Bibeli Luayãtaalá Amↄsi 7

Kwaↄ

1 Yã́ pↄ́ Dii Lua ↄ̀lↄmɛɛn kɛ: Má è Dii bↄ̀ ń kwaↄ pↄkɛkɛ daalɛgↄↄ, pↄ́ pↄ́ wì kpa kíawa kɛkɛa gbɛa. 2 Kɛ́ kwaↄ tↄↄlɛ pↄ́ↄ sò píi aa làa, ma mɛ̀: Dii Lua, sùuukɛ! Bↄ́ Yakↄbu buiↄ e aaↄ kuòi? Asa aa kɛ̀ fɛ̃́nɛũ. 3 Ɔ̃ Dii yã́pi bↄ̀ a nↄ̀sɛu à mɛ̀, bee a kɛ lↄo.

Tɛ́

4 Yã́ pↄ́ Dii Lua ↄ̀lↄmɛɛn kɛ: Má mà Dii Lua lɛ́ mɛ á yã́kpalɛkɛ ń gbɛ̃́ↄ ń tɛ́o. Tɛ́pi ísia zↄ̃ↄ í bà, ↄ̃ à kũ̀ Isaili bùsuwa. 5 Ɔ̃ ma mɛ̀: Dii Lua, n yã́ na! Tuɛlɛ! Bↄ́ Yakↄbu buiↄ e aaↄ kuòi? Asa aa kɛ̀ fɛ̃́nɛũ. 6 Ɔ̃ Dii Lua yã́pi bↄ̀ a nↄ̀sɛu à mɛ̀, beepi a kɛ lↄo.

Pↄ́susugwabↄ

7 Yã́ pↄ́ a ↄ̀lↄmɛɛn kɛ: Ma Dii è zɛa bĩ́i súsu saɛ, a pↄ́ súsugwabↄ kũa. 8 Ɔ̃ à ma la à mɛ̀: Amↄsi, bↄ́ ń èi? Ɔ̃ má wèwà ma mɛ̀, pↄ́ súsugwabↄɛ. Ɔ̃ à mɛ̀:

Gwa, ma pↄ́ súsugwabↄ pòo ma gbɛ̃́ Isailiↄwa,

má sùuukɛńnↄ lↄo.

9 Wa Isailiↄ gulɛsĩ pↄ́ aa bòↄ daaĩ,

wa Izaaki buiↄ sa'okĩiↄ wíwi.

Má fɛlɛ Yeloboaũ bɛwa ń fɛ̃ndaoɛ.

Amↄsi ń sa'onkia Amaziao

10 Ɔ̃ Bɛtɛli sa'onkia Amazia gbɛ̃́ↄ zĩ̀ Isailiↄ kí Yeloboaũwa à mɛ̀: Amↄsi lɛ́ lɛkpaaĩnzi ń gbɛ̃́ↄ Isaili bùsuu. Bùsudeↄ aa aà yã́ fↄ̃́ lↄo. 11 Asa à mɛ̀ wa Yeloboaũ dɛ ń fɛ̃ndaoɛ,

wi Isailiↄ kṹkũ ń bùsuu,

wà táńnↄ zĩ̀zↄↄ ũɛ.

12 Ɔ̃ Amazia mↄ ò Amↄsiɛ à mɛ̀: Gu'ena, bàasi ǹ ta Yuda bùsuu, níↄ ble ń ãnabikɛkɛawa we. 13 Ńsu ɛa mↄ ãnabikɛkɛi Bɛtɛli la lↄo, asa sa'okĩi pↄ́ ì kía gba gbãa ku laɛ. 14 Ɔ̃ Amↄsi a zãsì Amaziawa à mɛ̀: Ãnabi ge ãnabi gãli gbɛ̃en ma ũ yãa seo. Sãdãnan ma ũ, kaadↄɛmblea dↄ́ɛ má dↄ̃. 15 Sãdãpi guu ↄ̃ Dii ma sɛu, a òmɛɛ mà gɛ ãnabikɛkɛ a gbɛ̃́ Isailiↄnɛ. 16 Swã́kpa ǹ Dii yãma sa. N mɛ̀,

másu ãnabikɛkɛ Isailiↄ yã́ musuo,

másu vãi pↄ́ a Izaaki buiↄ le oo.

17 Ayãmɛto Dii mɛ̀,

n na a káaluaka wɛ̃́lɛu,

wa n nɛ́ↄ dɛdɛ ń fɛ̃ndao gↄ̃ɛↄ ń nↄɛↄ.

Wa ba yↄ̃ n bùsuwa,

wi kpaalɛkↄ̃ɛ.

Wa Isailiↄ kṹkũ ń bùsuu

wà táńnↄ zĩ̀zↄↄ ũ,

ní ga luayãdↄ̃nsaiↄ bùsuu we.