ཡོ་ཧ་ནན་གྱི་འཕྲིན་བཟང་ལ་ཞལ་ཆད་རྙིང་པས་ཤུགས་རྐྱེན་ཧ་ཅང་ཆེན་པོ་ཞིག་ཐེབས་ཡོད། འོད་དང་ཚེ་སྲོག་གི་སྐོར་བརྗོད་པ་ནི་འཇིག་རྟེན་ཁམས་བཀོད་པའི་མདོ་ལས་འཇིག་རྟེན་བཀོད་པའི་གནས་ཚུལ་དང་འབྲེལ་བ་ཟབ་མོ་ཡོད། པེ་སག་གི་དུས་ཆེན་གྱི་དྲན་སྐུལ་རྣམས་ཡོ་ཧ་ནན་གྱི་འཕྲིན་བཟང་ནང་རྒྱུན་དུ་འབྱུང་ཞིང་། ཡོ་ཧ་ནན་ཞེས་བྱ་བ་ནི་གཙོ་བོ་ཡ་ཝཱེ་ཐུགས་རྗེ་ཅན་ཞེས་པའི་དོན་ཡིན།

གཞུང་འདི་ཡི་གེར་འགོད་མཁན་ནི་སྐྱབས་མགོན་ཡེ་ཤུས་གཅེས་པའི་ཐུགས་སྲས་ཏེ་སྐུ་ཚབ་པ་ཡོ་ཧ་ནན་ཡིན། ཡོ་ཧ་ནན་ལ་ཡ་ཧུ་དཱ་པའི་འཚོ་བར་གསལ་ཆ་ཡོད་དེ། རྒྱུན་དུ་ཡ་ཧུ་དཱའི་ལུགས་སྲོལ་གྱི་སྐོར་གསུངས་ཡོད། ཡོ་ཧ་ནན་གྱི་འཕྲིན་བཟང་ནི་མི་ཞིག་གིས་དངོས་སུ་མཐོང་བའི་བདེན་དཔང་ལྟར་བརྗོད་ཡོད་པས་དེ་ལ་ཐུན་མོང་མ་ཡིན་པའི་ཁྱད་ཆོས་མང་པོ་ལྡན་པར་གདོན་མི་ཟ། ཡི་གེར་བཀོད་པའི་ལོ་ཚིགས་ནི་སྤྱི་ལོ་85ལོའི་ཡས་མས་སམ། ཡང་ན་དེའི་གཞུག་ཙམ་ཡིན་པར་དགོངས།

ཡི་གེར་འགོད་མཁན་གྱིས་ལེའུ་ཉི་ཤུ་པའི་ཚིག་རྐང་སོ་གཅིག་ལས་རང་ཉིད་ཀྱི་རྩ་བའི་དམིགས་ཡུལ་གསལ་པོར་བསྒྲགས་ཡོད་དེ། ཁོང་གིས་གྷི་རིག་གི་ཀློག་པ་པོ་རྣམས་སེམས་ལ་བཅངས་ནས་གཞུང་འདི་ཡི་གེར་བཀོད་པར་འདོད། ཁོང་གི་དམིགས་ཡུལ་གཙོ་བོ་ནི་འཕྲིན་བཟང་སྒྲོག་རྒྱུ་དེ་ཡིན་ལ། བདེན་དཔང་གསར་པ་ཞིག་འགོད་རྒྱུ་མ་ཡིན་པར་དོན་རྣམས་ཁ་གསལ་ནས་བདེན་དཔང་དེ་ཁས་ལེན་ནམ་མི་ལེན་ཞེས་པ་དེ་ཡིན། ཁོང་གིས་ཀློག་པ་པོ་རྣམས་ལ་གནས་ཚུལ་བརྗོད་པའི་ཆེད་དུ་གཞུང་འདི་ཡི་གེར་བཀོད་པ་མ་ཡིན་པར། སྐྱབས་མགོན་ཡེ་ཤུར་དད་དགོས་པའི་སྐུལ་འདེབས་ཀྱི་ཆེད་དུ་ཡིན།

1. གཞུང་གི་ཁྱད་ཆོས་བརྗོད་པ། ༼1:1-18༽

2. སྐྱབས་མགོན་ཡེ་ཤུས་ཆོས་སྒྲོག་འགོ་བརྩམས་པ། ༼1:19-51༽

3. སྐྱབས་མགོན་ཡེ་ཤུའི་ཕྱག་ལས་ཏེ། རྟགས་མཚན་དང་གསུང་ཆོས་ཀྱི་སྐོར། ༼2:1-11:57༽

4. སྐྱབས་མགོན་ཡེ་ཤུ་ཁོང་ཉིད་ཡེ་རུ་སཱ་ལེམ་དུ་ཕེབས་པ་དང་། མཐར་ཤིང་རྒྱ་གྲམ་གྱི་སྟེང་དུ་བརྡབས་པའི་གཟའ་འཁོར། ༼12:1-19:42༽

5. སྐྱབས་མགོན་ཡེ་ཤུ་སླར་གསོན་པ། ༼20:1-29༽

6. དམིགས་ཡུལ་བརྗོད་པའི་བསྒྲགས་གཏམ། ༼20:30-31༽

7. མཇུག་གི་གཏམ་གླེང་། ༼21:1-25༽