ལེའུ་གསུམ་པ།
དཀོན་མཆོག་གིས་མི་རིགས་རྣམས་ལ་ཁྲིམས་ཐག་གཅོད་པ།
1 ལྟོས་ཤིག ཉིན་མོ་དེ་རྣམས་དང་དུས་དེ་ལ་བདག་གིས་ཡ་ཧུ་དཱ་དང་ཡེ་རུ་སཱ་ལེམ་གཉིས་ཀྱི་བཙོན་པ་རྣམས་ཕྱིར་ལོག་ཏུ་འཇུག་པའི་དུས་སུ།
2 བདག་གིས་མི་རིགས་ཐམས་ཅད་བསྡུས་ནས། དེ་རྣམས་ཡེ་ཧོ་ཤ་ཕད་ཀྱི་ལུང་པར་ཁྲིད་དེ། གནས་དེར་བདག་གིས་རང་གི་མི་སྡེ་སྟེ་བདག་གི་ནོར་སྐལ་ཡེས་ར་ཨེལ་གྱི་ཕྱིར་དུ་མི་རིགས་རྣམས་ལ་ཁྲིམས་ཐག་གཅོད་ངེས་ཏེ། ཅིའི་ཕྱིར་ཞེ་ན། དེ་རྣམས་ཀྱིས་ངའི་མི་སྡེ་ནི་མི་རིགས་རྣམས་ཀྱི་ཁྲོད་དུ་གཏོར་ནས་ངའི་ཡུལ་ཐམས་ཅད་བགོས་པ་དང་།
3 ཡང་ངའི་མི་སྡེའི་དོན་དུ་རྒྱན་འཕངས་ཏེ། བུ་ཆུང་རྣམས་སྨད་འཚོང་མ་ལ་བརྗེས་པ་དང་། བུ་མོ་རྣམས་རྒུན་ཆང་གི་དོན་དུ་བཙོངས་ནས་རྒུན་ཆང་འཐུང་བའོ། །
4 ཀྱེ་ཐཱར་དང་ཚི་ཏུན་དང་། ཕེ་ལེ་ཤེད་མཐའ་འཁོར་གྱི་མི་རྣམས། ཁྱོད་རྣམས་བདག་དང་འབྲེལ་བ་ཅི་ཡོད་དམ། ཁྱོད་རྣམས་ཀྱིས་བདག་ལ་འཁོན་ལན་སློག་གམ། གལ་ཏེ་བདག་ལ་འཁོན་ལན་སློག་པ་ཡིན་ན། བདག་གིས་དེའི་རྣམ་སྨིན་ནི་མྱུར་བ་མྱུར་དུ་ཁྱོད་རང་གི་མགོ་ལ་འཁོར་བར་བྱའོ། །
5 ཁྱོད་རྣམས་ཀྱིས་ངའི་གསེར་དང་དངུལ་རྣམས་ཕྲོགས་ནས། ངའི་རིན་པོ་ཆེ་རྩ་ཆེན་རྣམས་ཁྱེར་ཏེ་རང་གི་ལྷ་ཁང་རྣམས་སུ་བཞག་པར་མ་ཟད།
6 ད་དུང་ཡ་ཧུ་དཱ་པ་དང་ཡེ་རུ་སཱ་ལེམ་པ་རྣམས་རང་གི་ཡུལ་དང་ཁ་འབྲལ་བའི་ཕྱིར་གྷི་རི་སི་པ་རྣམས་ལ་བཙོངས།
7 ལྟོས་ཤིག བདག་གིས་དེ་རྣམས་ལ་བསྐུལ་ནས། ཁྱོད་རྣམས་ཀྱིས་དེ་དག་བཙོངས་པའི་གནས་དེ་དང་འབྲལ་བར་བྱ་ཞིང་། ཡང་དེའི་རྣམ་སྨིན་ནི་ཁྱོད་རང་གི་མགོ་ལ་འཁོར་བར་བྱའོ། །
8 ཡང་བདག་གིས་ཁྱོད་ཀྱི་བུ་དང་བུ་མོ་རྣམས་ཡ་ཧུ་དཱ་པ་རྣམས་ཀྱི་ལག་ཏུ་བཙོངས་ནས། དེ་དག་གིས་ཁོ་རྣམས་རྒྱང་རིང་ཡུལ་གྱི་ཤེ་བཱ་པ་རྣམས་ལ་བཙོང་བར་འགྱུར་རོ་ཞེས་དཀོན་མཆོག་ཡ་ཝཱེས་འདི་སྐད་གསུངས་པའོ། །
9 མི་རིགས་རྣམས་ཀྱི་ཁྲོད་དུ་འདི་ལྟར་ཁྱབ་བསྒྲགས་བྱེད་དགོས་ཏེ། དམག་རྒྱག་པར་གྲ་སྒྲིག་བྱོས་ཤིག དཔའ་བོ་རྣམས་ལ་ངར་བསླངས་ནས་དམག་ཐམས་ཅད་ཡར་ཡོང་དུ་ཆུག
10 རང་གི་ཐོང་གཤོལ་རྣམས་ཀྱིས་རལ་གྲི་བརྡུང་བ་དང་། ཟོར་བ་རྣམས་ཀྱིས་མདུང་བརྡུངས་ཏེ། ཉམས་ཆུང་དག་གིས་ང་ནི་དཔའ་བོ་ཡིན་ཞེས་བརྗོད་དགོས།
11 ཀྱེ་ཕྱོགས་བཞིའི་མི་རིགས་རྣམས། ཁྱོད་རྣམས་མྱུར་དུ་ཡར་ཤོག་ལ་མཉམ་དུ་འཛོམས་པར་གྱིས། ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་ཉིད་ཀྱི་དཔའ་བོ་རྣམས་འོང་བར་མཛོད།
12 མི་རིགས་རྣམས་སྙིང་སྟོབས་བསྐྱེད་ནས་ཡེ་ཧོ་ཤ་ཕད་ཀྱི་ལུང་པར་འོང་དགོས་ཏེ། ཅིའི་ཕྱིར་ཞེ་ན། ང་རང་དེར་བསྡད་ནས་ཕྱོགས་བཞིའི་མི་རིགས་ཐམས་ཅད་ལ་ཁྲིམས་ཐག་གཅོད་པར་འགྱུར་རོ། །
13 འབྲུ་རིགས་སྨིན་པས་ཟོར་བས་བྲོགས་ཤིག རྒུན་ཆང་འཚིར་གཞོང་བཀང་བས་ཤོག་ལ་རྫིས་ཤིག དེ་དག་གི་སྡིག་པ་ཚབས་ཤིན་ཏུ་ཆེ་བས་ན་འཚིར་གཞོང་བཀང་ནས་མེར་བའོ། །
14 ཐག་ཆོད་ལུང་པར་མི་ཚོགས་ཤིན་ཏུ་མང་སྟེ། ཅིའི་ཕྱིར་ཞེ་ན། དཀོན་མཆོག་ཡ་ཝཱེའི་ཉིན་མོ་དེ་ཐག་ཆོད་ལུང་པ་དང་ཉེ་བར་སླེབས་པའོ། །
15 ཉི་མ་དང་ཟླ་བ་འགྲིབ་ཅིང་། སྐར་ཚོགས་རྣམས་ཀྱི་འོད་སྣང་ཟད།
དཀོན་མཆོག་གིས་རང་གི་མི་ལ་བྱིན་རླབས་གནང་བ།
16 དཀོན་མཆོག་ཡ་ཝཱེས་ཛ་ཡན་དུ་ང་རོ་འདོན་ཞིང་། ཡེ་རུ་སཱ་ལེམ་ནས་གསུང་སྐད་སྒྲོག་པ་དང་། ནམ་མཁའ་དང་ས་གཞི་འདར་ན་ཡང་། དཀོན་མཆོག་ཡ་ཝཱེ་ནི་རང་གི་འབངས་མིའི་སྦས་ས་དང་། ཡེས་ར་ཨེལ་པ་རྣམས་ཀྱི་བཙན་རྫོང་ཡིན།
17 དེ་ནས་ཁྱོད་རྣམས་ཀྱིས་བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་པ་རྟོགས་ཤིང་། བདག་ནི་ཛ་ཡན་ཏེ་ང་ཡི་རི་བོ་དམ་པ་རུ་གནས་པ་དང་། ཡེ་རུ་སཱ་ལེམ་ཡང་དམ་པར་འགྱུར་ཞིང་། མི་རྒྱུས་མེད་རྣམས་ནམ་ཡང་དེ་བརྒྱུད་ནས་འགྲོ་བར་མི་འགྱུར་རོ། །
18 ཉིན་མོ་དེ་ལ་རི་བོ་རྣམས་ལས་ཆང་མངར་མོ་འཛག་ཅིང་། རི་ཕྲན་རྣམས་ལས་འོ་མ་བཞུར་བ་དང་། ཡ་ཧུ་དཱའི་གྲོག་མོ་ཐམས་ཅད་ཆུ་ཡིས་བཀང་ཞིང་། དཀོན་མཆོག་ཡ་ཝཱེའི་མཆོད་ཁང་ལས་ཆུ་མིག་བཞུར་ནས་སིད་ཏིམ་ ལུང་པ་བརླན་པར་བྱའོ། །
19 ཨེ་ཅིབ་ནི་དབེན་སྟོང་དུ་འགྱུར་ངེས་ལ། ཨེ་དོམ་ནི་དབེན་སྟོང་གི་ཐང་རྒོད་དུ་འགྱུར་རོ། །ཅིའི་ཕྱིར་ཞེ་ན། དེ་དག་གིས་ཡ་ཧུ་དཱ་པ་རྣམས་ལ་གདུག་རྩུབ་སྤྱད་པ་དང་། ཡང་རང་གི་ཡུལ་དུ་ཉེས་མེད་རྣམས་ཀྱི་ཁྲག་བཞུར་དུ་བཅུག་པས་སོ། །
20 འོན་ཀྱང་ཡ་ཧུ་དཱ་ནི་རྒྱུན་ནས་རྒྱུན་དུ་གནས་པ་དང་། ཡེ་རུ་སཱ་ལེམ་ནི་མི་རབས་ནས་མི་རབས་བར་དུ་གནས་པར་འགྱུར།
21 ཡང་དེ་སྔར་བདག་གིས་ཁྲག་བཞུར་དུ་བཅུག་པའི་མི་ལ་འཁོན་ལན་མ་སློག ད་ནི་ངས་འཁོན་ལན་སློག་པར་བྱའོ། །དཀོན་མཆོག་ཡ་ཝཱེ་ནི་ཛ་ཡན་དུ་བཞུགས་པའོ།། །།