ལེའུ་ཉེར་གཅིག་པ།
ཡེ་རུ་སཱ་ལེམ་གསར་པ།
1 ཡང་བདག་གིས་གནམ་ས་གསར་པ་ཞིག་མཐོང་ངོ་།། རྒྱུ་མཚན་གནམ་ས་སྔ་མ་ནི་འདས་ཤིང་རྒྱ་མཚོ་ཡང་མེད་པར་གྱུར་པའི་ཕྱིར་རོ།།
2 ཡང་གྲོང་ཁྱེར་དམ་པ་སྟེ་ཡེ་རུ་སཱ་ལེམ་གསར་པ་ནི་དཀོན་མཆོག་ནས་བྱུང་ཞིང་ནམ་མཁའི་ཞིང་ཁམས་ལས་བབས་པ་བདག་གིས་མཐོང་ངོ་།། དེ་ནི་སྟ་གོན་བྱས་ཚར་བའི་བག་གསར་གྱིས་གཟབ་མཆོར་སྤྲས་ནས་མག་པར་སྒུག་པ་དང་མཚུངས།
3 དེ་ནས་བདག་གིས་བཞུགས་ཁྲི་ནས་སྐད་ཆེན་པོ་ཞིག་གྲགས་ཡོང་བ་ཐོས་ཤིང་འདི་སྐད་དུ། ལྟོས་དང༌། དཀོན་མཆོག་གི་གུར་མཆོག་ནི་མི་རྣམས་ཀྱི་དབུས་སུ་མཆིས་ཤིང་། ཁོང་མི་རྣམས་དང་མཉམ་དུ་བཞུགས་ཏེ། མི་རྣམས་ཁོང་གི་འབངས་མི་རུ་འགྱུར་བ་དང་། དཀོན་མཆོག་ནི་སྐུ་དངོས་སུ་ཁོ་རྣམས་དང་མཉམ་དུ་བཞུགས་ཤིང་ཁོ་རྣམས་ཀྱི་དཀོན་མཆོག་ཡིན་པར་འགྱུར།
4 དཀོན་མཆོག་གིས་ཁོ་རྣམས་ཀྱི་མིག་ཆུ་ཐམས་ཅད་དབྱི་བར་འགྱུར་ཞིང་། སྔོན་གྱི་དོན་རྣམས་འདས་ཟིན་པས། ད་ནི་འཆི་བ་ཡོད་མི་སྲིད་ལ། མྱ་ངན་དང་། ངུ་འབོད། ཟུག་གཟེར་བཅས་ཀྱང་ཡོད་མི་སྲིད་དོ།།
5 བཞུགས་ཁྲིའི་སྟེང་དུ་བཞུགས་མཁན་གྱིས་འདི་སྐད་དུ། ལྟོས་དང་། བདག་གིས་ཐམས་ཅད་གསར་དུ་སྐྲུན་པ་ཡིན་ཞེས་དང་། ཡང་འདི་སྐད་དུ། བཀའ་འདི་རྣམས་ནི་ཡིད་རྟོན་རུང་བ་དང་བདེན་པ་ཡིན་པས། ཁྱོད་ཀྱིས་ཡི་གེར་འགོད་པར་བྱའོ་ཞེས་གསུངས་སོ།།
6 ཡང་ཁོང་གིས་བདག་ལ་འདི་སྐད་དུ། ལེགས་པར་གྲུབ་འདུག ང་ནི་ཨལ་ཕཱ་དང་ཨོ་མེ་ཀ་སྟེ། ཐོག་མ་དང་མཐའ་མ་ཡིན་ནོ།། ངས་ཚེ་སྲོག་གི་ཆུ་མིག་ལས་ཁ་སྐོམ་པ་རྣམས་ལ་རིན་མི་དགོས་པར་གནང་བར་ངེས།
7 རྣམ་པར་རྒྱལ་པ་རྣམས་ལ་དོན་འདི་དག་འཐོབ་པར་འགྱུར་བ་དང་། བདག་ནི་ཁོ་རྣམས་ཀྱི་དཀོན་མཆོག་ཡིན་ཞིང་། དེ་རྣམས་ནི་བདག་གི་བུ་ཡིན་པར་འགྱུར་རོ།།
8 འོན་ཀྱང་། སྡར་མ་དང་། དད་པ་མེད་པ། ཞེན་ལོག་པ། ལག་དམར། ལོག་གཡེམ་པ། སྒྱུ་འཕྲུལ་པ། སྐུ་འདྲར་བརྟེན་མཁན། རྫུན་སྨྲ་མཁན་ཐམས་ཅད་ལ་འཐོབ་པའི་སྐལ་ནི་མུ་ཟི་འབར་བའི་མེ་མཚོ་ནང་དུ་ཡོད་ཅིང་། དེ་ནི་འཆི་བ་ཐེངས་གཉིས་པ་ཡིན་ཞེས་གསུངས་སོ།།
9 དེ་ནས་མཐའ་མའི་ཆག་སྒོ་བདུན་གྱིས་གང་བའི་ཕོར་བ་བདུན་བཟུང་ཡོད་པའི་ཕོ་ཉ་བདུན་ལས་གཅིག་ཡོང་སྟེ་བདག་ལ་འདི་སྐད་དུ། ཁྱོད་འདིར་ཤོག་དང་། བདག་གིས་ཁྱོད་ལ་བག་གསར་སྟོན་པར་བྱའོ།། དེ་ནི་ལུ་གུའི་ཆུང་མ་ཡིན་ཞེས་གསུངས་སོ།།
10 དེ་ནས་ཕོ་ཉ་དེས་ང་རང་དམ་པའི་ཐུགས་ཉིད་ཀྱི་ངང་ནས་མཐོ་ཞིང་ཆེ་བའི་རི་ཞིག་ཏུ་ཁྲིད་དེ། དཀོན་མཆོག་ནས་བྱུང་ཞིང་ནམ་མཁའི་ཞིང་ཁམས་ལས་བབས་པའི་གྲོང་ཁྱེར་དམ་པ་ཡེ་རུ་སཱ་ལེམ་བདག་ལ་བསྟན།
11 གྲོང་ཁྱེར་དེ་ལ་དཀོན་མཆོག་གི་གཟི་བརྗིད་ལྡན་པ་དང་། གྲོང་ཁྱེར་གྱི་གཟི་འོད་ནི་རིན་ཐང་ཆེ་བའི་རྡོ་དང་མཚུངས་ཤིང་གཡང་ཊི་སྔོན་པོ་དང་འདྲ་བ། ཆུ་ཤེལ་ལྟར་དྭངས་པ་ཡིན།
12 དེ་ལ་མཐོ་ཞིང་ཆེ་བའི་མཁར་གྱང་དང་། མཁར་སྒོ་བཅུ་གཉིས། མཁར་སྒོ་རུ་ཕོ་ཉ་བཅུ་གཉིས་བཅས་མཆིས། མཁར་སྒོའི་སྟེང་དུ་ཡེས་ར་ཨེལ་བུ་རྒྱུད་ཀྱི་ཚོ་པ་བཅུ་གཉིས་པོའི་མིང་བཀོད་ཡོད་དོ།།
13 ཤར་ཕྱོགས་སུ་མཁར་སྒོ་གསུམ་དང་། བྱང་ཕྱོགས་སུ་མཁར་སྒོ་གསུམ། ལྷོ་ཕྱོགས་སུ་མཁར་སྒོ་གསུམ། ནུབ་ཕྱོགས་སུ་མཁར་སྒོ་གསུམ་བཅས་མཆིས།
14 གྲོང་ཁྱེར་གྱི་མཁར་གྱང་ལ་རྟིང་རྡོ་བཅུ་གཉིས་ཡོད་ལ། རྟིང་རྡོ་བཅུ་གཉིས་ཀྱི་སྟེང་དུ་ལུ་གུའི་སྐུ་ཚབ་པ་བཅུ་གཉིས་ཀྱི་མིང་བཀོད་ཡོད་དོ།།
15 བདག་ལ་གཏམ་སྨྲ་མཁན་གྱིས་ཕྱག་ཏུ་གསེར་གྱི་ཐིག་ཤིང་བཟུང་སྟེ་གྲོང་ཁྱེར་དང་། མཁར་སྒོ། མཁར་གྱང་བཅས་ཀྱི་ཚད་ཐིག་འཇལ་བའི་ཕྱིར་རོ།།
16 གྲོང་ཁྱེར་དེ་ནི་གྲུ་བཞི་མ་སྟེ་སྲིད་ཞེང་གཉིས་འདྲའོ།། ཕོ་ཉས་ཕྱག་ཏུ་ཐིག་ཤིང་བཟུང་ནས་གྲོང་ཁྱེར་གྱི་ཚད་ཐིག་འཇལ་བ་ལ་རྒྱང་གྲགས་ཆིག་ཁྲི་ཉིས་སྟོང་ལྷག་ཡིན། སྲིད་ཞེང་མཐོ་གསུམ་འདྲའོ།།
17 ཡང་ཁོང་གིས་གྲོང་ཁྱེར་གྱི་མཁར་གྱང་གི་ཚད་ཐིག་འཇལ་བ་ལ། མིའི་ཚད་གཞི་བཞིན་ཏེ་ཕོ་ཉའི་ཚད་གཞི་ལྟར་ན་ཁྲུ་བརྒྱ་དང་ཞེ་བཞི་མཆིས།
18 མཁར་གྱང་ནི་གཡང་ཊི་སྔོན་པོས་བཟོས་ཤིང་། གྲོང་ཁྱེར་ནི་གསེར་སྦྱངས་བཙོ་མས་བཟོས་པ་དང་ཆུ་ཤེལ་ལྟར་དྭངས་ཤིང་གསལ།
19 མཁར་གྱང་གི་རྟིང་གཞི་ནི་རིན་པོ་ཆེ་སྣ་ཚོགས་ཀྱིས་བརྒྱན་ཞིང་། རྟིང་གཞི་དང་པོ་ནི་གཡང་ཊི་སྔོན་པོ་དང་། གཉིས་པ་ནི་ཨིནྡྲ་ནཱི་ལ། གསུམ་པ་ནི་པད་མ་རཱ་ག བཞི་པ་ནི་མ་རྒད།
20 ལྔ་པ་ནི་མཆོང་། དྲུག་པ་ནི་པདྨ་རཱ་ག བདུན་པ་ནི་བཻཌཱུརྱ་སུ་ག་ཏ། བརྒྱད་པ་ནི་བཻཌཱུརྱ་ལྗང་སེར། དགུ་པ་ནི་སྤྲིན་རྡོ། བཅུ་པ་ནི་བཻཌཱུརྱ་ལྗང་དཀར། བཅུ་གཅིག་པ་ནི་རྟ་ཀླད་སྨུག་པོ། བཅུ་གཉིས་པ་ནི་མུ་མེན་བཅས་ཡིན།
21 མཁར་སྒོ་བཅུ་གཉིས་ནི་མུ་ཏིག་བཅུ་གཉིས་ཡིན་ཞིང་། མཁར་སྒོ་རེ་རེ་མུ་ཏིག་རེ་རེས་བཟོས་པ་དང་། གྲོང་ཁྱེར་ནང་གི་སྲང་ལམ་ནི་གསེར་སྦྱངས་བཙོ་མས་བཟོས་པ་དང་ཆུ་ཤེལ་ལྟར་དྭངས་ཤིང་གསལ་ལོ།།
22 བདག་གིས་གྲོང་ཁྱེར་ནང་དུ་མཆོད་ཁང་ཡོད་པ་མ་མཐོང་ངོ་།། རྒྱུ་མཚན་ནི་གཙོ་བོ་དཀོན་མཆོག་སྟེ་ཀུན་དབང་དེ་ཉིད་དང་ལུ་གུ་ནི་གྲོང་ཁྱེར་གྱི་མཆོད་ཁང་ཡིན་པའི་ཕྱིར་རོ།།
23 དཀོན་མཆོག་གི་གཟི་བརྗིད་ཀྱིས་འོད་ཟེར་འཕྲོ་བ་དང་ལུ་གུ་ནི་གྲོང་ཁྱེར་གྱི་སྒྲོན་མེ་ཡིན་པས། གྲོང་ཁྱེར་ནང་དུ་ཉི་ཟླའི་འོད་ཟེར་མཁོ་བ་མེད།
24 རྒྱལ་ཁབ་ཐམས་ཅད་ནི་གྲོང་ཁྱེར་གྱི་འོད་ཟེར་ལ་བརྟེན་ནས་སྐྱོད་ཅིང་། ས་སྟེང་གི་རྒྱལ་པོ་ཐམས་ཅད་ཀྱིས་རང་གི་གཟི་བརྗིད་གྲོང་ཁྱེར་དེ་ལ་འབུལ་ངེས་ཡིན།
25 གྲོང་ཁྱེར་གྱི་མཁར་སྒོ་ནི་ཉིན་མོར་ཅིས་ཀྱང་མི་གཏན་ཏེ། གནས་དེར་མཚན་མོ་མེད་པའི་ཕྱིར་རོ།།
26 མི་རྣམས་ཀྱིས་རྒྱལ་ཁབ་ཐམས་ཅད་ཀྱི་གཟི་བརྗིད་དང་གུས་བཀུར་བཅས་གྲོང་ཁྱེར་དེ་ལ་འབུལ་ངེས་ཡིན།
27 མི་གཙང་བའམ། ཡང་ན་ཞེན་ལོག་པ་དང་རྫུན་གྱི་ལས་བྱེད་མཁན་སུ་ཡིན་ཡང་གྲོང་ཁྱེར་དེའི་ནང་དུ་འགྲོ་མི་ནུས་ཏེ། ལུ་གུའི་ཚེ་སྲོག་གི་གླེགས་བམ་ནང་དུ་མིང་ཐོ་བཀོད་ཡོད་པ་ཁོ་ན་དེའི་ནང་དུ་འགྲོ་ནུས་སོ།།