Bibeli Luayãtaalá Làasoode 2

Pↄnakɛaá pãɛ

1 Má ò mazĩawa mà fɛlɛ mà pↄnakɛa lɛ́ gwa, mí namablea dↄ̃, ↄ̃ má è beeá pãɛ lↄ. 2 Má è yaalↄá sↄũkɛɛ. Pↄnakɛa sↄ̃, bↄ́ ì inɛ́i? 3 Ma pↄna wɛ̀ɛlɛ vɛ̃ɛmia guu, ma ↄlìa mìsaiyãi, ãma ma làasoo lɛ́ tamanↄ ↄ̃nↄwa, kɛ́ mà yã́ pↄ́ maa gbɛ̃nazĩna lí kɛ dṹnia guu a wɛ̃ni kpòona lɛ́u dↄ̃.

4 Ma ↄkpà zĩ zↄ̃ↄↄwa, ma kpɛdↄ̀dↄ mazĩaɛ, ma vɛ̃ɛliↄ pɛ̀pɛ kpɛ́lɛkpɛlɛ. 5 Ma kaaↄ dàda, ma swa saɛↄ kɛ̀kɛ, ma lí pↄ́ wì a bɛ ble bui píi bàbau. 6 Ma íkalɛkĩiↄ kɛ̀kɛ aaↄ mↄ̀sɛpisi líkpɛpiↄwa. 7 Ma zↄↄ lùlu gↄ̃ɛↄ ń nↄɛↄ, mɛ́ wà ń keeↄ ì ma bɛɛ. Má zuↄ ń pↄtuo keleↄ vĩ dasidasi dɛ gbɛ̃́ pↄ́ kú Yelusalɛũ ma ãaↄla píi.* 8 Ma ã́nusu ń vuao kã̀aamazi ń kíaↄ àizɛɛↄ ń ń bùsu pↄ́ↄ.† Ma lɛ̀sinaↄ sɛ̀ gↄ̃ɛↄ ń nↄɛↄ, ma nↄ pↄ́ gↄ̃ɛ ì luaiↄ sɛ̀ dasi. 9 Ma tↄbↄ̀, ma zↄ̃ↄ dɛ gbɛ̃́ pↄ́ kú Yelusalɛũ ma ãaↄla píi, mɛ́ ma gi má ↄ̃nↄ apii guu.

10 Mi gi mazĩaɛ ń pↄ́ pↄ́ ma wɛ́ blèoo.

Mi pↄ́ pↄ́ ma pↄ gbàe to weo.

Ma pↄ kɛ̀na ma zĩkɛa píiwa,

ↄ̃mɛ ma isimagakpaa píi asea ũ.

11 Kɛ́ ma wɛtɛ̀ yã́ pↄ́ má kɛ̀ↄzi píi

ń isima pↄ́ má gà má kpà a musuo,

má è apii pãɛ mɛ́ gugiiyaaɛ,

a ài vĩ dṹniauo.

12 Ɔ̃ ma làasoo tà ↄ̃nↄ ń sↄũkɛo ń mìsaikɛowa.

Yã́ pↄ́ wa kɛ̀ za zi bàasio,

a kpele kí gɛ̃ɛ a kɛ lↄi?

13 Má è ↄ̃nↄ ài vĩ dɛ mìsaikɛa

lá gupua ìↄ ài vĩ dɛ gusiaawa.

14 Ɔ̃nↄna wɛ́ ìↄ ku aà aɛ,

sↄũ ìↄ bɛ gusiau.

Ɔ̃ má è gó doũ mɛ́ a ń bua ḿpii.

15 Ɔ̃ ma làasookɛ̀ ma sↄ̃u ma mɛ̀:

Lá gó doũ mɛ́ a wá bua ń sↄũↄ,

bↄ́ ài má e ma ↄ̃nↄwai?

Ɔ̃ ma mɛ̀: Beeá yãpãɛ lↄ.

16 Ɔ̃nↄna yã́ a dↄ gbɛ̃egu dɛ sↄũao,

ampii an yã́ a sã gbɛ̃́ↄgu zia.

Ɔ̃nↄna ì ga lán sↄũwaɛ.

Isimagakpaaá pãɛ

17 Ɔ̃ ma sakà ma kuau, asa yã́ pↄ́ wàlɛ kɛ dṹniau píi ì kɛmɛɛ yã'ↄ̃ma ũɛ. Apii pãɛ mɛ́ gugiiyaaɛ. 18 Ɔ̃ ma sakà zĩ pↄ́ má kɛ̀ dṹniauↄgu píi, kɛ́ má tó ma gɛ̃ɛɛ yã́i. 19 Démɛ dↄ̃ tó ↄ̃nↄna ge sↄũn aà ũi? Kásile zĩ pↄ́ má kɛ̀ dṹniau ń ↄ̃nↄo a gↄ̃ɛ̀ɛ. Beeá pãɛ lↄ. 20 Ɔ̃ ma pↄ yà isima pↄ́ má gà má kpà dṹniau píi yã́ musu. 21 Asa gbɛ̃́ ì zĩkɛ ń ↄ̃nↄo ń dↄ̃ao ń gↄ̃io, ↄ̃ ì to gbɛ̃́ pↄ́ i a kee kɛoɛ a pↄ́ ũ. Beeá pãɛ lↄ, yãvãiɛ maamaa. 22 Bↄ́ gbɛ̃́ ì e isima pↄ́ a ga kpà dṹniau ń dɛ̃ɛ pↄ́ a kào píi yã́ musui? 23 Aà kua dṹniau gↄↄpii aà zĩ ì mↄɛ̀ ń yã'ↄ̃mao ń pↄyaaoɛ.‡ Baa gwã́ aà nↄ̀sɛ lí dadoũo. Beeá pãɛ lↄ.

24 Yã́ pↄ́ maa ń gbɛ̃nazĩnao mɛ́ dɛ aà pↄble, aà imi, aà a zĩ sáaukpa.§ Má è bee bↄ̀ Lua ↄzĩɛ lↄ. 25 Lua dↄnlɛ sai démɛ a fↄ̃ pↄble à pↄnakɛi? 26 Lua ì gbɛ̃́ pↄ́ kàagu gba ↄ̃nↄ ń dↄ̃ao ń pↄnao,* ãma Lua ì àizɛɛsɛlɛkãaaa zĩda duunkɛnaɛ, kɛ́ à kpa gbɛ̃́ pↄ́ kàaguwa. Beeá pãɛ lↄ mɛ́ gugiiyaaɛ.

* 2:7 1Kia 5.2-3 † 2:8 1Kia 10.14-27 ‡ 2:23 Yob 14.1 § 2:24 Isa 56.12, Luk 12.19, 1Kln 15.32 * 2:26 Yob 32.8, Yaa 2.6