8
Yésu o aamme ávi uteŋena ámah ahu ala maagen
1 Ban firim fafu fafaŋ me gagu ᵽe go julobul me fo fuomme ufe : nubajale ávi uteŋena, aamme ahumu arobo me n’gañen gárib gal efenjeŋ yay yaa Jávi Aláemit dó fatiya n’émit yay.
2 Umu ró n’ekan burokol ni tiñ talu táñai me, taamme Fúggut fafu faa maagen faa gasal fo Aláemit faŋaol ailen me, bare let arafuhow.
3 Afan uteŋena ánoan narobenitoroben bi ekan bulogos ni ᵽoᵽ ekan úsimen ; yo eĉil me ateŋenaolal Yésu babaj may wo nájie.
4 Iníen me babe n’ettam naamene, mát’ánien ateŋena hani, mata baje ban uteŋena gakane me úteŋen ti gúboñ gagu gaa Móis gulob yo me.
5 Burok babu bo uteŋenaaw ubugi gukane me kakan bilihorum baa waf waw waamme n’émit yay. Yo eĉil me may no Móis aamme n’eilen Fúggut fafu ni gafit gagu, Aláemit nátallenol aagol : « Uluj joon min ukan waf waw ᵽe unabor ni wo nigiteni me ni firijaŋ fafu. »
6 Bare maer, burok babu bal ateŋena bo Aláemit asen me Yésu bufafaŋ baa bugagu uteŋena fúf, mata aĉila aamen n’etut babuge babu bafaŋ me m’búarie, báhago me ni waf wo Aláemit alobe esen wafaŋe jáari.
7 Maagen mamu, enoen me babuge babu bítiar babu bubajenut to bítigoe, mati togen bubao min bice búutten bújoul burobo to.
8 Bare til Aláemit nannunur bugal ésugol Israel mala utilil no naagil me :
« Juutten, gunah gagu ugu n’éjoul
no ᵽan ijogor me babuge buvugul ni bugal Israel ni bugaa Yúde.
Injé Atúla mamu nilobe.
9 Niegil may : Babuge baubu mati bunogor ni bo nijogoren me ni sipail gufan,
no nítugulil me ni guñen íᵽunnul ni mof mamu mal Esíp.
Gujogut babuge baubu jon, yaĉil me min ínje ívuil búsol.
10 Nitajen iegil : Babuge babu bo ínje ijae me ejogor ni bugal Israel,
gunah gaugu bágaler, bo buomme ube :
Ᵽan iŋar gúboñ gagu gúmbam ikan n’uinumil,
ᵽan íbilen go ni síĉigiril.
Ñer ᵽan íni Aláemilil,
ban bugo ᵽan gúni ésugom.
11 An mat’abbander asohola eoh aĉindorol ter atiol :
“Uliᵽ effas Ataw !”
Maagen bugo ᵽooil ᵽan guffasom,
újogum ni afaŋ me ekan añil, bi ni afaŋ me ekan anafan.
12 Ᵽan iboketil gagalen gagu golil,
ban util waw wolil, wo, mat’ibbander ikan wo n’gaᵽinv. »
13 Min Aláemit alob me mala babuge buvugul, no ñer nábahen me babuge babu bítiar babu bíni bufan ; ban waf wafanete, wo mati ᵽio n’unemo.