Bibeli Luayãtaalá Isaia 65

Yã́kpalɛkɛa ń Isailiↄ

1 Ma sↄu mà mà wemá,

ↄ̃ gbɛ̃e i ma gbɛao,

má kɛ̀ wà ma e,

ↄ̃ gbɛ̃e i ma kĩ́i wɛɛlɛo.

Má ò bui pↄ́ lɛ́ ma sisioↄnɛ:

Má kɛ́! Má kɛ́!

2 Ma ↄ ìↄ dↄa bui swã́gbãadeↄzi,

kási aa bɛ zɛ́ vãi guu tɛa ńzĩa pↄeãi.*

3 Bui pↄ́ ìↄ ma lɛ́wɛ gↄↄpiin ń ũ,

aaìↄ sa'o swaluu,

aaì tulaletikatɛa tàasoↄu.

4 Aaì zↄ̃lɛ miai, aaì i bàalikpɛu,

aaì sa'osawa nↄ̀ↄ só,

aaì pↄ́ bɛ̃̀ɛↄ yãma dɛ ń dou.

5 Aaì mɛ: Ɛa, ńsu sↄ̃mazio,

asa má ye mà gↄ̃ gbãlɛao!

Gbɛ̃́ beeↄ dɛ tɛ́ pↄ́ ìↄ kũ gↄↄpii súɛlɛ ũ ma nízĩɛ.

6 Dii mɛ̀: Gwa!

A kɛ̃a láu ma aɛ, máↄ nílɛo,

má fĩabonɛ́ à gɛ̃ ń kṹ,

7 má fĩabonɛ́ ń duuna

ń ń deziↄ duunao yã́ musu píi,

asa aa tulaletikàtɛa gbɛ̀sĩsĩↄwa,

aa lɛ'ɛ̀a sĩ̀sĩↄ musu.

Má yã́ pↄ́ aa kɛ̀ yãaↄ fĩabonɛ́ a lɛ́u à gɛ̃ ń kṹ.

8 Ma Dii ma mɛ̀:

Baa tó vɛ̃ɛbɛↄ í vĩ yↄↄnnↄ,

wì mɛ wasu a ↄ̃̀ↄkpao,

asa a kã́fĩa vĩɛ.

Màa má kɛ ma zↄ̀blenaↄ yã́i,

má gbɛ̃́ↄ midɛ píio.

9 Má bui sɛ Yakↄbu buiↄ guu,

Yudaeↄ gↄ̃ ma gbɛ̀sĩsĩↄ vĩ.

Gbɛ̃́ pↄ́ má sɛ̀ↄ mɛ́ aa gↄ̃ vĩ,

wekĩi ma zↄ̀blenaↄ aaↄ kuu.

10 Salↄna a gↄ̃ dã́dãkɛkĩi ũ,

Akoo guzulɛ† a gↄ̃ zuↄ kálɛkĩi ũ

ma gbɛ̃́ pↄ́ aaì ma kĩ́i wɛɛlɛↄnɛ.

11 Á gbɛ̃́ pↄ́ a pãkpàmaziↄ sↄ̃,

ma gbɛ̀sĩsĩ pↄ́ a kua adoa yã́ sã̀águ,

i blɛkalɛ tã́a pↄ́ ì mↄ́ ń minaoɛ,

i í gbãa yãalɛ tↄ̃́lɛ tã́a pↄ́ ì ń baa kpámáwa.

12 Má á baa kpáwá fɛ̃nda ũ,

í kúlɛ wà á dɛdɛ,

asa ma lɛzù, i weao,

ma yã'ò, i swã́sɛio,

a yã́ pↄ́ má yeio kɛ̀,

a zɛ ń yã́ pↄ́ i kamaguoo.

13 A yã́i tò ma Dii Zĩgↄ̃de ma mɛ̀

ma zↄ̀blenaↄ pↄble, nↄana i á dɛ.

Ma zↄ̀blenaↄ imi, imi i á dɛ.

Ma zↄ̀blenaↄ pↄnakɛ, wí i á kṹ.

14 Ma zↄ̀blenaↄ gulakɛ ń nↄ̀sɛnao,

ápiↄ sↄ̃ á wiilɛ ń yã'ↄ̃mao,

í búbuapɛ ń pↄsiao.

15 Á tↄ́ a gↄ̃ gbɛ̃́ pↄ́ má sɛ̀ↄnɛ gbɛ̃́kabↄ ũ.

Ma Dii Lua má á dɛdɛ,

ãma má tↄ́ dafu kpá ma zↄ̀blenaↄnɛ.

16 Gbɛ̃́ pↄ́ lɛ́ sa'olɛkɛnɛ́ bùsupiu

a kɛ ń Lua sĩande tↄ́o.

Gbɛ̃́ pↄ́ lɛ́ lada bùsupiu,

a da ń Lua sĩande tↄ́o.

Asa taasi pↄ́ aa kɛ̀ yãa a sã́ńgu,

i sãalɛ ma wɛ́u.

Musu dafu ń zĩ́lɛ dafuo

17 Málɛ musu dafu ń zĩ́lɛ dafuo kɛ.‡

Yãziↄ dↄ gbɛ̃́ↄgu lↄo,

a gɛ̃ ń làasoo guuo.

18 À pↄnakɛ,

àↄ yáalↄ pↄ́ pↄ́ málɛ kɛwa gↄↄpii,

asa málɛ Yelusalɛũ kɛ wà yáalↄu,

aà gbɛ̃́ↄ i pↄnakɛu.

19 Má yáalↄ Yelusalɛũwa,

ma pↄ a kɛ ma gbɛ̃́ↄwa na.

Wa ↄↄlↄ ń búbuapɛao súu ma a guu bau lↄo.§

20 Wa nɛ'iulitɛ̃n kpɛ́ɛ bau lↄo.

Mae zↄ̃ↄe a ga we a gↄↄ lesaio.

Tó gbɛ̃́ kà wɛ̃̀ basↄo mɛ́ à gà,

wa mɛ ɛ̀waasoɛ.

Tó gbɛ̃́ i ka wɛ̃̀ basↄoo, mɛ́ à gà,

wa mɛ Lua lɛkɛ̀ɛ̀ɛ.

21 Aa kpɛdↄdↄ, aaiↄ kuu,

aa vɛ̃ɛliↄ pɛ́pɛ, aaiↄ a bɛ ble.

22 Aa kpɛdↄdↄ buipãleↄnɛo,

aali pɛ́pɛ, dãↄ a bɛ bleo,

asa ma gbɛ̃́ↄ wɛ̃ni kɛ lán líwa,

gbɛ̃́ pↄ́ ma ń sɛ́piↄ ń zĩ ài ble.

23 Aa isima ga kpa pão,

aa nɛ'i à ɛɛ ń tó weo,

asa aaↄ dɛ gbɛ̃́ pↄ́ ma báaadàńguↄ ũ,

ampiↄ ń ń nɛ́ↄ sãnu.

24 E aaↄ gɛ́ lɛzui, má wemá,

e aaↄ yã'o aaↄ gɛ́ láai, má swã́sɛi.

25 Àwalɛwana ń são a sɛ̃ ble sãnu,

nↄ̀ↄmusu a tàaable lán zuwa,

mlɛ̃ↄ pↄblea aↄ dɛ bùsu ũ.

Aa pↄe kɛ'ĩa ge aa pↄe ↄ̃̀ↄkpa ma gbɛ̀sĩsĩ pↄ́ a kua adoa musuo.*

Ma Dii mámɛ má ò.

* 65:2 Lom 10.20-21 † 65:10 Yoz 7.26 ‡ 65:17 Isa 66.22, 2Piɛ 3.13, Zia 21.1 § 65:19 Zia 21.4 * 65:25 Isa 11.6-9