8
Lama moröŋan muŋgem supap 7:ŋi munjuratza.
1 Lama moröŋan muŋgem supap (sil) 7:ŋi munjurata mutuliga Suep miri miaŋgöreŋ kouruk pakpak göröŋ ala 30 minitkö dop nöŋ qeba ahöyök.
2 Mewö asuhuiga Suep garata 7 Anutugö wösöŋe kinjei, mi eŋgekiga kunöŋ tömun qainŋi kun (biugel) 7 mi böröŋine ala eŋgiyök.
3 Mi eŋgekiga Suep garata kun asuhuba jiniŋ ohohogö goul qambiŋi memba kaba alta kösutŋe kinök. Ambazip sarakŋi pakpak Anutugö köulukögetka yaŋön jiniŋ altanöŋ ohoiga wörönŋi umköhöwakŋambuk mi köulukŋinambuk toroqeba pukpuköba mohotŋe öŋgöba Anutugöreŋ anakza. Goul alta mi jakömbuak dum wösöŋe kinjawi, yaŋön mönö miaŋgö kösutŋe kiniga tosatŋan jiniŋ mi gwötpuk ohomapköra waŋgiget.
4 Yaŋön jiniŋ mi ohoiga miaŋgö köwakŋan mönö Anutugö ambazip sarakŋi yeŋgö köulukŋinambuk toroqeba Suep garata yaŋgö böröŋeyök wahöta Anutugö jemesoholŋe öŋgöget.
5 Suep garata miaŋön jiniŋ qambi mi memba altanöhök könöp jitŋi mei jeiga qambi miaŋgöreŋ uiga kokolak qeiga gölmenöŋ gili geyök. Gili geiga miaŋgöreŋök wölpöndaŋgö göjuŋi göjuŋi asuhuba giŋgururuŋ qerök. Wölbilik ösumŋinambuk asuhugetka kenöŋi kenöŋi nalöŋi nalöŋi meyök. Mewö.
Garata yeŋön tömun qainŋi kun uget.
6 Suep garata 7 tömunŋini qainŋi kun (biugel) megeri, yeŋön mi ubingö jöjöröget.
7 Garata mutukŋan wahöta tömunŋi qainŋi kun uyök. Mi uiga ais kötŋi aka könöp bölamŋi mi kie ewö asuhuba sepuk toroqegetka kunöŋ mi mokoiga mohotŋe gölmenöŋ erök. Miaŋön könöpŋambuk eta gölme qeiga gölmegö bahöŋi karöbutŋan jem teköyök. Arökŋaŋgö ipŋi mieŋgö bahöŋi karöbutŋan jem teköget aka gwözözak sinŋi görökŋi mi körek jeba jem teköyök.
8 Garata yahötŋi yaŋön wahöta tömunŋi qainŋi kun uyök. Mi uiga kunöŋ kunduŋi ketaŋi könöp jejeŋi tandök ewö (wolkeno) yuai mi giliga köwetnöŋ geyök. Geba köwet meiga köwetkö bahöŋi karöbut mieŋgöreŋök kunŋan meleŋda sep ahök.
9 Mewöŋanök Anutunöŋ köwetkö yuaiŋi pakpak miwikŋaiiga maljei, miaŋgö bahöŋi karöbut mieŋgöreŋök kun mi kömuget aka waŋge pakpak mieŋgö bahöŋi karöbut mieŋgö likepŋini kun mi jömgöba ayuhuget.
10 Garata karöbutŋan wahöta tömunŋi qainŋi kun (biugel) uyök. Mi uiga seŋgelau ketaŋi kiwa bölamŋi ewö tandök jeba suepnöhök teköba erök. Eta köla gölmegö o töwatŋi eŋguba mieŋgö bahöŋi karöbut mieŋgöreŋök kun aka o jeŋi pakpak mi dop köl eŋgiyök.
11 Seŋgelau miaŋgö qetŋi mi röbek kömbukŋambuk. Röbek miaŋön eriga oŋi oŋi mieŋgö bahöŋi karöbutŋi mi meleŋda kömbukŋinambuk aket. Kömbukŋinambuk akeraŋgöra aka ambazip gwötpukŋan mi nemba kömuget.
12 Garata 4:ŋi yaŋön wahöta tömunŋi qainŋi kun uyök. Mi uiga kunöŋ wehön jeŋi aka köiŋ jeŋi mietkö asakŋiraŋgö bahöŋiri karöbutŋi mi etkuiga bahösapsap ömuŋ köla söŋauyohot. Mewöŋanök seŋgelau bahöŋini karöbutŋi eŋguiga meleŋda söŋauget. Miaŋgöra silim nalöŋaŋgö bahöŋi karöbutŋan söŋauba pandaman ahök. Mewöŋanök suŋgemgö asakŋan töriiga bahöŋi karöbutŋan söŋauyök.
13 Mewö aiga eu uba tukapkap kun eka mötpiga könakembaŋe eu bölbölgöba suep bibiŋe kutuba kaba köhöikŋanök qeta kewö jiyök, “O ambazip gölmenöŋ maljei, Suep garata karöbut yeŋön mönö toroqeba tömunŋini qainŋi kun ubingö dop akze. Tömun karöbut mieŋgö kourukŋini mötketka lömböt kanjamŋambuk karöbut asuhumei, miaŋgöra mönö wölziköba yei! yei! yei! jiba sahötzal.” Mewö.