ⅩⅩ
Bɛmɔ́ Kĩ Linikɛ a Waa Luto.
Ⅰ Ɛkwansieda ɔnɔnɛ tutuutu a, kĩ fɔkɔ tákpalɛ tɔ̃ a, Maria Magdalani naa linikɛ a ɔwɛ̃, ade ɛmɔ́ kĩ bitinya de a nɛ linikɛ a onukpɛ̃.
Ⅱ Foesũ ewula atsɛ ɛnaa Simon Petro mɔ fɔtsa ɔkɔlɛnɛ a kĩ Yesu látunɔ kalɛ a sɛkɛ̃, ebi be kĩ, “Bɛyabɔɛ boe Ɔlate nɛ linikɛ a kamɛ bɛdzakũmɛna, ade bunyína awã kĩ bɛkɔa ye biyi a.”
Ⅲ Ade Petro mɔ fɔtsa ɔkɔlɛnɛ kĩ a yidza bɛnaa linikɛ a ɔwɛ̃.
Ⅳ Be nviã a flee bɛkawula atsɛ, lɛmɛ fɔtsa ɔkɔlɛnɛ kĩ a wula atsɛ ɛtɛ̃ Petro ɛnya lɔtɔ ewo linikɛ a ɔwɛ̃.
Ⅴ Ɛkɛna akũ ɛdã de kamɛ ɛmɔ́ aklala a kĩ bɛkɔa bisuli ɔnɔkpa a, lɛmɛ ɛtáwo nɛ linikɛ a kamɛ.
Ⅵ Simon Petro kĩ etomɔ ye nɛ liti a, ya ade ye kɔ̃ ewo nɛ linikɛ a kamɛ a. Ɛmɔ́ aklala ovoe a kĩ ɛwaa nɛ awã.
Ⅶ Ɛmɔ́ lima a kĩ bɛkɔa bisui Yesu lɔlɔ a lɛmɛ nɛ awã, lɛmɛ lɛwáa nɛ aklala a ɔwɛ̃, mbom bibuta de biyi de lite.
Ⅷ Ke liti a, fɔtsa ɔkɔlɛnɛ bɛbã a kĩ ɛnya lɔtɔ ewo linikɛ a ɔwɛ̃ a, lɛmɛ wo nɛ de kamɛ. Ɛmɔ́ aklala mɔ lɔlɔ kasui lima a, ade ɛtɛ edo a.
Ⅸ Ke malo ni, bɛtánu kayɔ kĩ Katsɛlɛ Kpalɛwa a lɛ kĩ kɛnɛ kĩ Yesu eyidza eto kanɔkpa.
Ⅹ Ke liti a, fɔtsa bakɔlɛnɛ a dzakũ bɛnaa be tɔtɔ kamɛ.
Yesu Nyɛ Ye Akũ Ɛtsa Maria Magdalani
Ⅺ Lɛmɛ Maria dza nɛ linikɛ a ɔwɛ̃ ɛkabe. Kĩ ɛkabe a, ɛkɛna akũ ɛdã linikɛ a kamɛ,
Ⅻ ade ɛmɔ́ ode fɔtɔ banyanɛ nviã kĩ bideĩ nɛ tɛtadiɛ fitaa kamɛ, kĩ bidzi nɛ awã kĩ bɛwɔ́la Yesu a. Ɔmɔa dzi nɛ ye lɔlɔ nyangɛ, ɔbɛbã dzi nɛ ye abɔa kayɔ.
ⅩⅢ Bivia Maria kĩ, “Boe ɔma, litsa sũ abe?”
Maria kpa be mbuayɛ kĩ, “Bɛbɔɛ yĩ Ɔlate bɛnamɛna, ade ĩnyína awã kĩ bɛkɔa ye bɛnamɛna a.”
ⅩⅣ Kĩ ɛlɛ fukĩĩ eyua a, ɛdani akũ ade ɛmɔ́ Yesu kĩ ɛdzɛ̃ nɛ awã, lɛmɛ ɛtányi kĩ ye yanɛ.
ⅩⅤ Yesu via ye kĩ, “Boe ɔma, nde sũ abe? Owei awɛ?”
Lɛmɛ Maria kɔna kĩ oti a kĩ yadãmɛna awã a yanɛ, foesũ ebi ye kĩ, “Ɔnɔkɔɛ̃, ntɛ nɔ lɛbɔɛ ye ni, bi yĩ awã kĩ oyi ye lɔkɔa nnaabɔɛ ye.”
ⅩⅥ Ade Yesu vɛ ye kĩ, “Maria!”
Ɛdani ɛtsɛlamɔ ye ade ɛlɛ nɛ Hebri tide kamɛ kĩ, “Raboni!” Foe kayɔ nyɛ Fɔtsa ɔtsanɛ.
ⅩⅦ Yesu bi ye kĩ, “Tata yĩ, kitonɛkĩ ntámuniki nnaa ode nɛ Nda sɛkɛ̃ tɔ̃. Lɛmɛ naa nwaɛ̃ amɛ sɛkɛ̃ kabi be kĩ mmuniki manaa oti a kĩ ɛnyɛ Nda mɔ mi Ɔlɛga, yĩ Baguma mɔ mi Baguma a sɛkɛ̃.”
ⅩⅧ Foesũ Maria Magdalani a nabi fɔtsa bakɔlɛnɛ a kĩ ɛmɔ́ Ɔlate a, ade ebi be fɔlɛtsa a kĩ Yesu bi ye a flee a.
Yesu Nyɛ Ye Akũ Ɛtsa Ye Fɔtsa bakɔlɛnɛ a.
ⅩⅨ Nɛ Ɛkwansieda a na olobe a, fɔtsa bakɔlɛnɛ a kpɔta nɛ kɔla kamɛ, ade bɛbalɛ onyukpɛ̃ tupunu a flee, kitonɛkĩ bɛkavila Yudafɔ banɔkɔɛ̃ a. Lɛtalɛta Yesu yanɛ ɛdza nɛ be kayite, ade ebi be kĩ, “Lukudɔ litomɔ mi.”
ⅩⅩ Kĩ ɛlɛ fukĩĩ eyua a, ɛkɔa ye awɛ mɔ sɛklabi ɛtsa be. Adeke kawɔlɛ de fɔtsa bakɔlɛnɛ a kĩ bɛmɔ́ Ɔlate a.
ⅩⅪ Yesu buki ebi be kĩ, “Lukudɔ litomɔ mi! Ndɛ ayekĩ Nda do yĩ a, ade aye mado mi a.”
ⅩⅫ Adeke ɛwɛya eko nɛ be akũ, ɛlɛ kĩ, “Mitɛ Hũhũ Kpalɛwa a.
ⅩⅩⅢ Ntɛ mikɔa bati tɔkpa mite be ni, bɛkɔa bite be, lɛmɛ ntɛ mitákɔa be tɔkpa mite be a ni, bɛtákɔa te bite be.”
Yesu Nyɛ Ye Akũ Ɛtsa Toma.
ⅩⅩⅣ Kĩ Yesu ya a, Toma kĩ ɛnyɛ fɔtsa bakɔlɛnɛ ewua-nviã a kamɛ ɔmɔa, kĩ bibuki bavɛ Ata a, tána nɛ ye bade a kamɛ.
ⅩⅩⅤ Foesũ fɔtsa bakɔlɛnɛ bɛbã a bi ye kĩ, “Bɔmɔ́ boe Ɔlate a!”
Ade Toma bi be kĩ, “Ntɛ ntámɔ ye awɛ kamɛ tiplego fɔɔkpa a, nkɔa lawobi nte nɛ fɔɔkpa a akũ ndo awɛ nɛ ye sɛklabi ni, nláatɛ ndo da.”
ⅩⅩⅥ Nɛ fuwi ɛlɛ̃ liti a, fɔtsa bakɔlɛnɛ a buki bɛkpɔta nɛ kɔla a kamɛ, ade Toma lɛmɛ na nɛ be kamɛ a. Bɛbalɛ tupunu a flee, lɛmɛ Yesu yadza nɛ be kayite ade ɛlɛ kĩ, “Lukudɔ litomɔ mi!”
ⅩⅩⅦ Adeke ebi Toma kĩ, “Kɔa nɔ lawobi kate nɛ awĩ, kadã yĩ awɛ kamɛ. Yo kɔkpɔ kado awɛ nɛ yĩ sɛklabi kamɛ. Fɔ̃ atsindze katɛ, lɔkɔa katɛ kado!”
ⅩⅩⅧ Toma bi ye kĩ, “Yĩ Ɔlate mɔ yĩ Baguma!”
ⅩⅩⅨ Ade Yesu bi ye kĩ, “Ayekĩ ɔmɔ́ yĩ sũ ɔtɛ odo. Baguma hila bikĩ bɛtámɔ yĩ, lɛmɛ bɛtɛ bido a!”
Lɛtsa a Kĩ Lɛnyɛ Ovoli Kĩĩ Botaɛ.
ⅩⅩⅩ Nɛ ɔnɔkɔali kamɛ ni, Yesu kɛna awãwã fɔtsa bɛbã pii nɛ ye fɔtsa bakɔlɛnɛ a anɛ, kĩ bɛtátsɛlɛ bido nɛ ovoli kĩĩ kamɛ.
ⅩⅩⅪ Lɛmɛ bɛtsɛlɛ fukĩĩ biyi ayekĩ míatɛ mido kĩ Yesu nyɛ Kristo, Baguma Obi, ade mitɛ ye mido ni, míatsã ye akũ mina nkpã kĩ ɛla kawũna a.