Bibeli Luayãtaalá Soũↄ 28

Wabikɛa ń sáaukpaao

Davidi lɛ.

1 Dii ma gbɛsi, málɛ lɛzunzi,

ńsu ǹ n swã́ kákamɛɛo.

Tó ń nílɛ,

má gↄ̃ lán gbɛ̃́ pↄ́ aa sì bɛdauↄwaɛ.

2 Málɛ wɛ̃na wii lɛma, swã́sɛmazi,

málɛ ma ↄ sɛ n kúkĩi oi.

3 Ńsu ma gálɛ ń gbɛ̃́ bɛ̃̀ɛↄ ge vãikɛnaↄ sãnuo.

Aaì yãna o ń gbɛ̃́deeɛ,

ãma an zaa gbɛ̃́ↄu kɛ̀ zài.

4 Kɛnɛ́ ń yãkɛa ń ń vãikɛaowa,

fĩabonɛ́ ń dàawa,

a gbɛ i wí ń musu.*

5 Aali Dii yãkɛa ń aà zĩkɛao yãdao,

a ń fuangba, a ń zɛdↄo.

6 Ma Dii sáaukpà,

asa à swãsɛ̀ ma wɛ̃na wiilɛai.

7 Dii mɛ́ ma gbãa ń ma sɛ̀ngbaoo ũ,

má aà náai vĩ ma sↄ̃u.

Ì dↄmalɛ, ma nↄ̀sɛ ì yáalↄ,

mi aà sáaukpa ń lɛsiao.

8 Dii mɛ́ a gbɛ̃́ↄ gbãa ũ,

a dɛ ulɛkĩi ũ kía pↄ́ a kpàɛ,

ì aà suaba.

9 Ǹ n gbɛ̃́ↄ suaba, ní báaadańgu.

Ǹ ń dã́dã, níↄ ń kũa gↄↄpii.