2
A Kedo Mahuri
1 I mavonga, mu lobo liu ni rata a naro hale. Mu lobo ni tatami, mu lobo ni ngava naru, mu lobo ni tahate ne huriki ri tahoka a maki, mu lobo ni vakahale a rana turane mua.
2-3 Ge muholi mu hataki pali a naro kamumu ne Bakovi Dagi, mu ngaru hateka a nita na Vure, i manga a koma kiroko, ni poda karaba, i ngaru hateka ni ruru. Muri bara mu korurike, a Vure ge korimule mua.
4-5 E Kristo i manga a kedo mahuri, ri koi vona e huriki a bakovi. Pali a Vure i vulakia, i ngaru hatekea. Na tahuna mu valai ne Kristo, mua ranga mu manga a kedo mahuri. Ni ru palupu mua, mu bele manga a roho na Vure, ge mua e huriki a prister na Vure, mu gu habi na Vure a nihabi ge vivi vona, a vuhuna a leho i ratea e Isu Kristo.
6 A Hinere i ta maea,
“A ru puru o Sion a kedo.
Ia a vuhu kedo a vulakia. A ngaru hatekea.
E rei a viri i luhoi tora ia
i uka ma ge maruhu.”
7 Lakea mua e huriki mu luhoi torea a kedo iea, mu ngaru hatekea. Pali e huriki i uka ma ri luhoi torea, a Hinere i ta maea,
“A kedo i marikoi vona e huriki a mari ni hae a ruma,
i bele manga a vuhu butu.”
8 I ta maea tabu,
“A kedo iea i rata e huriki ri sibo,
ri boru.”
Ri sibo a vuhuna ri longotaroa a nitana, i manga a hini a Vure i taki muga ri gi rata.
9 Pali mua, a Vure i vulaki mua. Mua e huriki a prister na hariki, a tara malamala, ne vona a Vure kunana. A Vure i rata mavonga, mu gu vakasiri e huriki vona a Vure i kamumu hateka, a vuhuna muga mu made na uvo. Pali i gale tala mua, mu gu made na nipara kamumu vona.
10 I muga mu manga a bakovi a ngatavine tavula. Pali ngane mua e huriki a bakovi a ngatavine na Vure. I muga i uka tara viri ge dodo mua. Pali ngane a Vure i vakasiri pali ne mua a nidodo vona.
11 Mua o huriki a turagu, mu manga a mosi, mu laho polo kunanea a malala iea. A taki tora mua mu gu pile a ningaru hale na kakaine mua. A ningaru hale nga ri vaubi na hanune mua.
12 Mu laho malamala na matane huriki ri made na uvo. Lakea na tahuna ri padi virihi mua, ta mu rata a naro hale, bara ri matakilaka vona a naro malamala ne mua. Muri bara ri kavurikea a Vure na Parava i valai vona.
13 Mu longototo a matakari lobo koea na malala, a vuhuna e Bakovi Dagi i ngaru si gi rata mavonga. Mu longototoa a hariki i matakari.
14 Mu longo tabu e huriki a matakari, ra i rudu a hariki ge vakamadihi e huriki ri rata a naro hale, ge kavurike e huriki ri rata a naro kamumu.
15 A Vure i ngaru mu gu longototo ria. Na naro iea, bara mu tukari a ngavane huriki a bakovi manga manga.
16 I muholi i uka ma mua a vora. Pali mu laho manga a vora na Vure, mu ramai a ningaru vona. Naha ni rata a naro hale.
17 Mu togo e huriki lobo. Mu ngaru e huriki e turane hita. Mu mangenge na Vure. Mu togoa a hariki.
A Vorakato
18 Mua o huriki a vorakato, mu longototo, mu togo e huriki a matakari ne mua. Ria a bakovi navai, mu longototo ria. Ge ria a bakovi kamumu, a bakovi madoru, o ge ria a bakovi hale, mu longototo ria.
19 A viri i luhoi torea a Vure, lakea i bole tavula a nimadihi, i uka ma i rata a naro hale ge bole a nimadihi vona. Ia ge kaloho kunana, i rata a naro kamumu.
20 Mua bara mu rata a naro hale, ni lagu mua, pali mu kalohoa, ni gi kavurike navai mua? Pali mua bara mu rata a naro kamumu, ni lagu mua, mu kalohoa, a Vure bara i vivi ne mua.
21 I gale mua mu gu rata mavonga, a vuhuna e Kristo tara i bole a nimadihi na murine mua, mu gu muri mai a narona.
22 I uka ma i ratea tara naro hale. I uka ma i ratea tara ngava taminga.
23 Na tahuna e huriki ri harogia, i uka ma i koli. Na tahuna i bole a nimadihi, i uka ma i ta vakamengenge. I ru kunana ia na limana Viri i pelekado e huriki na naro malamala.
24 Na tahuna i tavore na kai tavalavala, i bole na kakaina a naro hale ne hita. I rata mavonga, si gi mate na naro hale, si gi mahuri mule na naro malamala. A harena lebo na kakaina i vakatavaga mua.
25 I muga mu manga a maka sipsip ri ruru. Pali mu hamule pali na Matakari na hanune mua.