16
Hagar aka Ismael
1 Abramgö anömŋi Sarainöŋ köpin mala morö qahö meyökmö, Saraigö welen ambi qetŋi Hagar malök. Mi Ijipt ambia.
2 Yaŋön malöhaŋgöra Sarainöŋ Abramgöra kewö jiyök: “Kembunöŋ soŋgo jöhöm niŋgiiga morö qahö mealaŋgöra gi mönö welen ambini menöŋga gölöm ala morö kun meiga nöŋgö buŋaya asuhubawak. “Mewö jiiga Abramnöŋ Saraigöreŋ keugöra urumohot ahök.
3 Abramnöŋ Keinan gölmenöŋ yambu 10 mal teköiga nalö miaŋgöreŋ Sarai Abramgö anömŋan Ijiptkö welen ambiŋi Hagar memba apŋaŋgö anömŋi akŋapköra waŋgiyök.
4 Mewö waŋgiiga memba maliga gölöm alök. Gölöm ala mi möta galöm ambiŋi Sarai könahiba jijiwilit ak waŋgiyök.
5 Mewö ak waŋgiiga Sarainöŋ Abramgöra kewö jiyök: “Urunan böliiga sihimbölö mörakzali, miaŋgö keuŋan mönö göhö qake öŋgöba ahöma. Nöŋön welen ambini göhö böröge albiga gölöm ala mi möta miaŋgöreŋök könahiba jijiwilit ak niŋgiba malja. Miaŋgöra Kembunöŋ mönö ni aka gi netkö sutnire keu kewöta jim teköma.”
6 Mewö jiiga Abramnöŋ kewö jiyök: “Welen ambigi miaŋön nange böröge maljawaŋgöra wania mötnöŋga dop köljawi, mönö miaŋgö dop i ak waŋgiman. “Mewö jiiga Sarainöŋ Hagar laŋ örömureim ak waŋgiiga mosöta tököba ölöŋ köla anök.
7 Aniga Kembugöreŋ garata kunöŋ gölme qararaŋkölkölŋe o jeŋi kungö kösutŋe miwikŋaim waŋgiyök. O jeŋi mi Sur mire anangö köna jitŋe miaŋgöreŋ ahöza.
8 Miaŋgöreŋ miwikŋaim waŋgiba kewö jiyök: “Hagar, Saraigö welen ambiŋi, gi mönö denikeyök kazana denike anman?” Mewö jiiga kewö meleŋnök: “Ni galöm ambini Saraigöreŋök asamböta ölöŋ köla kazal.”
9 Mewö jiiga Kembugöreŋ garatanöŋ Hagar kewö jim kutum waŋgiyök: “Gi mönö kunbuk Saraigöreŋ anda welenŋi qeba yaŋgö keu bapŋe malman.”
10 Keu mi toroqeba kewö jii mörök: “Hagar, nöŋön mönö göhö gwölönarökurupki ahum sehim eŋgibiga qötöŋini oyoŋoyoŋgö dop qahö aiga malme.”
11 Kembugöreŋ garatanöŋ kunbuk toroqeba Hagargöra kewö jiyök: “Gi moröbuk akzana nahöngi meman. Dölki tapötkokorok möta sahötnöŋga mi mönö Kembugö kezapŋe geiga mötza. Miaŋgöra morögö qetŋi Ismael qetman. (Ismael Anutunöŋ kezapŋan mötza.)
12 Yaŋön azi doŋki bau kömböt ewö aka (nanŋi imbi-imbi qakŋe laŋ anda kaba) malma. Yaŋön böröŋan ambazip pakpak qetal eŋgiiga ambazip pakpak yeŋön i qetal waŋgiba malme. Yaŋön munurupŋi pakpak yembuk kerök-kerök aka nanŋök kekelolo malma.”
13 Mewö jiiga Hagarnöŋ kewö jiyök: “Nöŋön mönö dölki kunöŋ ni nehakzawi, i ekzal. “Miaŋgöra Kembu yaŋgöra keu jiyöhi, yaŋgö qetŋi kewö qet waŋgiyök: “Gi Kembu ni nehakzanaŋön akzan. “Qetŋi mewö qerök.
14 Könaŋi miaŋgöra aka o löm miaŋgö qetŋi mi Ber Lahai Roi (Malmalŋambuk mala nehakzawaŋgö o lömŋi) qetketka ahöza. O löm mi toroqeba miri yahöt qetŋiri Kades aka Bered mietkö sutŋire ahöza.
15 Hagarnöŋ Abramgö morö nahönŋi meyök. Abramnöŋ nanŋi moröŋi Hagar meyöhi, yaŋgö qetŋi Ismael qerök.
16 Abramnöŋ yambuŋi 86 aiga Hagarnöŋ Ismael morö mi Abramgöra meyök. Mewö.