ལེའུ་བཅུ་གསུམ་པ།
དབང་སྒྱུར་མཁན་གྱི་བཀའ་ལ་ཉན་དགོས་པའི་སྐོར།
1 མི་རེ་རེས་སྲིད་དབང་གི་དབང་སྒྱུར་མཁན་གྱི་བཀའ་ལ་ཉན་དགོས། གང་ལགས་ཟེར་ན། དེར་ཡོད་པའི་དབང་ནི་དཀོན་མཆོག་གིས་བཀོད་པ་ཡིན་གྱིས། དཀོན་མཆོག་གིས་བཀོད་པ་ལས་གཞན་པའི་དབང་མེད་དོ།
2 དེའི་ཕྱིར་སུས་ཀྱང་དབང་སྒྱུར་མཁན་གྱི་བཀའ་བརྒལ་ན་དེས་དཀོན་མཆོག་གི་བཀའ་ལ་རྒོལ། ཡང་དཀོན་མཆོག་གི་བཀའ་ལ་རྒོལ་མཁན་རྣམས་ལ་ཁྲིམས་གཅོད་ཕོག་པར་འགྱུར།
3 གང་ཡིན་ཞེ་ན། སྤྱོད་ལམ་བཟང་པོ་བྱེད་མཁན་མིན་ཏེ་ངན་པ་བྱེད་མཁན་རྣམས་དབང་སྒྱུར་མཁན་ལ་འཇིགས་དགོས། གལ་ཏེ་དབང་སྒྱུར་གྱི་འཇིགས་པ་ལས་ཐར་བར་འདོད་ན། སྤྱོད་ལམ་བཟང་པོ་བྱོས་ཤིག དེ་རྗེས་ཁོས་ཁྱེད་ལ་བསྟོད་པར་འགྱུར།
4 ཁྱོད་ལ་ཕན་པའི་ཕྱིར་ཁོ་ནི་དཀོན་མཆོག་གི་ཞབས་ཕྱི་ཡིན། འོན་ཀྱང་ཁྱོད་ཀྱིས་ངན་པ་བྱས་ན་འཇིགས་དགོས། གང་ལགས་ཤེ་ན། ཁོས་དོན་མེད་དུ་རལ་གྲི་ཐོགས་པ་མ་ཡིན། ཁོ་ནི་ངན་པ་བྱེད་མཁན་ལ་ཐུགས་ཁྲོའི་ཆད་པ་གཅོད་པའི་དཀོན་མཆོག་གི་ཞབས་ཕྱི་ཡིན།
5 དེའི་ཕྱིར་ཁོ་ཚོའི་བཀའ་ལ་ཉན་དགོས། དེ་ནི་ཉེས་ཆད་ལ་འཛེམ་པ་ཙམ་མ་ཟད་སེམས་དྲང་པོར་གནས་ཕྱིར་ཡང་ཡིན།
6 ཁྱོད་ཚོས་ཁྲལ་འཇལ་དགོས་པའི་རྒྱུ་མཚན་དེ་ཡིན། གང་ཡིན་ཟེར་ན། དབང་ལྡན་པ་རྣམས་ནི་དོན་དེ་རང་ལ་དམ་འཛིན་བྱེད་མཁན་དཀོན་མཆོག་གི་ཞབས་ཕྱི་ཡིན་པས་སོ།
7 མི་ཐམས་ཅད་ལ་གང་སྤྲོད་དགོས་པ་དེ་སྤྲོད་ཅིག ཁྲལ་ལེན་མཁན་ལ་ཁྲལ་དང༌། ཚོང་ཁྲལ་སྡུད་མཁན་ལ་ཚོང་ཁྲལ་འཇོལ་ཞིག གུས་འོས་པ་ལ་གུས་ཤིང༌། བཀུར་སྟི་འོས་པ་ལ་བཀུར་སྟི་བྱོས་ཤིག
བྱམས་སེམས་ཀྱི་སྐོར།
8 གཅིག་གིས་གཅིག་ལ་བྱམས་པ་བྱེད་པ་མ་གཏོགས་པར་མི་སུ་ལའང་བུ་ལོན་འཇལ་རྒྱུ་ལུས་མ་འཇུག གང་ཡིན་ཞེ་ན། གཞན་ལ་བྱམས་པ་བྱེད་མཁན་གྱིས་ཆོས་ཁྲིམས་བསྒྲུབས་པས་སོ།
9 ལོག་གཡེམ་མ་བྱེད། མིའི་སྲོག་མ་གཅོད། རྐུ་མ་མ་རྐུས། ཧམ་འདོད་མ་བྱེད་ལ་སོགས་པའི་བཀའ་ཁྲིམས་ནི། ཁྱིམ་མཚེས་ལ་རང་དང་འདྲ་བར་བརྩེ་བར་ཟུངས་ཤིག་ཅེས་པའི་བཀའ་ཡིས་སྙིང་དོན་སྡུད།
10 བྱམས་པ་ནི་ཁྱིམ་མཚེས་ལ་གནོད་པ་མི་བྱེད། དེར་བརྟེན་བྱམས་པ་ནི་ཆོས་ཁྲིམས་སྒྲུབ་པའོ། །
11 དུས་སྐབས་འདི་རྟོགས་ཏེ་དེ་ལྟར་བྱོས་ཤིག ང་ཚོས་ཐོག་མར་དད་པ་སྐྱེས་པའི་དུས་དེ་ལས་ཀྱང་ད་ལྟ་ངེད་ཀྱི་ཐར་པ་ཉེ་བར་ཡོང་བས་གཉིད་སད་པའི་དུས་ལ་འབབ།
12 མཚན་མོ་འདས་ཤིང་ཉི་མ་ཤར་གྲབས་ཡོད་པས་མུན་པའི་ཁྲོད་ཀྱི་བྱ་བ་སྤངས་ནས་འོད་ཀྱི་ཁྲབ་གྱོན་དགོས།
13 བག་མེད་ལོངས་སྤྱོད་དང༌། ར་བཟི། ལོག་གཡེམ། འདོད་ཆགས། ཁ་རྩོད། ཕྲག་དོག་བཅས་མེད་པར་ཉིན་མོ་དང་བསྟུན་པའི་སྤྱོད་ལམ་བཟང་པོ་བྱེད་དགོས།
14 དེ་ལས་ལྡོག་སྟེ་གཙོ་བོ་ཡེ་ཤུ་མཱ་ཤི་ཀ་གོས་ལྟར་གྱོན་པ་དང༌། སྡིག་པའི་རང་གཤིས་ཀྱི་འདོད་པ་སྐོང་བར་མ་སོམས་ཤིག །