Bibeli Luayãtaalá Ezekiɛli 31

Egipi lɛɛũa ń sɛdɛ lío

1 Wá kua zĩ̀zↄↄ ũ wɛ̃̀ kuɛdode, a mↄ àaↄ̃de gↄↄ sɛ̃́ia zĩ́ Dii yã'òmɛɛ à mɛ̀: 2 Gbɛ̃nazĩn nɛ́, o Egipiↄ kí Falaↄ̃ↄɛ ń a zĩgↄ̃ dasiↄ ǹ mɛ:

Démɛ muaannↄ zↄ̃ↄkɛ yã́ musui?

3 Wà n lɛɛũ ń Libã bùsu sɛdɛ lío.

A gↄ̃na kɛfɛũ, ì ue kɛ líkpɛu.

À gbã̀ lɛsĩlɛsĩ,

a misona zↄ̃̀ luawa.

4 Mↄ̀sɛ mɛ́ tò à gbã̀akũ̀,

í pↄ́ kú tↄↄlɛu mɛ́ tò à gbã̀.

Ípi liaa a zĩ́naↄi,

ípi kĩni iↄ ta sɛ̃̀a lí pãleↄ kĩ́iɛ.

5 A yã́i a gbã̀a dɛi lí kĩniↄla,

a gↄ̃ndaↄ dasikũ̀,

mɛ́ a ↄnɛↄ gbã̀akũ̀,

à kɛ̀ yɛ̀lɛlɛ í zↄ̃ↄpi yã́i.

6 Bã bui píi mↄ̀ sakpɛdà a láu,

sɛ̃̀anↄbↄ bui píi mↄ̀ nɛ́ dà a gbáu,

mɛ́ bui pↄ́ aa dasiↄ ku a uei ḿpii.

7 A zↄ̃ↄkɛ kɛfɛũ a gↄ̃n gbã̀aↄ yã́i,

asa a zĩ́naↄ í zↄ̃ↄ lèɛ.

8 Ma lu Edɛni sɛdɛ líe i kawào,

pɛ̃ligↄ̃nae i ka a gↄ̃nawao,

kpakpaa lí gↄ̃nda gèele sáa no.

Ma lu líe kɛfɛũ laaàwao.

9 Má tò a kɛfɛũ ń gↄ̃na dasiↄ,

ma lu Edɛni lí píi aà gwea nidɛ̀.

10 A yã́i tò ma Dii Lua ma mɛ̀, lá à gbã̀akũ̀ lɛsĩlɛsĩ, mɛ́ a misona zↄ̃̀ luawa, ↄ̃ à azĩa sɛ̀ lɛsĩ a gbã̀a yã́i. 11 Bee yã́i ma aà nà buiↄ swanaɛ a ↄzĩ, ↄ̃ a kɛ̀ɛ̀ aà vãikɛawa. Ma giaàzi, 12 ↄ̃ bui zĩ̀lo pãsĩpiↄ aà zↄ̃̀, aa aà tò gbɛ̀sĩsĩↄ musu we. A gↄ̃naↄ lɛ̀lɛ guzulɛↄu píi, a ↄnɛↄ wìwi bùsu swadↄↄu píi. Ɔ̃ dṹnia bui píi bↄ̀lɛ aà uei, aa aà tò we. 13 Bã bui píi mↄ̀ pɛ̀pɛ a gɛwa, sɛ̃̀anↄbↄ bui píi mↄ̀ kìlimpa a gↄ̃naↄwa. 14 Ayãmɛto lí pↄ́ kú í saɛe a gbã̀akũ lɛsĩlɛsĩ màa lↄo, a misona a zↄ̃ luawa lↄo. Lí i'enae gbã̀a a ka màa lↄo, asa ampii a ga lán gbɛ̃nazĩnawaɛ, aai ta ɛ̀ zòolou tↄↄlɛ nↄnau.

15 Ma Dii Lua ma mɛ̀, gↄↄ pↄ́ à tà bɛdau, má tò í pↄ́ kú tↄↄlɛu wɛ̃nakɛ̀ɛ̀, má tò a íↄ zↄ̃̀ɛ, í zↄ̃ↄpi gↄ̃̀ kálɛa gudoũ. Má tò gusia kùlɛ Libã bùsuwa, ↄ̃ sɛ̃̀a líↄ lá wòlo píi. 16 Kɛ́ ma aà zù bɛdau ń gbɛ̃́ pↄ́ aalɛ tá ɛ̀ zòolou weↄ, aà lɛ́lɛa kↄ̃fĩ buiↄ lùalua, ↄ̃ Edɛni líↄ nↄ̀sɛ nìni tↄↄlɛ nↄnau we, Libã lí maa kɛfɛna í'enapiↄ. 17 Bui pↄ́ lɛdoũkɛ̀aànↄ aa ku aà ueipiↄ sↄ̃, buipiↄ sìaànↄ bɛdau, aa tà gbɛ̃́ pↄ́ gàga zĩ guuↄ kĩ́i.

18 N bɛɛɛ ń n zↄ̃ↄkɛo yã́ musu Edɛni lí kpele mɛ́ kànwai? Ń beeo wa n zu tↄↄlɛ nↄnau Edɛni lípiↄ kĩ́iɛ. Ńyↄ̃ↄ ku we ń gyafↄↄdeↄ ń gbɛ̃́ pↄ́ gàga zĩ guuↄ. Falaↄ̃ↄ ń a gbɛ̃́ↄ yã́n we ḿpii. Ma Dii Lua mámɛ má ò.