3
Ziozgö nup galöm yeŋgö keu areŋ
1 Kunŋan urumeleŋ könagesögö uru galöm pasto akŋamgö ak waŋgizawi, yaŋön mönö nup sorokŋi aködamunŋambuk miwikŋaima. Keu mi öl töhönŋa.
2 Miaŋgöra urumeleŋ könagesögö uru galöm nupköra mönö azi kewöŋi möwölöhöba kuŋgugetka dop kölma: Kungö sileŋö köpösihitkö keuŋi qahö, ambi mohot-kungö apŋi, kekpurikŋi qahö, ahakmemeŋi törörök galöm köl aŋguiga göda qem waŋgimakze. Yaŋgöreŋ kamei, i ölöp köl öröba köyan köl eŋgiba mötmöt törörök kusum eŋgimakza.
3 Kunöŋ o köhöikŋi nemba bim laŋ qeba aŋgururuk aka moneŋ membagun memamgö köpösöŋgömakzawi, i qahöpmö, kunŋan ölöp ambazip mutulaŋgöba mökölim eŋgiba guŋbönjönjöŋ ak eŋgimakzawi, mönö azi mi kuŋgume.
4 Kunöŋ nanŋi anöm-moröurupŋi ölöp galöm köla goro eŋgiiga nahönböraturupŋan göda qem waŋgiba keuŋi pakpak tem köla maljei, mönö ia kuŋgugetka kinma.
5 Galöm azi kunŋan nanŋi saiwaurupŋi galöm köl eŋgimamgö qötötaŋgöza ewö, yaŋön Anutugö urumeleŋ könagesöurupŋi mönö denöwö köyan köl eŋgibawak? Mi mönö osibawak.
6 Azi kunŋan nalö köröpŋi uruŋi meleŋda zeŋ kinjawi, yaŋön ölöp kutukutulaŋ galöm nup memeŋina aka malma. Kunŋan nalö töröpŋi uruŋi meleŋda an köl kam köl aka tiwokmawok aka töptöpŋe qeba sileŋi memba öŋgöbapuk. Bölöŋaŋgö Toŋan kezapjupjup aiga Anutunöŋ keuŋi jim teköba közöl waŋgii erök. Miaŋgö dop eŋgö galömŋinan sileŋi memba öŋgöiga Anutunöŋ i Satan ewö jim teköiga etpapuk.
7 Galöm kunŋan urumeleŋgö kopa yeŋgö sutŋine qetbuŋa ölöpŋi qahö bisibawak ewö, ambazipnöŋ i laŋ jim böligetka Bölöŋaŋgö Toŋan mötöp simbaŋi ali miaŋön töteköi qeiga etpapuk. Mewö.
Ewanjelis aka Buŋa nup ambazip yeŋgö keu
8 Buŋa nup ambazip yeŋön mewöyök ambazipnöŋ göda qem eŋgimeaŋgö dop taŋörakŋini qahö aka malme. Tosatŋan keu jöl yahötyahöt jiba wain o gwötpuk nemba möndömöndö qakŋe injarere mala moneŋ yuaigöra kapaŋ kölakzei, i mönö kude kuŋgum eŋgigetka kinme.
9 I qahöpmö, ambazipnöŋ mötnaripkö keu ölŋi asa-asambötŋi Anutunöŋ indelöhi, mi nöm tik memba miaŋgöreŋ qekötahöba uruŋinan tölöhobapuköra galöm mem aŋguba sarakŋi maljei, mönö ia kuŋgum eŋgime.
10 I mewöyök mönö mutuk kewöt eŋgigetka keu jizalaŋgö dop köhöiba kingetka dop kölma ewö, mönö ölöp kuŋgum eŋgigetka kinda Buŋa nupkö ambazipŋini aka malme.
11 Yeŋgö ambiurupŋinan mewöyök ambazipnöŋ göda qem eŋgimeaŋgö dop taŋörakŋini qahö aka andöqeqe keu jitnöŋ yöhösaŋ qahö jiba malmemö, kekpurikŋini qahö mala yuai pakpak memburik-qemburikŋini qahö memba malme.
12 Buŋa nup azinöŋ mönö ambi mohot-kungö apŋi aka nanŋi anöm-morö aka welenqeqeurupŋi ölöp galöm köl eŋgimakŋa.
13 Buŋa nup ambazip nupŋini ölöpŋanök memakzei, ambazipnöŋ i göda qem eŋgigetka qetbuŋa ölöpŋi miwikŋaime. Mi miwikŋaiba ölöp awösamkakak kinda ambazip uruŋini kuŋguba Jisös Kraist möt naribingö keu mi köhöiba jimakŋe. Mewö.
Anutunöŋ Buŋaŋi asa-asambötŋi indelök.
14 O Timoti, nöŋön zilaŋ göhöreŋ kaba gekŋamgö jörömqöröm al mamböt akzalmö, töndup kimbi ki göhöra ohozal.
15 Nalöni qeköriiga kabileŋbuköra mutuk kimbi ki kewögöra ohobi kaza: Gi Anutugö urumeleŋ könagesöurupŋi denöwö galöm köl eŋginöŋga ahakmemeŋinan diŋgiba ölöwakŋawi, mönö qambaŋ keu mi oyoŋda mötman. Anutugö könagesöurupŋi neŋön Anutugö mindimindiri zioz selŋi akzin. Malmal Toŋi yaŋgöreŋ qekötahöinga mindirim neŋgiiga miri dop tokoba keu ölŋi jim sehimakzin. Keu ölŋan böliba ösumŋi etpapuköra miaŋgö wötŋi aka tandöŋi akzin.
16 Anutunöŋ amötqeqegö könaŋi asa-asambötŋi indelöhi, neŋön Buŋa keu mi möt asariba kewö jim miwikŋaimakzin:
Buŋa Toŋi yaŋön nanŋak gölme azia aka sutnine asuhuyök.
Asuhuiga keu jakeŋe albingö keuŋi laŋ jarum bibihigetka Uŋa Töröŋan könaŋi solanŋi aukŋe kondelök. Mi kondela meiga Kembu aka wahöta Suep garata galöm köl eŋgiiga aködamunŋi uba eket.
Mi eketka Anutunöŋ waŋgiri Suepnöŋ öŋgöba Anutubuk tata galöm köl neŋgimakza. Galöm köl neŋgiiga Buŋa keuŋi mi kantriŋi kantriŋi liliköba jim asarigetka gwötpuk yeŋön gölme dop möt narim waŋgimakze.
Mewö jim miwikŋaininga ölŋa aködamunŋambuk akza. Mewö.