13
Batar ni basaf súsola saa Pool
1 Maer ban íjoul bi ni buru ejoulom éfatten. Ti Firim fafu fal Aláemit fulob me fuoh : « Baj me waf waate utaliŋi, ᵽan umundumal uuttenal bugan gúuba ter gúfaji gajuge no waf wauwu ubaj me. »
2 Ban ñer ilob ni bugan bugagu gaamen me no ni gatil ni ᵽoᵽ ni buru ᵽe ihato. Niĉafenul yo iban n’ejoulom ésugul éutten, bare ban ibbañ mul iĉaful maer no nilet to maa ni buru iegul : no nijae me ébbañul ñañe ésugul, mat’irum enil an ni buru.
3 Buru filiᵽ juom ni fo waf waw wajae me egitenul búoh Kirista n’ínje nálobume ? Ᵽan ñer jibaj wo. Jiffase búoh Kirista ágotout ni buru, bare til nagitenulgiten sembeol.
4 Maagen, no naĉet me n’ekuruaay, nánini ti an ágotoe, bare maer, ni búkanum baa sembe sasu sal Aláemit, umu m’buroŋ. Wóli ᵽoᵽ júgotogoto ti aĉila, bare no jijae me eilo bújoŋorul, ᵽan jigitenul búoh jurondoŋ n’aĉila ni búkanum baa sembe sasu sal Aláemit.
5 Buru fumumul juote jílingenoro min jujuh ter buru ubugu m’buroŋ ni gáinen gagu. Ter babaj to waf wagitene búoh Yésu Kirista umu ni buru ti maagen, ter bajut ?
6 Bare nifiume búoh buru jujuge ŋanno ca búoh burokóli bilet burok baa bamotoŋ.
7 Wóli ubugu n’elaw Aláemit jambi buru jikan maarat. Let ter jimamaŋ egiten búoh wóli jibabaj bakoŋ, bare wo wóli jimaŋ me wo uomme min buru jikan maaro, hani min níme nan burokóli burok bom baa bamotoŋ.
8 Wóli jújuut jikan waf wannamut ni maagen mamu ; miĉila bare jújue jilagen.
9 Júsumaetesumaet nánonan no wóli júgotoe min buru jibaj sembe. Waf waw wo wóli jilae me Aláemit, wo uomme min gáinenul guliŋ tir.
10 Nihiĉululhiĉ gurim gaugu no ᵽan níraliul maa, jambi bil, no nijae me éni ni buru, níjoum ni fufane fafu fo Ataw asenom me min ilobul gurim gátañie. Fufane faufu nasenomfosen, let bi ehajenul, bare bi eliŋen gáinen gagu golul.
11 Ñer maemma, gutiom, niegul júsumaet ! Nánonan jiŋes min jútuh liŋ ni gáinenul bi no jae me ebao, jujonenor, jikan firim fanur min juroŋ n’gásumay. Jikan mo me, Aláemit, aamme ala gábboli ni gásumay, ᵽan áni ni buru.
12 Jisafor búsafor baa batiay. Gutiolal ejangara ᵽe gusafulul.
13 Mbi Ataw Yésu Kirista ásonienul, mbi Aláemit ammeŋenul gábboliol, mbi Biinum Banabe bukanul n’jibaj gajamor buru ᵽooul !