Pitögöreŋ Kimbi 1
Pitönöŋ Kimbiŋi mutukŋi alök.
Jim-asa-asari
Pitönöŋ Buŋa Kimbiŋi ki ohoba Kraistkö alaurupŋi Eisia prowinsgö Not likepŋe deŋda malgeri, yeŋgöra ali anda liliköyök. Könahiba qetŋini kewö qeta ohoyök, “Anutunöŋ ambazip nanŋaŋgöra möwölöhöm eŋgiyöhi, mieŋön.” Mötnarip ambazip sesewerowero miwikŋaiba sihimbölö möta malgeri, yeŋgö uruŋini naŋgömapköra aka Kimbi ki ohoyök. Kraistkö Ölöwak Buŋagö könaŋi ölum eŋgubapuköra aka Jisösgö keuŋi kunbuk kewö jim asariyök, “Jisösnöŋ kömuyökmö, kunbuk kömupnöhök guliba wahöta kunbuk liliŋgöba kamamgö jim jöhöba oyaeŋkoyaeŋ akingö jörömqörömŋi neŋgiiga al mambörakzin. Miaŋgöra sihimbölö mörakzei, mi mönö möt aŋgön köla kapaŋ köla köhöiba kinda malme. Sihimbölö miaŋön mötnaripŋini kewöriga ölŋambuk akŋa ewö, Anutunöŋ mönö likepŋi meleŋ eŋgima. Jisös Kraistnöŋ asuhumawi, nalö miaŋgöreŋök mönö aködamunŋinambuk akŋe. Keu mi möta awösamkakak kinme.” Mewö qambaŋ eŋgiba ohoyök.
Wahöjaliŋ nalöŋe uruŋini naŋgöm eŋgiba toroqeba köhöiba kewö uru kuŋgum eŋgiyök, “Iŋini Kraistkö buŋaya akzeaŋgö dop mönö malmal sarakŋi malme.”
Buk kiaŋgö bahöŋi bohonŋi 6 mi kewö:
Keu mutukŋi 1.1-2
Anutugö amötqeqe nupkö könaŋi 1.3-12
Malmal sarakŋi malbingö jimkutukutu 1.13–2.10
Sihimbölö qakŋe nup denöwö bisibin 2.11–4.19
Uruŋini meleŋda memba et ala nup meme 5.1-11
Buŋa kimbi kiaŋgö keu kötŋi bohonŋi 5.12-14
1
1 Anutunöŋ ambazip nanŋaŋgöra möwölöhöm neŋgiiga neŋgöreŋök iŋini tosatŋan Israel mosöta prowins qetŋini Pontus, Galesia, Kapadosia, Eisia aka Bitinia miaŋgöreŋ deŋda anda malje. Pitö nöŋön Jisös Kraistkö melaimelai azi aposol aka embuk keu eraum mötpingöra kimbi ki ohozal.
2 Iwi Anutunöŋ qeljiŋe möpŋaŋgö möpŋe mötmöt areŋ ali ahöiga miaŋgö dop Uŋa Töröŋan iŋini mem sarahim eŋgiiga Anutugö buŋaŋi aket. Anutunöŋ iŋini Jisös Kraistkö jitŋi tem kölmegöra möwölöhöm eŋgiiga Kraistkö sepŋan qewösahöi eŋgömiriba saŋgoŋ eŋgimakza.
Anutugö kalem möriamŋan mönö uruŋini dop sehiiga luainöŋ malme. Mewö.
Oyaeŋkoyaeŋgö jörömqörömninaŋgöra Anutu möpöseibin.
3 Neŋön Kembunini Jisös Kraistkö Iwiŋi Anutu i kewögöra möpöseimakin: Anutunöŋ ak kömukömu ketaŋi neŋgiba neŋgömeiga ahuahu dölökŋi ahuin. Ahuahu dölökŋi ahuba Jisös Kraistnöŋ guliba kömupnöhök wahöröhi, neŋön miaŋgö dop guliba wahöta oyaeŋkoyaeŋ akingö jörömqöröm aka maljin.
4 Oyaeŋ-koyaeŋ buŋa qem aŋgubingöra jörömqöröm aka al mambörakzin. Anutunöŋ oyaeŋkoyaeŋ mi urumeleŋ alaurupŋi neŋgimapköra Suep mire ali ahöza. Miaŋgöreŋ ahöba qahö sahaha kahawet memba töwiba gisahöba ayapköma.
5 Mötnarip köl gulime ewö, Anutugö ösumŋan sel jöhöba kölközizip eŋgiiga Suepkö buŋaya malgetka Jisösnöŋ ölöp eŋguaŋgiriga Suepnöŋ öŋgöba oyaeŋko-yaeŋ akŋe. Anutunöŋ Amötqeqe Toŋaŋgö könaŋi nalö teteköŋe mewö indel teköiga ambazip jim asarim eŋgibingöra aka ahöza.
6 Oyaeŋkoyaeŋ akingöra söŋgaiba maljemö, gölmenöŋ malinga Anutunöŋ esapesap Toŋi qahö jöhöiga lömböt aŋgösirip könaŋi könaŋi asuhugetka sihimbölö miwikŋaiba möta malje. Nalö töröpŋi mewö malmemö, mi töndup sösöŋgai aka malje.
7 Anutunöŋ esapesap qahö jöhöiga qakŋine öŋgöba mötnaripŋinaŋgö tandökŋi kewörakza. Köt ölŋi köhöikŋi goul miaŋgö söŋgöröŋan mönö guli dötnam oŋgitzapmö, töndup nalö kunöŋ ayapköm teköma. Nalö töröpŋaŋgöra aka ambazipnöŋ goul mia kun könöpnöŋ delasi ohoba ölŋan gizikörörök ahöbapuköra kewöta esapkömakze. Miaŋgö dop iŋini ölŋa törörök möt nariba kin köhöimakze me qahö, esapesapnöŋ mönö miaŋgö könaŋi kondelakze. Anutunöŋ uruŋini ölŋi kewöriga goul kewögöra oŋgitmapköra mötza: Mötnaripŋinan pöwöwöm köhöikŋi aiga söŋgöröŋi öŋgöŋgöŋan goul silwö gwötpuk oŋgita nalö teteköŋi qahö bauköm eŋgii dop kölma. Mewö eŋgehi dop kölma ewö, Jisös Kraistnöŋ kunbuk asuhumawaŋgö nalöŋe mönö möpöseim eŋgiiga Anutugö jeŋe qetbuŋa miwikŋaiba aködamunŋinambuk akŋe.
8 Iŋini Kraist qahö eka töndup jöpaköm waŋgiba malje. Nalö kewöŋe Kraist qahö eka töndup möt narim waŋgimakze. Mewö aka sösöŋgai sorokŋi aködamunŋambuk söŋgaimakze. Sösöŋgaiŋini miaŋön mönö jitnöŋ jijigö dop qahö akza.
9 Iŋini Jisös möt narigetka amöt qem eŋgiiga letotket. Mötnaripŋinaŋgö tohotŋi mi Suep mire eu ahöza. Anutunöŋ uŋaŋini eŋgömeiga eŋön euyaŋgöreŋ öŋgöba tohot mi zilaŋ misirimegö möta sösöŋgai ahakze. Mewö.
Kezapqetok ambazipnöŋ jörömqöröm aka malget.
10 Kezapqetok ambazip yeŋön amötqeqegö könaŋi jaruba Anutu köuluköba qeqesi ala möt kewöta mala kotket. Mewö mala Anutunöŋ kalem möriam eŋgimapkö möt asariba miaŋgö kezapqetok keuŋi mi qeljiŋe jiba mala kotket.
11 Kraistkö Uŋa Töröŋan kezapqetok ambazip sölölöhöm eŋgiba asuhumapkö keuŋi indela saŋep ala kewö jii mötket, “Kraistnöŋ sihimbölö möta miaŋgö andöŋe asakmararaŋ aködamunŋambuk miwikŋaiba asariba malma.” Mewö jiiga möta Amötqeqe Toŋan wani nalönöŋ aka dendenöwö asuhumawi, miaŋgö könaŋi jaruba qeqesi ala möt kewöta malget. Mewö mala söpsöp keuŋi keuŋi qeljiŋe naŋgöba jiba mala kotket.
12 Amötqeqe Toŋaŋgö könaŋi jaruba qeqesi ala möt kewöta malgetka Uŋa Töröŋan mötmöt kewö indel eŋgiba jiyök, “Iŋini mönö nanŋini welenŋina kude qem aŋgumemö, ambazip könaŋgep ahuba keuŋini oyoŋmei, mönö i bauköm eŋgiba malme.” Mewö jiba kezapqetok keu eŋgiyöhi, nini tosatŋan mi nalö kewöŋe liliköba jim asarim eŋgiinga mötket. Kraistnöŋ Uŋa Töröŋi Suepnöhök melaiiga eta ambazip sölölöhöba inahöm eŋgiiga Ölöwak Buŋa jiba uru kuŋgum eŋgiba malgeri, yeŋön Buŋa keu miyöhök jiba malget. Kezapqetok keu miaŋgö ölŋi asuhuiga Suep garataurupninan mewöyök mi uba eka könaŋi möt asaribingö awöweŋgöba malje. Mewö.
Anutunöŋ sarakŋi malbingöra neŋgoholakza.
13 Buŋa keuŋi mewö ahözawaŋgöra eŋön mönö uruŋini Anutugö nupköra ala opoŋini öröget yöhöiga mem kurukŋini memba kinme. Mönö böŋ qeba nanŋini ahakmemeŋini galöm köl aŋguba malme. Jisös Kraistnöŋ kunbuk asuhuba miaŋgö nalöŋe kalem möriam eŋgimawi, mönö miaŋgöra al mamböta jöröm-qörömŋini pakpak miaŋgöreŋ ala malme.
14 Anutugö nahönbörat-urupŋan keuŋi tem kölakzei, eŋön mönö miaŋgö dop köna sarakŋi wuataŋgöba malme. Mutuk gukmaulem tönpin malgetka nanŋini sihim kömbönaŋini bölöŋan yeyaseŋseŋ mem eŋgigetka laŋlaŋ malget. Mewö malgetmö, nalö kewöŋe ahakmemeŋini mönö sihim mieŋgö dop kude toroqeba aka memba malme. Laŋ siksauk malbepuköra mönö galömŋini mem aŋguba malme.
15 Laŋ siksauk qahöpmö, Anutu sarakŋan eŋgoholiga eŋön mönö mewöyök yaŋgö dop ahakmemeŋini pakpak miaŋgöreŋ sarakŋi aka malme.
16 Buŋa Kimbigö keu kun kewö ohoget ahöza, “Nöŋön töröŋi sarakŋi maljalaŋgöra nöŋgö buŋani eŋön mönö sarakŋi aka malme.”
17 Anutugöra “Iwinini!” jiba ösumŋi köl örömakzini, yaŋön iwi ölöpŋaŋgö dop ambazip tosatŋi qahö neŋgek soriba tosatŋi qahö qepureim eŋgimakza. Körek neŋgö ahakmemenini mönö dop mohotnöŋ kewöta mohot mohot neŋgö keunini jim teköma. Miaŋgöra Anutu töröŋaŋgö buŋaya akze ewö, mönö gölmenöŋ kusukŋi malmeaŋgö dop sarakŋi aka malme. Jitŋinanök qahöpmö, ahakmemeŋinan mönö Anutugö jitŋi oŋgitpinpuköra sömbuŋini möta malme.
18 Mewöyök Anutunöŋ sohopŋini meyöhaŋgö könaŋi mötagun mönö sarakŋi aka malme. Ambösakonurupninan tandö lopioŋ mötmöt laŋ wuataŋgöba ahakmeme omaŋi kondel neŋgigeri, Anutunöŋ iŋini yeŋgö dop toroqeba laŋ malbepuköra bohonŋini öŋgöŋgöŋi gila sohopŋini meyök. Bohonŋi mi silwö goul oŋgita gilöhi, mi mötze. Gölmegö moneŋ inap ayapkömawaŋgö dop akzawi, yuai mewöŋi miaŋön bohonŋini qahö meyök.
19 Miaŋön qahöpmö, Kraistkö sepŋi söŋgöröŋi öŋgöŋgöŋi miaŋön mönö bohonŋini meyök. Kraistnöŋ lama moröŋi solanŋi uzi poretŋi qahö tandök aiga jöwöwöl ohohogö tandök qegetka sepŋi mokoyök. Miaŋgöra mönö sarakŋi aka malme.
20 Anutunöŋ mutuhök Suep gölme qahö miwikŋaim etkiba nalö miaŋgöreŋök Kraist möwölöhöba sohopnini memapkö nup areŋ mi lök qeljiŋe ala areŋgöyök. Mi areŋgöiga ahöi mala kota malgetmö, nalö teteköŋe kiaŋgöreŋ iŋini ölöwakŋegöra aka indeli aukŋe asuhuyök.
21 Kraistnöŋ nam köl eŋgiiga ölöp Anutu möt narim waŋgimakze. Anutunöŋ Kraist mem gulim waŋgii kömupnöhök wahöriga asakmararaŋ al waŋgii malja. Mewö maljawaŋgöra aka iŋini Anutu möt nariba kinda yuai pakpak jiyöhi, miaŋgö dop ahakŋapkö jörömqöröm ak waŋgimakze.
22 Jörömqöröm ak waŋgiba keu ölŋi tem kölgetka Kraistkö sepŋan köl könjörat mem eŋgiiga malme. Mewö mala ölöp urumeleŋ alaurupŋini geŋmoŋi qahö jöpaköm eŋgiba malme. Urukönömŋini pakpak miaŋön mönö kapaŋ köla törörök urukalem ak aŋguba malme.
23 Malmal köhöikŋaŋgö keuŋi miaŋön mönö nam köl eŋgiiga ahuahu dölökŋi ahuget. Gölmegö keu kusukŋi kunŋan qahö nam köl eŋgiiga Iwi ketaŋaŋgö nahönböraturupŋi aket. Anutugö keuŋan mönö qahö ayapkömapmö, teteköŋi qahö zeŋ ahöm öŋgöma.
24 Keu miaŋgö könaŋi mi Buŋa Kimbinöŋ kewö ohoget ahöza: “Ambazip pakpak iŋini mönö gwözözak luplup tandök akze. Aködamunŋini pakpak mi juraŋi asakasak-ŋinambuk tandök akza. Gwözözak luplupnöŋ mönö soholiba gororoŋgögetka juraŋinan buratiba teköqeköba etme.
25 Mewö etmemö, Kembugö Buŋa keu malmal köhöikŋi neŋgimakzawi, miaŋön mönö teteköŋi qahö ahöm köhöiba ahöm öŋgöma.”
Buŋa keu miaŋön Ölöwak Buŋaya aiga tosatŋan mi jim asarim eŋgigetka mötze. Mewö.