Ⅲ
Yohanes Mui Ɔwɔlanɛ a De Lɛtsã Nɛ Kalɛ Wĩ a Akũ.
Ⅰ Nɛ Lɛgãnɔkɔɛ̃ Kaisare Tiberio lɛgãkanya kateli kawualode kamɛ a, Pontio Pilato nya abãã ɔnɔkɔɛ̃ nɛ Yudea tite akũ. Nɛ lɔkɔ a na kamɛ a, Herodes lɛnya Galilea tite akũ, ade ɔwaɛ̃ Filipo nyá Iturea mɔ Trakoniti tite akũ a. Lisania nya Abilene tite akũ.
Ⅱ Hana mɔ Kayafa lɛmɛ nya Yudafɔ basɔfɔnɔkɔɛ̃ flefle a. Ade lɔkɔ a na kamɛ lɛmɛ mɔ Baguma ɔlɛdo ya ɛkpa Yohanes kĩ ɛnyɛ Zakaria obi a kĩ ɛna nɛ kɔsa kamɛ a.
Ⅲ Foesũ Yohanes tsã emini nɛ Yordan ɔwɔ abuĩ mɔ ye fuyite a ɛkade lɛtsã kĩ, “Midani mi tɔwɔlɛ kamɛ lɔkɔa mitɛ mui kawɔla amaniɛ ayekĩ Baguma aakɔa mi tɔkpa ete mi.”
Ⅳ Ade aye bɛtsɛlɛ nɛ Baguma Onukpɛ̃ Ɔnyɛnɛ Yesaya ovoli a kamɛ kĩ,
“Oti odi tsɛ̃ yabɔa fɔwɔla nɛ kɔsa kamɛ kalɛ kĩ,
‘Milɔla osi mikpa boe Ɔlate kaya.
Mikɛna osi kpĩĩ miyi ye.
Ⅴ Miyula fɔkɔ a kĩ fɔpɛlɛ pɛlɛ fuwo a,
ade mibubuli tɔtɔ mɔ kɔtɔbii a flee fɔtɛɛ a.
Miyo tisi balibaliwa a,
ade mitɛɛtɛɛ fɔkɔ a kĩ fude fute a.
Ⅵ Katinya kamɛ bati flee aamɔ Ɔtɔnɛ a kĩ Baguma do a!’ ”
Ⅶ Bati kɔdabu kɔdabu pii ya nɛ Yohanes sɛkɛ̃ kĩ ɛkɛna be mui kawɔla amaniɛ, ade ebi be kĩ, “Mi bati kĩ mila ndɛ bɔɛ kpa! Owei lɛkpa mi kɔdɛ kĩ míapuli milo nɛ sɔtɔ kavɛlɛ a kĩ Baguma aayamɛna a kamɛ?
Ⅷ Minyɛ mitsa nɛ mi fɔtsakɛlawa kamɛ bɛmɔ kĩ midani tɔwɔlɛ kamɛ. Ade mitakalɛ kĩ minyɛ Abraham babi mɔ bawa sũ ni, Baguma lɛláavɛlɛ mi sɔtɔ. Kitonɛkĩ mabi mi kĩ Baguma aapuli ɛkɔa boe kĩĩ ɛkɛna babi mɔ bawa ɛkpa Abraham.
Ⅸ Bike kasɔã kɔkɔɛ nɛ futse tɔbɔlɛ akũ kĩ baatsua. Kutse nyɛ kutse kĩ kɔáwũ babi wĩ ni, baakpeli koe bɛta bido nɛ fi luwotu kamɛ.”
Ⅹ Awã naa bati a via Yohanes kĩ, “Foesũ litsa kɛnɛ kĩ bɔkɛna?”
Ⅺ Ade ke ɛkpa be mbuayɛ kĩ, “Nɔ a kĩ odeĩ tɛtadiɛ tiwo te nviã ni, kɔa amɔa kakpa odi kĩ ɛlá adima. Ade ke nɔ a kĩ odeĩ funitsã ni sɛ̃ foe mɔ bikĩ bidzi kɔlɛ a.”
Ⅻ Tɔgɔlɛ batɛnɛ badi malo ya kĩ ɛwɔla be mui, ade bivia ye kĩ, “Fɔtsa Ɔtsanɛ, litsa kɛnɛ kĩ bɔkɛna?”
ⅩⅢ Yohanes bi be kĩ, “Mitatɛ ɔgɔlɛ fɔba fukĩ abãã tsua eyi kĩ mitɛ a.”
ⅩⅣ Sodzafɔ badi lɛmɛ yavia ye kĩ, “Boe malo litsa kɛnɛ kĩ bɔkɛna?”
Yohanes bi be kĩ “Mitakɔa kɔbɛ̃ mitɛ sika nɛ bati awɛ, ade mitatsua odima onukpɛ̃ nɛ lɛtsa a kĩ minyina kĩ ɛtákɛna a akũ. Mifɔ̃ mi kɔtɔkase kuwo mi anɛ.”
ⅩⅤ Ayekĩ bati anɛ teĩ nɛ boe Ɔtɛnɛ a kaya mɔatsɛ akũ sũ ni, bɛkakɔna kĩ ɔsa Yohanes nyɛ oti a kĩ badzɔlɛ a.
ⅩⅥ Foesũ Yohanes bi be kĩ, “Yĩ kɔ̃ nkɔa mui mawɔla mi mui, lɛmɛ oti odi kĩ ɛbɛ̃ yĩ aya nɛ liti. Ntáfɛta kĩ manyɛ ye mpabua nɛ ye abɔa malo. Oti kĩĩ aakɔa Hũhũ Kpalɛwa mɔ fi ɛwɔla mi mui.
ⅩⅦ Ɛnɛɛ ye kɔvɛla kĩ yaakɔa ɛwɛ ɛnyɛ ye babi wĩ a lɔkɔa efila be eko nɛ oli kamɛ. Lɛmɛ yaapila afafa a nɛ fi kĩ fɔlá kadi a kamɛ!”
ⅩⅧ Ade Yohanes tsã kɔdɛ tisi futefute pii akũ ede lɛtsã nɛ Kalɛ Wĩ a akũ kĩ bati bɛdani be kadzi kamɛ a.
ⅩⅨ Yohanes kã abãã ɔnɔkɔɛ̃ Herodes anɛ, kitonɛkĩ ɛtɛ ɔwaɛ̃ ɔtsɔ̃ kĩ bavɛ Herodia ɛkɔã, ade Herodes kɛna fɔtsa kpa bɛbã pii lɛmɛ a.
ⅩⅩ Ade ebuki ɛkɛna tɔkpa kĩ tɛbɛ̃ kɔlaa kĩ epi Yohanes edo nɛ abãã kɔla kamɛ a.
Yohanes Wɔla Yesu Mui.
ⅩⅪ Kĩ Yohanes wɔla bati a flee mui eyua a, ɛwɔla Yesu lɛmɛ mui. Ade lɔkɔ a kĩ Yesu kabɔa mpaɛ a, odetɔ́ kamɛ binya,
ⅩⅫ ade Hũhũ Kpalɛwa ka ndɛ mblɔduma aye ɛyadzi nɛ ye akũ a. Awã naa odo odi to ode ɛlɛ kĩ, “Nɔ nyɛ yĩ obi kĩ maátunɔ kalɛ. Kawɔlɛ ade yĩ nɛ nɔ akũ.”
Yesu Bawanyɔ Kasinu a Kamɛ Bati.
ⅩⅩⅢ Yesu tɛ ndɛ futeli taalɛ fɔmɔ eyi ye kanade adzuma kayɔ. Bati kɔna kĩ ɔlɛga nyɛ Yosef.
Kĩ ye ɔlɛga nyɛ Eli,
ⅩⅩⅣ Eli ɔlɛga nyɛ Mata.
Mata ɔlɛga nyɛ Levi, Levi ɔlɛga nyɛ Melki.
Melki ɔlɛga nyɛ Yanai, Yanai ɔlɛga nyɛ Yosef.
ⅩⅩⅤ Yosef ɔlɛga nyɛ Matatia, Matatia ɔlɛga nyɛ Amos.
Amos ɔlɛga nyɛ Nahum, Nahum ɔlɛga nyɛ Esli.
Esli ɔlɛga nyɛ Nagae,
ⅩⅩⅥ Nagae ɔlɛga nyɛ Mahat.
Mahat ɔlɛga nyɛ Matatia, Matatia ɔlɛga nyɛ Semei.
Semei ɔlɛga nyɛ Yosek, Yosek ɔlɛga nyɛ Yuda.
ⅩⅩⅦ Yuda ɔlɛga nyɛ Yohanan, Yohanan ɔlɛga nyɛ Resa.
Resa ɔlɛga nyɛ Zerubabel, Zerubabel ɔlɛga nyɛ Sealtiel.
Sealtiel ɔlɛga nyɛ Neri,
ⅩⅩⅧ Neri ɔlɛga nyɛ Melki.
Melki ɔlɛga nyɛ Adi, Adi ɔlɛga nyɛ Kosam.
Kosam ɔlɛga nyɛ Elmadam, Elmadam ɔlɛga nyɛ Er.
ⅩⅩⅨ Er ɔlɛga nyɛ Yosua, Yosua ɔlɛga nyɛ Eliezer.
Eliezer ɔlɛga nyɛ Yorim, Yorim ɔlɛga nyɛ Matat.
Matat ɔlɛga nyɛ Levi,
ⅩⅩⅩ Levi ɔlɛga nyɛ Simeon.
Simeon ɔlɛga nyɛ Yuda, Yuda ɔlɛga nyɛ Yosef.
Yosef ɔlɛga nyɛ Yonam, Yonam ɔlɛga nyɛ Eliakim.
ⅩⅩⅪ Eliakim ɔlɛga nyɛ Melea, Melea ɔlɛga nyɛ Mena.
Mena ɔlɛga nyɛ Matata, Matata ɔlɛga nyɛ Natan.
Natan ɔlɛga nyɛ Dawid,
ⅩⅩⅫ Dawid ɔlɛga nyɛ Isai.
Isai ɔlɛga nyɛ Obed, Obed ɔlɛga nyɛ Boaz.
Boaz ɔlɛga nyɛ Salmon, Salmon ɔlɛga nyɛ Nahason.
ⅩⅩⅩⅢ Nahason ɔlɛga nyɛ Aminadab, Aminadab ɔlɛga nyɛ Admin.
Admin ɔlɛga nyɛ Arni, Arni ɔlɛga nyɛ Ezron.
Ezron ɔlɛga nyɛ Perez, Perez ɔlɛga nyɛ Yuda.
ⅩⅩⅩⅣ Yuda ɔlɛga nyɛ Yakob, Yakob ɔlɛga nyɛ Isak.
Isak ɔlɛga nyɛ Abraham, Abraham ɔlɛga nyɛ Tara.
Tara ɔlɛga nyɛ Nahor,
ⅩⅩⅩⅤ Nahor ɔlɛga nyɛ Seruk.
Seruk ɔlɛga nyɛ Regu, Regu ɔlɛga nyɛ Pelek.
Pelek ɔlɛga nyɛ Eber, Eber ɔlɛga nyɛ Sala.
ⅩⅩⅩⅥ Sala ɔlɛga nyɛ Kainan, Kainan ɔlɛga nyɛ Arfaksad.
Arfaksad ɔlɛga nyɛ Sem, Sem ɔlɛga nyɛ Noa.
Noa ɔlɛga nyɛ Lamek,
ⅩⅩⅩⅦ Lamek ɔlɛga nyɛ Metusala.
Metusala ɔlɛga nyɛ Henok, Henok ɔlɛga nyɛ Yared.
Yared ɔlɛga nyɛ Mahaleel, Mahaleel ɔlɛga nyɛ Kainan.
ⅩⅩⅩⅧ Kainan ɔlɛga nyɛ Enok, Enok ɔlɛga nyɛ Set.
Set ɔlɛga nyɛ Adam, ade Adam ɔlɛga nyɛ Baguma a.