ལེའུ་གཉིས༌པ།
སྐྱབས་མགོན་མཱ་ཤི་ཀ་ནི་བདག་ཅག་གི་བར་མི་ཡིན་པའི༌སྐོར།
1 བདག་གི་བུ་ཕྲུག༌རྣམས། ངས་ཁྱོད་ཅག་ལ་དོན་འདི་རྣམས་འབྲི་དོན་ནི་ཁྱོད་ཅག་གིས་སྡིག་པ་མི་བྱེད་པའི་ཕྱིར་ཡིན། གལ་ཏེ། སུ་ཞིག་གིས་སྡིག་པ་བྱས༌པ་ཡིན་ན། ཡབ་ཀྱི་དྲུང་དུ་བདག་ཅག་ལ་ཞུ་བ་འབུལ་མཁན་ཞིག་ཡོད་དེ། ཁོང་ནི་རྣམ་པར་དག་པ་ཡེ་ཤུ་མཱ་ཤི་ཀ་ལགས་སོ།།
2 ཁོང་ནི་བདག་ཅག་གི་སྡིག་པའི་ཕྱིར་ཉེས་ཆད་བསལ་བའི་མཆོད་རྫས་ཡིན་ཞིང༌། དེ་ནི་བདག་ཅག་ཁོ་ན་མ་ཡིན་པར་འཇིག་རྟེན་གྱི་མི་ཐམས་ཅད་ཀྱི་དོན་དུའང་ཡིན༌ནོ།།
3 གལ་ཏེ། བདག་ཅག་གིས་ཁོང་གི་བཀའ་རྣམས་བརྩི་སྲུང་བྱས་པ་ཡིན་ན། ཁོང་ཉིད་དངོས་གནས་ངོ་ཤེས་པ་གསལ་ལོ།།
4 གལ་ཏེ། མི་ཞིག་ན་རེ། ངས་ཁོང་ཉིད་ངོ་ཤེས་པ་ཡིན་ཞེས་སྨྲས་ཀྱང་ཁོང་གི་བཀའ་རྣམས་མི་བརྩི་ན། མི་དེ་ནི་རྫུན་སྨྲ་མཁན་ཡིན་ལ། བདེན་པ་ཉིད་ཀྱང་ཁོའི་སེམས་སུ་ཡོད་པ་མ་ཡིན།
5 སུ་ཞིག་གིས་ཁོང་གི་བཀའ་བསྲུངས་ན། དཀོན་མཆོག་གི་བྱམས་པ་ནི་ཁོའི་སེམས་ནང་དུ་དངོས་གནས་ཕུལ་དུ་བྱུང་བ༌ཡིན། དོན་འདི་ལས་བདག་ཅག་གིས་རང་ཉིད་དཀོན་མཆོག་གི་ནང་དུ་གནས་པ་ཤེས་སོ།།
6 མི་ཞིག་གིས་བདག་ནི་ཁོང་གི་ནང་དུ་གནས་པ་ཡིན་ཟེར༌ན། མི་དེས་སྐྱབས་མགོན་ཡེ་ཤུའི་སྤྱོད་ལམ་བཞིན་དུ་སྤྱོད་འོས༌སོ།།
7 སྙིང་ནས་བརྩེ་བའི་སྤུན་ཟླ༌རྣམས། ངས་ཁྱོད་ཅག་ལ་འབྲི་བཞིན་པ་ནི་བཀའ་གསར་པ་ཞིག་མིན༌ཏེ། ཐོག་མ་ནས་ཁྱོད་ཅག་ལ་ཐོབ་པའི་བཀའ་རྙིང་པ་དེ་ཡིན་ལ། བཀའ་རྙིང་པ་དེ་ནི་ཁྱོད་ཅག་གིས་ཐོས་མྱོང་བའི་བཀའ་ཡིན་ནོ།།
8 ཡང་གཅིག་བཤད༌ན། ངས་ཁྱོད་ཅག་ལ་འབྲི་བཞིན་པ་ནི་བཀའ་གསར་པ་ཞིག་ཡིན༌ལ། དེ་ནི་སྐྱབས་མགོན་ཡེ་ཤུ་དང་ཁྱོད་རྣམས་གང་གི་ཆ་ནས་ཀྱང་བདེན་པ་ཡིན་ནོ།། ཅིའི་ཕྱིར་ཞེ་ན། མུན་ནག་རིམ་བཞིན་ཡལ་ཞིང་འོད་ཟེར་བདེན་པ་དེ་སྔར་ནས་འཕྲོ་བཞིན་ཡོད་པའི་ཕྱིར་རོ།།
9 གལ་ཏེ། མི་ཞིག་གིས་རང་ཉིད་འོད་ཟེར་ནང་དུ་ཡོད་ཟེར་ནའང་། རང་གི་སྤུན་ཟླར་སྡང༌བ་ཡིན་ན། མི་དེ་ནི་སྔར་བཞིན་མུན་ནག་ནང་དུ་གནས་པ༌ཡིན་ནོ།།
10 རང་གི་སྤུན་ཟླར་གཅེས་མཁན་ནི་འོད་ཟེར་ནང་དུ་གནས་ཤིང་། ཁོ་ནི་ས་རུ་འགྱེལ་བའི་རྒྱུ་རྐྱེན་མེད།
11 འོན་ཀྱང་། རང་གི་སྤུན་ཟླར་སྡང་མཁན་ནི་མུན་ནག་ནང་དུ་གནས་ཤིང་མུན་ནག་ནང་དུ་སྤྱོད་པ་དང༌། རང་ཉིད་གང་དུ་འགྲོ་བའང་མི་ཤེས་སོ།། ཅིའི་ཕྱིར་ཞེ་ན། མུན་ནག་གིས་ཁོའི་མིག་ཟུང་ལོང་བར་བྱས༌པས་སོ།།
12 བུ་ཕྲུག༌རྣམས། ངས་ཁྱོད་ཅག་ལ་འཕྲིན་ཡིག་འབྲི་དོན་ནི། ཁྱོད་རྣམས་ཀྱི་སྡིག་པ་ནི་སྐྱབས་མགོན་ཡེ་ཤུའི་མཚན་ལ་བརྟེན་ནས་བསལ་བའི་ཕྱིར་རོ།།
13 ཕ་ཡིན་པ་རྣམས། ངས་ཁྱོད་ཅག་ལ་འཕྲིན་ཡིག་འབྲི་དོན་ནི། ཁྱོད་རྣམས་ཀྱིས་ཐོག་མ་ཉིད་ནས་བཞུགས་པ་ཁོང་ཉིད་ངོ་ཤེས་པའི་ཕྱིར༌ཡིན། ན་གཞོན་རྣམས། ངས་ཁྱོད་ཅག་ལ་འཕྲིན་ཡིག་འབྲི་དོན་ནི། ཁྱོད་རྣམས་བདུད་ངན་དེ་ལས་རྣམ་པར་རྒྱལ་བའི་ཕྱིར་ཡིན།
14 བུ་ཕྲུག༌རྣམས། ངས་ཁྱོད་ཅག་ལ་འཕྲིན་ཡིག་འབྲི་དོན་ནི། ཁྱོད་རྣམས་ཀྱིས་ཡབ་ངོ་ཤེས་པའི་ཕྱིར༌ཡིན། ཕ་ཡིན་པ་རྣམས། ངས་ཁྱོད་ཅག་ལ་འཕྲིན་ཡིག་འབྲི་དོན་ནི། ཁྱོད་རྣམས་ཀྱིས་ཐོག་མ་ཉིད་ནས་བཞུགས་པ་ཁོང་ཉིད་ངོ་ཤེས་པའི་ཕྱིར་ཡིན། ན་གཞོན་རྣམས། ངས་ཁྱོད་ཅག་ལ་འཕྲིན་ཡིག་འབྲི་དོན་ནི། ཁྱོད་རྣམས་ལ་སྟོབས་དང་ལྡན་ཞིང་དཀོན་མཆོག་གི་བཀའ་རྟག་ཏུ་ཁྱོད་ཅག་གི་སེམས་སུ་བཞུགས༌པ་དང༌། ཁྱོད་ཅག་བདུད་ངན་དེ་ལས་རྣམ་པར་རྒྱལ་བའི་ཕྱིར༌རོ།།
འཇིག་རྟེན་ལ་ཞེན་ཆགས་མི་རུང་བའི༌སྐོར།
15 འཇིག་རྟེན་འདི་དང་འཇིག་རྟེན་གྱི་དངོས་པོ་ཀུན་ལ་ཞེན་ཆགས༌པར་མི་བྱའོ། །གལ་ཏེ། མི་སུ་ཞིག་འཇིག་རྟེན་ལ་ཞེན་ཆགས་པར་གྱུར་ན། མི་དེའི་སེམས་སུ་ཡབ་ལ་གཅེས་པའི་སེམས་ནི་ཡོད་པ་མ་ཡིན་ནོ།།
16 ཅིའི་ཕྱིར་ཞེ་ན། འཇིག་རྟེན་གྱི་དོན་ཐམས་ཅད་དེ། ཤ་གཟུགས་ཀྱི་འདོད་ཆགས་དང་། མིག་གི་འདོད༌ཆགས། ཚེ་འདིའི་ང་རྒྱལ་བཅས་ནི་ཡབ་ནས་བྱུང་བ་མ་ཡིན་པར་འཇིག་རྟེན་ནས་བྱུང་བའི་ཕྱིར་རོ།།
17 འཇིག་རྟེན་འདི་དང་འཇིག་རྟེན་གྱི་འདོད་ཆགས་ཐམས་ཅད་འཇིག་པར་འགྱུར༌མོད། འོན་ཀྱང་དཀོན་མཆོག་གི་ཐུགས་དགོངས་བཞིན་སྒྲུབ་མཁན་ནི་གཏན་དུ་གནས་པར་འགྱུར་རོ།།
སྐྱབས་མགོན་ཡེ་ཤུའི་བསྟན་དགྲ་ལ་དོགས་ཟོན་བྱེད་པ།
18 བུ་ཕྲུག༌རྣམས། ད་ནི་མཐའ་མའི་དུས་སྐབས་ཡིན༌ལ། སྐྱབས་མགོན་མཱ་ཤི་ཀའི་བསྟན་དགྲ་ཡོང་ངེས་པ་ཁྱོད་ཅག་གིས་ཐོས་མྱོང་བ༌ལྟར། ད་ལྟ་སྐྱབས་མགོན་མཱ་ཤི་ཀའི་བསྟན་དགྲ་མང་པོ་ཡོང་ཡོད་པས། བདག་ཅག་གིས་ད་ལྟ་ནི་མཐའ་མའི་དུས་སྐབས་ཡིན་པ་ཤེས།
19 དེ་དག་ནི་བདག་ཅག་གི་ཁྲོད་ནས་ཕྱི་རོལ་ཏུ་སོང་བ་ཡིན༌མོད། འོན་ཀྱང་བདག་ཅག་ལ་གཏོགས་པ་མ་ཡིན། དེ་རྣམས་བདག་ཅག་ལ་གཏོགས་པ་ཡིན་ན། སྔར་བཞིན་བདག་ཅག་དང་ལྷན་དུ་འགྲོག་ངེས༌མོད། འོན་ཀྱང་དེ་རྣམས་ཕྱི་རོལ་ཏུ་སོང་བས་བདག་ཅག་ལ་མི་གཏོགས་པ་གསལ་པོར་མངོན་ནོ།།
20 ཁྱོད་ཅག་ནི་དམ་པ་ཉིད་ཀྱིས་བྱུགས་པའི་མི་རྣམས་ཡིན་ལ། ཁྱོད་ཅག་ཐམས་ཅད་ཀྱིས་ཀྱང་དོན་འདི་ཤེས་སོ།།
21 བདག་གིས་ཁྱོད་རྣམས་ལ་འཕྲིན་ཡིག་འདི་འབྲི་དོན་ནི་ཁྱོད་ཅག་གིས་བདེན་པ་ཉིད་མི་ཤེས་པའི་རྐྱེན་གྱིས་མ་ཡིན༌པར། ཁྱོད་རྣམས་ཀྱིས་བདེན་པ་ཉིད་ཤེས་པར་མ་ཟད། བདེན་པ་ཉིད་ལས་རྫུན་མི་འབྱུང་བའང་ཤེས་པའི་ཕྱིར་ཡིན།
22 རྫུན་སྨྲ་མཁན་ནི་སུ་ཡིན་ཞེ་ན། ཡེ་ཤུ་ནི་སྐྱབས་མགོན་མཱ་ཤི་ཀ་ཡིན་པར་ཁས་མི་ལེན་པའི་མི་དེ་མ་ཡིན༌ནམ། དེའི་ཕྱིར། ཡབ་དང་སྲས་ཁོང་ཉིད་ཁས་མི་ལེན་པའི་མི་ནི་སྐྱབས་མགོན་མཱ་ཤི་ཀའི་བསྟན་དགྲ་ཡིན།
23 སྲས་ཁོང་ཉིད་ཁས་མི་ལེན་པའི་མི་དེ་ལ་ཡབ་ནི༌མེད། སྲས་ཁོང་ཉིད་ཁས་ལེན་པའི་མི་དེ་ལ་ཡབ་ནི་ཡོད་པའོ།།
24 ཁྱོད་ཅག་གི་སྐོར་གླེང་བ་ཡིན་ན། ཐོག་མ་ནས་ཐོས་པ་རྣམས་ཁྱོད་ཅག་གི་ནང་དུ་གནས་པར་གྱིས། གལ་ཏེ། ཐོག་མ་ནས་ཐོས་པ་དེ་རྣམས་ཁྱོད་ཅག་གི་ནང་དུ་གནས་པ་ཡིན་ན། ཁྱོད་ཅག་ནི་སྲས་ཁོང་ཉིད་ཀྱི་ནང་དུ་གནས་ཤིང་ཡབ་ཀྱི་ནང་དུའང་གནས༌པ་ཡིན།
25 སྐྱབས་མགོན་ཡེ་ཤུས་བདག་ཅག་ལ་ཞལ་བཞེས་གནང་བ་ནི་མཐའ་མེད་པའི་ཚེ་སྲོག་དེ་ཉིད་ཡིན་ནོ།།
26 བདག་གིས་ཁྱོད་ཅག་ལ་སྐད་ཆ་འདི་དག་འབྲི་དོན་ནི་ཁྱོད་ཅག་ལ་སླུ་བྲིད་གཏོང་མཁན་དེ་དག་ལ་དམིགས་ནས་སྨྲས་པའོ།།
27 སྐྱབས་མགོན་ཡེ་ཤུ་ནས་ཐོབ་པའི་བྱུགས་པར་མཛད་པ་དེ་ཉིད་ཁྱོད་ཅག་གི་སེམས་སུ་བཞུགས་ཡོད་པས། མི་སུས་ཀྱང་ཁྱོད་ཅག་ལ་བསླབ་བྱ་གཏོང་དགོས་པ་མ་ཡིན༌ཏེ། ཁོང་ལས་ཐོབ་པའི་བྱུགས་པར་མཛད་པ་དེ་ཉིད་ཀྱིས་དོན་ཐམས་ཅད་ཀྱི་སྐོར་ནས་ཁྱོད་ཅག་ལ་བསླབ་བྱ་གནང་ངེས་ཤིང་། བྱུགས་པར་མཛད་པ་དེ་ཉིད་ནི་བདེན་པ་ཡིན་པ་ལས་རྫུན་མིན༌ལ། བྱུགས་པར་མཛད་པ་དེ་ཉིད་ཀྱིས་བསླབ་བྱ་གནང་བ་བཞིན། ཁྱོད་ཅག་ནི་ཁོང་གི་ནང་དུ་གནས་པར་བྱའོ།།
28 བུ་ཕྲུག༌རྣམས། ཁྱོད་ཅག་ནི་སྐྱབས་མགོན་ཡེ་ཤུའི་ནང་དུ་གནས་པར་གྱིས། དེ་ལྟར་བྱས་ན། ཁོང་ཉིད་མངོན་པར་འགྱུར་བའི་དུས་སུ། བདག་ཅག་བག་ཕེབས་ཞུམ་མེད་ངང་སྡོད་ནུས་ལ། ཁོང་ཉིད་ཕེབས་ཡོང་བའི་དུས་སུ། ཁོང་གི་སྤྱན་དྲུང་དུ་བདག་ཅག་ངོ་གནོང་བར་མི་འགྱུར་རོ།།
29 གལ་ཏེ། ཁྱོད་ཅག་གིས་ཁོང་ནི་དྲང་བདེན་ཡིན་པ་ཤེས༌ན། དྲང་བདེན་གྱིས་སྒྲུབ་མཁན་ཐམས་ཅད་ནི་ཁོང་ལས་སྐྱེས་པའང་ཤེས་སོ།།