ལེའུ་གཉིས་པ།
ཨེ་ཕེ་སི་གྲོང་ཁྱེར་གྱི་ཆོས་ཚོགས་ལ་སྤྲིངས་པའི་འཕྲིན་ཡིག
1 ཡང་ཁོང་གིས་འདི་སྐད་དུ། ཁྱོད་ཀྱིས་ཨེ་ཕེ་སིའི་ཆོས་ཚོགས་ཀྱི་ཕོ་ཉ་ལ་འཕྲིན་ཡིག་བྲིས་ཏེ་འདི་ལྟར་སྨྲ་བར་བྱའོ།། ཕྱག་གཡས་པར་སྐར་མ་བདུན་ཐོགས་ཤིང་། གསེར་གྱི་སྒྲོན་སྟེགས་བདུན་གྱི་ཁྲོད་དུ་བགྲོད་མཁན་གྱིས་འདི་སྐད་དུ།
2 ཁྱོད་ཀྱིས་བྱས་པའི་ལས་དང་། དཀའ་ངལ། བཟོད་བསྲན་བཅས་ངས་ཤེས་པར་མ་ཟད། ཁྱོད་ཀྱིས་མི་ངན་ལ་བཟོད་པ་སྒོམ་མི་ཐུབ་པ་ཡང་ཤེས། ཁྱོད་ཀྱིས་དེ་སྔར་རང་ཉིད་སྐུ་ཚབ་པ་ཡིན་ཟེར་ཡང་སྐུ་ཚབ་པ་དངོས་མིན་པ་རྣམས་ལ་ཚོད་བགམས་ཏེ། ཁོ་རྣམས་རྫུས་མ་ཡིན་པ་རྟོགས་པའང་ཤེས།
3 དེ་སྔར་ཁྱོད་ཀྱིས་བཟོད་བསྲན་བྱས་ནས། བདག་གི་མིང་གི་ཆེད་དུ་དཀའ་སྡུག་མྱངས་ཀྱང་ཐང་མ་ཆད་པའང་བདག་གིས་ཤེས་སོ།།
4 འོན་ཀྱང་། ཁྱོད་ཀྱིས་ཐོག་མར་ཡོད་པའི་བྱམས་པ་སྤངས་པས། བདག་གིས་ཁྱོད་ལ་སྐྱོན་འགེལ་བར་བྱའོ།།
5 དེའི་ཕྱིར། ཁྱོད་ནི་ཇི་ལྟར་ཉམས་པར་གྱུར་པ་ལ་ཕྱིར་དྲན་བྱ་འོས་པར་མ་ཟད། འགྱོད་བཤགས་བྱས་ཏེ་ཐོག་མར་ཅི་ལྟར་བྱས་པ་བཞིན་བྱེད་དགོས། གལ་ཏེ་ཁྱོད་ཀྱིས་འགྱོད་བཤགས་མི་བྱེད་ན། ང་རང་ཁྱོད་ཀྱི་གམ་དུ་ཡོང་ནས་སྒྲོན་སྟེགས་དེ་རང་གནས་ལས་ལེན་པར་བྱའོ།།
6 འོན་ཀྱང་། ཁྱོད་ལ་བཟང་ཆ་གཅིག་རང་ཡོད་པ་ནི། ཁྱོད་རང་ནེ་ཀོ་ལཱ་པ་རྣམས་ཀྱི་སྤྱོད་ལམ་ལ་སྡང་སེམས་ཆེ། ང་རང་ཡང་དེ་ལ་སྡང་བའོ།།
7 རྣ་བ་ཡོད་པ་ཐམས་ཅད་ཀྱིས་དམ་པའི་ཐུགས་ཉིད་ཀྱིས་ཆོས་ཚོགས་ཡོངས་ལ་གསུངས་པའི་བཀའ་ལ་མཉན་པར་བྱའོ།། བདག་གིས་རྒྱལ་ཁ་ལེན་མཁན་རྣམས་ལ་དཀོན་མཆོག་གི་དགའ་བདེའི་ལྡུམ་རར་ཡོད་པའི་ཚེ་སྲོག་གི་ལྗོན་ཤིང་ལས་བཟའ་བྱར་གནང་བར་ངེས་ཞེས་གསུངས་སོ།།
སི་མིར་ནཱ་གྲོང་ཁྱེར་གྱི་ཆོས་ཚོགས་ལ་སྤྲིངས་པའི་འཕྲིན་ཡིག
8 ཡང་ཁོང་གིས་འདི་སྐད་དུ། ཁྱོད་ཀྱིས་སི་མིར་ནཱའི་ཆོས་ཚོགས་ཀྱི་ཕོ་ཉ་ལ་འཕྲིན་ཡིག་བྲིས་ཏེ་འདི་ལྟར་སྨྲ་བར་བྱའོ།། ཐོག་མ་དང་མཐའ་མ་ཡིན་ལ། སྔར་གྲོངས་ནའང་སླར་གསོན་པ་དེ་ཉིད་ཀྱིས་འདི་སྐད་དུ།
9 ངས་ཁྱོད་ཀྱི་དཀའ་སྡུག་དང་དབུལ་ཕོངས་ཤེས་ལ། དོན་དམ་དུ་ཁྱོད་ནི་ཕྱུག་པོ་ཡིན། ཡང་རང་ཉིད་ཡ་ཧུ་དཱ་པ་ཡིན་ཟེར་བ་དག་གིས་སྐུར་འདེབས་ཀྱི་གཏམ་སྨྲས་པའང་བདག་གིས་ཤེས། དོན་དངོས་སུ་དེ་དག་ནི་ཡ་ཧུ་དཱ་པ་མ་ཡིན་པར། བདུད་སཱ་ཏན་གྱི་ཚོགས་ཁག་ལ་གཏོགས་པ་ཡིན།
10 ཁྱོད་ནི་སྡུག་བསྔལ་མྱང་བར་འགྱུར་བ་ལ་འཇིགས་པར་མི་བྱའོ།། ལྟོས་དང་། བདུད་ཀྱིས་ཁྱོད་ཅག་ལས་འགའ་ཞིག་བཙོན་དུ་བཅུག་ནས་ཁྱོད་རྣམས་ལ་ཚོད་བརྟག་བྱེད་ཅིང་། ཁྱོད་ཅག་གིས་ཉིན་བཅུའི་རིང་ལ་དཀའ་སྡུག་མྱང་ངེས་ཡིན། འོན་ཀྱང་འཆི་བའི་བར་དུ་བློ་སེམས་བརྟན་པར་གྱིས་དང་། བདག་གིས་ཁྱོད་ལ་ཚེ་སྲོག་གི་ཅོད་པན་གནང་བར་བྱའོ།།
11 རྣ་བ་ཡོད་པ་ཐམས་ཅད་ཀྱིས་དམ་པའི་ཐུགས་ཉིད་ཀྱིས་ཆོས་ཚོགས་ཡོངས་ལ་གསུངས་པའི་བཀའ་ལ་མཉན་པར་བྱའོ།། རྒྱལ་ཁ་ལེན་མཁན་རྣམས་ལ་འཆི་བ་ཐེངས་གཉིས་པའི་གནོད་འཚེ་ཐེབས་སུ་མི་འཇུག་པ་ཁག་ཐེག་ཡིན་ཞེས་གསུངས་སོ།།
ཕེར་ག་མུ་གྲོང་ཁྱེར་གྱི་ཆོས་ཚོགས་ལ་སྤྲིངས་པའི་འཕྲིན་ཡིག
12 ཁྱོད་ཀྱིས་ཕེར་ག་མུའི་ཆོས་ཚོགས་ཀྱི་ཕོ་ཉ་ལ་འཕྲིན་ཡིག་བྲིས་ཏེ་འདི་ལྟར་སྨྲ་བར་བྱའོ།། རལ་གྲི་རྣོན་པོ་ཁ་གཉིས་ཅན་ཐོགས་མཁན་གྱིས་འདི་སྐད་དུ།
13 ཁྱོད་ཀྱི་སྡོད་གནས་ནི་བདུད་སཱ་ཏན་གྱི་ཁྲི་ཡོད་ས་ཡིན་ཞིང་། བདག་གི་བློ་སེམས་དཀར་པོའི་དཔང་པོ་ཨན་ཏི་པཱ་ནི་ཁྱོད་ཅག་ཁྲོད་དུ་བདུད་སཱ་ཏན་སྡོད་སར་བཀྲོངས་པའི་ཉིན་མོ་དག་ལ། ཁྱོད་ཀྱིས་ད་དུང་བདག་གི་མིང་བརྟན་པོར་བསྲུངས་ཤིང་། བདག་ལ་དད་ལོག་མ་བྱས་པ་བདག་གིས་ཤེས་སོ།།
14 འོན་ཀྱང་། དོན་འགའ་ཤས་ཀྱི་ཆ་ནས། བདག་གིས་ཁྱོད་ལ་སྐྱོན་འགེལ་བར་བྱའོ།། རྒྱུ་མཚན་ནི་ཁྱོད་ཅག་གི་ཁྲོད་དུ་པེལ་ཨམ་གྱི་བསླབ་བྱར་བསྟུན་མཁན་ཡོད། པེལ་ཨམ་གྱིས་སྔོན་ཆད་པཱ་ལག་ལ་ཡེས་ར་ཨེལ་གྱི་བུ་རྒྱུད་ཀྱི་མདུན་དུ་བཀག་རྡོ་བཞག་ནས། ཁོ་རྣམས་ལ་སྐུ་འདྲར་ཕུལ་བའི་མཆོད་རྫས་ཟ་བ་དང་ལོག་གཡེམ་བྱེད་པའི་བསླབ་བྱ་གནང་ཞིང་།
15 ཡང་དེ་བཞིན་དུ་ཁྱོད་ཅག་གི་ཁྲོད་དུ་མི་ཁ་ཤས་ཀྱིས་ནེ་ཀོ་ལཱ་པ་རྣམས་ཀྱི་བསླབ་བྱར་བསྟུན་པ་རེད།
16 དེའི་ཕྱིར། ཁྱོད་ཀྱིས་འགྱོད་བཤགས་བྱོས་ཤིག གལ་ཏེ་འགྱོད་བཤགས་མི་བྱེད་ན། བདག་ནི་མྱུར་བ་མྱུར་བར་ཁྱོད་ཀྱི་གམ་དུ་ཡོང་སྟེ། བདག་གི་ཁ་ནས་ཐོན་པའི་རལ་གྲིས་ཁོ་རྣམས་ལ་རྒོལ་བར་བྱའོ།།
17 རྣ་བ་ཡོད་པ་ཐམས་ཅད་ཀྱིས་དམ་པའི་ཐུགས་ཉིད་ཀྱིས་ཆོས་ཚོགས་ཡོངས་ལ་གསུངས་པའི་བཀའ་ལ་མཉན་པར་བྱའོ།། རྒྱལ་ཁ་ལེན་མཁན་རྣམས་ལ་སྦས་ཤིང་གབ་པའི་མཱན་ནཱ་དེ་ལས་གནང་ངེས་པར་མ་ཟད། རྡོ་དཀར་པོ་ཞིག་ཀྱང་གནང་བར་འགྱུར་ལ། རྡོའི་ཐོག་ཏུ་མིང་གསར་པ་བརྐོས་ཤིང་། ཐོབ་མཁན་ལས་གཞན་སུས་ཀྱང་རྟོགས་པར་མི་འགྱུར་ཞེས་གསུངས་སོ།།
ཐི་ཨ་ཏེ་རཱ་གྲོང་ཁྱེར་གྱི་ཆོས་ཚོགས་ལ་སྤྲིངས་པའི་འཕྲིན་ཡིག
18 ཁྱོད་ཀྱིས་ཐི་ཨ་ཏེ་རཱ་ཡི་ཆོས་ཚོགས་ཀྱི་ཕོ་ཉ་ལ་འཕྲིན་ཡིག་བྲིས་ཏེ་འདི་ལྟར་སྨྲ་བར་བྱའོ།། སྤྱན་ཟུང་ནི་མེ་ལྕེ་དང་མཚུངས་ཤིང་ཞབས་ནི་འོད་འཕྲོ་བའི་ལི་དང་འདྲ་བའི་དཀོན་མཆོག་གི་སྲས་ཀྱིས་འདི་སྐད་དུ།
19 ཁྱོད་ཀྱིས་བྱས་པའི་ལས་དང་། བྱམས་པ། དད་སེམས། ལས་བརྩོན། བཟོད་བསྲན་བཅས་བདག་གིས་ཤེས་པར་མ་ཟད། ཁྱོད་ཀྱིས་ཕྱིས་སུ་བྱས་པའི་ལས་རྣམས་སྔར་ལས་ཀྱང་ལྷག་ཏུ་མང་བའང་ཤེས་སོ།།
20 འོན་ཀྱང་། དོན་འདིའི་ཆ་ནས་བདག་གིས་ཁྱོད་ལ་སྐྱོན་འགེལ་ཏེ། རང་ཉིད་ལུང་སྟོན་པ་ཡིན་ཟེར་བའི་བུད་མེད་ཡེ་ཟི་བེལ་གྱིས་བདག་གི་ཞབས་ཕྱི་པ་རྣམས་ལ་ཁྲིད་སྟོན་དང་བསླུ་བྲིད་བྱས་ཤིང་། དེ་དག་གིས་ལོག་གཡེམ་བྱེད་པ་དང་སྐུ་འདྲར་ཕུལ་བའི་མཆོད་རྫས་ཟོས་ཀྱང་ཁྱོད་ཀྱིས་ཁོ་མོ་ལ་བཟོད་པ་སྒོམ་པའི་ཕྱིར་རོ།།
21 བདག་གིས་ཁོ་མོར་འགྱོད་བཤགས་བྱེད་པའི་གོ་སྐབས་སྤྲད་ནའང་། ཁོ་མོས་ལོག་གཡེམ་ལས་འགྱོད་བཤགས་བྱེད་པར་མི་འདོད།
22 ལྟོས་དང་། བདག་གིས་ཁོ་མོ་མལ་སར་ལྷུང་བར་བྱེད་པ་དང་། ཁོ་མོ་དང་མཉམ་དུ་ལོག་གཡེམ་བྱེད་མཁན་རྣམས་ཀྱིས་ཁོ་མོའི་སྤྱོད་ལམ་ལས་འགྱོད་བཤགས་མི་བྱེད་ན། བདག་གིས་དེ་རྣམས་ལའང་དཀའ་སྡུག་ཆེན་པོ་མྱང་དུ་འཇུག་པ་ཡིན།
23 ཡང་བདག་གིས་ཁོ་མོའི་བུ་ཕྲུག་རྣམས་འཆི་ལམ་དུ་བརྫང་བར་བྱེད་ཅིང་། བདག་ནི་མིའི་སེམས་དང་བསམ་པར་རྟོག་དཔྱོད་བྱེད་མཁན་ཡིན་པར་མ་ཟད། ཁྱོད་རྣམས་ཀྱིས་ལས་ཅི་བྱས་པ་རེ་རེ་ལ་ལན་སློག་མཁན་ཡིན་པའང་ཆོས་ཚོགས་ཡོངས་ཀྱིས་ཤེས་པར་འགྱུར་རོ།།
24 ཡང་ཁྱོད་ཅག་ཐི་ཨ་ཏེ་རཱ་ཡི་མི་གཞན་དག་སྟེ། དེ་དག་གི་བསླབ་བྱ་ལ་མི་ཉན་པ་དང་། གཞན་རྣམས་གྱིས་རྒྱུན་དུ་གླེང་བའི་བདུད་སཱ་ཏན་གྱི་གསང་བ་ཟེར་བ་མི་རྟོགས་པ་ཐམས་ཅད་ལ། བདག་གིས་ཁུར་བོ་གཞན་ཞིག་ཁྱོད་ཅག་གི་ཕྲག་ལ་མི་འགེལ་ཞེས་སྨྲ་བ་ཡིན།
25 འོན་ཀྱང་། ཁྱོད་ཅག་ལ་ཅི་ཞིག་ཡོད་པ་དེ་ང་རང་ཡོང་བའི་བར་དུ་བརྟན་པོར་བསྲུང་བར་བྱའོ།།
26 རྒྱལ་ཁ་ལེན་ཞིང་བདག་གི་འཕྲིན་ལས་རྣམས་མཐར་ཐུག་བར་དུ་སྲུང་མཁན་ལ། བདག་གིས་རྒྱལ་ཁབ་ཁག་ལ་དབང་བསྒྱུར་བའི་མངའ་ཐང་གནང་བར་བྱ་སྟེ།
27 བདག་ལ་རང་གི་ཡབ་ལས་དབང་ཐང་ཐོབ་པ་བཞིན། ཁོས་ལྕགས་དབྱུག་བཟུང་ནས་དེ་རྣམས་ལ་དབང་བསྒྱུར་ཅིང་དེ་དག་རྫ་ཆས་རྡུལ་དུ་བརླག་པ་བཞིན་དུ་འགྱུར་ཞིང་།
28 ཡང་བདག་གིས་ཐོ་རེངས་སྐར་ཆེན་ཁོ་ལ་གནང་བར་བྱའོ།།
29 རྣ་བ་ཡོད་པ་ཐམས་ཅད་ཀྱིས་དམ་པའི་ཐུགས་ཉིད་ཀྱིས་ཆོས་ཚོགས་ཡོངས་ལ་གསུངས་པའི་བཀའ་ལ་མཉན་པར་བྱའོ་ཞེས་གསུངས་སོ།།