyo bi ni guñolol ró.
13 Arambena ala jangu akan me burokol wári, nah’ababaj gailo gaaro ban náh’ájuju alob ni gakañen dó mala gáinen gagu go nubajal me ni gajogorolal ni Yésu Kirista.
Waf waw waa gáinenolal waffasenuti me
14 Tímonte, ínje umu n’ehiĉuli eletar yauye ni gafium gagu ró gaa búoh mati ᵽio nikeli bujuh.
15 Bare íni me ejoulom ban eᵽio, eletar ye ᵽan egiteni bu nuot me uroŋ nogor ni Jangu yay yal Aláemit, yaamme fiil fafu fal Aláemit ahu aroŋ me. Fiil faufu fo fuomme erujen yay ni fúhag fafu saᵽem me maagen mamu.
16 Ey, an ájuut aceŋ yo, waf waw waa gáinenolal waffasenuti me újalojalo :
Aláemit nagitenoroe ni gáni gal arafuhow,
Biinum Banabe bigitenolal gaĉolol go naĉol me,
ban emalakaay gujugol ;
gajaol guvarei ni súsuh sasu ᵽe,
bugan bugagu bugaa mof gúinene ni o,
ban natebeni bi fatiya n’émit ni gasal ró.