18
Babilon siti köndeŋgetka gororoŋgöma.
1 Miaŋgö andöŋe Suep garata kun kukösumŋi öŋgöŋgöŋi ekiga Suepnöhök asuhuba eriga asakmararaŋan gölme mem asariyök.
2 Eta köhöikŋanök silata kewö qerök, “Babilon siti ketaŋi mi köndeŋget. Mi ölŋa köndeŋgetka gororoŋgoyök. Ambazip qahöwaketka öme wöröme könaŋi könaŋi yeŋönök mönö tokoba miriŋini miaŋgöreŋ megetka yeŋgö gölmeŋini bohonŋi ahök. Neiŋi neiŋi dönqizinŋinambuk aka imbiloŋloŋinambuk mieŋönök mönö miaŋgöreŋ tokoba aipŋini laŋ ala öŋsöŋ malje.
3 “Anutunöŋ mi kewögöra jiiga köndeŋget: Kantri pakpak yeŋön ambi miaŋgö serowilinŋaŋgöra aka uruŋini wahöriga eŋololoŋ aketka Anutugö irimŋi seholiyök. Irimsesewölŋi mi qakŋine öŋgöiga wain o nemakzeaŋgö tandök mötket. Gölmegö kiŋ kembuŋi kembuŋi yeŋön ambi miambuk sero namböŋnamböŋ aka malget. Kölköl-örörö ambazipnöŋ gölme dop miaŋgöreŋök kaba sukinap aködamunŋinambuk bohonŋi memapköra algetka önöŋi qahö öröba siyoŋsayoŋi qahö malök. Yaŋgö örömgöjup memgöjupŋaŋgöra aka yeŋön pomŋi kindiŋbirik aka öŋgöŋgöŋi aket.”
4 Miaŋgö andöŋe Suepnöhök kunöŋ keu jiiga kewö möral,
“Nöŋgö könagesöurupni, iŋini mönö siti mi mosöta yaigep etket.
Ambi miaŋön siŋgisöndok ahakzawi, miaŋön mönö eŋgualöŋni yambuk kinda uruŋini tölohobepuk.
Anutunöŋ likepŋi meleŋ eŋgiiga lömböt kanjamŋinambuk qakŋine öŋgömei, lömböt mewöŋi kunöŋ mönö nanŋini qakŋine öŋgöiga mewöyök sihimbölö mötpepuk. Miaŋgöra yembuk mönö kude mindiriba malme.
5 Ambi miaŋön siŋgisöndokŋi aka qaknöŋ qaknöŋ aliga öŋgöba lök suep misirim teköza.
Kegwek-kahasililiŋ aka malgeri, Anutunöŋ mi mönö nanŋi mötmötnöŋ ala miaŋgöra qahö ölum qema.
6 Ahakmeme goŋgoŋi tosatŋi ak eŋgiba malgeri, iŋini mönö miaŋgö dop meleŋda ak eŋgime. Bölöŋi aka memba malgeri, iŋini mönö miaŋgö likepŋi sömaŋi yahötkö dop meleŋ eŋgigetka qakŋine öŋgöma.
Siŋgisöndokö qambiŋi nemegöra mokoba malgeri, nanŋini qambi miaŋgöreŋök mönö sömaŋ yahötkö dop uba meleŋda wain o kömbukŋi kötökŋi mi eŋgöra mokoget neme.
7 Ambi miaŋön sukinap aködamunŋinambuk önöŋi qahö öröba qetbuŋa öŋgöŋgöŋi miwikŋaiba siyoŋsayoŋi qahö malök. Miaŋgö likepŋi mönö nanŋi ihileknöŋ ohotiriba ip özöpaŋnöŋ sihimbölö önöŋi qahö ak waŋgigetka jiŋgeŋ köla wösöbirik malma. Nanŋi uruŋe kewö mötmöriba laŋ jimakza,
‘Nöŋön qin ambi kembugö jakömbuak dum tatatŋe tatzal. Malö qahö akzal aka nalö kunöŋ jiŋgeŋ qahö kölmam.’
8 Mewö laŋ jimakzawaŋgöra aka Anutunöŋ likepŋi meleŋ waŋgiiga nalö mohotkö uruŋe yaŋgö qakŋe öŋgöma.
Kembu Anutunöŋ keuŋi kewöta jim teköm waŋgiyöhi, yaŋgö kukŋan mönö öŋgöŋgöŋi akza.
Miaŋgöra lömböt kanjamŋinambuk könaŋi könaŋi mieŋön mönö zilaŋ kewö asuhum waŋgime:
Tinitosolomŋan kömugetka jiŋgeŋ köla bödi tariga nanŋi könöpnöŋ ohogetka jema.”
9 Könöpnöŋ ohogetka jeiga köwak wahötmawi, kantriŋi kantriŋi pakpak mieŋgö kiŋ kembuŋinan mi eka mönö amburereŋ aka sahötme. Kiŋ kembu mieŋön yambuk serowilin aka malget. Sukinapŋi aködamunŋinambuk önöŋi qahö miaŋgö nem söŋgaipŋi yambuk ala söŋgaiba malgeri, yeŋön mönö yaŋgöra aka jiŋgeŋ kölme.
10 Jiŋgeŋ köla ihileknöŋ ohotirigetka ip özöpaŋnöŋ sihimbölö önöŋi qahö mötzawi, miaŋgöra mönö töwöratiba tikep kinda kewö sahöta jime, “O Babilon siti qetbuŋaŋambuk, lömböt qakŋine öŋgöyöhaŋgöra mönö Yei! Yei! jiba sahötzin. O siti kukösumŋini ketaŋi, Suep Toŋan likepŋi meleŋ eŋgiiga ösumok aua mohotkö uruŋe qakŋine öŋgöiga sihimbölö ketaŋi mötze. Yei Yei! jiba sahötzin!”
11 Kantriŋi kantriŋi mieŋgö kölköl-örörö ambazip yeŋön mewöyök amburereŋ akŋe. Kunŋan toroqeba yeŋgö inapŋini bohonŋi qahö memakŋawaŋgöra mönö jiŋgeŋ köla sahötme.
12 Aködamunŋini goul, silwö, jamönjiŋ ölŋinambuk aka sorom kötŋi mi Babilon yeŋön me tosatŋan qahö bohonŋi meme. Opoŋini tuat lalamŋi, pisikŋi gugakgugak, pisikŋi pötpöt aka opo qetŋi silk mi qahö bohonŋi meme. Ip qetpuk könaŋi könaŋi mieŋgö kembaŋini aka börösöwöŋini könaŋi könaŋi mi qahö toroqeba bohonŋi meme. Aködamunŋini elefant sihitŋan memeŋi, mi öne ahöme. Dum tebol yuaiŋini ip söŋgöröŋini ketaŋi in, qönqön, mihinik, naŋim aka yuari miaŋön memeŋi, mi öne ahöme. Börösöwö ain gohotŋi brons aka ain injaŋan memeŋi aka köt qetŋi mabol miaŋön memeŋi mi mönö öne ahöme.
13 Babilon yeŋön kömusönönik (sinamon) aka gipŋi tosatŋi mi qahö bohonŋi meme. Silegö sanda qetŋi mör, jiniŋ samburup aka sile ömön tosatŋi mi qahö bohonŋi meme. Wanafu, berat, wölömjikjik aka wörönŋi asuhumapkö yuai tosatŋi mi qahö bohonŋi meme. Mewöyök wain o, oil ipkö oilŋi, wit kötŋi aka flaua neneŋi mi qahö bohonŋi meme. Bulmakau, lama, hos aka hos kare mi qahö bohonŋi meme. Mutuk welenqeqe ambazip bohonŋini memba nupnöŋ al eŋgigetka sile me urumötmötŋinan böliba ayuhuyök. Mewö qahö toroqeba ahakŋe.
14 Kölköl-örörö ambazip yeŋön Babilon ambi miaŋgöra kewö jime, “Ip ölŋi nemamgö sihimŋi möta eröm ota malnöŋi, mi mönö qahöwaketka öne maljan. Töhötmöriamgi aka sukinapki aködamunŋinambuk mi mönö körek pakpak gömosöta ayapkögetka tömtömimba maljan. Mi mönö nalö kungen kunbuk miwikŋaimanaŋgö dop qahö.”
15 Kölköl-örörö ambazip sukinapŋini mewö mewö bohonŋi memegöra ala siti miaŋgöreŋök moneŋ goul (guli dötnam) öröba qetbuŋaŋinambuk aket. Yeŋön tikep kingetka tosatŋan ihileknöŋ ohotirigetka ip özöpaŋnöŋ sihimbölö önöŋi qahö möröhi, miaŋgöra mönö auruba sahöta jiŋgeŋ kölme.
16 Jiŋgeŋ köla kewö jime, “O siti ketaŋi, lömböt qakŋine öŋgöyöhaŋgöra mönö yei! yei! qeta jiŋgeŋ köljin. Yeŋön opoŋini tuat lalamŋi, pisikŋi gugakgugak aka pisikŋi pötpöt mi löŋgötket. Aködamunŋini goul, jamönjiŋ ölŋinambuk aka kösasorom tosatŋan meŋölöm aŋgugetka tandökŋinan kölkölbilikŋinambuk aket.
17 Mewö aketmö, sukinapŋini mewöŋi önöŋi qahö mi mönö ösumok aua mohotkö uruŋe ayuhuba ayapköba qahöwaket.” Mewö jiget.
Waŋge pailot pakpak aka ambazip waŋgenöŋ anda kamakzei, yeŋön mewöŋanök körek Babilon siti ohoget jeiga köwakŋi mi tikep kinda ekŋe. Mewöyök waŋge ambazip opo seri möröreŋgögetka luhutnöŋ naŋgöi anakzei aka köwetnöŋ nup tosatŋi memba malmalŋini naŋgömakzei, mieŋön mönö körek pakpak mi tikep kinda ekŋe.
18 Ambi ketaŋi qetbuŋaŋambuk ohoget jeiga könöp bölamŋaŋgö köwakŋi wahötmawi, mi tikep kinda eka amburereŋ aka kewö jime, “Siti qetbuŋaŋambuk kiaŋgö alaŋi mönö nalö kunöŋ qahö ahöyök.”
19 Mewö jiba sömsöm urata kau ariba qeta jiŋgeŋ köla unduba sahöta kewö jiget, “O siti ketaŋi, aua mohotkö uruŋe yuaiŋi pakpak mönö ayuhuba ayapköba qahöwahök. Ambazip waŋgeŋinambuk pakpak köwetnöŋ anda kaba sukinapŋini bohonŋi memegöra ala miaŋgöreŋök moneŋ goul (guli dötnam) sehisehiŋi örögetka siti miaŋön qetbuŋaŋambuk ahök. Lömböt qakŋine öŋgözawaŋgöra mönö yei! yei! jiba sahötzin.” Mewö jiget.
20 Yeŋön ahakmeme goŋgoŋi tosatŋi ak eŋgiba malgeri, Anutunöŋ mönö miaŋgö keuŋi jim teköba likepŋi meleŋniga qakŋine öŋgöiga sihimbölö ketaŋi mörakze. Miaŋgöra Suep mire maljei, iŋini mönö yaŋgöra aka köiraŋ kölme. Anutugö ambazip sarakŋi, aposolurupŋi aka kezapqetok ambazip iŋini mönö söŋgaiba saureŋ qeba malme.
21 Miaŋgö andöŋe Suep garata ösumŋi öŋgöŋgöŋi kunöŋ kaba köt keta bölökŋi memba wahöta köwetnöŋ gili geiga kewö jiyök, “Anutunöŋ siti ketaŋi qetbuŋaŋambuk mi mönö kiaŋgö dop könöpuk köndeŋda meleŋni geba qahöwak teköma. Qahöwak teköiga könaŋgep nalö kunöŋ qahö miwikŋaimeaŋgö dop akŋa.
22 Iŋini siti miaŋgöreŋ kömam köla gita kulele qeba awölop tömun uba liŋet köla undumalgeri, miaŋgö kourukŋi mönö nalö kunöŋ kunbuk qahö mötme. Babilon eŋgöreŋ ambazip mötmöt nupŋini könaŋi könaŋi memba malgeri, mi mönö teköyök. Dokta didiman, qaqazu klak aka mewöŋi mi miaŋgöreŋ kunbuk qahöpmahöp miwikŋaim eŋgime. Wit padi kötŋi jamönjiŋ yahötkö sutŋire möjöjahögetka (mill) kourukŋi asuhuyöhi, miaŋgö isikusukŋan mönö qahöwahiga sitinöŋ mönö göröŋ qeba ahöma.
23 “Mutuk sitiŋinaŋgö miriŋi pakpak mi kiwaŋinambuk asarigetmö, asakŋi miaŋön mönö bököiga pandaman ahöma. Azigö andöurupŋinan ambigö mam bohonŋi bau aŋguba börum megetka ambigö sepkitipurupŋan köiraŋ ala nem jöwösök aka sösöŋgai almalgeri, oköiraŋ mewöŋaŋgö kourukŋi mi mönö kunbuk mötmeaŋgö dop qahö. Babilon eŋgö kölköl-örörö ambazip mi kantriŋi kantriŋi miaŋgöreŋ möt eŋgigetka qetbuŋaŋinambuk aka malget. Yeŋgöreŋ qarösoŋgo amötqeqe ambazip mi gölme dop ambazip uruŋini mem sohogetka jaŋjuŋ aka malget.” Suep garatanöŋ mewö jiyök.
24 Babilon mi kewögöra ayuhuyök: Kezapqetok ambazip aka Anutugö ambazip sarakŋi mi mönö yeŋgö sutŋine töndup taköwölaŋ aka eŋguget kömugetka sepŋinan erök. Yeŋgöreŋ sep aka gölmenöŋ ambazip tosatŋi eŋgugetka kömumalgeri, körek yeŋgö sepŋinaŋgö kitipŋan mönö yeŋgö qakŋine öŋgöi malget. Könaŋamŋini mewö miwikŋaigetka ahöyök. Mewö