ལེའུ་བཅུ་དགུ་པ།
ཧ་ལེ་ལོའུ་ཡཱ།
1 དེའི་རྗེས་སུ། བདག་གིས་ནམ་མཁའི་ཞིང་ཁམས་ནས་འདུ་ཚོགས་ཆེན་པོའི་སྐད་སྒྲ་ལྟ་བུ་ཞིག་ཐོས་ཏེ་འདི་སྐད་དུ།
ཧ་ལེ་ལོའུ་ཡཱ་ཐར་པ་དང་།།
གཟི་བརྗིད་དབང་ཐང་ཐམས་ཅད་པོ།།
བདག་ཅག་དཀོན་མཆོག་ཉིད་ལ་གཏོགས།།
2 ཁོང་གིས་བཅད་པའི་ཉེས་ཆད་ནི།།
བདེན་ཅིང་དྲང་པོ་ཡིན་ལགས་པས།།
ཁོང་གིས་སྨད་འཚོང་ཆེན་མོ་ལ།།
ཉེས་ཆད་བཅད་པ་ཡིན་ལགས་སོ།།
ཁོ་མོས་ལོག་གཡེམ་ལ་བརྟེན་ནས།།
འཇིག་རྟེན་འདི་ནི་རྫོབ་པར་བྱས།།
དཀོན་མཆོག་གིས་ནི་ཁོང་ཉིད་ཀྱི།།
ཞབས་ཕྱི་རྣམས་ཀྱི་བཞུར་བའི་ཁྲག །
སྨད་འཚོང་མ་ལས་ཁྲག་ལན་བླངས།།
ཞེས་གསུངས་སོ།།
3 ཡང་འདི་སྐད་དུ།
ཀྱེ་ཀྱེ་ཧ་ལེ་ལོའུ་ཡཱ་ཀྱེ།།
ཁོ་མོ་བསྲེག་པའི་དུ་བ་ནི།།
ནམ་ཞར་དགུང་ལ་རྟག་ཏུ་འཕྱུར།།
ཞེས་གསུངས་སོ།།
4 རྒན་པོ་ཉེར་བཞི་དང་སེམས་ཅན་བཞི་པོས་ཕྱག་བཙལ་ནས་ཁྲི་ལ་བཞུགས་པའི་དཀོན་མཆོག་ལ་བསྟོད་བསྔགས་ཕུལ་ཏེ་ན་རེ། ཨ་མེན། ཧ་ལེ་ལོའུ་ཡཱ་ཞེས་བརྗོད་དོ།།
5 དེ་ནས་བཞུགས་ཁྲི་ནས་གསུང་སྐད་ཅིག་ཐོན་ཏེ་འདི་སྐད་དུ།
ཀྱེ་ཀྱེ་དཀོན་མཆོག་ཉིད་ཀྱི་ཞབས་ཕྱི་ཀུན།།
ཁོང་ལ་གུས་ཤིང་འཇིགས་པར་བྱེད་མཁན་དང་།།
མི་སྣ་ཆེ་ཆུང་དབྱེ་བ་མེད་པ་ཡི།།
ཀུན་གྱིས་བདག་ཅག་དཀོན་མཆོག་བསྟོད་པར་ཤོག །
ཅེས་གསུངས་སོ།།
6 ཡང་བདག་གིས་འདུ་ཚོགས་ཆེན་པོའི་སྐད་སྒྲ་ལྟ་བུ་ཞིག་ཐོས་ཤིང་། དེ་ནི་ཆུ་མང་པོའི་སྒྲ་དང་འབྲུག་སྒྲ་ལྡིར་བ་དང་མཚུངས་པར་འདི་སྐད་དུ།
རང་རེའི་གཙོ་བོ་དཀོན་མཆོག་ཀུན་དབང་ཉིད༎
རྒྱལ་པོར་བཞུགས་པས་ཧ་ལེ་ལོའུ་ཡཱ་ཀྱེ།།
7 ལུ་གུའི་བག་སྟོན་དུས་ལ་བབས་པ་དང་།།
ཁོང་གི་བག་མས་སྟ་གོན་བྱས་ཚར་ཕྱིར།།
བདག་ཅག་དགའ་མགུ་རང་ཞིང་སྤྲོ་བ་དང་།།
ཁོང་ལ་བསྟོད་བསྔགས་བརྗོད་པར་འོས་སོ་ལོ།།
8 དྭངས་ཤིང་གཙང་ལ་འོད་སྣང་འཕྲོ་བ་ཡི།།
སོ་རས་སྲབ་བུའི་གྱོན་གོས་ཁོ་མོར་གནང་།།
ཞེས་བརྗོད་པ་དང་། སོ་རས་སྲབ་བུའི་གྱོན་གོས་དེ་ནི་དད་ལྡན་དམ་པ་དག་གིས་བྱས་པའི་དྲང་བདེན་གྱི་ལས་རྣམས་ཡིན་ནོ།།
9 དེ་ནས་ཕོ་ཉ་དེས་བདག་ལ་འདི་སྐད་དུ། ལུ་གུའི་གཉེན་སྟོན་ལ་གདན་ཞུ་གནང་བ་ཐམས་ཅད་བདེའོ་ཞེས་ཁྱོད་ཀྱིས་ཡི་གེར་འགོད་པར་བྱའོ་ཞེས་གསུངས་པ་དང་། ཡང་ཁོང་གིས་བདག་ལ་འདི་སྐད་དུ། འདི་རྣམས་ནི་དཀོན་མཆོག་གི་བདེན་པའི་བཀའ་ཡིན་ཞེས་གསུངས་སོ།།
10 བདག་གིས་ཁོང་གི་ཞབས་དྲུང་དུ་ཕྱག་བཙལ་ནས་བསྟོད་བསྔགས་བརྗོད་པར་བརྩམས་པ་ན། ཁོང་གིས་དེ་ལྟར་ཡེ་ནས་བྱ་མི་རུང་སྟེ། ང་རང་ཡང་སྐྱབས་མགོན་ཡེ་ཤུར་བདེན་དཔང་བྱེད་མཁན་ཁྱོད་དང་ཁྱོད་ཀྱི་སྤུན་ཟླ་བཞིན་དུ་ཞབས་ཕྱི་པ་ཡིན། ཁྱོད་ཀྱིས་དཀོན་མཆོག་ལ་བསྟོད་པ་འབུལ་འོས་ཏེ། རྒྱུ་མཚན་སྐྱབས་མགོན་ཡེ་ཤུར་བདེན་དཔང་བྱེད་པ་ནི་ལུང་བསྟན་འཆད་པའི་སེམས་ཉིད་ཡིན་ཞེས་གསུངས་སོ།།
རྟ་དཀར་པོར་བཅིབ་མཁན།
11 དེ་ནས་བདག་གིས་ནམ་མཁའི་ཞིང་ཁམས་ཕྱེས་ཡོད་པ་མཐོང་བ་དང་། ལྟོས་དང་། དེ་རུ་རྟ་དཀར་པོ་ཞིག་ཡོད་ཅིང་། རྟ་དེར་བཅིབ་མཁན་ལ་བློ་གཏད་རུང་བ་དང་བདེན་པ་ལགས་སོ་ཞེས་གསོལ་བ་དང་། ཁོང་གིས་དྲང་བདེན་གྱི་ངང་ནས་ཉེས་ཆད་གཅོད་པ་དང་དམག་འདྲེན་ནོ།།
12 ཁོང་གི་སྤྱན་ཟུང་ནི་མེ་ལྕེ་དང་མཚུངས་ལ། ཁོང་གི་དབུ་ལ་ཅོད་པན་མང་པོ་མནབས་པ་དང༌། ཁོང་གི་སྐུ་ལུས་ཀྱི་སྟེང་དུ་རང་ལས་གཞན་སུས་ཀྱང་མི་ཤེས་པའི་མཚན་ཞིག་བཀོད་ཡོད།
13 ཁྲག་ལ་སྦངས་པའི་ན་བཟའ་ཁོང་གིས་མནབས་ཤིང་། ཁོང་གི་མཚན་ལ་དཀོན་མཆོག་གི་བཀའ་ཞེས་གསོལ།
14 ནམ་མཁའི་ཞིང་ཁམས་སུ་ཡོད་པའི་དམག་དཔུང་རྟ་དཀར་པོར་བཞོན་པ་དང་། ལུས་ལ་དཀར་ཞིང་གཙང་བའི་སོ་རས་སྲབ་བུ་གྱོན་ནས་ཁོང་གི་རྗེས་སུ་འབྲང་ངོ་།།
15 རྒྱལ་ཁབ་རྣམས་ལ་རྡེག་པའི་ཕྱིར་ཁོང་གི་ཞལ་ལས་རལ་གྲི་རྣོན་པོ་ཐོན་ཞིང་། ཁོང་གིས་ལྕགས་ཀྱི་དབྱུག་པས་ཁོ་རྣམས་འཚོ་སྐྱོང་བྱེད་པར་འགྱུར་ཞིང་། ཀུན་དབང་དཀོན་མཆོག་གི་ཐུགས་ཁྲོ་དྲག་པོའི་རྒུན་འབྲུམ་འཚིར་གཞོང་ལ་རྡོག་བརྫིས་གཏོང་བར་མཛད།
16 ཁོང་གི་ལྭ་རིང་དང་བརླའི་སྟེང་དུ། རྒྱལ་པོ་རྣམས་ཀྱི་རྒྱལ་པོ་དང་། གཙོ་བོ་རྣམས་ཀྱི་གཙོ་བོ་ཞེས་པའི་མིང་རྟགས་བཀོད་འདུག་གོ།
17 དེ་ནས་བདག་གིས་ཕོ་ཉ་ཞིག་ཉི་མའི་ནང་དུ་འགྲེངས་ནས་བསྡད་ཡོད་པ་མཐོང་ཞིང་། ཁོང་གིས་བར་སྣང་དུ་འཕུར་བའི་འདབ་ཆགས་རྣམས་ལ་སྐད་ཆེན་པོས་འདི་སྐད་དུ། ཁྱོད་རྣམས་ལྷན་དུ་འདུས་ནས་དཀོན་མཆོག་གི་སྟོན་ཆེན་ལ་ཞུགས་པར་གྱིས།
18 རྒྱལ་པོ་དང་། དམག་དཔོན། སྟོབས་ཅན་བཅས་ཀྱི་ཤ་དང་། རྟ་དང་རྟ་དམག་གི་ཤ གཞན་ཡང་རང་དབང་ཅན་དང་གཡོག་པོ། མི་མཆོག་དམན་ཐམས་ཅད་ཀྱི་ཤ་བཅས་བཟའ་རུང་ཞེས་གསུངས་སོ།།
19 ཡང་བདག་གིས་གཅན་གཟན་དེ་དང་ས་སྟེང་གི་རྒྱལ་པོ། དེ་དག་གི་དམག་དཔུང་ཐམས་ཅད་འདུས་པ་མཐོང་ངོ་།། དེ་ནི་རྟ་ལ་བཅིབ་མཁན་དང་ཁོང་གི་དམག་དཔུང་ལ་འཐབ་པའི་ཕྱིར་ཡིན།
20 འོན་ཀྱང་གཅན་གཟན་དེ་ནི་བཟུང་ཞིང་། དེའི་མིག་སྔར་གྲུབ་རྟགས་རྣམས་བསྟན་ཏེ། གཅན་གཟན་གྱི་རྟགས་བརྒྱབ་ཡོད་པ་དང་གཅན་གཟན་གྱི་གཟུགས་བརྙན་ལ་ཕྱག་འཚལ་བའི་མི་རྣམས་བསླུ་མཁན་གྱི་ལུང་སྟོན་པ་རྫུས་མ་ཡང་གཅན་གཟན་དང་མཉམ་དུ་བཟུང་ཞིང་། དེ་གཉིས་ཀ་མུ་ཟི་འབར་བའི་མེ་མཚོའི་ནང་དུ་གསོན་པོར་གཡུགས་སོ།།
21 འཕྲོ་མ་རྣམས་རྟ་དཀར་པོར་བཅིབ་མཁན་གྱི་ཞལ་ནས་ཐོན་པའི་རལ་གྲིས་བསད་པ་དང་། བྱ་ཐམས་ཅད་ཀྱིས་དེ་དག་གི་ཤ་ཟོས་ནས་ལྟོ་བ་འགྲངས་པར་གྱུར་ཏོ།།