47
Josefnöŋ kiŋgö jeŋe korök.
1 Josefnöŋ anda Farao kiŋgöra kewö jiyök: “Nöŋgö iwi darumunurupni yeŋön lama bulmakau kambuŋini aka sukinap öröyuaiŋini pakpak memba Keinan gölme mosöta kaba mala dölki Gosen gölmenöŋ kaŋgota malje.”
2 Yaŋön darumunurupŋi yeŋgöreŋök azi 5 eŋguaŋgita Farao kiŋgö jeŋe öŋgöba kingetka eŋgehök.
3 Eŋgeka kewö qesim eŋgiyök: “Iŋini wani nuwa memakze?” Mewö qesim eŋgiiga kewö meleŋ waŋgiget: “Welenqeqeurupki neŋön iwiurupninan mutuk malgeraŋgö dop lama bulmakau galöm kölköl nupŋi memba mala maljin.”
4 Mewö jiba toroqeba kewö jiget: “Keinan gölmenöŋ bödi lömbötŋambuk ahözawaŋgöra welenqeqeurupki neŋön lama bulmakau kambunini yeŋgöra nene qahö miwikŋainin. Miaŋgöra neŋön gölme kiaŋgöreŋ kusuk malbingöra kain. Mewö aiga welenqeqeurupki ölöp oŋ jiba jim teköm neŋginöŋga nini Gosen prowins miaŋgöreŋ tatat dumdumnini möhamgöbin.”
5 Mewö jigetka Farao kiŋnöŋ Josef kewö jii mörök: “Iwi darumunurupkan göhöreŋ kaget.
6 Ijipt kantri ki aukŋe göhö jege ahözawaŋgöra ölöp iwi darumunurupki gölme bahöŋi kelökŋi ölöpŋi miaŋgöreŋ al eŋginöŋga malme. Ölöp Gosen prowinsnöŋ malme. Sutŋine nup qetpuk meme azi tosatŋi maljei, mi möt eŋgiman ewö, ölöp nöŋgö mirigö sömbup kambuni mi yeŋgö böröŋine al eŋginöŋga galöm köl eŋgiba malme.”
7 Mewö jii möta Josefnöŋ iwiŋi Jeikob Farao kiŋgö jeŋe waŋgita kaiga ehi Farao kiŋ mi kötuetköm waŋgiyök.
8 Kötuetköm waŋgiiga kewö qesim waŋgiyök: “Göhö yambugi dawik akza?”
9 Qesim waŋgiiga kewö meleŋnök: “Nöŋön yambu 130:gö dop gölmenöŋ liliköba mala kota maljal. Nöŋgö malmalnaŋgö yambuŋi pakpak mi awamdökŋi aka osikosiŋinambuk aket. Iwiurupnan yambu sehisehiŋi gölmenöŋ liliköba malgeri, nöŋgö yambu qötönan yeŋgöreŋambuk dop mohot qahö akza.”
10 Mewö jiba Farao kiŋ mi kunbuk kötuetköm waŋgiba jemesoholŋeyök eta anök.
11 Josefnöŋ iwi darumunŋi mi Farao kiŋnöŋ jim kutuyöhaŋgö dop Ijipt kantrinöŋ al eŋgiba Ijiptkö gölme bahöŋi kelökŋi ölöpŋi kun mi Rameses prowins (Gosen) miaŋgöreŋ eŋgiyök.
12 Josefnöŋ mewöyök iwi darumunurupŋi aka iwiŋaŋgö könagesöurupŋi pakpak mi neneŋini anöm-moröurupŋini malgeri, qötö miaŋgö dop dopŋine eŋgiba malök.
Bödi nalöŋi lömbötŋambuk.
13 Bödi ketaŋi mi lömbötŋambuk ahöiga nenenöŋ gölme dop qahöwahiga Ijipt aka Keinan kantri mietkö könagesöŋiran mönö nenegö kömum soholip aka malget.
14 Mewö mala Josefköreŋ kaba wit padi söŋgöröŋi megetka yaŋön moneŋ pakpak Ijipt aka Keinan kantri uruŋe ahöyöhi, mi tokoba memba Farao kiŋgö jakömbuak mirigö köweŋe alök.
15 Ijipt könagesö aka Keinan könagesö yeŋgöreŋ moneŋ qahöwak teköiga Ijipt körek yeŋön Josefköreŋ kaba kewö jiget: “Moneŋninan qahöwak teközawaŋgöra göŋön mönö nene neŋgiman. Nene qahö neŋgiman ewö, neŋön mönö göhö jemesoholge kömumbin.”
16 Mewö jigetka Josefnöŋ kewö jiyök: “Moneŋinan qahöwakzawaŋgöra eŋgöreŋ lama aka bulmakau ahözei, mönö mi memba kaba niŋgigetka nöŋön nene eŋgimam.”
17 Mewö jiiga anda lama bulmakauŋini eŋguaŋgita kaba Josef waŋgiget. Yeŋön hosŋini, lamaŋini, memeŋini, bulmakauŋini aka doŋkiŋini mi eŋguaŋgita kaba nenegö söŋgöröŋa Josef waŋgiba nene memba malget. Lama bulmakauŋini pakpak mi Josef waŋgigetka yaŋön nene eŋgiba mewö miaŋön yambu mohotkö uruŋe malmalŋini naŋgöiga qahö kömuget.
18 Qahö kömugetka yambu miaŋön teköyök. Teköiga yambu dölökŋe dumŋe kunbuk yaŋgöreŋ kaba kewö jiget: “Azi kembunini, moneŋnini qahöwakzawaŋgöra könaŋamnini ölŋi mi göhö jege ölöp qahö köyatibin. Neŋgöreŋ lama bulmakaunini mi mewöyök gihiinga göhö buŋaya ak teköza. Nini mi pakpak azi kembunini gi gihim teköinaŋgöra nanini aka gölmenini miyök ahöm neŋgiza. Miaŋgöra mönö wania kun gihibinak?
19 Nini mönö könaŋi wuanöŋgöra göhö jege töndup kömumbinak? Nanini kömuinga gölmeninan mönö wuanöŋgöra öne ahöba apopam köla bölibawak? Miaŋgöra mönö nanini aka gölmenini bohonini memba miaŋön numbu nene neŋginöŋga nini ölöp Farao kiŋgö welenqeqe omaŋi ahinga gölmeninan mewöyök yaŋgö buŋaya akŋa. Neŋön toroqeba jebuk mala kömumbinbuköra mönö nene kötŋi neŋgiman. Neŋginöŋga gölme nup waŋgiinga öne qahö ahöba gönjaŋ akŋa.”
20 Bödi köhöikŋi kötökŋi miaŋön Ijipt könagesö yembuk ahöyöhaŋgöra yeŋön körek mohot mohot nup gölmeŋini köröŋi mi bohonŋinaŋgöra algetka Josefnöŋ Ijipt gölme pakpak mi söŋgöröŋi meiga Farao kiŋgö buŋaya ak teköyök.
21 Josefnöŋ Ijipt könagesö miri dop kantrigö jabö teteköŋi uruŋe malgeri, mi pakpak eŋgömeiga gawmangö welenqeqe omaŋi aka malget.
22 Farao kiŋnöŋ jike nup galöm yeŋgö fotnait töwaŋini eŋgiiga memba miaŋön malmalŋini naŋgöba malget. Mewö aiga neneŋinaŋgöra qahö lömböriiga gölmeŋini Josefnöŋ söŋgöröŋi memapköra qahö alget. Miaŋgöra jike nup galöm yeŋgöreŋ gölme mieŋön mohot kiŋ Faraogö buŋaŋi qahö aket.
23 Josefnöŋ könagesö yeŋgöra kewö jiyök: “Mötket, nöŋön nanŋini aka gölmeŋini söŋgöröŋini mem teköbiga Farao kiŋgö buŋaya akze. Miaŋgöra nöŋön nene kötŋi eŋgibiga mi ölöp memba gölmenöŋ kömötme.
24 Kömötketka ölŋi asuhuiga mi mönö kewötketka kambu 5 asuhugetka mieŋgöreŋök mohot mohot mi Farao kiŋgöra ala waŋgiba malmemö, kambu 4 mi kunbuk gölmenöŋ kömötmeaŋgöra aka neneŋinaŋgöra ahöma. Mi nanŋini, anöm-moröurupŋini aka tosatŋi miriŋine maljei, mönö eŋgö neneŋina ahöma.”
25 Mewö jiiga kewö jiget: “Göŋön neŋgö malmalnini bödinöhök mekönöŋ. Miaŋgöra azi kembuninaŋgö jeŋe ak-kömukömu miwikŋaibin ewö, neŋön ölöp Farao kiŋgö welenqeqe omaŋi aka malbin.”
26 Josefnöŋ Ijipt yeŋgö gölmegöra jimkutukutu ali ahöba kota ki ohozali, nalö kewöŋe mewöyök toroqeba ahöza. Jimkutukutu mi kewö: Nene nupkö ölŋini mi mönö mendeŋgetka kambu 5 aiga mieŋgöreŋök mohot mohot mi Farao kiŋgö buŋaya akŋapköra ala malme. Jike nup galöm yeŋgöreŋ gölme mieŋön mohot Farao kiŋgö buŋaŋi qahö aket.
Jeikobnöŋ qamötŋaŋgöra Josef qesiiga oŋ jiyök.
27 Israel yeŋön Ijipt gölmegö prowins qetŋi Gosen miaŋgöreŋ tatat dundumŋini memba gölme aŋgön köla malget. Miaŋgöreŋ mala ahumsehip aketka qötöŋinan gwötpuk qariyök.
28 Jeikobnöŋ malmalŋi yambu 17 mi Ijipt gölmenöŋ malök. Malmalŋi jömukŋaŋgö yambuŋi mi mindiriba 147 ahök.
29 Israelgö kömup nalöŋan dopdowiiga nahönŋi Josef jii kaiga kewö jii mörök: “Nöŋön göhö jege ak-kömukömu miwikŋaizal ewö, göŋön mönö dölki urukalem kondela keu kewö pöndaŋ wuataŋgöba mem yakömamgö jiba börögi nöŋgö tambuni bapŋe ala kewö jim jöhöman: Nöŋön kömumbiga qamötni mi mönö Ijipt gölme kiaŋgöreŋ kude löm kölman.
30 Nöŋön kömumba iwi asani yembuk luhut memba ahömami, nalö miaŋgöreŋ nöŋgö qamötni mi mönö Ijipt kantrinöhök memba anda iwi asani löm köl eŋgigeri, yeŋgö qaksiriŋine nesim kölman. “Mewö jiiga kewö jiyök: “Jizanaŋgö dop mi ölöp akŋam.”
31 Mewö jiiga iwiŋan kewö jiyök: “Keu mi mönö jöjöpaŋ keunöŋ jim köhöim niŋgiman. “Mewö jiiga Josefnöŋ mi jöjöpaŋ keunöŋ jim köhöiiga Jeikobnöŋ mi möta bilipköba nöröpŋi memba geba öröpŋaŋgö kitipŋe ala nariba Anutugö waikŋi memba möpöseiyök. Mewö.