གསུང་མགུར་བརྒྱ་དང་དྲུག
དཀོན་མཆོག་གིས་ཁོང་གི་མི་རྣམས་དྲིན་གྱིས་བསྐྱངས་པ།
1 ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌། །ཡ་ཝཱེ་ལེགས་པས་ཁོང་ལ་གཏང་རག༌ཕུལ། །ཁོང་གི་བྱམས་བརྩེ་རྒྱུན་ནས་རྒྱུན་དུ༌གནས།།
2 ཡ་ཝཱེའི་མཐུ་ལྡན་ཕྱག་ལས་སུས་བརྗོད༌ནུས། །ཡང་ན་བསྟོད་པ་ཁ་ཚང་སུས་འབུལ༌ཐུབ།།
3 སུ་ཡིས་དྲང་གཞག་སྐྱོང་ཞིང་དུས་རྟག༌ཏུ། །དྲང་བདེན་བཞིན་དུ་སྤྱོད་པའི་མི་དེ༌བདེ།།
4 ཁྱེད་ཀྱི་འབངས་མི་དྲིན་གྱིས་སྐྱོང་དུས༌སུ། །ང་ཡང་ཐུགས་སུ་འཛིན་རོགས་ཀྱེ་ཡ༌ཝཱེ། །ཁོ་རྣམས་སྐྱོབ་དུས་ང་ཡང་གཟིགས་པར༌མཛོད།།
5 ཁྱེད་ཀྱིས་བདམས་པ་རྣམས་ཀྱི་བྱིན་རླབས༌མཐོང༌། །ཁྱེད་ཀྱི་འབངས་མིའི་དགའ་སྐྱིད་དཔལ་ལ༌རོལ། །ཁྱེད་ཀྱི་ནོར་སྐལ་མཉམ་དུ་བསྟོད་པ༌འབུལ།།
6 ངེད་དང་མེས་པོ་ཀུན་གྱིས་སྡིག་པ༌བྱས། །ཉེས་པ་བསགས་ཤིང་ངན་པར་སྤྱད་པ༌ཡིན།།
7 ཨེ་ཅིབ་ཡུལ་དུ་རང་རེའི་མེས་པོ༌རྣམས། །ཁྱེད་ཀྱི་ངོ་མཚར་དོན་རྣམས་རྟོགས་པ༌མེད། །ཁྱེད་ཀྱི་དཔག་མེད་བྱམས་བརྩེ་མ་དྲན༌ཞིང༌། །རྒྱ་མཚོ་དམར་པོའི་འགྲམ་ནས་ངོ་ལོག༌བྱས།།
8 འོན་ཀྱང་ཁོང་གིས་ནུས་མཐུ་སྟོན་པ༌དང༌། །མཚན་གྱི་ཕྱིར་དུ་དེ་རྣམས་ཐར་བར༌མཛད།།
9 རྒྱ་མཚོ་དམར་པོར་བཀྱོན་ནས་མཚོ་ཡང༌བསྐམས། །དེ་རྣམས་ཁྲིད་དེ་ཐང་སྟོང་བརྒྱུད་པ༌བཞིན། །མཚོ་ཡི་གཞུང་རྣམས་བརྒལ་ནས་ཕེབས་པ༌ཡིན།།
10 དེ་ཚོར་སྡང་བ་རྣམས་ཀྱི་ལག་ནས༌བསྒྲལ། །དགྲ་བོའི་ལག་ནས་ཁོ་རྣམས་སྐྱོབ་པར༌མཛད།།
11 དེ་ནས་ཁོ་ཚོའི་དགྲ་རྣམས་ཆུ་ཡིས༌བསྣུབས། །ཤུལ་དུ་ལུས་པ་གཅིག་ཀྱང་ཡོད་མ༌ཡིན།།
12 དེ་ནས་ཁོ་རྣམས་ཁོང་གི་གསུང་ལ༌དད། །མགུར་གླུ་བླངས་ནས་ཁོང་ལ་བསྟོད་པ༌ཕུལ།།
13 འོན་ཀྱང་དུས་ཡུན་རིང་པོ་མ་འགོར༌བར། །དེ་ཚོས་ཁོང་གི་འཕྲིན་ལས་བརྗེད་གྱུར༌ཅིང༌། །ཁོང་གི་སློབ་སྟོན་ལ་ནི་མ་སྒུག༌པར།།
14 འདོད་པ་ཚད་མེད་དབེན་སྟོང་དུ་སྐྱེས༌ཏེ། །མྱ་ངམ་ཐང་དུ་དཀོན་མཆོག་ཐུགས་ཀྱང༌སད།།
15 དེའི་ཕྱིར་ཁོ་ཚོའི་ཞུ་བ་བཞིན་དུ༌གནང༌། །འོན་ཀྱང་ཁོ་ཚོའི་སྟེང་དུ་ནད་ཡམས༌ཕབ།།
16 དེ་ཚོས་སྒར་གྱི་ནང་དུ་མོ་ཤེ༌དང༌། །ཡ་ཝཱེའི་སྐྱེས་བུ་དམ་པ་ཨ་རོན༌ཏེ། །ཁོང་གཉིས་ལ་ནི་ཕྲག་དོག་བྱས་པ༌འོ།།
17 ས་ཡིས་ཁ་གདངས་དཱ་ཐན་ཁྱུར་མིད༌བཏང༌། །ཨ་བི་རཱམ་གྱི་ཕྱོགས་རྣམས་སས་བསྣུབས༌སོ།།
18 དེ་ཚོའི་ཚོགས་ནང་མེ་ཡང་འབར་གྱུར༌ནས། །མེ་ལྕེས་སྡིག་སྤྱོད་ཅན་རྣམས་བསྲེགས་པར༌བྱས།།
19 དེ་ཚོས་ཧོ་རེབ་རི་བོར་བ་ཕྲུག་བཟོས། །བླུགས་པའི་སྐུ་ལ་བཏུད་ནས་ཕྱག་བཙལ༌ཏོ།།
20 ཁོ་ཚོས་གཟི་བརྗིད་ལྡན་པའི་དཀོན་མཆོག༌ནི། །རྩྭ་གཟན་གླང་གི་གཟུགས་སུ་བསྒྱུར་པ༌ཡིན།།
21 ཁོ་རྣམས་སྐྱོབ་པའི་དཀོན་མཆོག་བརྗེད་གྱུར༌ཏེ། །ཁོང་གིས་ཨེ་ཅིབ་ཡུལ་ནས་དོན་ཆེན༌མཛད།།
22 ཧཱམ་གྱི་ཡུལ་དུ་ངོ་མཚར་དོན་རྣམས༌མཛད། །རྒྱ་མཚོ་དམར་པོར་འཇིགས་རུང་དོན་རྣམས༌བྱས།།
23 དེའི་ཕྱིར་ཁོང་གིས་དེ་རྣམས་འཇོམས་དགོས༌གསུངས། །གལ་ཏེ་ཁོང་གིས་བདམས་པའི་མོ་ཤེ༌ནི། །ཁོང་གི་དྲུང་དུ་བར་མིར་ལངས་བསྡད༌ནས། །ཉིད་ཀྱི་ཐུགས་ཁྲོ་ཞི་བར་མ་བྱས༌ཚེ། །ཁོང་གིས་དེ་རྣམས་རྩད་ནས་བརླག་ཉེན༌ཆེ།།
24 ཁོ་ཚོས་སྐྱིད་པའི་ཡུལ་དེར་མཐོང་ཆུང༌བྱས། །ཁོང་གི་བཀའ་ལ་ཡིད་ཆེས་ཀྱང་མ༌བྱས།།
25 རང་རང་གུར་ནང་འཁང་ར་བྱས་པ༌དང༌། །ཡ་ཝཱེའི་གསུང་སྐད་ལ་ཡང་མ་མཉན༌ཏོ།།
26 དེའི་ཕྱིར་ཁོང་གིས་དེ་ཚོར་མནའ་བཞེས་ཏེ། །ཁོ་རྣམས་དབེན་སྟོང་ཡུལ་དུ་སར་བསྒྱེལ༌ཞིང༌།།
27 ཁོ་ཚོའི་བུ་རྒྱུད་མི་རྣམས་ཁྲོད་འགྱེལ༌ནས། །ས་ཕྱོགས་ཀུན་ཏུ་ཐོར་བར་བྱ་ཞེས༌གསུངས།།
28 དེ་ཚོས་པཱ་ཨལ་ཕེ་ཨོར་སྐྱབས་སུ༌བསྟེན། །སྲོག་མེད་ལྷ་ལ་མཆོད་པའི་རྫས་རྣམས༌ཟོས།།
29 དེ་བཞིན་བྱས་ནས་ཡ་ཝཱེར་ཐུགས་ཁྲོ༌བསླངས། །དེ་དག་ནང་དུ་རིམས་ནད་ཐོན་པར༌གྱུར།།
30 དེ་དུས་ཕི་ནེ་ཧེ་ཁོང་ཡར་ལངས༌ནས། །ངན་པར་ཉེས་ཆད་བཅད་པས་རིམས་ནད༌ཆད།།
31 རྒྱུན་ནས་རྒྱུན་དུ་མི་རབས་ཐམས་ཅད༌ལ། །ལས་དེ་ཁོའི་ཕྱིར་དྲང་བདེན་དུ་བརྩིས་སོ།།
32 དེ་ཚོས་མེ་རི་བཱ་ཡི་ཆུ་འགྲམ༌དུ། །ཡང་བསྐྱར་ཡ་ཝཱེར་ཐུགས་ཁྲོ་བསླངས་པ༌དང༌། །ཐ་ན་མོ་ཤེ་ལ་ཡང་ཉེས་ཆད༌ཕོག།
33 དེ་ཚོས་དཀོན་མཆོག་ཐུགས་ལ་གྱེན་ཟློག༌བྱས། །མོ་ཤེའི་ཁ་ནས་བསམ་མེད་གཏམ་ཡང༌ཤོར།།
34 ཡ་ཝཱེས་གནང་བའི་བཀའ་བཞིན་དེ་རྣམས༌ཀྱིས། །ཕྱི་ཕྱོགས་མི་རྣམས་ཚར་དུ་མ་བཅད༌པར།།
35 དེ་རྣམས་དང་ནི་ཡོངས་སུ་འདྲེས་གྱུར༌ཏེ། །དེ་ཚོའི་ཡུལ་སྲོལ་གོམས་འདྲིས་བསླབ་པ༌དང༌།།
36 དེ་ཚོའི་སྐུ་འདྲ་རྣམས་ལ་བསྙེན་བཀུར༌ཞུས། །དེ་ནི་ཁོ་ཚོའི་རྙི་རུ་གྱུར་པ༌ཡིན།།
37 བུ་དང་བུ་མོ་གདོན་འདྲེར་མཆོད་པ༌བྱས།།
38 དེ་ཚོས་ཉེས་མེད་རྣམས་ཀྱི་ཁྲག་བཞུར༌ཏེ། །རང་གི་བུ་དང་བུ་མོའི་ཁྲག་གིས༌ནི། །ཀ་ན་ཨན་གྱི་སྐུ་ལ་མཆོད་པ༌ཕུལ། །ཁྲག་གིས་ཡུལ་ཁམས་དེ་ཡང་བཙོག་པར༌བཟོས།།
39 རང་བྱས་ལས་ཀྱིས་རང་ཉིད་བཙོག་པར༌བཟོས། །སྤྱོད་པའི་ཐད་ནས་ལོག་གཡེམ་སྤེལ་བས༌ན།།
40 ཡ་ཝཱེ་འབངས་མིའི་སྟེང་ལ་ཐུགས་ཁྲོས༌ཤིང༌། །ཉིད་ཀྱི་ནོར་སྐལ་ལ་ནི་ཞེན་ལོག༌སྟེ།།
41 ཁོ་རྣམས་ཕྱི་ཕྱོགས་མི་ཡི་ལག་ཏུ༌སྤྲད། །ཁོ་ཚོར་སྡང་བ་དག་གིས་དབང་དུ༌བསྒྱུར།།
42 དགྲ་བོས་ཁོ་ཚོར་གཉའ་གནོན་བྱས་པ༌དང༌། །ཁོ་རྣམས་དགྲ་བོའི་ལག་ཏུ་ཚུད་པ༌ཡིན།།
43 ཁོང་གིས་དེ་རྣམས་ལན་མང་ཐར་བཅུག༌ཀྱང༌། །དེ་ཚོས་བསམ་བཞིན་གྱེན་ཟློག་བྱས་པས༌ན། །རང་གི་ཉེས་པས་རང་ཉིད་དམན་སར༌ཕབ།།
44 འོན་ཀྱང་དེ་ཚོའི་ངུ་འབོད་གསན་པ༌དང༌། །ཁོང་གིས་དེ་ཚོའི་སྡུག་བསྔལ་གཟིགས་པར༌གྱུར།།
45 ཁོང་གི་ཞལ་ཆད་དེ་རྣམས་དོན་དུ༌དྲན། །དཔག་མེད་བྱམས་བརྩེ་བཞིན་དུ་ཐུགས་ཀྱང༌འགྱོད།།
46 དེ་རྣམས་བཙན་གནོན་བྱེད་མཁན་ཀུན་གྱི༌མདུན། །དེ་ཚོར་ཁོང་གི་སྙིང་རྗེ་ཐོབ་པར༌མཛད།།
47 ཁྱེད་མཚན་དམ་པར་གཏང་རག་འབུལ་བ༌དང༌། །ཁྱེད་ལ་བསྟོད་པ་གཟི་བརྗིད་དུ་བརྩི༌ཕྱིར། །ང་ཚོའི་དཀོན་མཆོག་ཡ་ཝཱེས་ངེད་རྣམས༌སྐྱོབ། །ཕྱི་ཕྱོགས་མི་རྣམས་ཁྲོད་ནས་ངེད་བསྡུ༌རོགས།།
48 ཡེས་ར་ཨེལ་གྱི་དཀོན་མཆོག་ཡ་ཝཱེ༌ནི། །རྒྱུན་ནས་རྒྱུན་དུ་བསྟོད་པར་འོས་སོ༌ལོ། །མི་སྡེ་ཀུན་གྱིས་ཨ་མེན་ཞུ་བར༌ཤོག །ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌།།