ⅩⅤ
Yesu Nyɛ Kutse Wĩ a.
Ⅰ “Yĩ nyɛ kutse wĩ a, ade Nda nyɛ futse kɔba ɔnɛnɛ a.
Ⅱ Ɔnanɛ odi nyɛ odi kĩ edeĩ nɛ yĩ akũ kĩ yaáwũ babi ni, yatsua ye kamuni, ade ɔnanɛ odi nyɛ odi kĩ yawũ babi ni, yanyɛ ye akũ tɔɔta, ayekĩ yaawũ babi pii.
Ⅲ Finyaa yĩ fɔlɛtsa a kĩ mbi mi a kpalɛ mi akũ kɔkɔɛ.
Ⅳ Mikɛna ɔmɔa mɔ yĩ, yĩ malo nkɛna ɔmɔa mɔ mi. Ndɛ ayekĩ kutse ɔnanɛ lɛláapuli kuwũ nɛ koe akũ, mbɔɛntɛ kɔmanɛ nɛ kutse ɔma akũ a, ade aye mi malo miláapuli miwũ babi ntɛ mitákɛna ɔmɔa mɔ yĩ a.
Ⅴ “Yĩ nyɛ kutse a, ade mi minyɛ tɛnanɛ a. Oti a kĩ ɛkɛna ɔmɔa mɔ yĩ, mɔ yĩ malo nkɛna ɔmɔa mɔ ye ni, ade ye aawũ babi pii, kitonɛkĩ ntɛ nláa mi kamɛ ni, miláapuli mikɛna lɛtsama.
Ⅵ Oti a kĩ ɛláa yĩ kamɛ ni, ɛla ndɛ ɔnanɛ kĩ bitsua bɛta bimuni ade yawɔlɛ a. Bakpɔta tɛnanɛ a kafila kado nɛ fi kamɛ tavio.
Ⅶ Ntɛ mikɛna ɔmɔa mɔ yĩ, mɔ yĩ fɔlɛtsa a deĩ nɛ mi kamɛ ni, míavia lɛtsa a kĩ miawɛ ade baakɛna foe bɛkpa mi a.
Ⅷ Ntɛ miwũ babi beblebee ni, foe fɔnyɛ Nda kukũkpalɛ fɔtsa, ade fusipi kĩ yĩ fɔtsa bakɔlɛnɛ mianɛ.
Ⅸ Ayekĩ Nda awɛ yĩ kalɛ a ni, ade aye yĩ malo mawɛ mi kalɛ a. Foesũ mifɔ̃ yĩ ɔdɔ a ɛna nkɔsu nɛ mi kamɛ lɔmɔ.
Ⅹ Ntɛ mipi yĩ tɛbla a midomɔ akũ ni, míana nɛ yĩ ɔdɔ a kamɛ ndɛ ayekĩ yĩ malo mpi Nda mbla ndomɔ akũ fɔfɔ̃ ye ɔdɔ deĩ nɛ yĩ kamɛ a.
Ⅺ “Mbi mi fɔlɛtsa kĩĩ ayekĩ kawɔlɛ a kĩ kideĩ nɛ yĩ kamɛ a odu kɛna nɛ mi kamɛ, lɔkɔa mi kawɔlɛ a kɛkpɔla.
Ⅻ Ade yĩ mbla kĩ makpa mi nyɛ kĩ, miwɛ mi akũ akũ kalɛ ndɛ ayekĩ nwɛ mi kalɛ a.
ⅩⅢ Ɔdɔ titiliwu adima lɛláa kĩ oti akɔa ye nkpã ɛbɔa afɔliɛ nɛ bakɔba lɔlɔ.
ⅩⅣ Ntɛ mikɛna nɛ yĩ mbla a kĩ nkpa mi a akũ a ni, lɔkɔa minyɛ yĩ bakɔba.
ⅩⅤ Nláabuki nvɛ mi kĩ basumunɛ, kitonɛkĩ ɔsumunɛ linyína lɛtsa a kĩ ye ɔlate akɛna. Lɛmɛ mavɛ mi kĩ bakɔba kitonɛkĩ lɛtsa nyɛ lɛtsa a kĩ nnu ntomɛna Nda sɛkɛ̃ ni, nfɔ̃ minyi foe.
ⅩⅥ Nnɛ́ mi lɛpau yĩ, mbom yĩ lɛpau mi ndzina mi kĩ minaawũ babi beblebee kĩ baawa daa. Nɛ foesũ lɛtsa nyɛ lɛtsa kĩ míavia Ɔlɛga a nɛ yĩ dĩ akũ ni, yaakpa mi foe.
ⅩⅦ Foesũ ade mbla kĩ makpa mi kĩ miwɛ mi akũ kalɛ.”
Katinya Kamɛ Likesĩ.
ⅩⅧ Yesu buki ɛlɛ kĩ, “Ntɛ katinya kamɛ bati akesĩ mi ni, minyi kĩ bɛnya lɔtɔ bikesĩ yĩ.
ⅩⅨ Ntɛ katinya kamɛ bade mianɛ ni, kufɛ baawɛ mi kalɛ ndɛ be bade aye. Lɛmɛ kĩ mpau mi ntomɛna katinya bati kamɛ ade mibuki minyɛ́ be bade a sũ ni, katinya kamɛ bati akesĩ mi.
ⅩⅩ Mite anɛ nɛ kalɛ a kĩ mbi mi akũ a kĩ, ‘Ɔsumunɛ lɛbɛ́ ye ɔlate.’ Ntɛ bati yidza bɛdza nɛ yĩ akũ ni, baayidza bɛdza nɛ mi malo akũ. Ntɛ bipi yĩ fɔlɛtsa bidomɔ akũ ni, baapi mi fude lɛmɛ bidomɔ akũ.
ⅩⅪ Lɛmɛ baakɛna fukĩĩ flee nɛ mi akũ nɛ yĩ dĩ sũ, kitonɛkĩ binyína oti a kĩ edo yĩ a.
ⅩⅫ Ntɛ ntayaabi be fɔlɛtsa ni, kufɛ bɛtáku tɔkpa kɔtɔ. Lɛmɛ finyaa bɛkɛna tɔkpa ade bɛlá onukpɛ̃ kanyɛ kadima a.
ⅩⅩⅢ Odi nyɛ odi kĩ yakesĩ yĩ ni, yakesĩ Nda lɛmɛ.
ⅩⅩⅣ Ntɛ ntakɛna fɔtsa kĩ odima tákɛna tɔ̃ nɛ be kamɛ ni, kufɛ bɛtákɛna tɔkpa, lɛmɛ kĩ finyaa bɛmɔ́ fɔtsa a kĩ nkɛna a malo ni, bakesĩ bɔmɔ Nda.
ⅩⅩⅤ Lɛmɛ fukĩĩ flee ya nɛ foe kamɛ ayekĩ fɔlɛtsa a kĩ bɛtsɛlɛ nɛ be mbla ovoli kamɛ a, fɔya nɛ foe kamɛ kĩ, ‘Bikesĩ yĩ pupulidza.’
ⅩⅩⅥ “Maado Obumɛnanɛ eto Ɔlɛga a sɛkɛ̃ ɛya nɛ mi sɛkɛ̃. Ade ye nyɛ Hũhũ a kĩ yaanyɛ ɔnɔkɔali a nɛ Baguma akũ ɛtsa a. Ntɛ eto Ɔlɛga a sɛkɛ̃ ɛya ni, yaadi adansiɛ nɛ yĩ akũ.
ⅩⅩⅦ Mi malo míadi adansiɛ, kitonɛkĩ mina nɛ yĩ sɛkɛ̃ kito kayɔkayi a.