2
Boe Ekawo Tuiordae Tumeardae Pagado Boei
1 Imedage nure tagi. Pagimijera Jesus Cristo pemegare boe jamedu boe kori rugadu. Tameartorure Pagimijera Jesusji rugadu. Dukodire iwo tawie. Tagaba tardae tameardae pagado boei. Mare tameardaewo boei boe remawu tabo taro pemegawo boe eiamedu boei.
2 Ia meri keje tamode bato pui tamagowo Pao Kurireu bagai baruto dukeje ime pobedu doge emode turemo tawaito. Tarduwakare ei mare ia ukudau areia moture. Meture ierako tadawu tori kuieje anel moture. Mare nou metia ukudau areia pegagodure. Motu bokware rugadu.
3-4 Tamode tameardae pagado ei dukeje tagagomode nou ukudau areia motureuji uwo tumugudo nono boe pemegareu keje ira pemegareu keje. Mare tagagomode nou ukudau areia pegagodureuji jamedu ukawo tumugudo. Uwo tumugudo mare toro moto keje boe erdukawo ji. Tagagore aino ei dukeje tanure tameardae pegado ei. Tamode tameardae pagado ei dukeje taro pegamode rugadu. Tamode ekimijerado tagi tagaiwowo ero bagai tarduwo ia ero pegareuji ia ero pemegareuji mare pagatu jere taroino. Mare iwo tawie tarokaba aino boei. Tagaba tardae tameardae pagado boei. Tameardaewo boei boe remawu tabo boe pemegareu tabo taro pemegawo boe eiamedu boei.
5 Imeardu kurire jiwuge imedage nure tagi. Iwo tawie. Meartorukare Pao Kurireu jiwuge emeardae pagare oe bokwareugei, emago pegare ei jamedu enoe bokware kodi. Mare ia oe bokwareuge emeartorure Pao Kurireuji. Dukodire ere nono oe kurireuge emogadure Pao Kurireu jakai. Mare boe enoe ji karega inagoino. Emodukare tugera ra tumeartorure Pao Kurireu jitu piji. Dujire inagoino. Dukodire Pao Kurireu ure tugeragu nou oe bokwareugei pudae tuwo enoe kurido baru tada tuwo emugudo pudabo baru tada, tuwo boe eimijeragedo emage baru tada. Marigudu Pao Kurireu makore meardu kurire puduiwugei. Akore tumoduie meardu kurire puduiwuge eiamedu boe eimijeragedo emage baru tada toro ia meri keje. Ainore Pao Kurireu akore.
6 Ma kočare tagi tamago pegare oe bokwareugei. Mare oe kurireugeire tamago pemegare. Mare kočare emagere ere taekiripagado tuwo tagoe tawuje tabiji pudai. Ere tarego boe eimijera ae tumago pegare dutabo tuwo tumeardae pegareu maku nou boe eimijera ai nou boe eimijera uwo boe pegado tai tagoe bokwawo.
7 Nou oe kurireuge emago pegare tameartorure jiwu Pagimijera Jesusji jamedu. Boe eimijera pemegareu nure Jesusče mare nou oe kurireuge ewiapagakare nou inoduji. Emago pegare ji rugadu. Du inodu tabo tamago pemegare nou oe kurireugei. Kodiba taroino?
8 Pao Kurireu bataru padure bapera keje rugadu. Akore: – Tameardu kurido boei nono tameardu kuri moga tai dumogadure.
Ainore Pao Kurireu akore. Tameartorumode nou bataruji dukeje taromode jiboe umode turugadu Pao Kurireu jakai.
9 Mare tamode tardae tameardae pagado boei dukeje taro pegareu jire taroino. Dukodire meartorukare Pao Kurireu bataru jiwuge emode tagi. Dukodire ro pegareuge emode tagi Pao Kurireu jakai.
10 Boe emeartoru kuriago Pao Kurireu bataru jamedu boeji mare emeartorumodukare nouia Pao Kurireu bataru roguji dukeje meartoru bokwareuge emode emage Pao Kurireu jakai. Ro pegareu remawuge emode emage Pao Kurireu jakai rugadu.
11 Pao Kurireu akore boe eribarikaiago toreduje piji toredu piji. Pao Kurireu akore boe ekawo boe ewido jamedu. Ča boe eribarimodukare toreduje piji toredu piji mare emode ia boe ewido dukeje ro pegareuge emode emage rugadu Pao Kurireu jakai.
12-13 Pao Kurireu okudugodure boebo dukodire ure tuwadaru pemegareu maku boe etai eno bakaruče ewo tamudo bakaru jawu piji. Pao Kurireu ure tuwadaru pemegareu maku boe etai eno bakaru maiwuče emeartoruwo ji. Emeartorumode nou bakaru maiwuji dukeje Pao Kurireu okudugodumode ebo. Umodukare boe pegado ei ia ero pegareu moriče. Mare boe enogudumodukare boebo nono nou bakaru maiwu mako mogadure dukeje Pao Kurireu umode boe pegado ei ero pegareu moriče rugadu. Dukodire inure tawie. Tameartorudo nou Pao Kurireu ure maku boe etaiwu bakaru maiwuji rugadu. Tameartorudo ji tamago pemegareu tabo taro pemegareu tabo. Tameartorumode nou Pao Kurireu ure maku boe etaiwu bakaru maiwuji dukeje Pao Kurireu umodukare boe pegado tai ia taro pegareu moriče. Dukodire tamode tagamudo nouia bakaru jawu piji.
Boe Emeartorumode Jesusji Mare Ero Pemegamode Jamedu
14 Imedage nure tagi. Mare ia tagi tagagomode tameartoruie Jesusji mare tameartorumodukare Jesus bataruji dukodi pagare tagagoino. Tameartoru jokodukare Jesusji rugadu. Jesus umodukare taginorudo.
15-16 Ia meartorure Jesus jiwuge areme ime ekudau areia bokwamode eke bokwamode mare tamodukare ia tage maku etai tamodukare ia tagudau areia maku etai dukeje pagare tagagoino tameartoruie Jesusji. Etumode tabiji dukeje tagagomode ei: – Toro. Tagemode. Tagudau areia mode. Pao Kurireu uwo maku tagai. Ainore tagagomode mare tagare ia maku etai dukeje pagare tagagoino tameartoruie Jesusji. Tameartoru remawu mode Jesusji dukeje tamode ia tage maku etai, tamode ia tagudau areia maku etai.
17 Du aino ča imode tawie. Boe egomode tumeartoruie Jesusji mare emodukare turo pemegado boei dukeje pagare egoino. Jesus umodukare ekinorudo rugadu.
18 Ia boe egore i pudumie turo pemegaie mare imie imeartoruie Jesusji. Ainore ia boe egore. Mare imire itaidure boe ewo iordudo ia meartoru remawure Jesus jiwuge erore jiboeji. Ča iwo tawie. Boe emeartoru remawu mode Jesusji dukeje emode turo pemegado nono Jesus meardae mogadure rugadu.
19 Ia boe egore Pao Kurireu uie mitotu je. Nou emagore jiboe ure turugadu. Pao Kurireu ure mitotu je rugadu. Mare tu nou inodu jire emeartorumode dukeje emode nono bope doge emogadure. Pao Kurireu umodukare ekinorudo. Bope doge erduware Pao Kurireu ure mitotu je duji jamedu. Epagudure Pao Kurireuče dukodire etomagadugodure. Mare Pao Kurireu umodukare ekinorudo jamedu.
20 Tagagomode meartorure Jesus jiwu boe ewiagoromodukaie turo pemegawo dukeje jorduwa bokwareuge emode tagi. Boe egore tumeartoruie Jesusji mare ero pemegamodukare dukeje pagare egoino.
21-23 Ča iwo tawie. Meartoru remawu nure Jesus jiwu ro pemegamode rugadu. Boe etuo Abraão rore jiboe umode parduwado nou inoduji rugadu. Marigudu Abraão meartorure Pao Kurireuji dukodire Pao Kurireu ure tugeragu Abraãoji pudae tuwo udo nono ro pemegareu mogadure tiagai. Ainore Pao Kurireu bataru akore. Nono toro ia meri keje Pao Kurireu makore Abraãoji uwo tonaregedu Isaque bito tuwo tonaregedu Isaque maku Pao Kurireu ai. Dukodire Abraão ure tudo turugadu tuwo tonaregedu Isaque bito rugadu tuwo maku Pao Kurireu ai. Pao Kurireu jordure nou inoduji dukeje makore ji ukawo bito. Mare Pao Kurireu jorduware Abraão meartorumoduie pudui turo jamedu boe tabo. Abraão meartoru remawure Pao Kurireuji rugadu. Nono boe egore Pao Kurireu metia nure ema jamedu. Abraão akore tumeartoruie Pao Kurireuji. Nono meartorure Pao Kurireu makore pudui duji rugadu turo jamedu boe tabo. Abraão makore jiboe ure nono rore jiboe mogadure. Dukodire boe erduware Abraão meartoru remawure Pao Kurireuji rugadu.
24 Dukodire čare tarduware. Boe emeartoru remawumode Jesusji dukeje Jesus umode tugeragu ei pudae tuwo edo nono ro pemegareuge emogadure tiagai. Mare tu tuwadaru tabo boe emeartorumode Jesusji dukeje pagare egoino. Boe emeartoru remawumode Jesusji dukeje erore jiboe umode nono Jesus aidu mogadure jamedu. Dukodire Jesus umode tugeragu ei pudae tuwo edo nono ro pemegareuge emogadure tiagai.
25 Iwo tarduwado ia metiaji pugeje meartorure Pao Kurireu jiwuge ero pemegare rugadu. Marigudu Israel doge etaidure turugoduwo Jericó ba kurireu kejewugei tuwo tugeragu nou edaji epiji pudai dukodire ere tumedage etudo toro tubodu tabo taiwowo nou ba kurireu tadawu boei tuiorduwawo nuba turomode turugoduwo ei. Nono etaregodure toro dukeje ere tuwiado nou ba kurireu kejewu tugobaigarege epiji ia aredu jeribari diero bagaiwudo uwai tada. Nou aredu iere Raabe. Nou Raabe ro pemegare nou imei dukodire ure ewiado tugobaigarege epiji tuwai tada. Ure erduwado etuwo ia awaraji tuwo ekinorudo nou ba kurireu kejewu tugobaigarege epiji. Dukodire Pao Kurireu jordu pemegare nou areduji. Ure tugeragu ji pudae tuwo udo nono ro pemegareudo mogadure. Du meartorure Pao Kurireu jiwu ro pemegamode rugadu. Du jire inagoino.
26 Boe bimode rugadu dukeje padumode nono tuwi tabo. Bire rugadu. Boe erdumodukare ji pugeje. Nono ča ia boe egore tumeartoruie Jesusji mare erore jiboe ukare nono Jesus aidu mogadure dukeje nou boe ere nono nou bireu mogadure. Ero pemegare jiboe bokware. Mare ewi ji karega inagoino. Erore jiboe ukare nono Jesus aidu mogadure dukodire pagare egoino tumeartoruie Jesusji. Meartoru remawure Jesus jiwuge ekaregure emage. Jesus umodukare ekinorudo. Ewarigudumode bope doge eda kejewu joru pegareuto rugadu.