གསུང་མགུར་རེ་བཞི༌པ།
དགྲ་བོའི་ལྐོག་གཡོ་ལས་སྐྱོབ་པར་ཞུ་བ།
1 ༼དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ ཀྱེ་ཀྱེ་དཀོན་མཆོག་སྡུག་ཡུས་འདོན་དུས༌སུ། །ཁྱེད་ཀྱིས་བདག་གི་སྐད་ལ་གསན་པར༌མཛོད། །ངའི་སྲོག་དགྲ་ཡི་འཇིགས་སྐུལ་ལས་བསྲུང༌རོགས།།
2 དོན་ངན་སྤྱོད་མཁན་རྣམས་ཀྱི་ལྐོག་གྲོས༌དང༌། །ཉེས་པ་གསོག་མཁན་རྣམས་ཀྱི་ཟིང་ཆ༌ལས། །ཁྱེད་ཀྱིས་ང་རང་ཡིབ་ཅིང་བསྐྱབ་ཏུ༌གསོལ།།
3 དེ་ཚོས་ལྕེ་ནི་རལ་གྲི་བཞིན་བརྡར༌ཞིང༌། །ཚིག་རྩུབ་མདའ་མོ་རྣོན་པོ་བཞིན་དུ༌འཕེན།།
4 ཉེས་མེད་རྣམས་ལ་ལྐོག་ནས་མདའ་འཕེན༌ཞིང༌། །འཇིགས་སྣང་མེད་པར་གློ་བུར་མདའ་ཡིས༌རྒྱག།
5 ཕན་ཚུན་སྙིང་ཕུར་རྡེབ་ཅིང་ཇུས་ངན༌འགོད། །ལྐོག་ཏུ་རྙི་རྒྱ་འཛུགས་པར་གྲོས་བྱས༌ནས། །སུ་ཡིས་འདི་རྣམས་མཐོང་བར་འགྱུར་ཞེས༌སྨྲ།།
6 དེ་ཚོས་གཡོ་སྒྱུའི་སྦྱོར་བ་སྤེལ་ནས༌ནི། །ང་ཚོས་ཇུས་ལེགས་དཔེ་མེད་བཤམས་ཡོད༌སྨྲ། །མི་ཡི་སེམས་དང་བསམ་པ་གཏིང་མི༌ལོན།།
7 འོན་ཀྱང་དཀོན་མཆོག་དེ་ཚོར་མདའ་འཕེན༌ཞིང༌། །ཁོ་རྣམས་གློ་བུར་ཉིད་དུ་རྨས་པར༌འགྱུར།།
8 རང་རང་ལྕེ་ཡིས་དེ་རྣམས་འཕུང་བར༌བྱ། །ཚུལ་དེ་མཐོང་བའི་མི་རྣམས་མགོ་བོ༌གཡུག།
9 འཇིག་རྟེན་མི་བུ་ཐམས་ཅད་འཇིགས་པ༌དང༌། །དཀོན་མཆོག་ཁོང་གི་འཕྲིན་ལས་བསྒྲགས་ནས༌ནི། །ཁོང་གི་མཛད་པར་བསམ་བློ་ཞིབ་ཏུ༌གཏོང༌།།
10 དྲང་བདེན་མི་རྣམས་ཡ་ཝཱེའི་ནང་དགའ་ཞིང་། །ཁོང་ལ་བློ་གདེང་བསྐྱེད་པར་གྱུར་ཅིག༌གུ །གཞུང་དྲང་རྣམས་ཀྱིས་ངོམ་སོ་སྟོན་པར༌ཤོག།