28
Jisösnöŋ kömupnöhök wahörök.
Mak 16.1-10; Luk 24.1-12; Jon 20.1-10
1 Sabat kendon tatket teköiga Sonda söŋanök wahöta miri giaŋiiga Magdalagö Maria aka alaŋi Maria kun yetkön qaksirigö köt köteŋ ekitkö anohot.
2 Anohotka miaŋgöreŋök kenöŋ ketaŋi kewögöra meyök: Kembugö garata kunöŋ Suepnöhök eta qaksirinöŋ kaba numbuŋe köt ketaŋi qetali ani qakŋe tarök.
3 Garatagö kaisoŋgolomŋi mi wöl ewö aiga malukuŋi mi kousu ewö tuat lalamŋi ahök.
4 Mewö asuhuiga yarö azi qaksiri galöm megeri, yeŋön yaŋgöra awöwöliba jönömŋini undui kömum töriget.
5 Mewö aketka garatanöŋ ambi yahöt yetköra keu kewö jiyök, “Jisös maripomnöŋ qegeri, iŋiri yaŋgöra jaruzahot, mi mötzal. Miaŋgöra mönö keŋgötŋiri kude mötmahot.
6 Nanŋak jiyöhaŋgö dop mönö kömupnöhök wahötza. Miaŋgöra ki qahö ahöza. Mönö kaba dum ahöyöhi, salupŋi mi ekŋahot.
7 “Mi eka ösumok gwarekurupŋi yeŋgöreŋ anda buzup keu ki jiyohot mötme, Jisösnöŋ kömupnöhök wahötza. Mötket, yaŋön mönö qeljiŋe mutuk Galili prowinsnöŋ anma. Iŋini ölöp miaŋgöreŋ anda i ekŋe. Mötket, nöŋön mi lök jibi mötze.”
8 Mewö jiiga zilaŋök qaksiri mosöta keŋgötŋiri möta töndup önöŋi qahö söŋgaiba buzup mi memba gwarekurupŋi jiyohot mötmegöra ösumŋiran anohot.
9 Ösumŋiran anohotka Jisösnöŋ i könanöŋ asuhum etkiba “Söŋanŋiri!” jiyök. Mewö jiiga kösutŋe anda sipköba könaŋe meraköba waikŋi memba möpöseim waŋgiyohot.
10 Möpöseim waŋgiyohotka kewö jii mörohot, “Keŋgötŋiri kude mötmahot. Mönö anda munurupnan Galili anmegö keu jiyohotka miaŋgöreŋ anda ni nekŋe.” Mewö.
Qaksiri galöm meme yeŋön kösohotŋini jiget.
11 Ambiyahöt yetkön köna anohotka qaksirigö köt köteŋ galöm meme yarö azi tosatŋan sitinöŋ kaba jike nup galöm eŋgeka yuai pakpak asuhuyöhi, miaŋgö kösohotŋi jiget mötket.
12 Yeŋön mi möta Juda yeŋgö jitŋememeurupŋini öröm eŋgigetka mohotŋe totoko ala Jisös wahötwahötkö keu asambötpingö keu areŋ miwikŋaiba moneŋ keta bölökŋi mi yarö azi eŋgiget.
13 Mi eŋgiba kewö jim kutum eŋgiget, “Iŋini mönö keu kewö jime: Nini suŋgem gaun ahöinga gwarekurupŋan ölöŋ kaba qamötŋi yoŋgorö memba anget.
14 Keu mewö jigetka keu miaŋön premiögö kezapŋe gei mötma ewö, lömböt eŋgö qakŋine öŋgöbapuköra neŋön mönö uruŋi mölöwöriba memba eta alinga waimanjat qahö malme.”
15 Mewö jim kutum eŋgigetka miaŋgö dop aka moneŋ memba anda nup keuŋini wuataŋgöget. Mewö aketka Juda yeŋön keu mi sutŋine jim sehigetka möta malgetka anda nalö kewöŋe mewöyök mi toroqeba jiget mörakzin. Mewö.
Misin nup membingö jimkutukutuŋi
Mak 16.14-18; Luk 24.36-49; Jon 20.19-23; Apo 1.6-8
16 Gwarekurup 11 yeŋön Jerusalem mosöta Galili prowinsnöŋ anda Jisösnöŋ kunduŋe anmegöra jiyöhi, miaŋgöreŋ öŋgöget.
17 Miaŋgöreŋ öŋgöba Jisös eka waikŋi memba möpöseim waŋgigetmö, tosatŋan yaŋgöra uruyahöt aket.
18 Möpöseim waŋgigetka yeŋgöreŋ kaba kewö jiiga mötket, “Suepkö aka gölmegö kukösum pakpak mi Anutunöŋ niŋgiiga nöŋgöreŋ ahöza.
19 “Miaŋgöra iŋini mönö gölme dop anda ambazip kambu pakpak kewö eŋgömegetka nöŋgö gwarekurupni akŋe: I mönö Iwi, Nahön aka Uŋa Töröŋi neŋgö qetnine o melun mem eŋgime
20 aka nöŋön keu wuataŋgömegöra jim kutum eŋgiali, mi pakpak tem kölmegöra mönö kusum eŋgiba malme. Mötket, nöŋön mönö nalöŋi nalöŋi embuk mala anda malbiga gölmegö nalöŋan teköma.” Mewö.