Bibeli Luayãtaalá Zelemii 47

Yã́ pↄ́ a Filitɛ̃ↄ le

(Isa 14.29-32, Eze 25.15-17, Yoɛ 3.4-5, Amↄ 1.6-8, Sof 2.4-7, Zkl 9.5-7)

1 Dii yã'ò ãnabi Zelemiiɛ Filitɛ̃ↄ musu e Falaↄ̃ↄ àↄ gɛ́ lɛ́lɛi Gazawa à mɛ̀: 2 Dii mɛ̀:

Í bↄ̀ gugbãntoo oi,

àlɛ su lán swa paawa.

Ípi dà bùsua ń pↄ́ pↄ́ kú a guuↄ,

à dà wɛ̃́lɛↄla ń gbɛ̃́ pↄ́ kúuↄ píi.

Wàlɛ wiilɛ,

bùsudeↄ lɛ́ búbuapɛ ḿpii,

3 ibɛɛↄ sↄ̃́ gbãa bàalɛkↄ̃fĩ yã́i

ń sↄ̃́goↄ wuluu tↄↄlɛlualuaa yã́io.

Maeↄ ɛa su ń nɛ́ↄ sɛ́lɛio,

kɛ́ an gã̀sĩ gↄ̃̀ dↄ̀lↄlↄ yã́i.

4 Filitɛ̃ↄ kɛa kɛ́lɛkɛlɛ gↄↄ mɛ́ kà,

wa gbɛ̃́ pↄ́ aaì dↄ Tiideↄ ń Sidↄ̃deↄlɛ kↄ̃napiↄ míↄnzↄ̃ɛ.

Dii mɛ́ a Filitɛ̃ↄ ásookɛ,

i Kɛlɛti bùsude pↄ́ gↄ̃̀piↄ dɛ̃ↄnzↄ̃.

5 Gazadeↄ ń mi bò,

Asekelonideↄ lɛ́ gↄ̃̀ kpaaũa.

Gusalala gbɛ̃́ kↄ̃naↄ,

áↄ ázĩa lili e bↄɛ ni?

6 Á'a Dii fɛ̃nda, ńyↄ̃ zɛwɛ̃ɛ bↄɛ ni?

Sↄlↄ n kpɛ́u! Kã́ma bo! Zɛ màa lɛ!

7 Dii mɛ́ fɛ̃ndapi dàu, kpelewa a kɛ à zɛi?

A dìlɛ fɛ̃ndapiɛ aà yɛ̃́mɛmi Asekelonideↄ ń ísialɛdeↄguɛ.