ལེའུ་བཅུ་གཉིས་པ།
བུད་མེད་དང་འབྲུག་གི་སྐོར།
1 ནམ་མཁའ་རུ་ངོ་མཚར་བའི་ལྟས་ཆེན་པོ་བྱུང་སྟེ། བུད་མེད་ཅིག་ཡོད་པ་དེས་ལུས་ལ་ཉི་མ་གྱོན་ཞིང་ཟླ་བ་རྐང་འོག་ཏུ་མནན་པ་དང་། མགོ་ལ་སྐར་མ་བཅུ་གཉིས་ཀྱི་ཅོད་པན་གྱོན་ལ།
2 ཁོ་མོར་མངལ་སྦྲུམ་པ་དང་ཕྲུ་གུ་བཙའ་བའི་དཀའ་སྡུག་ཁྲོད་ཟུག་གཟེར་གྱི་འཁུན་སྒྲ་འབྱིན་ནོ།།
3 ཡང་ནམ་མཁའ་ནས་ངོ་མཚར་བའི་ལྟས་གཞན་ཞིག་བྱུང་སྟེ། ལྟོས་དང་། འབྲུག་ཆེན་དམར་པོ་ཞིག་ཡོད་པ་ལ་མགོ་བདུན་དང་རྭ་ཅོ་བཅུ་ཐོགས་པ་དང་། མགོ་བོ་བདུན་པོར་ཅོད་པན་རེ་གྱོན་ཡོད།
4 འབྲུག་གི་རྔ་མས་ནམ་མཁའི་སྐར་མ་རྣམས་ཀྱི་གསུམ་ཆའི་གཅིག་དྲུད་ནས་ས་གཞིར་གཡུགས་ཤིང་། བུད་མེད་ཀྱིས་ཕྲུ་གུ་བཙས་རྗེས་ཁོ་མོའི་ཕྲུ་གུ་ཁྱུར་མིད་གཏོང་ཕྱིར། འབྲུག་དེ་ནི་ཕྲུ་གུ་བཙའ་རན་པའི་བུད་མེད་དེའི་མདུན་དུ་འགྲེངས་ནས་བསྡད་དོ།།
5 དེ་ནས་བུད་མེད་ཀྱིས་བུ་ཞིག་བཙས་ཤིང་བུ་དེ་ནི་མ་འོངས་པར་ལྕགས་ཀྱི་དབྱུག་པས་རྒྱལ་ཁབ་ཐམས་ཅད་སྐྱོང་མཁན་ཡིན་ལ། ཁོ་མོའི་བྱིས་པ་ནི་དཀོན་མཆོག་དང་ཁོང་ཉིད་ཀྱི་བཞུགས་ཁྲིའི་གནས་སུ་ཡར་དྲངས་པ་རེད།
6 བུད་མེད་དབེན་སྟོང་དུ་བྲོས་ཤིང་། གནས་དེ་རུ་དཀོན་མཆོག་གིས་ཁོ་མོར་ས་ཆ་ཞིག་སྟ་གོན་མཛད་ཡོད་དེ། ཉིན་ཆིག་སྟོང་ཉིས་བརྒྱ་དྲུག་ཅུ་ལ་ཁོ་མོ་སྐྱོང་བར་མཛད་པའི་ཕྱིར་རོ།།
7 དེ་ནས་ནམ་མཁའི་ཞིང་ཁམས་སུ་འཐབ་འཁྲུག་བྱུང་བ་སྟེ། ཕོ་ཉ་མེའ་ཀཱ་ཨེལ་དང་ཁོང་གི་འཁོར་རྣམས་འབྲུག་ལ་འཐབ་ཅིང་། འབྲུག་གིས་ཀྱང་ཁོའི་འཁོར་རྣམས་ལ་ལྷན་དུ་རྒོལ་བ་དང་།
8 རྒྱལ་ཁ་མ་ལོན་ཞིང་དུས་དེ་ནས་བཟུང་ནམ་མཁའི་ཞིང་ཁམས་སུ་དེ་རྣམས་ལ་སྡོད་ས་མེད་དོ།།
9 འབྲུག་ཆེན་ནི་གནའ་བོའི་སྦྲུལ་དེ་ཡིན་པ་དང་མིང་ལ་བདུད་དང་། ཡང་ན་སཱ་ཏན་ཞེས་ཀྱང་ཟེར་ཏེ། འཇིག་རྟེན་ཡོངས་ལ་སླུ་བྲིད་གཏོང་མཁན་ཡིན། འབྲུག་ཆེན་དེ་ས་གཞིར་གཡུགས་ཤིང་ཁོའི་འཁོར་རྣམས་ཀྱང་ལྷན་དུ་སར་གཡུགས་པའོ།།
10 དེ་ནས་ནམ་མཁའི་ཞིང་ཁམས་ནས་སྐད་ཆེན་པོ་ཞིག་གིས་འདི་སྐད་དུ་གསུངས་པ་བདག་གིས་ཐོས་ཏེ།
བདག་ཅག་དཀོན་མཆོག་ཉིད་ཀྱི་ཐར་པ་དང་།།
ནུས་མཐུ་དང་ནི་རྒྱལ་སྲིད་བཅས་པ་དང་།།
ད་དུང་ཁོང་གི་མཱ་ཤི་ཀ་ཉིད་ཀྱི།།
དབང་ཐང་ཐམས་ཅད་ད་ལྟ་སླེབས་ཟིན་ཏོ།།
དེ་ནི་བདག་ཅག་དཀོན་མཆོག་ཞབས་དྲུང་དུ།།
ཉིན་མཚན་མེད་པར་བདག་ཅག་སྤུན་ཟླ་ལ།།
སྐྱོན་འཛུགས་མཁན་དེ་ས་ལ་གཡུགས་པས་སོ།།
11 སྤུན་ཟླ་རྣམས་ནི་དེ་ལས་རྒྱལ་བ་ཡང་།།
ལུ་གུའི་ཟུངས་ཁྲག་དང་ནི་རང་ཉིད་ཀྱི།།
བདེན་དཔང་ཚིག་ལ་བརྟེན་ནས་རྒྱལ་བ་འོ།།
ཁོ་རྣམས་འཆི་བའི་ལམ་དུ་འགྲོ་དགོས་ཀྱང་།།
རང་སྲོག་ལ་ནི་ཡེ་ནས་མ་འཛེམས་སོ།།
12 དེའི་ཕྱིར་ནམ་མཁའ་དང་ནི་གནས་དེ་རུ།།
བདེ་བར་སྡོད་པ་ཐམས་ཅད་སྤྲོ་བར་གྱིས།།
འོན་ཀྱང་ས་གཞི་དང་ནི་རྒྱ་མཚོ་ལ།།
ཆག་སྒོ་འབྱུང་བ་རྒྱུ་མཚན་ཅི་ཞེ་ན།།
བདུད་ཀྱིས་རང་ལ་དུས་ཡུན་མང་པོ་ཞིག །
མེད་པར་ཤེས་ནས་ཁོང་ཁྲོ་ཆེན་པོ་བཅས།།
ཁྱོད་ཅག་གམ་དུ་མར་ལ་ཡོང་བ་ཡིན།།
ཞེས་པའོ།།
13 འབྲུག་གིས་རང་ཉིད་སར་གཡུགས་པ་མཐོང་སྟེ། བུ་བཙའ་མཁན་བུད་མེད་དེ་ལ་མནར་གཅོད་བཏང་ངོ་།།
14 དེ་ནས་བུད་མེད་ལ་གླག་ཆེན་པོའི་གཤོག་ཟུང་གནང་སྟེ། ཁོ་མོ་དབེན་སྟོང་དུ་འཕུར་ཞིང་རང་གི་ས་ཆར་སོང་ནས་སྦྲུལ་དེ་ལ་གཞའ་ཐུབ་པའི་ཕྱིར་ཡིན། གནས་དེ་རུ་ཁོ་མོ་ལོ་གཅིག་དང་ལོ་གཉིས། ལོ་ཕྱེད་ཀ་བཅས་ལ་སྐྱོང་བར་མཛད་དོ།།
15 སྦྲུལ་གྱིས་བུད་མེད་ཀྱི་རྒྱབ་ཏུ་ཁ་ནས་ཆུ་བསྐྱུགས་ཤིང་། དེ་ནི་གཙང་པོ་དང་འདྲ་ཞིང་ཆུས་བུད་མེད་འཁུར་བའི་ཕྱིར་ཡིན་མོད།
16 འོན་ཀྱང་ས་གཞི་ཡིས་བུད་མེད་ལ་རོགས་བྱས་ཤིང་། ས་གཞིས་ཁ་གདངས་ཏེ་འབྲུག་གི་ཁ་ནས་བསྐྱུགས་པའི་གཙང་པོ་མིད་དོ།།
17 དེ་ནས་འབྲུག་བུད་མེད་ལ་རབ་ཏུ་ཁྲོས་ཏེ་ཁོ་མོའི་བུ་ཕྲུག་གཞན་རྣམས་ལ་འཐབ་ཏུ་སོང་ཞིང་། བུ་ཕྲུག་དེ་དག་ནི་དཀོན་མཆོག་གི་བཀའ་ཁྲིམས་བསྲུངས་ཤིང་སྐྱབས་མགོན་ཡེ་ཤུར་བདེན་དཔང་བྱེད་མཁན་རྣམས་ཡིན་ལ།
18 དེའི་དུས་སུ་འབྲུག་ནི་རྒྱ་མཚོའི་འགྲམ་གྱི་བྱེ་ཐང་དུ་འགྲེངས་ནས་བསྡད་ཡོད་དོ།།