ལེའུ་བཅུ་པ།
ཕོ་ཉ་དང་ཤོག་དྲིལ་ཆུང་བའི་སྐོར།
1 ཡང་བདག་གིས་ནུས་མཐུ་ཆེན་པོ་ལྡན་པའི་ཕོ་ཉ་གཞན་ཞིག་ནམ་མཁའི་ཞིང་ཁམས་ནས་མར་ཕེབས་པ་མཐོང་ངོ་།། ཁོང་ནི་སྤྲིན་ཕུང་གིས་གཡོགས་ཤིང་། དབུ་ལ་འཇའ་ཚོན་ཤར་བ་དང་། ཞལ་རས་ནི་ཉི་མ་དང་མཚུངས། ཞབས་ཟུང་ནི་མེའི་ཀ་བ་དང་འདྲ།
2 ཕྱག་ཏུ་ཁ་ཕྱེས་ཡོད་པའི་ཤོག་དྲིལ་ཆུང་བ་ཞིག་ཐོགས་ཤིང་། ཁོང་གིས་ཞབས་གཡས་པ་རྒྱ་མཚོ་དང་ཞབས་གཡོན་པ་ས་སྟེང་དུ་བཅགས་ཏེ།
3 གསུང་སྐད་ཆེན་པོ་བསྒྲགས་པ་ནི་སེང་གེས་ངར་སྐད་སྒྲོག་པ་ལྟ་བུ་ཡིན། གསུང་སྐད་བསྒྲགས་ཚར་བ་དང་འབྲུག་སྐད་བདུན་གྲགས།
4 འབྲུག་སྐད་བདུན་གྲགས་རྗེས་བདག་གིས་ཡི་གེར་འགོད་པར་རྩོམ་པ་ལ། ནམ་མཁའི་ཞིང་ཁམས་ནས་སྐད་སྒྲ་ཞིག་གིས་འདི་སྐད་དུ། འབྲུག་སྐད་བདུན་གྱིས་གསུངས་པ་ནི་ཁྱོད་ཀྱིས་གསང་དགོས་པ་ལས་ཡི་གེར་འགོད་མི་རུང་ཞེས་གསུངས་སོ།།
5 དེ་ནས་བདག་གིས་མཐོང་བའི་རྒྱ་མཚོ་དང་ས་སྟེང་ལ་ཞབས་ཀྱིས་བཅགས་པའི་ཕོ་ཉ་དེ་ཉིད་ཀྱིས་ནམ་མཁའི་ཞིང་ཁམས་ཀྱི་ཕྱོགས་སུ་ཕྱག་གཡས་པ་ཡར་བཀྱགས་ཏེ།
6 ནམ་མཁའ་དང་ནམ་མཁར་ཡོད་པའི་དངོས་པོ་དང་། ས་གཞི་དང་ས་གཞིར་ཡོད་པའི་དངོས་པོ། རྒྱ་མཚོ་དང་རྒྱ་མཚོར་ཡོད་པའི་དངོས་པོ་ཐམས་ཅད་སྐྲུན་མཁན་དང་། ཇི་སྲིད་བར་དུ་གསོན་པོར་བཞུགས་པ་ཁོང་ཉིད་ལ་བརྟེན་ནས་འདི་སྐད་དུ། ད་ནི་དུས་འགྱང་མི་རུང་ངོ་།།
7 འོན་ཀྱང་ཕོ་ཉ་བདུན་པས་དུང་སྐད་བསྒྲག་པའི་ཉིན་མོ་དག་ལ། དཀོན་མཆོག་གིས་རང་ཉིད་ཀྱི་ཞབས་ཕྱི་ལུང་སྟོན་པ་རྣམས་ལ་འཕྲིན་བཟང་བསྒྲགས་པ་བཞིན། ཁོང་གི་གསང་བ་འགྲུབ་པར་འགྱུར་ཞེས་དམ་བཅས་སོ།།
8 དེ་ནས་བདག་གིས་དེ་སྔར་ཐོས་པའི་ནམ་མཁའི་ཞིང་ཁམས་ནས་གྲགས་པའི་སྐད་སྒྲ་དེས་ཡང་བསྐྱར་བདག་ལ་འདི་སྐད་དུ། ཁྱོད་ཕར་སོང་ནས་རྒྱ་མཚོ་དང་ས་སྟེང་དུ་ཞབས་ཀྱིས་བཅགས་པའི་ཕོ་ཉའི་ཕྱག་ལས་ཁ་ཕྱེས་ཡོད་པའི་ཤོག་དྲིལ་ཆུང་བ་དེ་ཚུར་ལོངས་ཤིག་ཅེས་བཀའ་གནང་བས།
9 ང་རང་ཕོ་ཉའི་དྲུང་དུ་སོང་སྟེ། ཤོག་དྲིལ་ཆུང་བ་དེ་བདག་ལ་གནང་བར་མཛོད་ཅེས་ཞུས་པ་ན། ཁོང་གིས་འདི་སྐད་དུ། ཁྱོད་ཀྱིས་འདི་བླངས་ནས་བཟའ་བར་གྱིས། ཁྱོད་ཀྱི་ཕོ་བ་ནི་ཁ་མོར་འགྱུར་ཡང་། ཁྱོད་ཀྱི་ཁ་རུ་སྦྲང་རྩི་ལྟར་མངར་མོ་ཡིན་ཞེས་གསུངས་སོ།།
10 བདག་གིས་ཕོ་ཉའི་ཕྱག་ལས་ཤོག་དྲིལ་ཆུང་བ་ཚུར་བླངས་ཏེ་ཟོས་པ་དང་། བདག་གི་ཁ་ནང་དུ་དངོས་གནས་སྦྲང་རྩི་ལྟར་མངར་མོ་ཡིན་མོད། འོན་ཀྱང་ཟོས་པའི་རྗེས་སུ་ཕོ་བ་ནི་ཁ་མོར་གྱུར་ཏོ།།
11 ཡང་བདག་ལ་འདི་སྐད་དུ། ཁྱོད་ཀྱིས་ངེས་པར་མི་རིགས་དང་། རྒྱལ་ཁབ། སྐད་རིགས། རྒྱལ་པོ་བཅས་མང་པོ་ལ་ཡང་བསྐྱར་མ་འོངས་ལུང་བསྟན་གནང་དགོས་ཞེས་གསུངས་སོ།།