Ⅱ
Kristo Nyɛ Boe Obumɛnanɛ.
Ⅰ Yĩ babi, nlamɛna fɔlɛtsa kĩĩ katsɛlɛ kamɛna mi ayekĩ miláakɛna tɔkpa. Lɛmɛ ntɛ odi kɛna tɔkpa ni, budeĩ odi kĩ yawãnɛ boe lɔlɔ nɛ Ɔlɛga a sɛkɛ̃. Ade ye nyɛ Yesu Kristo kĩ ɛnyɛ oti kpĩĩ a.
Ⅱ Kristo akũ Baguma tsã ɛkɔa boe tɔkpa ete boe. Nnɛ́ boe odi tɔkpa ɛkɔa ete, mbom ɛkɔa ete batidziwa flee.
Ⅲ Ntɛ bɔakɛna nɛ Baguma mbla a akũ ni, fɔ́afɔ̃ bɔmɔ́ buyi ɔsũ kĩ bunyina ye.
Ⅳ Oti a kĩ yalɛ kĩ, “Ĩnyina ye,” lɛmɛ yaákɛna nɛ ye mbla a akũ ni, ɔvãlɛvã yanɛ, ade ɔnɔkɔali a lɛláa ye kamɛ a.
Ⅴ Lɛmɛ odi nyɛ odi kĩ yakɛna nɛ ye kalɛ a akũ ni, ade ye ɔdɔ a kĩ edeĩ ɛkpa Baguma a lɛkpɔla a. Ayekĩ bɔ́akɛna bunyi kĩ bɔkɛna ɔmɔa mɔ Baguma nyɛ kĩ,
Ⅵ Odi nyɛ odi kĩ yalɛ kĩ edeĩ nɛ Baguma kamɛ ni, kɛnɛ kĩ edzi nkpã ndɛ ayekĩ Yesu Kristo dzi a.
Mikɛna Nɛ Mbla Vɔɛ̃ a Akũ.
Ⅶ Yĩ bakɔba kĩ maátunɔ kalɛ, nnɔ mbla vɔɛ̃ ntsɛlɛ mama mi, mbom mbla kɔɛ a kĩ bɛkpa mi kito anɛ kayɔkayi a yanɛ. Mbla kɔɛ a nyɛ ɔlɛdo a kĩ minu kɔkɔɔkɔɛ a.
Ⅷ Lɛmɛ mbla a kĩ ntsɛlɛ finyaa mamɛna mi a nyɛ avɔɛ̃, ade ɔnɔkɔali a kĩ edeĩ nɛ ye kamɛ a lɛmɛ nyɛ akũ nɛ Kristo mɔ mi kamɛ a. Kitonɛkĩ ɔtũ a lamɛna katɛ̃ ade ɔhaĩ mɔawɛ a lamɛna kavɔlɛ kɔkɔɛ a.
Ⅸ Odi nyɛ odi kĩ yalɛ kĩ edeĩ nɛ ɔhaĩ a kamɛ, lɛmɛ yakesĩ ɔwaɛ̃ ni, ebuki edeĩ nɛ ɔtũ kamɛ kɛyawo finyaa.
Ⅹ Odi nyɛ odi kĩ yawɛ ɔwaɛ̃ kalɛ ni, edeĩ nɛ ɔhaĩ a kamɛ, foesũ lɛtsama lɛláafɔ̃ ɛkɛna tɔkpa.
Ⅺ Lɛmɛ odi nyɛ odi kĩ yakesĩ ɔwaɛ̃ ni, edeĩ nɛ ɔtũ kamɛ, ɛtsɛ̃ nɛ ɔtũ kamɛ, ade enyína awã kĩ yakpa, kitonɛkĩ ɔtũ a kɔ ye anɛ.
Ⅻ Mi babisɛ̃, mi nlamɛna ovoli kĩĩ katsɛlɛ kama, kitonɛkĩ bɛkɔa mi tɔkpa bite mi nɛ Kristo sũ.
ⅩⅢ Mi balɛga, mi nlamɛna ovoli kĩĩ katsɛlɛ kama, kitonɛkĩ minyi Kristo a kĩ edeĩ nkpã kito anɛ kayɔkayi a.
Mi bapopo, mi nlamɛna ovoli kĩĩ katsɛlɛ kama, kitonɛkĩ minya Oti Kpa a akũ.
ⅩⅣ Mi babisɛ̃, mi nlamɛna ovoli kĩĩ katsɛlɛ kama, kitonɛkĩ minyina Ɔlɛga a.
Mi balɛga a, ntsɛlɛ mma mi, kitonɛkĩ minyina Kristo a kĩ edeĩ nkpã kito anɛ kayɔkayi a.
Mi bapopo, ntsɛlɛ mma mi, kitonɛkĩ mideĩ kɔbɛ̃, Baguma kalɛ a deĩ nɛ mi kamɛ, ade minya Oti Kpa a akũ a.
ⅩⅤ Mitawɛ katinya ĩye fɔtsa a kĩ fudeĩ nɛ ke kamɛ a fudima kalɛ. Ntɛ odi awɛ katinya kalɛ ni, Ɔlɛga a ɔdɔ lɛláa ye kamɛ.
ⅩⅥ Kitonɛkĩ katinya kamɛ fɔtsa flee kĩ fɔakɔ sukɛna odo, ĩye fɔakɔ anɛ odo, mɔ fɔtsa a kĩ oti apia nɛ foe akũ a lɛmɛ, fudima táto Ɔlɛga a sɛkɛ̃, mbom katinya kamɛ futo.
ⅩⅦ Katinya mɔ ke kamɛ fɔtsa a kĩ fɔakɔ oti odo aatɛ̃, lɛmɛ oti a kĩ yakɛna nɛ Baguma kawɛ akũ a, aadzi nkpã daa.
Midã Kadã Wĩ Nɛ Kristo Bakesĩnɛ a Akũ.
ⅩⅧ Yĩ babi, katinya kawũna a fuã! Ndɛ ayekĩ minu kĩ Kristo okesĩnɛ a aaya a, finyaakĩĩ malo Kristo bakesĩnɛ pii nɛ́ kɔkɔɛ, nɛ foesũ bunyina kĩ katinya kawũna a fuã.
ⅩⅨ Nɛ ɔnɔkɔali kamɛ ni, boe kamɛ bati kĩĩ nɛ́ bito, lɛmɛ bɛláa boe kamɛ. Kitonɛkĩ ntɛ boe kamɛ bideĩ ni, kufɛ bibuki bideĩ nɛ boe kamɛ. Lɛmɛ bɛdzakũ ayekĩ fɔ́anɛ fɔwa pefee kĩ be kamɛ odima lɛnyɛ́ boe ode.
ⅩⅩ Lɛmɛ Kristo kɔa Hũhũ Kpalɛwa eko nɛ mi akũ, ade mi flee minyi ɔnɔkɔali a.
ⅩⅪ Nnɛ́ kĩ minyína ɔnɔkɔali a sũ mɔ matsɛlɛ mi ovoli kĩĩ, mbom ayekĩ minyina ɔnɔkɔali a, ade minyina lɛmɛ kĩ fɔvã lɛláa ɔnɔkɔali a kamɛ sũ.
ⅩⅫ Foesũ owei koũ nyɛ ɔvãlɛvã a? Ade ye nyɛ oti a kĩ yalɛ kĩ nnɛ́ Yesu nyɛ Kristo a. Ade oti kĩĩ odu liti ɛnyɛ Kristo okesĩnɛ a kĩ esĩ Ɔlɛga a mɔ Obi a flee a.
ⅩⅩⅢ Kitonɛkĩ odi nyɛ odi kĩ esĩ Obi a ni, Ɔlɛga a lɛnyɛ́ ye ode. Odi nyɛ odi kĩ ɛtɛ Obi ni, Ɔlɛga a nyɛ ye ode.
ⅩⅩⅣ Mifɔ̃ fɔlɛtsa a kĩ minu kito kayɔkayi a fɔna nɛ mi tɔwɔlɛ kamɛ. Ntɛ mipi fɔlɛtsa a kĩ minu a midomɔ akũ ni, míapuli mina nɛ ɔmɔa kakɛna kamɛ mɔ Obi a mɔ Ɔlɛga a.
ⅩⅩⅤ Lɛtsa a kĩ Kristo mɔawɛ lɛ eyi kĩ yaakpa boe nyɛ nkpã kĩ ɛlá kawũna a.
ⅩⅩⅥ Ade bati a kĩ bawɛ kĩ bakɛ mi a akũ fɔlɛtsa nlamɛna katsɛlɛ kama mi a.
ⅩⅩⅦ Lɛmɛ mi kɔ̃ kugua a kĩ Kristo tsɛla mi buki kudeĩ nɛ mi kamɛ, foesũ fɔtásĩ kĩ odima abuki ɛtsa mi fɔtsa. Kitonɛkĩ ye kugua katsɛla a atsa mi lɛtsa nyɛ lɛtsa, ade fɔtsa a kĩ kɔatsa a nyɛ ɔnɔkɔali kĩ fɔvã lɛláa foe kamɛ. Foesũ mikɛna nɛ ye fɔtsa katsa a akũ lɔkɔa mina nɛ Kristo kamɛ.
ⅩⅩⅧ Foesũ finyaa, yĩ babi, midzi nɛ Kristo kamɛ, ayekĩ ntɛ ɛyanɛ ɛta nɛ Luwi akũ ni, bɔ́ado ɔwɔlɛ, kĩ kɔnyɔã lɛmɛ lɛláakɔ boe nɛ ye anɛ.
ⅩⅩⅨ Ntɛ minyina kĩ Kristo nyɛ oti kpĩĩ ni, kɛnɛ kĩ mitɛ mido kĩ odi nyɛ odi kĩ yakɛna fɔtsa wĩ ni, Baguma obi yanɛ.