Ⅱ
Nya Oti Wĩ Kĩ Etomɔ Kristo Yesu.
Ⅰ Yĩ obi, do nɔ akũ kɔbɛ̃ mɔ Baguma kɔnyakamɔ nɛ ɔmɔa kakɛna mɔ Kristo Yesu a kĩ bɛkpa boe a kamɛ.
Ⅱ Kɔa fɔtsa a kĩ onu kĩ ntsa nɛ adansifɔ pii anɛ kamɛ a kado nɛ bikĩ ɔtɛ odo kĩ baapuli bɛtsa bati bɛbã lɛmɛ a awɛ.
Ⅲ Do ɔwɔlɛ kamɔ lubo ndɛ sodzani wĩ kĩ ɛdzɛ̃ ɛkpa Kristo Yesu.
Ⅳ Sodzani kĩ ɛdzɛ̃ nɛ ye adzuma akũ ni, yawɛ kĩ yakɛna fɔtsa fuwo ye lɔtɔ ɔnyanɛ anɛ, foesũ ɛláado akũ nɛ adzuma kĩ ɛnyɛ́ sodzafɔ adzuma kamɛ.
Ⅴ Ade ayea fɔmɔ atsɛ owulanɛ aanya akũ ni, kɛnɛ kĩ ɛkɛna nɛ atsɛ kalo mbla akũ.
Ⅵ Okuani kĩ yanɛ kɔba mɔ ɔsĩ mɔ ɔsĩ ni, ade ye anya lɔtɔ kanya funitsã a kĩ fubo a.
Ⅶ Kɔna fɔtsa a kĩ mbi nɔ a akũ, kitonɛkĩ boe Ɔlate aabumɔ nɔ onu foe flee kayɔ.
Ⅷ Te anɛ nɛ Yesu Kristo kĩ ɛnyɛ Lɛgã Dawid kasinu obi a kĩ Baguma dzɛla ye etomɛna banɔkpa kamɛ a akũ ndɛ ayekĩ bɛtsa a. Ade foe nyɛ Kalɛ Wĩ a kĩ made lɛtsã nɛ ke akũ a.
Ⅸ Ade Kalɛ Wĩ a kĩ malɛ a sũ nlamɛna lubo kamɔ, ade ke bido yĩ nɛ nkɔsɔnkɔsɔ kamɛ ndɛ oti kĩ efum a. Lɛmɛ Baguma kalɛ kɔ̃ bɛtádo ke nkɔsɔnkɔsɔ!
Ⅹ Nɛ fukĩĩ sũ mado ɔwɔlɛ kamɔ lubo nɛ lɛtsa nyɛ lɛtsa kamɛ nɛ Baguma bati a kĩ ɛpau a sũ, ayekĩ nɛ Kristo Yesu akũ be malo baana katɛ mɔ kawɔlɛ nkpã a kĩ ɛla kawũna a.
Ⅺ Fukĩĩ nyɛ ɔnɔkɔali fɔlɛtsa kĩ balɛ,
“Ntɛ buku mɔ boe Ɔlate ni,
bɔ́adzi nkpã lɛmɛ mɔ ye.
Ⅻ Ntɛ budo ɔwɔlɛ bɔmɔ́ lubo ni,
bɔ́anya lɛgã lɛmɛ mɔ ye.
Ade ntɛ busĩ ye ni,
ye malo yaasĩ boe.
ⅩⅢ Ntɛ boe bɔákɛna nɛ boe katɛkado akũ malo ni,
ye kɔ̃ yakɛna nɛ ye kalɛ akũ daa,
kitonɛkĩ ɛláapuli esĩ ye akũ da.”
Pi Nɔ Akũ Kapi Wĩ Ayekĩ Baguma Aatsa Nɔ Lɛgãbɔɛ.
ⅩⅣ Te bati a fɔlɛtsa kĩĩ anɛ, lɔkɔa kasi be mbla nɛ Baguma anɛ kĩ bɛtakavɛlɛ fɔlɛtsa, kitonɛkĩ nfasɔ adima lɛláa foe kamɛ, mbom kabula fɔabula bati a kĩ batse foe a katɛkado kade.
ⅩⅤ Bɔa mbɔdi kakɛna adzuma mɔ ɔsĩ mɔ ɔsĩ ayekĩ fɔ́awo Baguma anɛ. Kɛna adzuma ndɛ oti kĩ ye adzuma lákɔ ye kɔnyɔã mbom yatsa Baguma ɔnɔkɔali kalɛ a pɛpɛɛpɛ.
ⅩⅥ Tado nɔ akũ nɛ kɔlɔmɛna kĩ fɔátsa Baguma kavila kamɛ, kitonɛkĩ fɔakpã bati kanɛlitimɛna nɛ Baguma akũ.
ⅩⅦ Fɔtsa katsa a na la ndɛ kaakpa kĩ kasa kaba sukɛna. Bati nviã kĩ bɛtsa foe odu nyɛ Himenaio mɔ Fileto.
ⅩⅧ Bimuniki nɛ ɔnɔkɔali osi a akũ, ade badani batɛ badonɛ a badi katɛkado a. Bɛkatsa fɔtsa kĩ banɔkpa kabuki kayidza kadzi nkpã ya kɛtɛ̃ kɔkɔɛ.
ⅩⅨ Lɛmɛ, Baguma kɔla kayɔkayi litekũ a kĩ eke a ni, lɛtsama lɛláapuli likuna de. Ade kayɔkayi litekũ kĩĩ akũ bɛtsɛlɛ fɔlɛtsa kĩĩ kĩ, “Boe Ɔlate nyina bikĩ bɛnyɛ ye bade a.” ade “Odi nyɛ odi kĩ yalɛ kĩ ɛnyɛ boe Ɔlate a ode ni, kɛnɛ kĩ emuniki nɛ tɔkpa liti.”
ⅩⅩ Nɛ tɔtɔ kpale kamɛ ni, fɔɔdaɛ mɔ titsensi kumɛkumɛ deĩ. Fudi nyɛ sika ngbã fude, fudi lɛmɛ nyɛ sika ovoe fude. Ade fudi lɛmɛ nyɛ tite ĩye titse fude a. Bɛkɔa fukĩ fudeĩ kɔya biyi bɛkpa fuwi titiliwu kanya, ade bɛkɔa fɔbɛbã biyi bɛkpa luwi daa akũ a.
ⅩⅪ Foesũ ntɛ oti odi vɔlɛ ye akũ ɛkɛna ye akũ yedede, ɛnɛ nɛ tɔkpa kamɛ ni, yaanya adzuma titiliwu ɔkɛnanɛ kitonɛkĩ bɛkpalɛ ye akũ ade edeĩ nfasɔ ɛkpa boe Ɔlate a.
ⅩⅫ Takɔa nɔ akũ ɔkpa fɔwɛtsa kpa a kĩ foe kakɛna akɔ bapopo odo. Pili katɛkado, nkpã wĩ kadzi, mɔ bati kawɛ. Mimɔ bati a mikɛna fukĩĩ mɔ kadzi nɛ lukudɔ kamɛ, mibɔa mpaɛ mivia boe Ɔlate kabumɛna mɔ ɔwɔlɛ kamɛ yedede.
ⅩⅩⅢ Tado onukpɛ̃ nɛ fɔlɛtsa kavɛlɛ kĩ nyansã lɛláa foe kamɛ. Nɔ mɔawɛ a onyina kĩ fɔlɛtsa kavɛlɛ naa bamɛ ayamɔ ɔdzɛ.
ⅩⅩⅣ Kɛtánɛ kĩ boe Ɔlate ɔsumunɛ akɛna ɔdzɛ, mbom kɛnɛ kĩ ɛkɛna sɛmɛ kalɛ ɛkpa odi nyɛ odi, ɛnya fɔtsa ɔtsanɛ wĩ kĩ edeĩ ɔwɔlɛ bɔɛɛ ɛkpa bikĩ bideĩ ɔsĩ a.
ⅩⅩⅤ Ade ke kɛnɛ kĩ ɛkɔa ɔwɔlɛ bɔɛɛ ɛkaanyɛ fɔlɛtsa kamɛ katsa bati a kĩ biyidza bɛdza nɛ kalɛ wĩ a akũ a. Ɔsa Baguma aafɔ̃ bɛdani tɔwɔlɛ kamɛ lɔkɔa bɛyaanyi ɔnɔkɔali kalɛ a.
ⅩⅩⅥ Nɛ foe kamɛ a, be adzuni kamɛ aabinya lɔkɔa bɛnɛ nɛ Abonsam kpeĩ kĩ bɛtɔ a, kĩ ɛkɔa be ɛkɛna ye fɔwɛtsa bakɛnanɛ a kamɛ.