ལེའུ་བཅུ་གསུམ༌པ།
སྐྱབས་མགོན་ཡེ་ཤུས་རང་གི་ཐུགས་སྲས་ཀྱི་རྐང་པ་བཀྲུ་བར་མཛད༌པ།
1 པེ་སག་གི་དུས་ཆེན་གྱི་སྔོན༌ལ། སྐྱབས་མགོན་ཡེ་ཤུས་རང་ཉིད་འཇིག་རྟེན་འདི་དང་ཁ་བྲལ་ནས་ཡབ་ཀྱི་དྲུང་དུ་གཤེགས་དགོས་པའི་དུས་ལ་བབས་པ་མཁྱེན་པ༌དང༌། ཁོང་གིས་འཇིག་རྟེན་འདིའི་རང་ཉིད་ལ་གཏོགས་པའི་རྗེས་འབྲང་པ་རྣམས་ལ་གཏན་དུ་བྱམས་ཤིང་གཅེས་ལ། དུས་མཐའ་མའི་བར་དུའང་བྱམས་པར་མཛད༌དོ།།
2 དེ་ནས་དགོང་ཟས་བཞེས་པའི་དུས༌སུ། བདུད་ཀྱིས་སྐྱབས་མགོན་ཡེ་ཤུ་ལ་ངོ་ལོག་བྱེད་པའི་བསམ་ཚུལ༌དེ་ནི་སྔར་ནས་ཨི་སི་ཀར་རེའི་སི་མོན་གྱི་བུ་ཡུ་དཱའི་སེམས་སུ་བཞག༌ཡོད་པ་རེད།
3 ཡབ་ཀྱིས་དབང་ཐམས་ཅད་རང་གི་ཕྱག་ལ་སྤྲད་པ་དང་རང་ཉིད་ནི་དཀོན་མཆོག་ནས་འོངས་ཤིང་སླར་ཡང་དཀོན་མཆོག་གི་དྲུང་དུ་གཤེགས་དགོས་པ་སྐྱབས་མགོན་ཡེ་ཤུས་མཁྱེན༌ཏེ།
4 བཞུགས་གྲལ་ནས་ཡར་བཞེངས་ཤིང་ཕྱི་གོས་ཕུད་དེ་རས་ལེབ་ཅིག་རྐེད་པར་དཀྲིས༌རྗེས།
5 གཞོང་པའི་ནང་དུ་ཆུ་བླུགས་ཏེ་ཐུགས་སྲས་རེ་རེའི་རྐང་པ་བཀྲུས་པ་དང་རྐེད་པའི་རས་ལེབ་བླངས་ནས་ཕྱིས༌པ་རེད།
6 དེ་ནས་ཐུགས་སྲས་སི་མོན་པེ་ཏྲོའི་རྐང་པ་བཀྲུ་བར་ཕྲད་པ་ན་ཁོ་ན༌རེ། གཙོ་བོ༌ལགས། ཁྱེད་ཀྱིས་བདག་གི་རྐང་པ་བཀྲུ་འདོད་དམ་ཞེས་ཞུས་པ༌ན།
7 སྐྱབས་མགོན་ཡེ་ཤུས་འདི་སྐད༌དུ། བདག་གིས་གང་ཞིག་བྱེད་པ་འདི་ད་ལྟ་ཁྱོད་ཀྱིས་མི་རྟོགས་ཀྱང་རྗེས་སུ་རྟོགས་པར་ངེས་ཞེས་གསུངས་སོ།།
8 ཡང་པེ་ཏྲོ་ན༌རེ། ཁྱེད་ཀྱིས་ནམ་ཡང་བདག་གི་རྐང་པ་བཀྲུ་མི་འོས་ཞེས་ཞུས་པ༌ལ། སྐྱབས་མགོན་ཡེ་ཤུས་འདི་སྐད༌དུ། གལ་ཏེ་ངས་ཁྱོད་མ་བཀྲུས༌ན། ཁྱོད་ནི་བདག་དང་འབྲེལ་བ་མེད་ཅེས་གསུངས་སོ།།
9 ཡང་སི་མོན་པེ་ཏྲོ་ན༌རེ། གཙོ་བོ༌ལགས། ཁྱེད་ཀྱིས་ངའི་རྐང་པ་ཙམ་མ༌ཟད། ངའི་ལག་པ་དང་མགོ་བོའང་བཀྲུ་བར་མཛོད་ཅེས་ཞུས་པ༌ན།
10 སྐྱབས་མགོན་ཡེ་ཤུས་འདི་སྐད༌དུ། ཁྲུས་བྱས་མྱོང་བ་རྣམས་ཀྱི་ལུས་ཧྲིལ་པོ་གཙང༌བ་ཡིན། རྐང་པ་ལས་གཞན་རང་གི་ལུས་པོ་བཀྲུ་མི་དགོས༌ལ། ཁྱོད་རྣམས་ནི་གཙང་མ་ཡིན་ཡང་ཐམས་ཅད་གཙང་མ་མིན་ཞེས་གསུངས་སོ།།
11 དོན་ནི་སྐྱབས་མགོན་ཡེ་ཤུས་རང་ཉིད་ལ་ངོ་ལོག་བྱེད་མཁན་སུ་ཡིན་པ་མཁྱེན༌པས། ཁྱོད་རྣམས་ཐམས་ཅད་གཙང་བ་མ་ཡིན་ཞེས་པའོ།།
12 དེ་ནས་སྐྱབས་མགོན་ཡེ་ཤུས་ཐུགས་སྲས་རྣམས་ཀྱི་རྐང་པ་བཀྲུས་ཚར༌རྗེས། ཕྱི་གོས་མནབས་ཤིང་སླར་ཡང་བཞུགས་ཏེ་འདི་སྐད༌དུ། ངས་ཁྱོད་རྣམས་ལ་ཅི་བྱས་པ་འདི་ཁྱོད་རྣམས་ཀྱིས་ཤེས༌སམ།
13 ཁྱོད་རྣམས་ཀྱིས་བདག་ལ་སློབ་དཔོན་ནམ་གཙོ་བོ་ཞེས་འབོད་ཅིང༌། བདག་ནི་དངོས་གནས་དེ་ཉིད་ཡིན་པས་ཁྱོད་ཅག་གིས་སྨྲས་པའང་བདེན༌པ་ཡིན།
14 བདག་ནི་ཁྱོད་རྣམས་ཀྱི་གཙོ་བོ་དང་སློབ་དཔོན་ཡིན་ཡང་ངས་ཁྱོད་རྣམས་ཀྱི་རྐང་པ་བཀྲུས༌པས། ཁྱོད་ཅག་གིས་ཀྱང་ཕན་ཚུན་གྱི་རྐང་པ་བཀྲུ་འོས།
15 ངས་ཁྱོད་རྣམས་ལ་མིག་དཔེ་བསྟན༌ཅིང༌། ཁྱོད་རྣམས་ཀྱིས་ཀྱང་བདག་བཞིན་དུ་བྱ་འོས༌པ་ཡིན།
16 བདག་གིས་ཁྱོད་རྣམས་ལ་ཡང་དག་པར་བདེན་པར་སྨྲ༌སྟེ། གཡོག་པོ་ནི་བདག་པོ་ལས་ཆེན་པོ་ཡིན་མི་སྲིད༌ཅིང༌། མངག་བྱའི་མི་སྣའང་མངགས་མཁན་ལས་ཆེན་པོ་མིན།
17 ད་ལྟ་ཁྱོད་རྣམས་ཀྱིས་ཀྱང་དོན་དེ་རྟོགས་པས་དེ་བཞིན་དུ་བྱེད་ན་ཁྱོད་རྣམས་ལའང་བདེ་བ་དང་ལྡན་པར༌ངེས།
18 བདག་གིས་གཏམ་འདི་ཁྱོད་ཅག་ཐམས་ཅད་ལ་སྨྲས་པ་མིན༌ལ། བདག་གིས་སུ་ཞིག་བདམས་པ་ངས་ཀྱང་ཤེས་སོ།། དེ་ནི་གསུང་རབ་ཀྱི་མདོ་ལས་ཇི་སྐད༌དུ།
བདག་དང་མཉམ་དུ་ཁ་ཟས་སྤྱོད་མཁན༌གྱིས།།
བདག་ལ་རྐང་པའི་ཕྱི་རྟིང་བསྟན་པ་ཡིན།།
ཞེས་གསུངས་པ་བཞིན་འགྲུབ་པའི་ཕྱིར༌ཡིན།
19 ད་ལྟ་དོན་དེ་མ་འགྲུབ་པའི་སྔོན༌དུ། བདག་གིས་ཐོག་མར་ཁྱོད་རྣམས་ལ་སྨྲ་བར་བྱ༌སྟེ། དོན་དེ་འགྲུབ་པའི་དུས་སུ་ཁྱོད་རྣམས་ཀྱིས་ང་རང་དེ་ཉིད་ཡིན་པ་ལ་དད་པ་བྱེད་པའི་ཕྱིར༌རོ།།
20 བདག་གིས་ཁྱོད་རྣམས་ལ་ཡང་དག་པར་བདེན་པར་སྨྲ༌སྟེ། མི་སུས་ཀྱང་ངས་མངགས་པ་གང་ཞིག་ལ་བསུ་བ་བྱས་ན་ང་རང་ལའང་བསུ་བ་བྱས་པ༌ཡིན། ང་རང་ལ་བསུ་བ་བྱས་ན་དོན་དམ་དུ་ང་རང་མངགས་མཁན་ལའང་བསུ་བ་བྱས་པ་ཡིན་ཞེས་གསུངས༌སོ།།
སྐྱབས་མགོན་ཡེ་ཤུས་ངོ་ལོག་པའི་མཚང་བརྟོལ༌བ།
21 སྐྱབས་མགོན་ཡེ་ཤུས་དེ་སྐད་གསུངས་པ་དང་ཐུགས་སྐྱོ་བར་གྱུར་ནས་འདི་སྐད༌དུ། བདག་གིས་ཁྱོད་རྣམས་ལ་ཡང་དག་པར་བདེན་པར་སྨྲ༌སྟེ། ཁྱོད་རྣམས་ལས་མི་གཅིག་གིས་ང་རང་ལ་ངོ་ལོག་བྱ་ངེས་ཡིན་ཞེས་གསུངས་པ༌དང༌།
22 ཐུགས་སྲས་རྣམས་ཀྱིས་ཕན་ཚུན་ལ་བལྟས་ཀྱང་ཁོང་གིས་གསུངས་པའི་མི་དེ་སུ་ཡིན་མ་ཤེས་པར་ཐེ་ཚོམ་སྐྱེས་སོ།།
23 སྐྱབས་མགོན་ཡེ་ཤུའི་སྐུ་བྲང་དུ་སྔས་པའི་ཁོང་གི་གཅེས་པའི་ཐུགས་སྲས་དེ༌ལ།
24 སི་མོན་པེ་ཏྲོས་བརྡ་བསྟན་ཏེ་ན༌རེ། ཁྱོད་ཀྱིས་ཤོད༌དང༌། སྐྱབས་མགོན་ཡེ་ཤུས་སུ་ཞིག་ལ་གསུངས་པ་ཡིན་ནམ་ཞེས་དྲིས་སོ།།
25 ཐུགས་སྲས་དེས་རང་གི་མགོ་བོ་སྐྱབས་མགོན་ཡེ་ཤུའི་སྐུ་བྲང་ལ་བསྔས༌ཏེ། གཙོ་བོ༌ལགས། མི་དེ་སུ་ཡིན་ནམ་ཞེས་ཞུས་པ༌ན།
26 སྐྱབས་མགོན་ཡེ་ཤུས་འདི་སྐད༌དུ། ངས་བག་ལེབ་དུམ་བུ་འདི་སྡེར་མའི་ནང་ལ་སྦངས་ནས་སུ་ཞིག་ལ་བྱིན་ན་དེ་ཡིན་ཞེས་གསུངས༌རྗེས། ཁོང་གིས་བག་ལེབ་དུམ་བུ་དེ་སྡེར་མའི་ནང་ལ་སྦངས་རྗེས་ཨི་སི་ཀར་རེའི་སི་མོན་གྱི་བུ་ཡུ་དཱ་ལ་གནང༌ངོ་༎
27 ཡུ་དཱས་ཀྱང་བག་ལེབ་སྦངས་མ་དེ་ཚུར་བླངས་མ་ཐག་བདུད་སཱ་ཏན་ཡང་ཁོའི་སེམས་ནང་དུ་ཞུགས་པ་རེད། དེ་ནས་སྐྱབས་མགོན་ཡེ་ཤུས་ཡུ་དཱ་ལ་འདི་སྐད༌དུ། ཁྱོད་ཀྱིས་བྱ་བ་གང་ཞིག་འདོད་པ་དེ་མྱུར་དུ་སྒྲུབས་ཤིག་ཅེས་གསུངས༌ནའང༌།
28 སྐྱབས་མགོན་ཡེ་ཤུ་དང་ལྷན་དུ་གྲལ་ལ་བཞུགས་པའི་མི་སུས་ཀྱང་ཁོང་གིས་ཅིའི་ཕྱིར་དེ་ལྟར་གསུངས་པའི་དོན་མ་རྟོགས་སོ།།
29 རྒྱུ་མཚན་ནི་ཐུགས་སྲས་ལ་ལས་ཡུ་དཱའི་ལག་ཏུ་དངུལ་ཁུག་བཟུང་ཡོད༌པས། སྐྱབས་མགོན་ཡེ་ཤུས་ཁོ་རང་ནི་དུས་ཆེན་ལ་མཁོ་བའི་དངོས་རྫས་ཉོ་བར་བསྐུལ༌བའམ། ཡང་ན་དབུལ་པོ་རྣམས་ལ་གང་ཞིག་སྦྱིན་པར་གསུངས་པར་བསམས་སོ།།
30 དེ་ནས་ཡུ་དཱས་བག་ལེབ་སྦངས་མ་དེ་བླངས་མ་ཐག་ཕྱི་རོལ་ཏུ་སོང་བ་དང་དུས་དེ་ནི་མཚན་མོ་ཡིན༌ནོ།།
པེ་ཏྲོ་སྐྱབས་མགོན་ཡེ་ཤུའི་ཐུགས་དང་འགལ་བའི་ལུང་བསྟན།
31 དེ་ནས་ཡུ་དཱ་ཕྱི་རོལ་ཏུ་སོང་བ་དང་སྐྱབས་མགོན་ཡེ་ཤུས་འདི་སྐད༌དུ། ད་ནི་མིའི་བུ་གཟི་བརྗིད་དང་ལྡན་པར་འགྱུར་ཞིང་དཀོན་མཆོག་གི་གཟི་བརྗིད་ཀྱང་མིའི་བུ་བརྒྱུད་ནས་མངོན་པར་འགྱུར༌ལ།
32 ཡང་དཀོན་མཆོག་གི་གཟི་བརྗིད་མིའི་བུ་བརྒྱུད་ནས་མངོན་པར་འགྱུར་བས༌ན། དཀོན་མཆོག་རང་ཉིད་ཀྱིས་ཀྱང་མིའི་བུ་གཟི་བརྗིད་དང་ལྡན་པར་མཛད་དེ་མྱུར་བ་མྱུར་དུ་མཛད་ངེས༌ཡིན།
33 བདག་གི་གཅེས་པའི་བུ༌རྣམས། བདག་ནི་ད་དུང་དུས་ཐུང་ངུ་ཙམ་ལ་ཁྱོད་ཅག་དང་མཉམ་དུ་ཡོད༌དེ། རྗེས་སུ་ཁྱོད་ཅག་གིས་ང་རང་འཚོལ་བར་འགྱུར་ནའང་། བདག་གིས་དེ་སྔར་ཡ་ཧུ་དཱ་པ་རྣམས་ལ་སྨྲས་པ་བཞིན་ད་ནི་ཁྱོད་རྣམས་ལའང་སྨྲ་བར་བྱ༌སྟེ། ང་རང་འགྲོ་བའི་གནས་སུ་ཁྱོད་རྣམས་འགྲོ་མི་ནུས་སོ།།
34 བདག་གིས་ཁྱོད་ཅག་ལ་བཀའ་གསར་པ་ཞིག་གནང་བར༌བྱའོ།། དེ་ནི་ཁྱོད་རྣམས་ཀྱིས་ཕན་ཚུན་ལ་བྱམས་ཤིང་གཅེས་པར་བྱེད་དགོས་པ༌དེ་ཡིན། ངས་ཁྱོད་རྣམས་ལ་བྱམས་ཤིང་གཅེས་པ་བཞིན་ཁྱོད་རྣམས་ཀྱིས་ཀྱང་ཕན་ཚུན་ལ་གཅེས་དགོས།
35 ཁྱོད་རྣམས་ཀྱིས་ཕན་ཚུན་ལ་བྱམས་ཤིང་གཅེས་པར་བྱས༌ན། མི་ཐམས་ཅད་ཀྱིས་ཀྱང་ཁྱོད་རྣམས་བདག་གི་རྗེས་འབྲང་པ་ཡིན་པ་ཤེས་པར་འགྱུར་ཞེས་གསུངས༌སོ།།
36 དེ་ནས་སི་མོན་པེ་ཏྲོ་ན༌རེ། གཙོ་བོ༌ལགས། ཁྱེད་ཉིད་གང་དུ་ཕེབས་སམ་ཞེས་ཞུས་པ༌ལ། སྐྱབས་མགོན་ཡེ་ཤུས་འདི་སྐད༌དུ། ང་རང་འགྲོ་བའི་གནས་སུ་ད་ལྟ་ཁྱོད་རང་བདག་གི་རྗེས་སུ་འབྲངས་ནས་འགྲོ་མི་ཐུབ༌ཀྱང༌། ཕྱིས་སུ་བདག་གི་རྗེས་སུ་འབྲང་བར་འགྱུར་ཞེས་གསུངས་སོ།།
37 ཡང་པེ་ཏྲོ་ན༌རེ། གཙོ་བོ༌ལགས། ད་ལྟ་ང་རང་ཅིའི་ཕྱིར་ཁྱེད་ཀྱི་རྗེས་སུ་འབྲང་མི་ཐུབ༌བམ། ངས་ཁྱེད་ཀྱི་དོན་དུ་རང་སྲོག་ཀྱང་བློས་གཏོང་བར་བྱའོ་ཞེས་ཞུས་པ༌ན།
38 ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱིས་བདག་གི་དོན་དུ་རང་སྲོག་ཀྱང་བློས་གཏོང་ཐུབ༌བམ། ངས་ཁྱོད་ལ་ཡང་དག་པར་བདེན་པར་སྨྲ༌སྟེ། བྱ་ཕོ་མ་གྲགས་པའི་སྔོན༌དུ། ཁྱོད་ཀྱིས་ང་རང་ཐེངས་གསུམ་ལ་ཁས་མི་ལེན་ཞེས་གསུངས༌སོ།།