ལེའུ་གསུམ༌པ།
དཀོན་མཆོག་ནི་ཡིད་རྟོན་རུང་བ་ཡིན་པ།
1 དེས་ན་ཡ་ཧུ་དཱ་པ་རྣམས་ལ་བཟང་ཆ་ཅི་ཡོད་པ༌དང༌། མཚན་སྐྱི་གཅོད་པ་ལ་ཕན་ཡོན་ཅི་ཡོད་ཅེ༌ན།
2 ཕྱོགས་གང་གི་ཆ་ནས་ཀྱང་ཕན་ནུས་ཆེན་པོ་ཡོད༌དེ། ཕན་ནུས་གཙོ་བོ་ནི་དཀོན་མཆོག་གི་གསུང་མོལ་ཡ་ཧུ་དཱ་པ་རྣམས་ལ་བཅོལ་བ༌དེ་ཡིན་ནོ།།
3 དཀོན་མཆོག་ལ་དད་པ་མི་བྱེད་པ་འགའ་ཤས་ཡོད་ན་མི་འགྲིག་པ་ཅི་ཡོང་། མི་དེ་རྣམས་ལ་དད་པ་མེད་པའི་རྐྱེན་གྱིས་དཀོན་མཆོག་གི་ལྷག་བསམ་ཡང་མེད་པར་བཟོའམ་ཞེ༌ན།
4 གཏན་ནས་མི་བཟོ༌སྟེ། དཀོན་མཆོག་ནི་དངོས་གནས་བདེན་པ་ཡིན༌ཞིང་མིའི་རིགས་ཐམས་ཅད་ནི་རྫུན་བཤད་མཁན་ཡིན་པར་ངེས་སོ།། དེ་ལ་གསུང་རབ་ཀྱི་མདོ་ལས་ཇི་སྐད༌དུ།
ཁྱེད་ཀྱིས་བཀའ་བཀྱོན་གནང་བའི་དུས།།
ལྷག་བསམ་རྣམ་དག་མངོན་པར༌འགྱུར།།
ཁྱེད་ལ་ཁ་ཚོན་གཅོད་པའི༌དུས།།
ཁྱེད་ནི་རྣམ་པར་རྒྱལ་བར༌འགྱུར།།
ཞེས༌བཀོད་པའོ།།
5 བདག་གིས་མིའི་བཤད་སྲོལ་ལྟར་སྨྲ་བར་བྱ༌སྟེ། བདག་ཅག་གི་རང་གཤིས་མི་དྲང་བ་འདིས་དཀོན་མཆོག་གི་རྣམ་པར་དག་པ་མངོན་པར་གྱུར༌ན། བདག་ཅག་གིས་ཅི་ལྟར༌སྨྲའམ། ཐུགས་ཁྲོ་འབེབ་པར་མཛད་པའི་དཀོན་མཆོག་ནི་རྣམ་དག་མིན་ནམ་ཞེ་ན།
6 དེ་ལྟར་གཏན་ནས་སྨྲ་མི་རུང༌། གལ་ཏེ་རྣམ་དག་མིན་ཚེ། དཀོན་མཆོག་གིས་འཇིག་རྟེན་ཡོངས་ལ་ཁྲིམས་ཆད་ཅི་ལྟར་གཅོད༌དམ།
7 གལ་ཏེ་ངའི་རྫུན་གྱི་སྒོ་ནས་དཀོན་མཆོག་གི་བདེན་པ་ལྷག་ཏུ་མངོན་ཞིང་ཁོང་གི་གཟི་བརྗིད་ཀྱང་འཕེལ་བར་བྱེད༌ན། ཅིའི་ཕྱིར་བདག་ལ་ཉེས་ཅན་བཞིན་དུ་ཉེས་ཆད་གཅོད༌དམ།
8 ཅིའི་ཕྱིར་ངེད་ཅག་གིས་དོན་བཟང་འབྱུང་བའི་ཕྱིར་དོན་ངན་སྒྲུབ་པ་ཡིན་ཞེས་མི༌སྨྲའམ། དེ་ནི་ཕྲ་མ་བྱེད་མཁན་དུ་མས་ངེད་ཅག་ལ་དེ་ལྟར་སྨྲས་པ་ཡིན༌ལ། མི་དེ་ལྟ་བུ་རྣམས་ལ་ཁྲིམས་ཆད་འཕོག་འོས༌སོ།།
མི་གཞུང་དྲང་གཅིག་ཀྱང་མེད་པ།
9 དེས་ན་ཅི་ལྟར་ཡིན་ནམ། བདག་ཅག་ནི་ཁོ་རྣམས་ལས་ཀྱང་བཟང་པོ་ཡིན་ནམ་ཞེ༌ན། གཏན་ནས་མ་ཡིན་ནོ།། རྒྱུ་མཚན་ནི་ངེད་ཅག་གིས་བདེན་དཔང་བྱས་ཟིན༌ཏེ། ཡ་ཧུ་དཱ་པ་དང་གྷི་རིག་པ་ཐམས་ཅད་སྡིག་པའི་འོག་ཏུ་ཡོད་པ་ཡིན།
10 དེ་ལ་གསུང་རབ་ཀྱི་མདོ་ལས་ཇི་སྐད༌དུ།
གཞུང་དྲང་མི་ནི་ཡོད་པ་མ་ཡིན་ལ༎
དེ་འདྲ་གཅིག་ཀྱང༌ཡོད་པ་མ་ཡིན་ནོ༎
11 གོ་བ་ཡོད་པའི་མི་ནི་གཅིག་ཀྱང་མེད།།
དཀོན་མཆོག་འཚོལ༌མཁན་མི་ཡང་གཅིག་ཀྱང་མེད།།
12 ཐམས་ཅད་ཁོང་དང་བྲལ་ནས་ལོག་ལམ༌ཞུགས།།
དེ་འདྲའི་སྐྱེ་བོ་ཚང་མ་མཁོ་མེད་གྱུར།།
ལས་བཟང་སྒྲུབ་མཁན་ཡོད་པ་མ་ཡིན་ལ༎
དེ་འདྲ་གཅིག་ཀྱང༌ཡོད་པ་མ་ཡིན་ནོ།།
13 སྐྱེ་བོ་དེ་ཡི་མིད་ཐག་ཕྲ་མོ༌ནི།།
སྒོ་ཆེན་ཕྱེ་བའི་དུར་ཁུང་དང༌མཚུངས་ཤིང་།།
ལྕེ་ལ་བརྟེན་ནས་གཡོ་སྒྱུའི་སྦྱོར་བ༌སྤེལ།།
ཁ་ཡི་ནང་དུ་དུག་སྦྲུལ་རླངས་པ༌འཕྱུར།།
14 ངག་ཏུ་སྡིགས་དམོད་དང་ནི་ཚིག་རྩུབ་གང་།།
15 དམར་གསོད་ལས་ལ་རྐང་པ་ཕྱོགས་བཞིར༌བྲེལ།།
16 བརྒྱུགས་ཤུལ་ཀུན་ཏུ་དྲག་རྩུབ་སྡུག་གིས༌ཁྱབ།།
17 ཞི་བདེའི་ལམ་ནི་དེ་ཚོས་མི་རྟོགས་ཤིང་།།
18 དེ་ཚོའི་མིག་མདུན་དཀོན་མཆོག་འཇིགས་པ་མེད།།
ཅེས་བཀོད་པའོ།།
19 དེ་ཡང་བཀའ་ཁྲིམས་ཀྱི་གསུང་མོལ་ཐམས་ཅད་ནི་བཀའ་ཁྲིམས་འོག་ཏུ་གནས་པ་རྣམས་ལ་གསུངས་པ་བདག་ཅག་གིས་ཤེས༌ཤིང་། དེ་ནི་མི་རེ་རེའི་སྨྲ་སྒོ་བཅད་ནས་འཇིག་རྟེན་པ་ཐམས་ཅད་དཀོན་མཆོག་གི་ཉེས་ཁྲིམས་འོག་ཏུ་འཇུག་པའི་ཕྱིར༌ཡིན།
20 དེ་བས་བཀའ་ཁྲིམས་ནི་མི་ལ་སྡིག་པ་ཤེས་སུ་འཇུག་པའི་ཕྱིར་ཡིན༌པས། མི་སུ་ཡིན་ཡང་བཀའ་ཁྲིམས་ལྟར་བསྒྲུབས༌པ་ལ་བརྟེན་ནས། དཀོན་མཆོག་གི་སྤྱན་སྔར་རྣམ་དག་ཏུ་བརྩི་ཐུབ་པ་གཅིག་ཀྱང་མེད༌དོ།།
དད་པའི་དབང་གིས་མི་རྣམ་དག་ཏུ་བརྩི༌བ།
21 འོན་ཀྱང་། ད་ལྟ་དཀོན་མཆོག་གི་རྣམ་པར་དག་པ་ནི་བཀའ་ཁྲིམས་ལ་མི་བརྟེན་པ་གསལ་པོར་མངོན་པ༌དང༌། བཀའ་ཁྲིམས་དང་ལུང་སྟོན་པའི་མདོ་རྣམས་ཀྱིས་ཀྱང་བདེན་དཔང་བྱེད༌དེ།
22 དཀོན་མཆོག་གི་རྣམ་པར་དག་པ་ནི་ཡེ་ཤུ་མཱ་ཤི་ཀར་དད་པ་བྱས་པ་བརྒྱུད་ནས་ཐོབ་ཅིང་། དད་པ་བྱེད་མཁན་ཐམས་ཅད་ལ་ཁྱད་པར་མེད་པར་གནང༌ངོ་༎
23 ཅིའི་ཕྱིར་ཞེ་ན། མི་ཐམས་ཅད་ཀྱིས་སྡིག་པ་བྱས་ཏེ་དཀོན་མཆོག་གི་གཟི་བརྗིད་དང་བྲལ༌ནའང༌།
24 ད་ལྟ་ཁོང་གི་ཐུགས་རྗེའི་རྐྱེན་དང་། མཱ་ཤི་ཀ་ཡེ་ཤུས་བླུས་པ་ལ་བརྟེན་ནས་རིན་མེད་དུ་མི་རྣམ་དག་ཏུ་བརྩིས་པའི་ཕྱིར༌ཡིན།
25 དཀོན་མཆོག་གིས་སྐྱབས་མགོན་ཡེ་ཤུའི་སྐུ་ཁྲག་ལ་བརྟེན་ཅིང་མིའི་དད་པ་བརྒྱུད་ནས། སྐྱབས་མགོན་ཡེ་ཤུ་ནི་མིའི་མིག་མདུན་དུ་ཉེས་ཆད་བསལ་བའི་མཆོད་རྫས་སུ་གསལ་པོར་བཤམས་སོ།། དེ་ནི་དཀོན་མཆོག་གི་རྣམ་པར་དག་པ་གསལ་པོར་མངོན༌པའི་ཕྱིར་ཡིན། རྒྱུ་མཚན་ནི་དཀོན་མཆོག་གིས་བཟོད་པ་བསྒོམས་ནས་མིས་སྔར་བྱས་ཀྱི་སྡིག་པར་གུ་ཡངས་གནང་བ་སྟེ།
26 ད་ལྟ་ཁོང་གི་རྣམ་པར་དག་པ་གསལ་པོར་མངོན་པ་དང་། མི་རྣམས་ལ་ཁོང་ཉིད་ནི་རྣམ་པར་དག་པ་ཡིན་ཞིང༌། སྐྱབས་མགོན་ཡེ་ཤུ་ལ་དད་པ་བྱེད་མཁན་རྣམས་མི་རྣམ་དག་ཏུ་བརྩི་མཁན་ཡང་ཡིན་པ་ཤེས་སུ་འཇུག་པའི་ཕྱིར༌རོ།།
27 དེ་འདྲ་ཡིན་ན་རང་གིས་རང་ལ་བསྟོད་འོས་པ་ཅི་ཡོད་དམ་ཞེ༌ན། རང་བསྟོད་བྱ་འོས་པ་ཅི་ཡང་མེད་དོ།། འོ་ན་རང་བསྟོད་བྱ་མི་འོས་པ་ཐབས་གང་ཞིག་ལ་བརྟེན་པ་ཡིན༌ནམ། རང་བྱས་ཀྱི་ལས་ལ་བརྟེན་པའི་ཐབས་བཀོལ་བ་ཡིན་ནམ་ཞེ༌ན། དེ་ཡང་མིན༌ཏེ། དད་པ་ལ་བརྟེན་པའི་ཐབས་བཀོལ་བ་ཡིན།
28 དེའི༌ཕྱིར། ངེད་ཅག་གིས་མཐའ་གཅིག་ཏུ་ངོས་བཟུང་བ་ནི། མི་རྣམ་དག་ཏུ་བརྩི་བ་ཐམས་ཅད་དད་པ་ལ་བརྟེན་པ་ལས་བཀའ་ཁྲིམས་བརྩི་སྲུང་བྱས་པར་རག་ལས་པ་མ་ཡིན་ནོ།།
29 དེ་ཡང་དཀོན་མཆོག་ནི་ཡ་ཧུ་དཱའི་མི་རིགས་ཁོ་ནའི་དཀོན་མཆོག་ཡིན༌ནམ། ཁོང་ནི་ཕྱི་ཕྱོགས་པ་རྣམས་ཀྱི་དཀོན་མཆོག་ཀྱང་མ་ཡིན་ནམ་ཞེ༌ན། ཁོང་ནི་ཕྱི་ཕྱོགས་པ་རྣམས་ཀྱི་དཀོན་མཆོག་ཀྱང་ཡིན་ནོ།།
30 དཀོན་མཆོག་ནི་གཅིག་རང་ཡིན་པས། ཁོང་གིས་མཚན་སྐྱི་བཅད་པ་རྣམས་དད་པའི་དབང་གིས་མི་རྣམ་དག་ཏུ་བརྩི༌ཞིང༌། མཚན་སྐྱི་མ་བཅད་པ་རྣམས་ཀྱང་དད་པའི་དབང་གིས་མི་རྣམ་དག་ཏུ་བརྩི་ངེས༌ཡིན་ནོ།།
31 དེས་ན་བདག་ཅག་གིས་དད་པ་བརྒྱུད་ནས་བཀའ་ཁྲིམས་མེད་པར་བཟོའམ་ཞེ༌ན། གཏན་ནས་མི་བཟོ་སྟེ། བཀའ་ཁྲིམས་དེ་ལས་ཀྱང་བརྟན་པོར་བྱེད་པ་ཡིན༌ནོ།།