10
Aposol 12 yeŋgö qetŋini
Mak 3.13-19; Luk 6.12-16
1 Jisösnöŋ gwarekurupŋi 12 eŋgoholi yaŋgöreŋ kagetka ömewöröme közöl eŋgimegö kukösumŋi al eŋgiyök. Mewöyök uzi kawöl qemjem-mamjeŋ könaŋi könaŋi mem ölöwakŋegö kukösumŋi al eŋgiyök.
2 Melaimelai azi aposol 12 mieŋgö qetŋini kewö: mutukŋi yaŋön Saimon, qetŋi kun Pitö qetket aka yaŋgö munŋi Andru. Miaŋgö andöŋe Jeims aka munŋi Jon, iwiŋiri qetŋi Zebedi.
3 Filip aka Bartolomyu, Tomas aka Matyu takis meme azi, Jeims Alfiusgö nahönŋi aka Lebeus qetŋi kun Tadius,
4 Saimon Zelot-politik azia aka Judas Iskariot. Kariot azi miaŋön könaŋgen Jisös mamalolo mem waŋgiyök.
Jisösnöŋ gwarekurupŋi 12 melaim eŋgiyök.
Mak 6.7-13; Luk 9.1-6
5 Jisösnöŋ azi 12 mi melaim eŋgiba kewö jim kutum eŋgiba jiyök, “Iŋini kian kantrigö ambazip yeŋgöreŋ kude anme. Mewöyök Samaria prowins yeŋgö taonŋini kunöŋ kude anme.
6 Miaŋgöreŋ kude anmemö, Israel könagesögö lama sohogeri, mönö yeŋgöreŋ anme. Mi nup mutukŋi.
7 Denike denike anmei, miaŋgöreŋ mönö Buŋa keu kewö jiba jim asarime, ‘Suepkö bemtohoŋan mönö dowe kazawa miaŋgö uruŋe aŋgotme.’
8 “Ambazip kawölŋinambuk mönö mem ölöwak eŋgiba kömukömuŋi mi mem gulim eŋgiba malme. Uzikuku ambazip mönö mem solanim eŋgigetka öme wöröme közöl eŋgiba malme. Anutunöŋ yuai kalema eŋgiyöhi, mi mönö toroqeba kalema eŋgiba malme.
9 “Köna anmeaŋgöra soujeŋi goul me silwö me ain kopönöŋ memeŋi mi mönö irimuŋgaŋine kude jöhöme.
10 Ambazipnöŋ nup meme ambazip malmalŋini naŋgömeaŋgö dop akze. Miaŋgöra köna anmeaŋgö yuaiŋi ki mi kude memba anme: gösö qahö, maluku semönŋi qahöpmö, mohot meme, köna esu qahö, öröp qahö.
11 “Anda taon me miri denike denike aŋgotmei, miaŋgöreŋ mönö daŋön azi ipŋi qetbuŋaŋambuk akzawi, miaŋgöra qesigetka miri eŋgimei, mönö miaŋgöreŋök mala nup memba taon mi mosöta köna anme.
12 Miri kunöŋ öŋgöba luainöŋ yembuk ahömapkö jime.
13 Mi jigetka luaiŋini aŋgön kölmeaŋgö dop akze ewö, luaiŋinan mönö yeŋgö qakŋine öŋgömapmö, mi aŋgön kölmeaŋgö dop qahö akze ewö, luaiŋinan mönö liliŋgöba nanŋine kama.
14 “Anda mala miri kunöŋ aŋgotketka qahö köl öröm eŋgiba keuŋini qahö mötketka nesampurekŋini mönö kewö jiba kondel eŋgime, ‘Nini eŋgö gölmenöŋ kainga sölbuham köna tambönine mekötahözawi, mi mönö tim tönjöraringa nanŋine liliŋgöba gema.’ Mewö jiba ölöp miri me taon mi mosöta toroqeba anme.
15 Nöŋön keu ölŋi kun kewö jibi mötme: Anutunöŋ nalö ketaŋe qemasolokepŋinaŋgö likepŋi meleŋni taon miaŋgö qakŋe öŋgömawi, dop miaŋön mönö Sodom aka Gomora gölme yeŋgö dop oŋgita toroqem eŋgima.” (Sodom Gomora yeŋön bölöŋi kanjamŋambuk memba uruŋini qahö meleŋgetka Anutunöŋ könöpnöŋ köndeŋ eŋgiyök.) Mewö.
Anda nup megetka sesewerowero asuhuma.
Mak 13.9-13; Luk 21.12-17
16 “Mötket, lama yeŋön arökŋaŋgö kiam kalŋi yeŋgö sutŋine gegetka luhuba eŋgöhöbepuk, nöŋön iŋini miaŋgö tandök ewö melaim eŋgibi anme. Miaŋgöra mönö mokoleŋ ewö mötkutukutu qakŋe galöm mem aŋguba mala kembö ewö ambazip bönjöŋi köpösihitkö keuŋini qahö malme.
17 Ambazipnöŋ iŋini öröba keu jakeŋine al eŋgiba köuluk miriŋine keu nupŋini memba ihilek wahiŋambuknöŋ tauköm eŋgime. Miaŋgöra ambazip mewöŋi yeŋgöra mönö galöm mem aŋguba malme.
18 “Tosatŋan nöŋgöra aka eŋguaŋgitketka kantriŋi kantriŋi yeŋgö kiŋ kembu aka premiö yeŋgö jemesoholŋine kinme. Mewö kinda nöŋgö könaŋamni naŋgöba jigetka azi ipŋi mi aka kian kantri könagesö yeŋön mi mötme.
19 Mi mötmemö, keu jakeŋe al eŋgigetka kinmei, nalö miaŋgöreŋ wani keuya denöwö jibinak, miaŋgö waimanjatŋi kude mötme. Keu jimei, mi Uŋa Töröŋan aua miaŋgöreŋök eŋgima.
20 Nanŋine uruŋineyök keu kude jimemö, Iwiŋinaŋgö Uŋa Töröŋan mönö uruŋini sölölöhöiga keu jime.
21 “Urumeleŋgö kopa kunöŋ darumunŋan uruŋi meleŋnö-haŋgöra aka i mamalolo meiga keu jakeŋe algetka qeget kömuma. Mewöyök iwi kunöŋ nahönböratŋi mamalolo meiga kömuma aka nahönbörat yeŋön iwinamurupŋini qetal eŋgiba jigetka eŋguget kömume.
22 Nöŋgö qetnaŋgöra aka kantriŋi kantriŋi yeŋön körek kazik al eŋgigetka malmemö, kunŋan kapaŋ köla nalö tekömawaŋgö dop köhöiba böŋ qeba kinmawi, yaŋön mönö oyaeŋkoyaeŋ buŋa qem aŋguma.
23 “Taon kunöŋ sesewerowero ak eŋgimei, mi mönö kök ala taon kunŋan anme. Nöŋön keu ölŋi kun kewö jibi mötme: Iŋini Israel taonŋi taonŋi qahö liliköm tekögetka Suep gölmegö azi ölŋan mönö liliŋgöba kama.
24 Gwarek kunŋan böhiŋi oŋgita mötmötŋambuk qahö akza aka welenqeqe kunŋan ketaŋamŋi oŋgita nupkö mötmöt qahö memba malja.
25 “Gwareknöŋ böhiŋi ewö mötmötŋambuk aiga dop kölma aka welenqeqenöŋ ketaŋamŋi ewö nupkö mötmöt memba maliga dop kölma. Miri uruŋi kungö saiwa galömŋi jim böliba qetŋi Katakömulat qetket ewö, yaŋgö saiwaurupŋi yeŋgö qetŋini mönö amqeba awamŋanök mewö qerakŋe.” Mewö.
Dagöra keŋgötŋini mötketka dop kölma?
Luk 12.2-7
26 “Ambazipnöŋ yuai önun meget ahözawi, mi pakpak mönö luluŋgetka aukŋe ahuma. Mewöŋanök keu asambötket ahözawi, mi pakpak mönö indelgetka möt kutume. Miaŋgöra ambazip yeŋgöra keŋgötŋini kude möta malme.
27 Nöŋön keu söŋaupnöŋ ölöŋ jimami, mi mönö asakŋe jime. Keu saŋep algetka kezapŋine gei mötmei, mi mönö sombemnöŋ aukŋe jime. Miaŋgöra mönö keuŋinaŋgö galöm memba malme.”
Dagöra keŋgötnini möringa dop kölma.
28 “Tosatŋan sileŋini qem kömumbeakmö, uŋaŋini qem kömumbingö osimei, yeŋgöra keŋgötŋini kude möta malme. Mi qahöpmö, yuai mutukŋi ki: Kunŋan kukösum memba uŋa aka sile mohot ayuhum etkiiga könöp sianöŋ gemahori, yaŋgöra mönö keŋgötŋini möta malme.
29 Tosatŋan bekösöm (jöjöröm, ulisit) yahöt moneŋ kötŋi mohot-töpnöŋ söŋgöröŋi memegöra alakzemö, etkerigetka Iwiŋinan oŋ qahö jiiga yetköreŋök mohotnöŋ gölmenöŋ qahö etma.
30 “Anutunöŋ köyan köl eŋgiba nöröp jupŋini pakpak mewöyök oyoŋ teköba jaŋgöŋini mötza.
31 Ambazip eŋgö söŋgöröŋini mi bekösöm ulisit gwötpuk eŋgoŋgita öŋgöŋgöŋi akza. Miaŋgöra keŋgötŋini mönö kude möta malme.” Mewö.
Kraist jim miwikŋaime me qaŋ kölme?
Luk 12.8-9
32 “Mewö aiga kunŋan ni ambazip jeŋine jim miwikŋaim niŋgimawi, nöŋön mönö mewöŋanök i Iwini Suep mire maljawaŋgö jeŋe jim miwikŋaimam.
33 Mewömö, kunŋan ni ambazip jeŋine qaŋ köl niŋgimawi, nöŋön mönö mewöŋanök Iwini Suep mire maljawaŋgö jeŋe qaŋ kölmam.” Mewö.
Jisösgöra luai qahöpmö, kazik asuhuma.
Luk 12.51-53; Luk 14.26-27
34 Jisösnöŋ toroqeba kewö jiyök, “Kewö kude mötmörime: Jisösnöŋ luai qemamgöra aka gölmenöŋ erök. Nöŋön luai qemamgöra qahöpmö, nöŋgöra aka jula deŋgetka bimgö sou ketaŋan aume.
35 “Mi kewögöra jizal: Nöŋgö Buŋa keunan ambazip uruŋini kuŋgui meleŋgeraŋgöra kewö asuhuma, ‘Iwi morö yetkön jula kerök-kerök ahotka nam morö yetkön tötal aŋguyohotka iranŋan iranŋi qetala julmahot.
36 Ambazip nanŋini saiwaurupŋinan mönö kerökurupŋini akŋe.’
37 “Kunŋan ni göragöra al niŋgiba iwiŋi me namŋi jegep ala jöpakömawi, yaŋön mönö nöŋgöreŋ qahö dop kölma. Kunŋan ni göragöra al niŋgiba nahönŋi me böratŋi jegepŋe ala jöpakömawi, yaŋön mönö nöŋgöreŋ qahö dop kölma.
38 Sisitŋini megetka kunŋan ni nuataŋgöba sihimbölö möta maripomnöŋ kömumamgö qahö jöjörömawi, yaŋön mönö nöŋgöreŋ qahö dop kölma.
39 “Kunŋan nanŋi malmal siyoŋsayoŋi qahö mi miwikŋaimawi, yaŋgö malmalŋan mönö sohoma. Kunŋan nöŋgöra aka malmalŋi köleŋniga sohomawi, yaŋön mönö oyaeŋkoyaeŋ malmal miwikŋaima.” Mewö.
Anutunöŋ nupŋinaŋgö töwaŋi eŋgima.
Mak 9.41
40 Jisösnöŋ jiyök, “Kunŋan iŋini miriŋe köl öröba köyan köl eŋgimawi, yaŋön mönö ni köl öröm niŋgima. Kunŋan ni köl öröm niŋgimawi, yaŋön melaim niŋgiyöhi, mönö i miriŋe köl öröm waŋgima.
41 Kunŋan kezapqetok ambazip kun kezapqetok nupŋaŋgöra aka miriŋe köl öröba köyan kölmawi, yaŋön mönö kezapqetok ambazipkö töwaŋi buŋa qem aŋguma. Kunŋan ambazip solanŋi kun solanŋi akzawaŋgöra aka miriŋe köl öröba köyan kölmawi, yaŋön mönö ambazip solanŋaŋgö töwaŋi buŋa qem aŋguma.
42 “Kunŋan morö kieŋgöreŋök kungöra nöŋgö gwarekni akzawaŋgöra aka o amötŋi qambiŋambuk nemapköra waŋgimawi, Anutunöŋ mönö miaŋgö töwaŋi meleŋda waŋgima. Nöŋön keu ölŋi kun kewö jibi mötme: Naŋgöm eŋgimei, mieŋön mönö töwa meme.” Mewö.