18
Gwarek sutŋine daŋön mutukŋi akza?
Mak 9.33-37; Luk 9.46-48
1 Nalö miaŋgöreŋ gwarek yeŋön Jisösgöreŋ kaba kewö jiget, “Suepkö bemtohoŋ uruŋe daŋön öŋgöŋgöŋi akza?”
2 Mewö jigetka namande moröŋi kun qeri kaiga sutŋine ali kinök.
3 Kiniga kewö jiyök, “Nöŋön keu ölŋi kun kewö jibi mötme: Uruŋini qahö meleŋda nahönbörat ewö qahö akŋe ewö, iŋini mönö nalö kunöŋ Suepkö bemtohoŋnöŋ qahö aŋgotme.
4 Miaŋgöra kunŋan nanŋi memba et ala morö kiaŋgö dop akŋawi, yaŋön mönö Suepkö bemtohoŋ uruŋe öŋgöŋgöŋi akza.
5 Kunŋan namande kewöŋi kun nöŋgö qetne köl öröba köyan kölmawi, yaŋön mönö ni köl öröm niŋgima.” Mewö.
Siŋgisöndokö kölgorom mönö qetal eŋgime.
Mak 9.42-48; Luk 17.1-2
6 Jisösnöŋ toroqeba kewö jiyök, “Morö kewöŋi möt narim niŋgizei, kunŋan yeŋgöreŋök kun kölgorom ak waŋgiiga siŋgisöndok akŋawi, azi miaŋön mönö lömböt öŋgöŋgöŋi miwikŋaima. Anutunöŋ lömböt miaŋgö likepŋi denöwö waŋgiiga dopŋe akawak? Kemuŋ jamönjiŋ jölŋe jöhöba köwet röndumnöŋ gilget mulumgöi gebawak, miaŋön mönö awamŋi ahum waŋgii tandök akawak.
7 “Siŋgisöndokö supatitikŋan mönö awamŋanök asuhumakza. Miaŋgöra gölme ambazip eŋgöra Yei wösöbirik! mötzal. Kunŋan supatitik aŋgön kölmamgö osimakzapmö, kun daŋön tosatŋi kölgorom ak eŋgiiga siŋgisöndok akŋei, yaŋgöra mönö Yei! jiba sahötzal. Sihimbölö öŋgöŋgöŋan mönö yaŋgö qakŋe öŋgöma.
8 “Börögan me könagan siŋgisöndok akŋangö kölgorom ak gihima ewö, mönö yandim gilman. Yandim gilagun börötak me könatohot mala malmal köhöikŋi miwikŋaiba oyaeŋkoyaeŋ akŋanmö, köna börö yahötpuk malnöŋga könaŋgep könöp sianöŋ gil gihigetka gebanbuk. Sia könöpŋi mi teteköŋi qahö jema.
9 “Mewöŋanök jegan siŋgisöndok akŋangö kölgorom ak gihima ewö, mönö qözöla gilman. Qözöla gilagun je-ilik mala malmal köhöikŋe aŋgota oyaeŋkoyaeŋ akŋanmö, je yahötpuk malnöŋga könöp siagö könöpnöŋ gil gihigetka gebanbuk.” Mewö.
Lamanöŋ sohoyöhi, miaŋgö dopkeu
Luk 15.3-7
10 “Ambazip moröŋi kieŋgöreŋök kun memba et al waŋgibe-puköra mönö galömŋini meme. Nöŋön keu kewö jizal: Yeŋgö kölközizip garataurupŋinan mönö Suep miri miaŋgöreŋ nöŋgö Suep Iwinaŋgö kösutŋe mala jemesoholŋi sundan ehakze. Miaŋgöra jijiwilit kude ak eŋgime.
11 (Suep gölmegö azi ölŋan mönö ambazip sohosohoŋi mem letot eŋgii oyaeŋkoyaeŋ akŋegöra erök.)
12 “Keu kiaŋgöra denöwö mötmörize? Azi kungö lamaurupŋi 100 malgetka mieŋgöreŋök kunŋan sohoba jaŋjuŋ aniga toŋan denöwö akŋa? Yaŋön mönö 99 mi kunduŋe eŋgömosöta anda mohot jaŋjuŋ anöhi, miaŋgö jaruba anma.
13 Jaruba anda mala miwikŋaima ewö, nöŋön keu ölŋi kun kewö jibi mötme: Yaŋön 99 jaŋjuŋ qahö angeri, mieŋgöra nalö miaŋgöreŋ gwötpuk qahö söŋgaimapmö, mohot miaŋgöra önöŋi qahö söŋgaiba malma.
14 Miaŋgö dop eŋgö Iwiŋini Suep mire maljawaŋön mönö ambazip moröŋi kieŋgöreŋök kunŋan sohoba könöp sianöŋ gebapuköra mörakza.” Mewö.
Alagan siŋgisöndok ak gihiiga kewö akŋan:
15 “Urumeleŋ alagan siŋgisöndok ak gihima ewö, gi mönö yaŋgöreŋ anda mesohol köl waŋgiba köna siŋgiyöhi, mi kondel waŋgiman. Mewö aknöŋga keugi möta bapŋe anma ewö, göŋön mönö alagi luhut al waŋginöŋga kunbuk urumohot aka malmahot.
16 Mewö aknöŋga keugi möta miaŋgö bapŋe qahö anma ewö, göŋön mönö toroqeba ala mohot me yahöt etkuaŋgita yaŋgöreŋ anme. Mewö Buŋa Kimbigö keu kiaŋgö dop akŋan, ‘Keu pakpak mi ambazip yahöt karöbutŋan naŋgöba jigetka köhöima.’
17 “Mewö aketka keuŋini möta miaŋgö bapŋe qahö anma ewö, göŋön mönö urumeleŋ könagesögö jitŋememe yeŋgöra jinöŋga yambuk eraum mötme. Eraum mötmemö, yeŋgö keu bapŋe mewöyök qahö anma ewö, mi mönö aukŋe jigetka jabö ahui urumeleŋgö kopa ewö ak waŋgiba malman. Takis tilipqilip-ŋinambuk megetka sisitŋini memakzei, miaŋgö tandök ewö i mönö mosötnöŋga yaigep malma.”
Siŋgisöndokö jöhöjöhöŋi aka pösatpösatŋi
18 “Nöŋön keu öl töhönŋi kun kewö jibi mötme: Eŋön siŋgisöndok gölmenöŋ jöhömei, mi pakpak mönö Suep mire mewöyök jöhöjöhöŋi ahöma aka siŋgisöndok gölmenöŋ mosöta pösatmei, mi pakpak mönö Anutunöŋ mosöri Suep mire mewöyök pösatpösatŋi ahöma.
19 “Toroqeba keu kewö jibi mötme: Gölmenöŋ eŋgöreŋök yahötŋan keu mi me mi miaŋgöra urumohok aka köuluköbitkö keu jöhömahori, mi nöŋgö Iwini Suep mire maljawaŋön mönö etkiiga buŋa qem aŋgumahot.
20 Mi kewögöra: Ambazip yahöt me karöbutŋan nöŋgö qetne igen me waigen tokomei, nöŋön mönö miaŋgöreŋ yeŋgö sutŋine malmam.” Mewö.
Welenqeqe ak-kömukömuŋi qahöpkö söpsöp keu
21 Nalö miaŋgöreŋ Pitönöŋ Jisösgöreŋ kaba keu kewö jii mörök, “Kembu, alanan siŋgisöndok ak niŋgimakzawi, nöŋön mi indimŋi dawikö dop mosötpiga dop kölma? Indimŋi 7 mi gwötpuk. Miaŋgö dop mosötpiga dop kölma me qahö?”
22 Jisösnöŋ mi möta kewö meleŋ waŋgiyök, “Indimŋi 7 qahöpmö, 70 taims 7 mi mosötnöŋga dop kölma. Nöŋön göhöra mewö jizal.
23 Miaŋgö könaŋi mi kewö jim tuarimam. Suepkö bemtohoŋi mi kiŋ azi kembugö dop albi kewö akza: Kiŋnöŋ welenqeqeurupŋi eŋgohola moneŋini galöm kölgeri, miaŋgö areŋ papiaŋi kondelget mindiŋgömapköra kapaŋ kölök.
24 “Mewö könahiba moneŋaŋgö kösohotŋi kewöta mindiŋgögetka miaŋgöreŋ azi kun waŋgita kagetka yaŋgö jeŋe kinök. Tosaŋi 10 milyön kina mi yaŋgöreŋ ahöyök.
25 Mi ahöyökmö, tosaŋi mi mekömamgöra moneŋi qahö dop köli osiyöhaŋgöra aka ketaŋamŋan kinda kewö jim kutuyök, ‘Sukinapŋi ahözawi, mi pakpak mönö söŋgöröŋi memegöra alme. I aka anöm-moröŋi i mewöyök mönö söŋgöröŋini memegöra algetka moneŋ kaiga miaŋön tosaŋi mi meköme.
26 “Mewö jim kutuiga welenqeqeŋan wösöŋe eta simin köla sipköba kewö ulet waŋgiyök, ‘Gi mönö urukönöp kude aka mökösöŋda mamböt niŋginöŋga göhöreŋ tosagi pakpak mi ölöp meköm gihimam.’
27 Mewö ulet waŋgiiga ketaŋamŋan welenqeqeŋaŋgöra wösö mötmöt aka tosaŋi mi kutuba mosöta pösari erök.
28 Erökmö, yaigep anda miaŋgöreŋ welenqeqe alaŋi kun miwikŋaiba ehök. Yaŋgö tosaŋi mi silim 100:kö töwaŋi (Kina500,-) miaŋgö dop yaŋgöreŋ ahöyök. I eka memba jölŋi köhöikŋanök mözöhöla kewö jiyök, ‘Nöŋgöreŋ tosa göhöreŋ ahözawi, mi mönö meköm niŋgiman me?’
29 “Mewö jiiga welenqeqe alaŋan wösöŋe eta simin köla sipköba kewö ulet waŋgiyök, ‘Gi mönö urukönöp kude aka mökösöŋda mamböt niŋginöŋga göhöreŋ tosagi mi ölöp meköm gihimam.’
30 “Mewö jiyökmö, yaŋön mi tököba anda jii memba jöhöba kösö mire alget tari tosaŋi mekögetka etma.
31 Yuai mi asuhuiga welenqeqe alaurupŋan tandök mi eka uruŋinan kömbuhiiga wösöbirik möta anda miaŋgö kösohotŋi mi körek ketaŋamŋinaŋgöra jigetka mörök.
32 “Mi möta ketaŋamŋinan welenqeqe mutukŋi mi qeri jeŋe kaŋgoriga kewö jii mörök, ‘Gi nup meme azi bölöŋi! Gi tosagi kutuba mosötmamgö qesim niŋginöŋga nöŋön mi pakpak mosöt gihizal.
33 Nöŋön gehoriba ak kömum gihibiga göŋön mewöyök miaŋgö dop welenqeqe alagi ak kömum waŋginöŋga dop kölbawak.’
34 “Ketaŋamŋan mewö jiiga irimŋi seholiiga welenqeqe miaŋgö keuŋi jim teköba kösö mirigö galöm yeŋgö böröŋine al waŋgiiga sihimbölö gwötpuk möta tatma. Miaŋgöreŋ tata tosaŋi kiŋgöreŋ ahöyöhi, mi pakpak meköm teköiga etma.
35 Söpsöp keu kiaŋgö ölŋi kewö: Iŋini mohot mohot alaŋinaŋgö siŋgisöndokŋi uruŋinan qahö mosötme ewö, nöŋgö Suep Iwinan mönö mewöyök keu miaŋgö dop ak eŋgima.” Mewö.