Bibeli Luayãtaalá Soũↄ 48

48

Siↄnaá Lua wɛ̃́lɛɛ

1 Kole buiↄ lɛ.

2 Dii zↄ̃ↄ,

à kà wà aà táasilɛ maamaa

wá Lua wɛ̃́lɛ guu,

aà gbɛ̀sĩsĩ pↄ́ a kua adoa musu.

3 Siↄna gbɛ kálɛa maa,

a dɛ dṹnia gbɛ̃́piiɛ pↄna ũ.

Kía zↄ̃ↄ wɛ̃́lɛpi* ku Siↄna gugbãntoo oi.

4 Lua ku a gudↄ̃akĩiↄ guu,

a tò wa a dↄ̃ aafia'ekĩi ũ.

5 Kɛ́ kíaↄ lɛdoũkɛ̀,

kɛ́ aa mↄ̀ lɛ́lɛiwà sãnu,

6 kɛ́ aa è màa, ↄ̃ à dìmá,

iwãa kà ń pↄa ↄ̃ aa tilɛ̀.

7 Aa gↄ̃̀ ń lualuao

lán nↄɛ nↄwãwãkɛnawa.

8 N ń wiwi

lá gukpɛ ĩ́ana ì laatanaↄ gó'ilɛnaↄ wíwiwa.

9 Yã́ pↄ́ wá mà ↄ̃ wa wɛsìɛ

Dii Zĩgↄ̃de wá Lua wɛ̃́lɛ guu.

Lua wɛ̃́lɛpi kàlɛ àↄ ku gↄↄpiiɛ.

10 Lua, wá kú n kpɛ́u,

wálɛ làasookɛ n gbɛ̃kɛwa.

11 Lua, lá n tↄ́ fã̀aa e dṹnia lɛ́u,

màa n táasilɛa fã̀aa lↄ.

Ni yã́gↄ̃gↄ̃ n gbɛ̃́ↄnɛ a zɛ́wa.

12 Siↄna gbɛ̀sĩsĩdeↄ lɛ́ pↄnakɛ,

Yuda bùsu wɛ̃́lɛdeↄ pↄ kɛ̀na

yã́kpalɛ pↄ́ ń kɛ̀ↄ yã́i.

13 À dↄdↄkↄ̃wa à lia Siↄnai,

í a bĩ́i musu gudↄ̃akĩi dasiↄ nao.

14 À a bĩ́iↄ tàasika ń a zɛgikĩiↄ,

kɛ́ à e dau à siu ziadeↄnɛ.

15 Asa Lua dee dɛ wá Lua ũ gↄↄpii,

ì dↄaawɛ̃ɛ e wà gɛ gɛò gɛ́kĩiɛ.

* 48:3 Mat 5.35