ལེའུ་བཞི༌པ།
དཀོན་མཆོག་ཐུགས་དགྱེས་པའི་ཆེད་དུ་སྲོག་འཚོ༌བ།
1 སྤུན་ཟླ༌རྣམས། མཐར་ངེད་ཅག་གིས་གཙོ་བོ་ཡེ་ཤུར་བརྟེན་ནས་ཁྱོད་རྣམས་ལ་ཞུ་བ་བྱེད་ཅིང་གདམས་པར༌བྱའོ།། དེ་སྔར་ཁྱོད་ཅག་གིས་ཇི་ལྟར་དཀོན་མཆོག་ཐུགས་དགྱེས་པར་བྱེད་དགོས་པ་ངེད་རྣམས་ལས་བསླབ་བྱ་བླངས་པ༌བཞིན། ད་ལྟ་ཁྱོད་ཅག་གིས་སྤྱོད་ལམ་དེ་ལྟར་བྱེད་ཅིང་དེ་ལས་ཀྱང་བརྩོན་པར༌གྱིས།
2 ཅིའི་ཕྱིར་ཞེ་ན། གཙོ་བོ་ཡེ་ཤུའི་དབང་ལ་བརྟེན་ནས་ངེད་རྣམས་ཀྱིས་ཁྱོད་ཅག་ལ་བཀའ་གང་ཞིག་བསྒྲགས་པ་ནི་ཁྱོད་རྣམས་ཀྱིས་ཀྱང་ཤེས་པའི་ཕྱིར༌ཡིན།
3 དཀོན་མཆོག་གི་ཐུགས་དགོངས་ནི་ཁྱོད་རྣམས་དམ་པར་འགྱུར་བ་སྟེ། ལོག་གཡེམ་རིང་དུ་སྤང་བ་དེ་ཡིན༌ལ།
4 ཁྱོད་ཅག་གིས་དམ་པ་དང་བཀུར་འོས་པའི་སྒོ་ནས་ཇི་ལྟར་རང་གི་ལུས་པོ་བསྲུང་དགོས་པ་རྟོགས༌ཤིང༌།
5 དཀོན་མཆོག་ངོ་མི་ཤེས་པའི་ཕྱི་ཕྱོགས་པ་རྣམས་བཞིན༌དུ། རང༌གི་འདོད་ངན་བག་ཡངས་སུ་མི་གཏོང་བ་དང༌།
6 མི་སུས་ཀྱང་དོན་དེའི་ཆ་ནས་རང་གི་སྤུན་ཟླར་འགལ་ནས་བསླུ་མི་རུང༌སྟེ། དོན་དེའི་རིགས་ཐམས་ཅད་ལ་གཙོ་བོས་ལན་མཛད་ངེས་པའི་ཕྱིར༌ཡིན་ཞིང་། དེ་ནི་ངེད་རྣམས་ཀྱིས་སྔར་ནས་ཁྱོད་ཅག་ལ་སྨྲས་ཤིང་ནན་ཏན་གྱིས་གདམས་པ་བཞིན༌ནོ།།
7 ཅིའི་ཕྱིར་ཞེ་ན། དཀོན་མཆོག་གིས་བདག་ཅག་ལ་ཞལ་འབོད་གནང་བ༌ནི། བདག་ཅག་མི་གཙང་བར་འགྱུར་བའི་ཆེད་དུ་མ་ཡིན༌གྱི། དམ་པར་འགྱུར་བའི་ཕྱིར་ཡིན༌པས།
8 བསླབ་བྱ་འདི་འདོར་མཁན་རྣམས་ཀྱིས་མིའི་རིགས་དོར་བ་མ་ཡིན༌པར། ཁྱོད་རྣམས་ལ་དམ་པའི་ཐུགས་ཉིད་གནང་མཁན་དཀོན་མཆོག་ཁོང་ཉིད་དོར༌བའོ།།
9 དེ་ཡང་དཀོན་མཆོག་གིས་ཁྱོད་རྣམས་ཕན་ཚུན་ལ་བྱམས་ཤིང་གཅེས་དགོས་པའི་བསླབ་བྱ་གནང་ཡོད༌པས། སྤུན་ཟླའི་བརྩེ་སེམས་སྐོར་ནས་ཁྱོད་ཅག་ལ་བྲི་མི་དགོས་སོ།།
10 ཁྱོད་ཅག་གིས་མ་ཀེ་དོན་ཡཱ་ཡུལ་ཐམས་ཅད་ཀྱི་སྤུན་ཟླ་རྣམས་ལ་དེ་བཞིན་དུ་བྱམས་ཤིང་གཅེས་པར་བྱེད༌ནའང༌། ངེད་རྣམས་ཀྱིས་སྤུན་ཟླ་ཁྱོད་རྣམས་ལ་དེ་ལས་ལྷག་པ་ཞིག་བྱེད་པར་བསྐུལ༌བ་ཡིན།
11 ཡང་ངེད་ཅག་གིས་དེ་སྔར་ཁྱོད་རྣམས་ལ་ཁ་བསྒོ་བཏང་བ༌བཞིན། ཁྱོད་ཅག་ནི་ཞི་ཞིང་དུལ་བའི་མི་ཞིག་བྱེད་པ༌དང༌། རང་དོན་བསྒྲུབ་ཅིང་རང་གི་ལག་པར་བརྟེན་ནས་ལས་བྱེད་པར་བརྩོན་དགོས།
12 དེ་ནི་ཁྱོད་ཅག་གིས་ཕྱི་མི་རྣམས་ལ་སྤྱོད་ལམ་བཟང་པོ་སྟོན་པ༌དང༌། རང་ཉིད་ལ་མི་འདང་ས་ཅི་ཡང་ཡོད་པར་མི་འགྱུར་བའི་ཕྱིར༌རོ།།
སྐྱབས་མགོན་ཡེ་ཤུ་ཕྱིར་འཇིག་རྟེན་ཏུ་ཕེབས་ངེས་པའི༌སྐོར།
13 སྤུན་ཟླ༌རྣམས། ཁྱོད་ཅག་གིས་རེ་ཐག་ཆད་པའི་མི་རྣམས་དང་འདྲ་བར་སེམས་སྡུག་མི་བྱེད་པའི་ཆེད༌དུ། ངེད་ཅག་གིས་འདས་པོ་རྣམས་ ཀྱི་སྐོར་ཁྱོད་ཅག་ལ་ཤེས་སུ་འཇུག་པར་འདོད་དོ།།
14 རྒྱུ་མཚན་ནི་སྐྱབས་མགོན་ཡེ་ཤུ་སྐུ་གྲོངས་ནས་སླར་གསོན་པར་བདག་ཅག་གིས་ཡིད་ཆེས་བྱེད་པ༌ཡིན་ན། སྐྱབས་མགོན་ཡེ་ཤུའི་དད་ལྡན་འདས་པོ་རྣམས་ཀྱང་དཀོན་མཆོག་གིས་སྐྱབས་མགོན་ཡེ་ཤུ་དང་ལྷན་དུ་འཁྲིད་ཡོང་བར༌ངེས།
15 ད་ལྟ་ངེད་ཅག་གིས་གཙོ་བོའི་བཀའ་ལྟར་ཁྱོད་རྣམས་ལ་དོན་འདི་སྨྲ་བར༌བྱ་སྟེ། གཙོ་བོ་ཕེབས་ཡོང་བའི་བར༌དུ། བདག་ཅག་གསོན་པོར་གནས་པ་རྣམས༌ནི་སྔར་ནས་ཚེ་ལས་འདས་པའི་དད་ལྡན་རྣམས་ཀྱི་སྔོན་དུ་འགྲོ་མི་ནུས༌ཏེ།
16 གཙོ་བོ་ནི་འུར་སྒྲ་དང་ཕོ་ཉའི་མཆོག་གི་སྐད༌སྒྲ། དཀོན་མཆོག་གི་དུང་སྒྲ་དང་བཅས་ནམ་མཁའི་ཞིང་ཁམས་ནས་ཕྱིར་འབྱོན་པའི་དུས༌སུ། སྐྱབས་མགོན་མཱ་ཤི་ཀའི་དད་ལྡན་འདས་པོ་རྣམས་སྔོན་དུ་སླར་གསོན་པར་འགྱུར་བའི་ཕྱིར༌རོ།།
17 དེ་ནས་བདག་ཅག་གསོན་པོར་གནས་པ་རྣམས་གློ་བུར་དེ་རྣམས་དང་མཉམ་དུ་སྤྲིན་ཕུང་ནང་དུ་དྲངས༌ཏེ། བར་སྣང་ནས་གཙོ་བོ་ལ་མཇལ་ཞིང་གཏན་དུ་ཁོང་དང་ལྷན་ཅིག་གནས་པར་འགྱུར་བས།
18 ཁྱོད་རྣམས་ཀྱིས་གཏམ་འདི་དག་གིས་ཕན་ཚུན་ལ་སེམས་གསོ་བྱེད་པར༌གྱིས།