Bibeli Luayãtaalá Ezekiɛli 19

19

Wɛ̃nalɛsia Isaili kíaↄnɛ

1 Wɛ̃nalɛ si Isaili kíaↄ yã́ musu 2 ǹ mɛ:

Á daá nↄ̀ↄmusu daɛ fá!

À wùlɛ nↄ̀ↄmusu saↄ zãnguo,

à a nɛ́ↄ gwà nↄ̀ↄmusu ɛ̀waasoↄ guu.

3 À a nɛ́ do gwà,

ↄ̃ à kɛ̀ nↄ̀ↄmusu sà bↄlↄ ũ.

À pↄ́taitaia dàda,

ↄ̃ à gↄ̃̀ gbɛ̃nazĩnsona ũ.

4 Kɛ́ buiↄ aà bao mà,

aa ɛyↄ̃̀ɛ̀, ↄ̃ à zù ɛpiu.

Aa bakàɛ̀ a níu,

aa tàaànↄ Egipi bùsuu.*

5 Kɛ́ nↄ̀ↄmusu dapi è tãmaa a nɛ,

yã́ pↄ́ aà wɛ́ dↄi mɛ́ mìdɛ we,

ↄ̃ à ɛ̀a à a nɛ́ do dìlɛ lↄ,

à kɛ̀ nↄ̀ↄmusu sà bↄlↄ ũ.

6 À bɛ̀bɛ ń nↄ̀ↄmusu saↄ

nↄ̀ↄmusu sà bↄlↄ ũ.

À pↄ́taitaia dàda,

ↄ̃ à gↄ̃̀ gbɛ̃nazĩnsona ũ.

7 À ń kibɛↄ wìwi, à ń wɛ̃́lɛↄ dàaĩ.

Sↄ̃ kɛ̃̀ bùsupideↄgu

nↄ̀ↄmusupi pũnaama yã́i.

8 Ɔ̃ buiↄ bↄ̀ bùsu pↄ́ liaaiↄ guu,

aa mↄ̀ lɛ́lɛiwà.

Aa baikpàɛ̀,

ↄ̃ à zù ɛ pↄ́ aa yↄ̃̀ɛ guu.

9 Wà bakàɛ̀ a níu,

wà wáa tã̀ wà aà dàu,

ↄ̃ wà tàaànↄ Babɛli kíaɛ.†

We wà aà dàu kpɛ́u,

kɛ́ wasu aà pũnaa ma

Isaili bùsu gbɛ̀sĩsĩↄ sↄ̀ↄu lↄo yã́i.

10 Á da dɛ lán vɛ̃ɛliwa á kaau.

Wa aà pɛ̀ swa saɛ,

ↄ̃ à gↄ̃naↄ kɛ̃̀kɛ̃,

ↄ̃ swa saɛpi tò à nɛ'ì.

11 A gↄ̃napiↄ gbãa kà

wà kía gopana kɛò.

Lípi lɛsĩ, à gbã̀ zↄ̃̀ luawa,

a gbã̀a ń a gↄ̃n dasipiↄ tò wìli kuawào.

12 Ɔ̃ wa bìlɛ ń pↄfɛ̃o wa nɛ̀.

Gukpɛ ĩ́ana tò à giigàga,

ↄ̃ a nɛ́ↄ wòlo.

A gↄ̃n gbãapiↄ giigàga,

ↄ̃ tɛ́ kũ̀wà.

13 Tiasa a pɛa gbáauɛ

tↄↄlɛ gii isaideu.

14 A gↄ̃n do tɛsɛ̀ à kũ̀ a nɛ́ↄwa.

A gↄ̃na pↄ́ a gbãa kà wà kí gopana kɛò kuwà lↄo.

Wɛ̃na yã́ɛ, wàli sí lɛ ũ.

* 19:4 2Kia 23.33-34 † 19:9 2Kia 24.15