Bibeli Luayãtaalá Isaia 63

63

Dii tↄsimagↄↄ

1 Démɛ bↄ̀ Ɛdↄũ bùsuu, àlɛ mↄ́,

à bↄ̀ Bↄzɛla, aà pↄkasaↄ tã̀ keei?*

Démɛ lɛ́ gↄ̃sagↄ̃sa táa'o ń gbãa zↄ̃ↄo,

a ula gawide daa keei?

Mámɛ, málɛ zĩblea kpàwakɛ,

má gbɛ̃́ↄ suabaa gbãa vĩ.

2 Bↄ́yãi n ula ń n pↄkasaↄ tã̀

lán gbɛ̃́ pↄ́ ↄ̃zↄ̃̀ vɛ̃ɛfɛ̃kĩiu pↄ́wai?

3 Ma ↄ̃zↄ̃̀ vɛ̃ɛfɛ̃kĩiu mado,

gbɛ̃e kumanↄo, baa do.

Ma ↄ̃zↄ̃̀ buiↄwa ń pↄkũmao,

ma kɛ̀sɛ tↄ̃̀má ma pↄfɛ̃ yã́i.

An au fã̀fã ma pↄkasaↄwa,†

ma ula gbãsĩkpà píi.

4 Asa má tↄsimagↄↄ kũa ma sↄ̃u,

ma gbɛ̃́ↄ bogↄↄ kà.

5 Ma gugwàgwa, gbɛ̃e ku à dↄmalɛo,

yã́ dìa kɛ́ gbɛ̃e ku à ma gba gbãao.

Ɔ̃ ma zĩblè ń mazĩa gã̀sa gbãao,

ma pↄkũma mɛ́ ma gba gbãa.

6 Ma ↄ̃zↄ̃̀ buiↄwa ń pↄfɛ̃o,

má tò ma pↄkũma í zↄ̃̀lɛmá,

ma ń au kↄ̀lɛ zĩ́lɛ.

Dii gbɛ̃kɛ galikɛa

7 Má Dii gbɛ̃kɛ galikɛ ń aà táasilɛao,

asa à yã́pii kɛ̀wɛ̃ɛ wá gwaa guu,

à yãmaa dasi kɛ̀ wá Isailiↄnɛ gbɛ̃kɛ guu.

8 À mɛ̀: Aa dɛ ma gbɛ̃́ↄ ũ,

aa mↄafiliyã kɛmɛɛo,

ↄ̃ à gↄ̃̀ ń Suabana ũ.

9 A dↄ̃ńnↄ ń taasikɛa guu píi,

aà aɛ malaika ń suabà,

à ń bó kɛ́ a yeńzi à ń wɛ̃nagwà yã́i.

A ń sɛa za yãayãa a ń kũa.

10 Kási aa bↄ̀ aà kpɛ,

aa aà Nisĩna pↄ yàɛ̀.

Ɔ̃ à mikpɛdↄ̀nɛ́ à gↄ̃̀ ń ibɛɛ ũ,

à zĩkàńnↄ.

11 Ɔ̃ Mↄizi gↄↄ yã́ dↄ̀ aà gbɛ̃́ↄgu aa mɛ̀:

Lua pↄ́ bùa ń a kpàsa dã̀dãnao ísiawa,

à a Nisĩna dàńgu ku má ni?

12 À a gã̀sa gawide pòo Mↄizi ↄplaai,

ↄ̃ à í zↄ̃̀ɛ ń aɛ,

kɛ́ à tↄbↄ e gↄↄpii yã́i.‡

13 À gɛ̃̀ńnↄ í títiu, aai gɛ̃mbↄlɛo

lán sↄ̃́ pↄ́ lɛ́ bàalɛ guwaiwaiuwa.

14 Ɔ̃ Dii Nisĩna ń gbá ĩ́ampakĩi,

lán zu pↄ́ wà gɛ̀ńnↄ swadↄↄiↄwa.

Màa n dↄaanɛ́,

kɛ́ n e tↄbↄ yã́i.

Suabaa wii

15 Kua za musu wɛ́kpalɛ ǹ gwa,

kua za n gulɛsĩ gawide pↄ́ a kua adoau.

N pãsĩ ń n nɛgↄ̃nkɛo tↄ́n lá?

N gi wɛ̃na ń sósobio kɛiwɛ̃ɛ.

16 Baa tó Ablahaũ wá dↄ̃o,

ḿmɛ ń wá Mae ũ.

Baa kɛ́ wá yã́ i dↄ Isailiguo,

Dii, ḿmɛ ń wá Mae ũ,

n tↄ́n wá Bona za zi.

17 Dii, bↄ́yãi ń tò wa zã n zɛ́wai?

Àkɛa n wá swã́ gbãakũ̀,

ↄ̃ wá n vĩa vĩo ni?

Ɛa su wápi n zↄ̀blenaↄwa,

gbɛ̃́ pↄ́ ń sɛ̀ buiↄn wá ũ.

18 Wa gↄ̃ bùsu pↄ́ ń kpàwá vĩ gↄↄpla,

ↄ̃ wá ibɛɛↄ mↄ̀ ↄ̃zↄ̃̀ n kpɛ́wa.

19 Wá dɛ lán gbɛ̃́ pↄ́ ń iko vĩmáoↄwa à gɛ̃̀gɛ̃,

lán gbɛ̃́ pↄ́ n tↄ́ kúmáoↄwa.

Kai! Tó n musu wɛ̃̀ n pila,

gbɛ̀sĩsĩↄ lualua n aɛ.

* 63:1 Isa 34.5-8 † 63:3 Zia 14.19, 19.13, 15 ‡ 63:12 Bↄa 14.21