ཕོལ་ལོལ་ཐེངས་གཉིས་པར་ཆོས་སྤེལ་དུ་ཕྱིན་པའི་སྐབས་སུ་ཐེ་སཱ་ལོ་ནེ་ཀེ་གྲོང་ཁྱེར་དུ་ཆོས་ཚོགས་ཚུགས་པ་རེད། ཁོང་གིས་ཐེ་སཱ་ལོ་ནེ་ཀེ་གྲོང་ཁྱེར་དུ་བདུན་ཕྲག་གསུམ་གྱི་རིང་ལ་ཆོས་འཆད་ནས་བཞུགས་སྐབས་སུ། ཡ་ཧུ་དཱ་པ་རྣམས་ཀྱིས་ཁོང་ལ་འགོག་རྒོལ་བྱས་པས་ཁོང་ཡུལ་དེ་ནས་གློ་བུར་གྱེས་དགོས་པ་བྱུང་སོང་། སྐབས་དེར་དད་ལྡན་རྣམས་ལ་ཕྱི་རོལ་པའི་ཆོས་ལུགས་ལས་བཙན་གནོན་ཐེབས་པ་དང་རྒྱབ་སྐྱོར་བྱེད་མཁན་མེད་པར་གྱུར། དེ་བས་ཕོལ་ལོལ་གྱིས་དེ་རྣམས་ཀྱི་དད་སེམས་སྲ་བརྟན་དུ་གཏོང་བ་དང་། བློ་སྟོབས་འཕེལ་བའི་ཆེད་དུ་འཕྲིན་ཡིག་འདི་བྲིས་པ་རེད།

ཕྱི་ནང་གཉིས་ཀྱི་རྒྱུ་མཚན་གང་ནས་བལྟས་ཀྱང་ཐེ་སཱ་ལོ་ནེ་ཀེ་པའི་འཕྲིན་ཡིག་འདི་ཡི་གེར་འགོད་མཁན་ནི་ཕོལ་ལོལ་ཡིན་ལ། དེའི་ལོ་ཚིགས་ནི་སྤྱི་ལོ་51ལོའི་ཡས་མས་ཡིན་པ་དང་། ག་ལད་ཡཱ་པའི་འཕྲིན་ཡིག་ནི་སྤྱི་ལོ་48ལོ་ནས་49ལོའི་བར་དུ་བྱུང་བའི་ལོ་ཚུགས་དེ་ཁས་མ་བླངས་ན། ཐེ་སཱ་ལོ་ནེ་ཀེ་པའི་འཕྲིག་ཡིག་དང་པོ་འདི་ནི་ཕོལ་ལོལ་གྱིས་བྲིས་པའི་འཕྲིན་ཡིག་ཆེས་སྔ་མ་ཡིན་པར་བརྗོད།

འཕྲིན་ཡིག་འདི་ལ་བརྗོད་བྱ་སྣ་ཚོགས་ཡོད་ནའང་། ཐེ་སཱ་ལོ་ནེ་ཀེ་པའི་འཕྲིན་ཡིག་དང་པོ་དང་གཉིས་པ་གང་ཡིན་རུང་དུས་ཀྱི་མཐའ་མའི་སྐོར་གྱི་བརྗོད་གཞི་འབུར་དུ་བཏོད་ཡོད། ཐེ་སཱ་ལོ་ནེ་ཀེ་པ་དང་པོའི་ལེའུ་རེ་རེའི་མཐའ་མར་སྐྱབས་མགོན་ཡེ་ཤུ་ཐེངས་གཉིས་པར་འབྱོན་པའི་སྐོར་གསུངས་ཡོད་པ་དང་། ལྷག་པར་དུ་ལེའུ་བཞི་པ་རུ་དུས་ཀྱི་མཐའ་མའི་སྐོར་ནན་གྱིས་གསུངས་ཡོད། དེ་ལྟར་ཁོང་ཉིད་ཡང་བསྐྱར་འབྱོན་པའི་གནས་ཚུལ་དེ་འཕྲིན་ཡིག་ཡོངས་སུ་ཁྱབ་པས། སྐྱབས་མགོན་ཡེ་ཤུ་ཡང་བསྐྱར་འབྱོན་པ་ནི་འཕྲིན་ཡིག་འདིའི་བརྗོད་བྱའི་སྙིང་པོ་ཡིན།

1. ཁམས་འདྲི་དང་བཀའ་དྲིན་ཞུ་བ། ༼1:1-10༽

2. ཕོལ་ལོལ་དད་ལྡན་རྣམས་ལ་འཕྲད་འདོད་ཀྱང་ཁོང་ཉིད་སླར་ཡང་ཕེབས་མ་ཐུབ་པའི་སྐོར། ༼2:1-3:13༽

3. སྐུལ་མ་གཏོང་བ། ༼4:1-5:22༽

ཀ དཀོན་མཆོག་ཐུགས་དགྱེས་པའི་ཆེད་དུ་སྲོག་འཚོ་བ། ༼4:1-12༽

ཁ། སྐྱབས་མགོན་ཡེ་ཤུ་ཕྱིར་འཇིག་རྟེན་ཏུ་ཕེབས་ངེས་པའི་སྐོར། ༼4:13-5:11༽

ག ཕན་ཚུན་འགྲིག་མཐུན་ཡོང་དགོས་པའི་སྐུལ་སློང་། ༼5:12-22༽

4. མཇུག་མཐའི་གདམས་པ། ༼5:23-28༽