ལེའུ་དྲུག༌པ།
སྐུ་ཚབ་པ་ཕོལ་ལོལ་གྱི་དཀའ༌ཚེགས།
1 དཀོན་མཆོག་གི་ལས་གྲོགས་ཡིན་པ་ངེད་ཅག་གིས་ཁྱོད་རྣམས་ལ་ཁོང་གི་ཐུགས་རྗེ་དོན་མེད་དུ་དང་ལེན་མི་བྱེད་པར་བསྐུལ༌བ་ཡིན་ནོ།།
2 ཅིའི་ཕྱིར་ཞེ་ན། དཀོན་མཆོག་གིས་འདི་སྐད༌དུ།
ཐུགས་དགྱེས་དུས་སུ་བདག་གིས་ཁྱོད་ཀྱི་སྨོན་ལམ༌བསྐངས།།
སྐྱོབ་པའི་ཉིན་མོར་བདག་གིས་ཁྱོད་ལ་རོགས་རམ༌མཛད།།
ཅེས་གསུངས་པའི་ཕྱིར༌རོ།། ལྟོས༌དང༌། ད་ནི་འོས་ཤིང་འཚམ་པའི་དུས་ལ་བབས། ལྟོས་དང་། ད་ལྟ་ནི་སྐྱོབ་པའི་ཉིན་མོ་ཡིན༌ནོ།།
3 ངེད་ཅག་གི་ཞབས་ཏོག་བྱེད་པའི་ལས་འགན་འདི་ལ་མི་གཞན་གྱིས་སྐྱོན་བརྗོད་མི་བྱེད་པའི༌ཕྱིར། ངེད་ཅག་གིས་ལས་གང་གི་ཆ་ནས་ཀྱང་བར་ཆད་མི༌བཟོ་ལ།
4 དོན་ཐམས་ཅད་ཀྱི་ཐད་ནས་ཀྱང་རང་ཉིད་ནི་དཀོན་མཆོག་གི་ཞབས་ཕྱི་པ་ཡིན་པ་གསལ་པོར་སྟོན་པ༌སྟེ། དཔེར༌ན། བཟོད་བསྲན༌དང༌། དཀའ༌སྡུག ཉམ་ཐག ཆག་སྒོ།
5 གཅར༌རྡུང༌། བཙོན༌འཇུག ཟིང༌སློང༌། ལས་ལ་བརྩོན་པ། གཉིད་མི་ཁུག༌པ། ཟས་མི་སྤྱོད༌པ།
6 སྤྱོད་གཙང༌། ཡོན༌ཏན། བཟོད༌པ། སྙིང༌རྗེ། དམ་པའི་ཐུགས་ཉིད། བཅོས་མ་མིན་པའི་བྱམས༌པ།
7 གཏམ་བདེན༌པ། དཀོན་མཆོག་གི་ནུས་མཐུ་ཆེན༌པོ། ལག་པ་གཡས་གཡོན་དུ་ཡོད་པའི་དྲང་བདེན་གྱི་མཚོན༌ཆ།
8 གཟི༌བརྗིད། ངོ༌ཚ། མིང༌ངན། མཚན༌སྙན། བལྟས་ན་བསླུ་བྲིད་ཡིན་ཡང་དོན་ལ་དྲང་པོ་ཡིན༌པ།
9 བལྟས་ན་ཅང་གིས་ངོ་མི་ཤེས་ཀྱང་དོན་ལ་ཀུན་གྱིས་ངོ་ཤེས་པ། བལྟས་ན་འཆི་ལ་ཉེ་ཡང་དོན་ལ་གསོན་པོ་ཡིན༌ལ། བལྟས་ན་ཉེས་ཆད་ཕོག་ཀྱང་དོན་ལ་སྲོག་མི་འཆོར་བ།
10 བལྟས་ན་སེམས་སྐྱོ་ཡང་དོན་ལ་ནམ་རྒྱུན་དགའ་སྤྲོས་ཁེངས༌པ། བལྟས་ན་དབུལ་ཕོངས་ཡིན་ཡང་དོན་ལ་མི་མང་པོ་ཕྱུག་པར་བྱེད༌པ། བལྟས་ན་ཅི་ཡང་མེད་ཀྱང་དོན་ལ་ཐམས་ཅད་འཛོམས་པ་ལྟ༌བུའོ།།
11 ཀོ་རིན་ཐུ་པ་རྣམས། ངེད་ཅག་གིས་ཁྱོད་རྣམས་ལ་གཏམ་དྲང་པོར་སྨྲ་ཞིང་སེམས་རྒྱ་ནི༌ཆེའོ།།
12 ཁྱོད་རྣམས་གུ་དོག་པ་ནི་ངེད་ཅག་གི་རྐྱེན་གྱིས་མིན༌ཏེ། ཁྱོད་ཅག་གི་སེམས་རྒྱ་ཆུང་བ་ལ་རག་ལས༌པ་ཡིན།
13 ཁྱོད་ཅག་གིས་ཀྱང་སེམས་རྒྱ་ཆེ་བའི་ངང་ནས་ངེད་རྣམས་ལ་དྲིན་ལན་གཞལ་དགོས༌ཏེ། བདག་གི་གཏམ་འདི་ནི་བུ་ཕྲུག་ལ་སྨྲ་བ་དང་མཚུངས༌སོ།།
དད་མེད་རྣམས་དང་མཉམ་དུ་གཉའ་ཤིང་མི་འཁུར་བ།
14 ཁྱོད་ཅག་གིས་དད་མེད་རྣམས་དང་མཉམ་དུ་གཉའ་ཤིང་མ་ཁུར༌ཅིག དྲང་བདེན་དང་ཁྲིམས་མེད་ལུགས་མེད་གཉིས་ལ་འབྲེལ་བ་ཅི་ཡོད་དམ། འོད་དང་མུན་པ་གཉིས་ལ་འབྲེལ་བ་ཡོད་ནུས་སམ།
15 སྐྱབས་མགོན་མཱ་ཤི་ཀ་དང་པེལ་ལེ་ཨར་གཉིས་ལ་གཞི་མཐུན་ས་ཅི་ཡོད༌དམ། དད་པ་བྱེད་མཁན་དང་དད་པ་མི་བྱེད་མཁན་གཉིས་ལ་འབྲེལ་བ་ཅི་ཡོད༌དམ།
16 དཀོན་མཆོག་གི་མཆོད་ཁང་དང་སྐུ་འདྲ་གཉིས་ལ་མཐུན་ས་ཡོད་དམ་ཞེ་ན་མེད་དོ།། ཅིའི་ཕྱིར་ཞེ་ན། བདག་ཅག་ནི་གཏན་དུ་གསོན་པོར་བཞུགས་པའི་དཀོན་མཆོག་གི་མཆོད་ཁང་ཡིན༌ཏེ། སྔར་དཀོན་མཆོག་གིས་འདི་སྐད༌དུ།
བདག་ནི་དེ་རྣམས་ནང་དུ་སྡོད་པ༌དང༌།།
དེ་དག་ཁྲོད་ནས་འགྲོ་འོང་བྱེད་པ༌དང༌།།
བདག་ནི་དེ་ཚོའི་དཀོན་མཆོག་བྱེད་པ༌དང༌།།
དེ་རྣམས་བདག་གི་འབངས་མི་ཡིན་པར༌འགྱུར།།
ཞེས༌དང༌།
17 ཡང་གཙོ་བོ་ལགས་ཀྱིས་འདི་སྐད༌དུ།
དེའི༌ཕྱིར་ཁྱོད་རྣམས་དེ་དག་ལས་ཐོན་ཤོག །
དེ་དག་ལ་ནི་དབྱེ་བ་འབྱེད་པར༌ཤོག །
མི་གཙང་བ་ལ་རེག་པར་མ་བྱེད༌ཅིག །
བདག་གིས་ཁྱོད་རྣམས་དྲུང་དུ་ལེན་པར༌བྱེད།།
18 བདག་ནི་ཁྱོད་ཚོའི་ཕ་རུ་བྱེད་པ༌དང༌།།
ཁྱོད་རྣམས་བདག་གི་བུ་དང་བུ་མོར༌འགྱུར།།
ཞེས་ཀུན་དབང་གཙོ་བོས་བཀའ་བསྩལ༌པའོ།།