ལེའུ་གསུམ༌པ།
མཐའ་མའི་ཉིན་དག་གི་སྤྱོད་ལམ༌སྐོར།
1 དེ་ཡང་མཐའ་མའི་ཉིན་མོ་དག་ལ་དཀའ་སྡུག་ཆེ་བའི་དུས་ཤིག་སླེབ་ངེས་པ་ཤེས་པར༌གྱིས།
2 ཅིའི་ཕྱིར་ཞེ་ན། དེའི་དུས་སུ། མི་རྣམས་ཀྱིས་རང་དོན་ཁོ་ན་བསམ་ཞིང་རྒྱུ་ནོར་ལ་རྔམ་པ༌དང༌། རང་རློམ་ཆེ༌བ། ང་རྒྱལ་ཆེ༌བ། ཚིག་རྩུབ་སྨྲ༌བ། ཕ་མའི་ངག་ལ་མི་ཉན༌པ། བཀའ་དྲིན་མི་དྲན༌པ། དམ་པ་མ་ཡིན༌པ།
3 བརྩེ་སེམས་མེད༌པ། འགལ་བའི་མདུད་པ་མི་དགྲོལ༌བ། སྙོན་འཛུགས་པར་དགའ༌བ། རང་ཚོད་མི་ཟིན༌པ། གདུག་རྩུབ་ཆེ༌བ། དོན་བཟང་པོར་མི་དགའ༌བ།
4 ངོ་ལོག༌པ། མི་ལས་དགུ་ལས། རང་ཆེ་རང་མཐོ། འདོད་ཡོན་ལ་ཆགས་པ་ལས་དཀོན་མཆོག་ལ་མི་དགའ་བ་བཅས་འབྱུང་བ་ཡིན་ནོ།།
5 དེ་དག་ལ་དད་གུས་ཀྱི་ཕྱི་ཚུལ་ཙམ་ཡོད༌ནའང༌དད་གུས་ཀྱི་སྙིང་པོ་སྤངས་ཡོད་པས་ཁྱོད་ཀྱིས་དེའི་རིགས་དང་རྒྱང་བཀྱེད་པར༌བྱའོ།།
6 མི་དེ་དག་གི་ཁྲོད་དུ་འགའ་ཞིག་བུད་མེད་བླུན་མ་རྣམས་ཀྱི་ཁྱིམ་དུ་འཛུལ་ནས་ཁོ་མོ་དག་ལ་དབང་བསྒྱུར༌ཞིང་། བུད་མེད་དེ་དག་ནི་སྡིག་པའི་ཁུར་གྱིས་མནན་ཞིང་འདོད་ཆགས་སྣ་ཚོགས་ཀྱིས་བསླུས༌ཏེ།
7 བདེན་པ་ཉིད་རྟག་ཏུ་བསླབས་དང་སློབ་བཞིན་ཡོད་ནའང་དོན་ནི་གཏན་ནས་རྟོགས་མི་ནུས་སོ།།
8 སྔོན་ཆད་ཡཱན་ནེ་དང་ཡཱམ་བྲེ་གཉིས་ཀྱིས་མོ་ཤེ་ལ་ཇི་ལྟར་རྒོལ་བ་བཞིན། མི་འདི་དག་གིས་ཀྱང་བདེན་པ་ཉིད་ལ་རྒོལ་བ༌དང༌། དེ་དག་གི་བསམ་པ་ངན་པར་གྱུར་པས་དེ་རྣམས་ནི་དད་པའི་ཆ་ནས་འདོར་རུང༌བ་ཡིན་ནོ།།
9 འོན་ཀྱང༌། མི་དེ་དག་གི་བླུན་རྟགས་ནི་མི་དེ་གཉིས་དང་འདྲ་བར་ཐམས་ཅད་ཀྱི་མདུན་དུ་གསལ་རྗེན་དུ་མངོན་ངེས༌པས། སྤྱོད་ལམ་དེ་ལྟ་བུ་འཕེལ་བར་མི་འགྱུར༌རོ།།
ཕོལ་ལོལ་གྱིས་ཐི་མོ་ཐེ་ལ་གདམས༌པ།
10 འོན་ཀྱང་། ཁྱོད་ཀྱིས་བདག་གི་སློབ་སྟོན༌དང༌། སྤྱོད༌ལམ། ཕུགས་འདུན། དད༌པ། བཟོད༌སྒོམ། བྱམས༌པ། བཟོད་བསྲན་བཅས་ལ་བསྟུན་པར་མ༌ཟད།
11 སྔོན་ཆད་ངས་ཨན་ཏི་ཡོག་ཡཱ་དང༌། ཨི་ཀོན་ཡུ། ལིས་ཏྲ་བཅས་ནས་མྱངས་པའི་གཉའ་གནོན་དང་སྡུག་བསྔལ་ལའང་བསྟུན༌ཏེ། བདག་གིས་བཟོད་བསྲན་བྱས་པའི་གཉའ་གནོན་ནི་ཅི་འདྲའི་ཚབས་ཆེ་ཨང་། འོན་ཀྱང་གཙོ་བོས་ང་རང་དེ་ཐམས་ཅད་ལས་བསྐྱབས༌པའོ།།
12 སྤྱིར་མཱ་ཤི་ཀ་ཡེ་ཤུའི་ནང་དུ་དད་གུས་ངང་འཚོ་འདོད་པ་ཐམས་ཅད་ལ་གཉའ་གནོན་ཐེབས་ངེས༌ཡིན།
13 མི་ངན་པ་དང་བསླུ་བྲིད་བྱེད་མཁན་རྣམས་ནི་སྔར་ལས་ཀྱང་ཇེ་ངན་དུ་འགྱུར་བ༌དང༌། མི་ལ་མགོ་སྐོར་གཏོང་བ་དང་རང་ཉིད་ཀྱང་མི་གཞན་གྱི་གཡོ་འོག་ཏུ་ཚུད་པར་འགྱུར་རོ།།
14 འོན་ཀྱང༌། ཁྱོད་ཀྱིས་ཅི་ཞིག་བསླབས་པ་དང་གང་ཞིག་ལ་མཐའ་གཅིག་ཏུ་བློ་གཏོད་པ་དེ་ནི་མུ་མཐུད་དུ་སེམས་སུ་འཛིན་དགོས༌ལ། ཁྱོད་ཀྱིས་དོན་དེ་རྣམས་སུ་ཞིག་ནས་བསླབས་པ་ཤེས་པར་མ༌ཟད།
15 ཁྱོད་ཀྱིས་ཆུང་དུས་ནས་དམ་པའི་གསུང་རབ་ཀྱང་རྟོགས༌ཤིང་། དམ་པའི་གསུང་རབ་ཀྱིས་ཁྱོད་ལ་མཱ་ཤི་ཀ་ཡེ་ཤུར་དད་པའི་སྒོ་ནས་ཐར་པའི་ལམ་དུ་ཁྲིད་པའི་ཤེས་རབ་བསྩལ་ནུས་སོ།།
16 དམ་པའི་གསུང་རབ་ཡོངས་རྫོགས་ནི་དཀོན་མཆོག་གིས་ཞལ་ཕུ་གནང་བ་ལས་བྱུང་ཞིང་། སློབ་སྟོན་གནང་བ༌དང༌། སྐྱོན་སྟོན༌པ། ཡོ་བསྲང་བྱེད་པ། དྲང་བདེན་གྱི་ཕྱོགས་སུ་ཁྲིད་སྟོན་བྱེད་པའི་ཐད་ལ་ཕན་ཐོགས་མཆིས་སོ།།
17 དེ་ནི་དཀོན་མཆོག་ལ་གཏོགས་པའི་མི་རྣམས་ཆ་ཡོངས་སུ་ཚང་བ༌དང༌། ལས་བཟང་པོའི་རིགས་ཐམས་ཅད་བསྒྲུབ་པར་སྟ་གོན་མཛད་པའི་ཕྱིར༌རོ།།