ལེའུ་ཉེར་གཅིག༌པ།
གཟི་བརྗིད་ཀྱི་ངང་ནས་ཡེ་རུ་སཱ་ལེམ་དུ་ཕེབས༌པ།
1 ཁོང་རྣམས་ཡེ་རུ་སཱ་ལེམ་གྱི་ཉེ་འགྲམ༌སྟེ། སྐྱུ་རུ་རའི་རི་བོའི་ངོས་སུ་ཡོད་པའི་པེ་ཕཱ་གེ་རུ་ཕེབས་པ༌དང༌། སྐྱབས་མགོན་ཡེ་ཤུས་ཐུགས་སྲས་གཉིས་མངགས༌ཏེ།
2 ཁྱོད་གཉིས་ཕ་རོལ་གྱི་གྲོང་སྡེ་རུ་སོང༌དང༌། གནས་དེར་སླེབས་མ་ཐག་བོང་བུ་མ་བུ་གཉིས་མཉམ་དུ་བཏགས་ཡོད་པ་མཐོང་ངེས༌ཤིང༌། དེ་གཉིས་ཀྱི་ཐག་པ་བཀྲོལ་ནས་འདིར་ཁྲིད༌ཤོག
3 སུ་ཞིག་གིས་ཁྱོད་གཉིས་ལ་ཅི་ཞིག་སྨྲས་པ་ཡིན༌ན། ཁྱོད་གཉིས་ཀྱིས་འདི་ནི་གཙོ་བོ་ལ་མཁོ་བ་ཡིན་ཞེས་སྨྲོས༌དང༌། དེས་མྱུར་དུ་གཏོང་བར་འགྱུར་ཞེས་གསུངས༌སོ།།
4 དོན་འདི་ནི་ལུང་སྟོན་པའི་ལུང་བསྟན་ལས་ཇི་སྐད༌དུ།
5 ཛ་ཡན་ཡུལ་གྱི་བུ་མོར་འདི་སྐད༌དུ།།
གཟིགས་དང་ཁྱོད་ཀྱི་རྒྱལ་པོ་ཁྱོད་དྲུང༌དུ།།
བོང་བུའི་བོང་ཕྲུག་ཅིག་ལ་བཅིབས་ནས༌ནི།།
ཞི་འཇམ་ངང་ནས་ཕེབས་བྱུང་ཞེས་སྨྲོས༌ཤིག །
ཅེས་གསུངས་པ་བཞིན་དུ་འགྲུབ་པའི་ཕྱིར་དེ་ལྟར་བྱུང༌ངོ༌།།
6 དེ་ནས་ཐུགས་སྲས་གཉིས་ཀྱིས་སྐྱབས་མགོན་ཡེ་ཤུའི་བཀའ་ལྟར་བསྒྲུབས༌ཏེ།
7 བོང་བུ་དང་བོང་ཕྲུག་གཉིས་ཀ་ཁྲིད་ཡོང༌ཞིང༌། རང་གི་ཕྱི་གོས་བོང་ཕྲུག་གི་རྒྱབ་ཏུ་བཏིངས་པ་དང་ཁོང་དེ་ལ༌བཅིབས།
8 མི་ཤིན་ཏུ་མང་པོས་རང་གི་ཕྱི་གོས་ལམ་དུ་བཏིངས༌ཤིང༌། ཡང་མི་གཞན་དག་གིས་སྡོང་པོའི་ཡལ་ག་བཅད་ནས་ལམ་ནང་དུ༌བཀྲམ།
9 ཁོང་གི་སྔོན་དུ་འགྲོ་བ་དང་རྗེས་སུ་འབྲངས་པའི་མི་ཚོགས་ཀྱིས་སྐད་ཆེན༌པོས། དཱ་བིད་ཀྱི་རིགས་སྲས་ལ་ཧོ་ཟན༌ནཱ། གཙོ་བོའི་མཚན་གྱི་སྒོ་ནས་བྱོན་པ་ནི་བྱིན་རླབས་ཅན༌ཡིན། བླ་ན་མེད་པའི་གནས་ལ་ཧོ་ཟན་ནཱ་ཞེས་ཡང་ཡང་བསྒྲགས༌སོ།།
10 དེ་ནས་སྐྱབས་མགོན་ཡེ་ཤུ་ཁོང་ཉིད་ཡེ་རུ་སཱ་ལེམ་དུ་ཕེབས་པ་དང་གྲོང་ཁྱེར་ཡོངས་སུ་འདུ་འཛི་བྱུང༌ཞིང༌། མི་ཀུན་གྱིས་འདི་ནི་སུ་ཡིན་ནམ་ཞེས་སྨྲས་པ༌ལ།
11 ཡང་མི་ཚོགས་ཀྱིས་ཁོང་ནི་ག་ལིལ་ཡུལ་གྱི་ནཱ་ཙ་རེལ་ནས་བྱོན་པའི་ལུང་སྟོན་པ་ཡེ་ཤུ་ཡིན་ཞེས་སྨྲས༌སོ།།
མཆོད་ཁང་གཙང་མར་མཛད༌པ།
12 སྐྱབས་མགོན་ཡེ་ཤུ་མཆོད་ཁང་དུ་ཕེབས༌ཏེ། མཆོད་ཁང་གི་ནང་དུ་ཡོད་པའི་ཚོང་པ་ཐམས་ཅད་སྒོའི་ཕྱི་རུ་ཕུད༌ཅིང༌། དངུལ་བརྗེ་མཁན་གྱི་ཅོག་ཙེ་དང་ཕུག་རོན་ཚོང་མཁན་གྱི་འདུག་སྟེགས་ཐམས་ཅད་ཀྱང་སར་བསྒྱེལ༌ཏོ།།
13 ཁོང་གིས་འདི་སྐད༌དུ། གསུང་རབ་ཀྱི་མདོ་ལས་ཇི་སྐད༌དུ། ངའི་མཆོད་ཁང་ལ་སྨོན་ལམ་ཞུ་སའི་གནས་སུ་འབོད་པར་འགྱུར་ཞེས་བཀོད་ཡོད༌ཀྱང༌། ཁྱོད་ཅག་གིས་འདི་ནི་ཇག་ཚང་ཞིག་ཏུ་བསྒྱུར་འདུག་ཅེས་གསུངས༌སོ།།
14 དེ་ནས་ལོང་བ་དང་གྱོལ་པོ་རྣམས་མཆོད་ཁང་དུ་སྐྱབས་མགོན་ཡེ་ཤུའི་དྲུང་དུ་ཡོང་བ༌དང༌། ཁོང་གིས་དེ་དག་གསོས༌པའོ།།
15 མཆོད་དཔོན་ཆེན་པོ་དག་དང་མཁན་པོ་རྣམས་ཀྱིས་ཁོང་གིས་མཛད་པའི་ངོ་མཚར་བའི་དོན་རྣམས་མཐོང་བ༌དང༌། བྱིས་པ་རྣམས་ཀྱིས་མཆོད་ཁང་དུ་སྐད་ཆེན་པོས་དཱ་བིད་ཀྱི་རིགས་སྲས་ལ་ཧོ་ཟན་ནཱ་ཞེས་ཟེར་བའང་ཐོས་ནས་ཤིན་ཏུ་ཁྲོས་ཏེ་ན༌རེ།
16 བྱིས་པ་རྣམས་ཀྱིས་ཅི་ཞིག་སྨྲ་བ་ཁྱོད་ཀྱིས་མ་ཐོས་སམ་ཞེས་སྐྱབས་མགོན་ཡེ་ཤུ་ལ་དྲིས་པ༌ན། ཁོང་གིས་འདི་སྐད༌དུ། བདག་གིས་ཐོས༌སོ། །དེ་ཡང་གསུང་རབ་ཀྱི་མདོ༌ལས། ཁྱེད་ཀྱིས་བྱིས་པ་དང་ཕྲུ་གུ་འོ་འཐུང་རྣམས་ཀྱི་ངག་ནས་རང་ཉིད་ལ་བསྟོད་བསྔགས་ཆ་ཚང་བར་མཛད་ཅེས་གསུངས་པ༌དེ་ཁྱོད་རྣམས་ཀྱིས་བཀླགས་མ་མྱོང་ངམ་ཞེས་གསུངས༌སོ།།
17 དེ་ནས་སྐྱབས་མགོན་ཡེ་ཤུ་མི་དེ་རྣམས་དང་ཁ་བྲལ་ནས་གྲོང་ཁྱེར་ཕྱི་རོལ་གྱི་པེ་ཐན་ཡཱ་རུ་ཕེབས་ཤིང་གནས་དེར་ཞག་བཞུགས་མཛད༌དོ།།
འབྲས་བུ་མེད་པའི་བསེ་ཡབ༌ཤིང༌།
18 ཞོགས་པའི་དུས་སུ་སྐྱབས་མགོན་ཡེ་ཤུ་གྲོང་ཁྱེར་དུ་ཕྱིར་ཕེབས་སྐབས་ཁོང་ཉིད་བཀྲེས༌ཤིང༌།
19 ལམ་འགྲམ་དུ་བསེ་ཡབ་ཤིང་སྡོང་ཞིག་ཡོད་པ་གཟིགས་ནས་དེའི་གམ་དུ་ཕེབས་པ༌ན། ལོ་མ་ལས་གཞན་ཅི་ཡང་མེད་པ་གཟིགས་ཏེ་ཤིང་སྡོང་ལ་འདི་སྐད༌དུ། དུས་ད་ནས༌བཟུང༌། ཁྱོད་ལ་ནམ་ཡང་འབྲས་བུ་མི་འབྱུང་བར་གྱུར་ཅིག་ཅེས་གསུངས་མ་ཐག་བསེ་ཡབ་ཤིང་སྡོང་བསྐམས་པར་གྱུར༌ཏོ།།
20 ཐུགས་སྲས་རྣམས་ཀྱིས་དོན་དེ་མཐོང་ནས་ངོ་མཚར་སྐྱེས༌ཏེ། བསེ་ཡབ་ཤིང་སྡོང་འདི་སྐད་ཅིག་ཙམ་ལ་བསྐམས་སོང་བ་ཅི་ཡིན་ནམ་ཞེས་ཞུས་པ༌ལ།
21 སྐྱབས་མགོན་ཡེ་ཤུས་འདི་སྐད༌དུ། བདག་གིས་ཁྱོད་རྣམས་ལ་བདེན་པར་སྨྲ༌སྟེ། ཁྱོད་རྣམས་ལ་དད་པ་ཡོད་ཅིང་ཐེ་ཚོམ་མེད༌ན། བསེ་ཡབ་ཤིང་སྡོང་འདིའི་སྟེང་དུ་བསྒྲུབས་པའི་དོན་འདི་ལྟ་བུ་བསྒྲུབ་ཐུབ་པར་མ༌ཟད། ཁྱོད་རྣམས་ཀྱིས་རི་བོ་འདི་ལ་ད་ལྟ་ཉིད་དུ་ཕར་སྤོས་ནས་རྒྱ་མཚོར་ལྷུང་བར་བྱོས་ཞེས་སྨྲས་ན་དེ་ལྟར་འགྲུབ་ངེས༌ཡིན།
22 ཁྱོད་རྣམས་ཀྱིས་གསོལ་བ་བཏབ་ནས་དོན་གང་ཞིག་ཞུས༌ཀྱང༌། དད་པ་བྱས་ན་འཐོབ་པར་འགྱུར་ཞེས་གསུངས༌སོ།།
སྐྱབས་མགོན་ཡེ་ཤུའི་དབང་དང་ནུས་མཐུའི༌སྐོར།
23 སྐྱབས་མགོན་ཡེ་ཤུ་མཆོད་ཁང་དུ་ཕེབས་ནས་ཆོས་གསུང་བཞིན་པའི་དུས༌སུ། མཆོད་དཔོན་ཆེན་པོ་དག་དང་ཡུལ་མི་རྒན་པོ་རྣམས་ཁོང་གི་དྲུང་དུ་ཡོང་སྟེ་ན༌རེ། ཁྱོད་ཀྱིས་དབང་གང་ལ་བརྟེན་ནས་དོན་འདི་དག་མཛད་པ་ཡིན༌ནམ། སུ་ཞིག་གིས་ཁྱོད་ལ་དབང་འདི་གནང་བ་ཡིན་ཞེས་ཞུས་པ༌ན།
24 སྐྱབས་མགོན་ཡེ་ཤུས་འདི་སྐད༌དུ། ངས་ཀྱང་ཁྱོད་རྣམས་ལ་དྲི་བ་ཞིག་འདོན༌ཏེ། ཁྱོད་རྣམས་ཀྱིས་ལན་བཏབ༌ན། བདག་གིས་ཀྱང་དོན་འདི་རྣམས་དབང་ཅི་ལྟ་བུས་བྱས་པ་ཁྱོད་རྣམས་ལ་སྨྲ་བར༌བྱའོ།།
25 ཡོ་ཧ་ནན་གྱི་ཁྲུས་གསོལ་དེ་ནམ་མཁའི་ཞིང་ཁམས་དང་མི་ཡུལ་གཉིས་ཀྱི་གང་ནས་བྱུང་བ་ལ་ལན་ཐོབས་ཤིག་ཅེས་གསུངས་པ༌དང༌། དེ་རྣམས་ཀྱིས་ཕན་ཚུན་ལ་གླེང་མོལ་བྱེད༌བཞིན། གལ་ཏེ་ནམ་མཁའི་ཞིང་ཁམས་ནས་བྱུང་བ་ཡིན་ཞེ༌ན། ཁོས་འོ་ན་ཁྱོད་རྣམས་ཅིའི་ཕྱིར་ཡོ་ཧ་ནན་ལ་ཡིད་མ་ཆེས་སམ་ཞེས་སྨྲ་ངེས༌ལ།
26 ཡང་མི་ཡུལ་ནས་བྱུང་ཞེ༌ན། མི་ཐམས་ཅད་ཀྱིས་ཡོ་ཧ་ནན་ནི་ལུང་སྟོན་པ་ཞིག་ཏུ་བཀུར་བས་ངེད་རྣམས་མི་ཚོགས་ལ་འཇིགས་ཞེས་སྨྲས༌ཤིང༌།
27 དེ་ནས་ཁོ་རྣམས་ན༌རེ། ངེད་ཅག་གིས་མི་ཤེས་ཞེས་ལན་བཏབ༌བོ། །ཡང་སྐྱབས་མགོན་ཡེ་ཤུས་འདི་སྐད༌དུ། དེས་ན་བདག་གིས་ཀྱང་དབང་གང་ལ་བརྟེན་ནས་དོན་འདི་དག་བྱེད་པ་ཁྱོད་རྣམས་ལ་སྨྲ་བ་མིན་ཞེས་གསུངས༌སོ།།
བུ་གཉིས་ཀྱི༌དཔེ།
28 དེ་ནས་སྐྱབས་མགོན་ཡེ་ཤུས་འདི་སྐད༌དུ། དོན་ཞིག་ཡོད་པ་འདིར་ཁྱོད་ཅག་གིས་ཅི་ལྟར་བསམ་པར༌བྱ། ཕ་ཞིག་ལ་བུ་གཉིས་ཡོད༌དེ། ཁོ་རང་བུ་ཆེ་བའི་གམ་དུ་སོང༌སྟེ། བདག་གི༌བུ། ཁྱོད་དེ་རིང་རྒུན་འབྲུམ་ར་བའི་ནང་དུ་ལས་ཀ་བྱེད་དུ་སོང་ཞིག་ཅེས་སྨྲས་པ༌ལ།
29 བུ་ན༌རེ། ང་མི་འགྲོ་ཞེས་སྨྲས༌ཤིང༌། ཕྱིས་སུ་འགྱོད་པ་སྐྱེས་ཏེ་སོང༌ངོ༌།།
30 དེ་ནས་ཕ་དེ་བུ་ཆུང་བའི་གམ་དུ་སོང་སྟེ་གོང་ལྟར་སྨྲས་པ༌ན། བུ་ཆུང་བ་ན༌རེ། ཕ༌ལགས། ང་རང་འགྲོའོ་ཞེས་སྨྲས་ཀྱང་མ་སོང་བ༌རེད།
31 བུ་དེ་གཉིས་ལས་སུ་ཞིག་གིས་ཕ་ཡི་དགོངས་པ་ལྟར་བྱས་པ་ཡིན་ནམ་ཞེས་གསུངས་པ༌ན། ཁོ་རྣམས་ཀྱིས་བུ་ཆེ་བས་བྱས་པ་ཡིན་ཞེས་ལན་བཏབ༌བོ། །ཡང་སྐྱབས་མགོན་ཡེ་ཤུས་འདི་སྐད༌དུ། བདག་གིས་ཁྱོད་རྣམས་ལ་བདེན་པར་སྨྲ༌སྟེ། ཁྲལ་ལེན་མཁན་དང་སྨད་འཚོང་མ་རྣམས་ཀྱང་ཁྱོད་ཅག་གི་སྔོན་དུ་དཀོན་མཆོག་གི་རྒྱལ་སྲིད་དུ་ཞུགས་པ༌ཡིན།
32 རྒྱུ་མཚན་ནི་ཁྲུས་གསོལ་མཁན་ཡོ་ཧ་ནན་དྲང་བདེན་གྱི་ལམ་ནས་ཁྱོད་ཅག་གི་གམ་དུ་ཡོང༌ནའང༌། ཁྱོད་རྣམས་ཁོང་ལ་ཡིད་མ༌ཆེས། འོན་ཀྱང་ཁྲལ་ལེན་མཁན་དང་སྨད་འཚོང་མ་དག་གིས་ཁོང་ལ་ཡིད་ཆེས་བྱས་པའི་ཕྱིར༌རོ། །ཁྱོད་ཅག་གིས་དོན་དེ་མཐོང་ཡང་འགྱོད་བཤགས་མ་བྱས་ལ་ཡིད་ཆེས་ཀྱང་མ་བྱས་ཞེས་གསུངས༌སོ།།
རྒུན་ཚལ་གྱི་བདག་པོའི༌དཔེ།
33 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཅག་གིས་ཡང་དཔེ་གཞན་ཞིག་ལ༌ཉོན་ཅིག དེ་ཡང་ཁྱིམ་བདག་ཅིག་གིས་རྒུན་ཚལ་ཞིག་བཙུགས་ཏེ་ཕྱོགས་བཞིར་ར་བས་བསྐོར་བ༌དང༌། རྒུན་འབྲུམ་འཚིར་གཞོང་ཞིག་བརྐོས་ནས་སོ་ལྟ་ཁང་ཞིག་ཀྱང་བརྩིགས༌རྗེས། རྒུན་འབྲུམ་ར་བ་མི་གཞན་ལ་གླས་ཏེ་ཁོ་རང་ཡུལ་གཞན་དུ༌སོང༌།
34 སྟོན་བསྡུ་བའི་དུས་ལ་བབས༌ཚེ། ཁོས་རང་གི་གཡོག་པོ་འགའ་གླ་མཁན་ཚང་ལ་འབྲས་བུ་ལེན་དུ་མངགས་པ༌ན།
35 དེ་རྣམས་ཀྱིས་གཡོག་པོ་རྣམས་བཟུང༌སྟེ། གཅིག་ལ་གཅར་རྡུང༌བྱས། གཅིག་ནི༌བསད། གཅིག་རྡོ་རུབ་ལ་བཏང༌ངོ༌།།
36 ཡང་བདག་པོ་དེས་གཡོག་པོ་སྔར་ལས་མང་པོ་ཞིག་མངགས༌ནའང༌། དེ་རྣམས་ཀྱིས་སྔར་བཞིན༌བྱས།
37 མཇུག་མཐར་ཁོས་རང་གི་བུའང་དེ་རྣམས་ཀྱི་གམ་དུ་མངགས༌ཤིང༌། དེ་ནི་གླ་མཁན་རྣམས་ཀྱིས་བདག་གི་བུ་ལ་བཀུར་སྟི་བྱེད་ངེས་ཡིན་བསམས༌སོ།།
38 འོན་ཀྱང་གླ་མཁན་རྣམས་ཀྱིས་བུ་མཐོང་སྟེ་ཕན་ཚུན༌ལ། འདི་ནི་ཕ་ཤུལ་འཛིན་མཁན་ཡིན༌པས། ཤོག་དང་གསོད་པར༌བྱའོ། །ནོར་སྐལ་ལེན་པར་བྱ་ཞེས་སྨྲས༌ཏེ།
39 བུ་དེའང་བཟུང་སྟེ་རྒུན་འབྲུམ་ར་བའི་ཕྱི་རུ་བཏོན་ནས་བསད༌དོ།།
40 དེ་ནས་རྒུན་འབྲུམ་ར་བའི་བདག་པོ་ཕྱིར་ཡོང༌ཚེ། གླ་མཁན་དེ་རྣམས་ལ་ཅི་བྱེད་པར་འགྱུར་རམ་ཞེས་གསུངས་པ༌ན།
41 ཁོ་རྣམས་ན༌རེ། བདག་པོས་མི་ངན་དེ་དག་ངན་གསོད་བྱས༌ཏེ། རྒུན་འབྲུམ་ར་བ་ནི་དུས་ལྟར་འབྲས་བུ་འབུལ་བའི་གླ་མཁན་གཞན་དག་ལ་སྤྲོད་པར་ངེས་ཞེས༌སྨྲས།
42 ཡང་སྐྱབས་མགོན་ཡེ་ཤུས་འདི་སྐད༌དུ། དེ་ལ་གསུང་རབ་ཀྱི་མདོ་ལས་ཇི་སྐད༌དུ།
བཟོ་བ་རྣམས་ཀྱིས་སྤངས་པའི༌རྡོ།།
ཁང་པའི་ཟུར་གྱི་རྨང་རྡོར༌གྱུར།།
གཙོ་བོ་ཁོང་ནས་བྱུང་བ༌ཡིན།།
བདག་ཅག་མིག་ལ་ངོ་མཚར༌ཆེ།།
ཞེས་གསུངས་ཡོད་པ་ཁྱོད་རྣམས་ཀྱིས་བཀླགས་མ་མྱོང༌ངམ།
43 དེའི༌ཕྱིར། བདག་གིས་ཁྱོད་རྣམས་ལ་སྨྲ་བར་བྱ༌སྟེ། དཀོན་མཆོག་གི་རྒྱལ་སྲིད་ནི་ཁྱོད་རྣམས་ལས་བླངས༌ནས། དེ་དང་མཐུན་པར་འབྲས་བུ་བསྐྱེད་པའི་མི་རིགས་གཞན་ལ་གནང་བར་འགྱུར༌རོ།།
44 མི་སུ་ཞིག་རྡོ་དེའི་སྟེང་དུ་ལྷུང༌ན། མི་དེ་ནི་དུམ་བུར༌འགྱུར། ཡང་རྡོ་དེ་མི་སུ་ཞིག་གི་སྟེང་དུ་ལྷུང༌ན། མི་དེའང་རྡུལ་དུ་བརླག་པར་འགྱུར་ཞེས་གསུངས༌སོ།།
45 དེ་ནས་མཆོད་དཔོན་ཆེན་པོ་དག་དང་ཕ་རུ་ཤི་པ་རྣམས་ཀྱིས་དཔེ་དེ་དག་ཐོས་ཤིང་ཁོ་རྣམས་ལ་གསུངས་པའང་ཤེས༌ཏེ།
46 སྐྱབས་མགོན་ཡེ་ཤུ་འཛིན་བཟུང་བྱ་བསམས༌ནའང༌། མི་ཚོགས་ཀྱིས་ཁོང་ནི་ལུང་སྟོན་པ་ཞིག་ཏུ་བཀུར༌བས་ཁོ་རྣམས་མི་ཚོགས་ལ་འཇིགས༌སོ།།