ལེའུ་བཅུ་དྲུག༌པ།
དམ་པའི་ཐུགས་ཉིད་ཀྱི་མཛད་འཕྲིན༌སྐོར།
1 དེ་ནས་ཡང་སྐྱབས་མགོན་ཡེ་ཤུས་འདི་སྐད༌དུ། བདག་གིས་དོན་འདི་དག་ཁྱོད་རྣམས་ལ་སྨྲས་པ་ནི་ཁྱོད་ཅག་གི་དད་པ་མི་ལོག་པའི་ཕྱིར༌ཡིན།
2 མི་རྣམས་ཀྱིས་ཁྱོད་ཅག་ཆོས་ཁང་ནས་ཕྱིར་འཕུད་པར་མ་ཟད། ཁྱོད་ཅག་གསོད་མཁན་རྣམས་ཀྱིས་དེ་ནི་དཀོན་མཆོག་ལ་བསྙེན་བཀུར་བྱེད་པ་ཡིན་སྙམ་པའི་དུས་ཤིག་སླེབ་པར་འགྱུར་རོ།།
3 དེ་རྣམས་ཀྱིས་དེ་ལྟར་བྱེད་པ་ནི་ཡབ་ངོ་མི་ཤེས༌ཤིང༌། ང་རང་ཡང་ངོ་མི་ཤེས་པའི་ཕྱིར༌ཡིན།
4 འོན༌ཀྱང༌། ངས་དོན་འདི་དག་ཁྱོད་ཅག་ལ་སྨྲ་བ་ནི་དུས་དེ་སླེབས་ཚེ། ཁྱོད་ཅག་གིས་ངས་སྨྲས་པ་རྣམས་དྲན་པའི་ཕྱིར༌ཡིན་ཞིང་། ངེད་རྣམས་མཉམ་དུ་འགྲོགས་ཡོད་པས་ངས་དོན་འདི་དག་སྔར་ཁྱོད་ཅག་ལ་མ་སྨྲས་པ་ཡིན།
5 ད་ལྟ་བདག་ནི་ང་རང་མངགས་མཁན་གྱི་དྲུང་དུ༌འགྲོ་ཞིང་། ཁྱོད་རྣམས་ལས་སུས་ཀྱང་ཁྱེད་རང་གང་དུ་འགྲོའམ་ཞེས་མི༌འདྲིའོ།།
6 ངས་དོན་འདི་དག་སྨྲས་པས་ཁྱོད་ཅག་གི་སེམས་སུ་སྐྱོ་སྡུག་གིས་ཁེངས༌པ་རེད།
7 འོན༌ཀྱང༌། ངས་ཁྱོད་ཅག་ལ་བདེན་པར་སྨྲ༌སྟེ། ང་རང་འགྲོ་བ་ནི་ཁྱོད་རྣམས་ལ་ཕན༌པ་ཡིན། ང་རང་མ་སོང་ན་སྡོངས་གྲོགས་དེ་ཁྱོད་ཅག་གི་གམ་དུ་ཕེབས་མི་སྲིད༌ཅིང༌། ང་རང་སོང་ན་ངས་ཁོང་ཉིད་ཁྱོད་ཅག་གི་གམ་དུ་མངག་པར༌བྱའོ།།
8 ཕྱིས་སུ་དམ་པའི་ཐུགས་ཉིད་ཕེབས་ཏེ། འཇིག་རྟེན་གྱི་མི་རྣམས་ལ་སྡིག་པ༌དང༌། དྲང༌བདེན། ཉེས་ཆད་གཅོད་པ་བཅས་ཀྱི་ཕྱོགས་ནས་མི་ལ་ཉེས་སྐྱོན་ཡོད་པ་སྟོན་པར་འགྱུར་རོ།།
9 དེས་ན་སྡིག་པའི་ཐད་ནས་མི་དེ་རྣམས་བདག་ལ་དད་པ་མེད་པའི་ཕྱིར༌དང༌།
10 དྲང་བདེན་གྱི་ཐད་ནས་ང་རང་ཡབ་ཀྱི་དྲུང་དུ་འགྲོ་བས་ཕྱིས་སུ་ཁྱོད་ཅག་གིས་ང་རང་མི་མཐོང་བའི་ཕྱིར༌དང༌།
11 ཉེས་ཆད་གཅོད་པའི་ཐད་ནས་འཇིག་རྟེན་འདིའི་དབང་སྒྱུར་མཁན་ལའང་ཉེས་ཆད་བཅད་ཟིན་པས༌སོ།།
12 བདག་ལ་ད་དུང་གཏམ་མང་ཡང་ད་ལྟ་ཁྱོད་ཅག་གི་སེམས་ཀྱིས་མི་བཟོད༌པ་ཡིན།
13 འོན་ཀྱང་བདེན་པ་ཉིད་ཀྱི་དམ་པའི་ཐུགས་ཉིད་ཕེབས༌ཚེ། ཁོང་གིས་ཁྱོད་རྣམས་ལ་བདེན་པ་ཐམས་ཅད་ཤེས་སུ་འཇུག༌ཅིང༌། གང་ཞིག་ཐོས་པ་རྣམས་ཇི་བཞིན་དུ་གསུངས་པ་ལས་རང་འདོད་དུ་མི་གསུང༌ཞིང༌། མ་འོངས་པའི་དོན་རྣམས་ཀྱང་ཁྱོད་ཅག་ལ་གསུང་བར་འགྱུར་རོ།།
14 ཡང་དམ་པའི་ཐུགས་ཉིད་ཀྱིས་བདག་ལ་གཟི་བརྗིད་སྩོལ་ངེས༌ཏེ། ཁོང་གིས་བདག་གི་ཡིན་པ་གང་ཞིག་བླངས་ནས་ཁྱོད་རྣམས་ལ་མངོན་པར་འགྱུར་བས༌སོ།།
15 དེའི༌ཕྱིར། ཡབ་ལ་གང་ཞིག་ལྡན་པ་ཐམས་ཅད་བདག་ལའང་དབང༌བས། དམ་པའི་ཐུགས་ཉིད་ཀྱིས་བདག་གི་ཡིན་པ་གང་ཞིག་བླངས་ནས་ཁྱོད་རྣམས་ལ་གསུང་བར་འགྱུར་ཞེས་བདག་གིས་སྨྲས་པ་ཡིན།
16 ད་ཅང་མི་འགོར་བར་ཁྱོད་རྣམས་ཀྱིས་ང་རང་མཐོང་བར་མི་འགྱུར༌ཞིང༌། ཡང་དེ་ནས་ཅང་མི་འགོར་བར་ཁྱོད་རྣམས་ཀྱིས་ང་རང་མཐོང་བར་འགྱུར་ཞེས་གསུངས་སོ།།
ཐུགས་སྲས་རྣམས་ཀྱི་དགའ་སྐྱོའི༌སྐོར།
17 དེ་ནས་ཐུགས་སྲས་ཁ་ཤས་ཀྱིས་ཕན་ཚུན་ལ་འདི་ལྟར་སྨྲས༌པ། ཁོང་གིས་ད་ཅང་མི་འགོར་བར་ཁྱོད་རྣམས་ཀྱིས་ང་རང་མཐོང་བར་མི་འགྱུར༌ཞིང༌། ཡང་དེ་ནས་ཅང་མི་འགོར་བར་ཁྱོད་རྣམས་ཀྱིས་ང་རང་མཐོང་བར་འགྱུར་ཞེས༌དང༌། ཡང་ཁོང་གིས་ང་རང་ཡབ་ཀྱི་དྲུང་དུ་འགྲོ་བའི་ཕྱིར་ཡིན་ཞེས་གསུངས་པའི་དོན་ཅི་ཡིན་ནམ་ཞེས་སྨྲས༌ཤིང༌།
18 ཡང་ཐུགས་སྲས་རྣམས་ན༌རེ། ཁོང་གིས་ཅང་མི་འགོར་བར་ཞེས་གསུངས་པའི་དོན་ཅི་ཡིན༌ནམ། ཁོང་གིས་ཅི་གསུངས་པ་བདག་ཅག་གིས་མི་ཤེས་ཞེས་སྨྲས་སོ།།
19 དེ་ནས་ཐུགས་སྲས་རྣམས་ཀྱིས་ཁོང་ལ་བཀའ་འདྲི་ཞུ་འདོད་པ་སྐྱབས་མགོན་ཡེ་ཤུས་མཁྱེན་ཏེ་འདི་སྐད༌དུ། ངས་ད་ཅང་མི་འགོར་བར་ཁྱོད་རྣམས་ཀྱིས་ང་རང་མཐོང་བར་མི་འགྱུར༌ཞིང༌། ཡང་ཅང་མི་འགོར་བར་ཁྱོད་རྣམས་ཀྱིས་ང་རང་མཐོང་བར་འགྱུར་ཞེས་སྨྲས་པ་འདིར་ཁྱོད་རྣམས་ཕན་ཚུན་ལ་དྲི་བ་ཡོད༌དམ།
20 ངས་ཁྱོད་ཅག་ལ་ཡང་དག་པར་བདེན་པར་སྨྲ༌སྟེ། ཁྱོད་རྣམས་ངུ་ཞིང་མྱ་ངན་བྱེད་ནའང་འཇིག་རྟེན་གྱི་མི་རྣམས་དགའ་བར༌འགྱུར། ཁྱོད་ཅག་ལ་སྡུག་བསྔལ་འབྱུང་ཡང་ཁྱོད་རྣམས་ཀྱི་སྡུག་བསྔལ་དེ་དགའ་སྤྲོ་རུ་འགྱུར་ངེས༌ཡིན།
21 བུད་མེད་ཅིག་གིས་ཕྲུ་གུ་བཙའ༌དུས། ཁོ་མོའི་ཕྲུ་གུ་བཙའ་བའི་དུས་དེ་སླེབས་ཚེ་ན་ཟུག་འབྱུང༌ནའང༌། ཕྲུ་གུ་བཙས་རྗེས་མི་ཞིག་འཇིག་རྟེན་དུ་སྐྱེས་པ་ཡིན་པས་ཁོ་མོ་དགའ་སྟེ་ན་ཟུག་མི་དྲན༌ནོ།།
22 ད་ལྟ་ཁྱོད་རྣམས་ལ་སྡུག་བསྔལ་ཡོད་ནའང་བདག་ནི་སླར་ཡང་ཁྱོད་ཅག་དང་འཕྲད་པར་འགྱུར༌ཞིང༌། ཁྱོད་ཅག་གི་སེམས་དགའ་བར་འགྱུར་ལ། ཁྱོད་རྣམས་ཀྱི་དགའ་སྤྲོ་སུས་ཀྱང་འཕྲོག་མི་ནུས།
23 ཉིན་དེ་སླེབས་ཚེ། ཁྱོད་ཅག་གིས་ང་རང་ལ་དོན་ཅི་ཡང་མི༌འདྲི། ངས་ཁྱོད་རྣམས་ལ་ཡང་དག་པར་བདེན་པར་སྨྲ༌སྟེ། ཁྱོད་རྣམས་ཀྱིས་ངའི་མིང་ལ་བརྟེན་ནས་ཡབ་ལ་གང་ཞིག་ཞུས་ཀྱང་ཁོང་གིས་གནང་བར་འགྱུར་རོ།།
24 སྔོན་ཆད་ཁྱོད་ཅག་གིས་བདག་གི་མིང་ལ་བརྟེན་ནས་ཅི་ཡང་ཞུས་མ་མྱོང༌ལ། ཁྱོད་ཅག་ལ་དགའ་སྤྲོས་ཁེངས་པའི༌ཕྱིར། ད་ལྟ་གསོལ་བ་ཐོབས་དང་འཐོབ་ངེས་སོ།།
25 བདག་གིས་དོན་དེ་རྣམས་དཔེའི་སྒོ་ནས་ཁྱོད་ཅག་ལ་སྨྲས༌ཀྱང༌། ཁྱོད་ཅག་ལ་དཔེའི་སྒོ་ནས་མི་སྨྲ་བའི་དུས་ཤིག་སླེབས་པར་ཉེ་བ༌ན། ངས་ཡབ་ཀྱི་སྐོར་ཁྱོད་ཅག་ལ་གསལ་པོར༌སྨྲ་བར་བྱའོ།།
26 ཉིན་དེ་སླེབས་ཚེ། ཁྱོད་རྣམས་ཀྱིས་ངའི་མིང་ལ་བརྟེན་ནས་གསོལ་བ་འདེབས་པར་འགྱུར། ངས་ཁྱོད་ཅག་གི་དོན་དུ་ཡབ་ལ་ཞུ་བར་བྱ་ཞེས་ཁྱོད་རྣམས་ལ་མི༌སྨྲ་སྟེ།
27 རྒྱུ་མཚན་ནི་ཁྱོད་ཅག་གིས་ང་རང་ལ་བྱམས་ཤིང་གཅེས་པ༌དང༌། ང་རང་ཡབ་ཀྱི་དྲུང་ནས་བྱུང་བ་ལའང་དད་པ་བྱས་པས། ཡབ་ཀྱིས་ཀྱང་ཁྱོད་རྣམས་ལ་བྱམས་ཤིང་གཅེས་པའི་ཕྱིར༌རོ།།
28 ང་རང་ཡབ་ཀྱི་དྲུང་ནས་བྱུང་སྟེ་འཇིག་རྟེན་དུ་ཡོང་བ༌དང༌། ཡང་འཇིག་རྟེན་དང་ཁ་བྲལ་ནས་ཡབ་ཀྱི་དྲུང་དུ་འགྲོ་བ་ཡིན་ཞེས་གསུངས་སོ།།
29 དེ་ནས་ཐུགས་སྲས་རྣམས་ན༌རེ། ལགས༌སོ།། ད་ནི་ཁྱེད་ཀྱིས་དཔེའི་སྒོ་ནས་མ་གསུངས་པར་གསལ་པོར་གསུངས།
30 ད་ལྟ་ངེད་ཅག་གིས་ཁྱེད་ནི་དོན་ཀུན་མཁྱེན་པ་དང་སུས་ཀྱང་ཁྱེད་ལ་བཀའ་འདྲི་ཞུ་མི་དགོས་པ་ཤེས༌པས། ཁྱེད་རང་ནི་དཀོན་མཆོག་གི་དྲུང་ནས་ཕེབས་པ་ཡིན་པར་དད་པ་བྱེད་ཅེས་ཞུས་པ༌ལ།
31 སྐྱབས་མགོན་ཡེ་ཤུས་འདི་སྐད༌དུ། ད་ལྟ་ཁྱོད་རྣམས་ཀྱིས་དད་པ་བྱེད༌དམ།
32 ལྟོས༌དང༌། དུས་ཤིག་སླེབ་ངེས་ཤིང་ད་ལྟ་དངོས་སུ་སླེབས་ཟིན་ཏེ། ཁྱོད་རྣམས་སོ་སོར་གྱེས་ནས་རང་ཡུལ་དུ་འགྲོ་ཞིང་ང་རང་ཁོ་ན་བསྐྱུར་ངེས༌ཡིན། འོན་ཀྱང་ཡབ་ནི་བདག་དང་མཉམ་དུ་བཞུགས་པས་ང་རང་གཅིག་པུ་མ་ཡིན།
33 བདག་གི་ནང་དུ་ཁྱོད་རྣམས་ལ་ཞི་བདེ་འཐོབ་པའི་ཕྱིར། ངས་ཁྱོད་ཅག་ལ་དོན་དེ་རྣམས་སྨྲས༌པ་ཡིན། འཇིག་རྟེན་འདིར་ཁྱོད་རྣམས་ལ་དཀའ་སྡུག་ཡོད་ནའང༌། ང་རང་ནི་འཇིག་རྟེན་ ལས་རྣམ་པར་རྒྱལ་བས་ཁྱོད་ཅག་གི་སེམས་བདེ་བར་གྱིས་ཞེས་གསུངས༌སོ།།