22
1 Polnöŋ kinda kewö jiyök, “Azi alaurupni, nöŋön keugö likepŋi jimami, mi mönö kezap ala mötket.”
2 Hibru keunöŋ keu jii möta keuŋini körek bököm teköi kingetka toroqeba jiyök,
3 “Ni Juda azia. Ni Silisia prowinsgö taon qetŋi Tarsus miaŋgöreŋ ahubiga Jerusalem siti kiaŋgöreŋ galöm köl niŋgigetka mala qarial. Mala qariba kota böhi qetŋi Gamaliel yaŋgö keu bapŋe tatpiga yaŋön Juda ambösakonurupnini yeŋgöreŋ Köna keu aka ahakmeme mi törörök kusum niŋgiiga miaŋgö mötmötŋi möta malal. Merak eŋön körek pakpak Anutugö keu bapŋe aŋgota kapaŋ köla yaŋgöra bim qeba maljei, nöŋön mönö miaŋgö dop aka malal.
4 Mewö mala ambazip Kembugö könaŋi wuataŋgöba maljei, mi köndeŋda sesewerowero ak eŋgibiga sihimbölö möta tosatŋan kömuget. Nöŋön ambazipŋi ambazipŋi eŋguaŋgita tapepnöŋ (muŋgamuŋga) jöhöba kösö mire al eŋgial.
5 Jike nup galöm bohonŋi aka jitŋememe pakpak yeŋön mi ölöp mötze aka yeŋgöreŋ anda qesim eŋgiinga mi ölöp naŋgöba jibeak. Yeŋön Juda azi ipŋi Damaskus sitinöŋ maljei, yeŋgöra kimbi ohoba niŋgiget memba malal. Miaŋgöreŋ ambazip Kembugö könaŋi wuataŋgöba maljei, nöŋön mönö mi mewöŋanök ‘Likepŋi meleŋ eŋgimegöra gwaröhöm eŋgiba Jerusalem ki eŋguaŋgitmam,’ jiba könanöŋ anal.”
Polnöŋ nanŋi urumeleŋaŋgö könaŋi jiyök.
Apo 9.1-19; 26.12-18
6 “Könanöŋ analmö, Damaskus siti dopdowibiga miaŋgöreŋ yuai kun kewö asuhuyök: Silim bibiŋe miaŋgöreŋ asakmararaŋ ketaŋi kun Suepnöhök wölbilik ewö asuhuba wölaŋ eta turum niŋgiyök.
7 Turum niŋgiiga tala gölmenöŋ eta ahöbiga Suepnöhök keu kun kewö asuhui möral, ‘Sol Sol, gi mönö wuanöŋgöra sesewerowero qakŋe al niŋgimakzan?’
8 Mi möta meleŋnal, ‘Kembu, gi daŋön?’ Mewö meleŋbiga jiyök, ‘Ni Nazaret azi Jisös, sesewerowero qakŋe al niŋgimakzani, nia mönö mi.’
9 Azi nömbuk kaba kingeri, yeŋön asakmararaŋ mia eketmö, keu nöŋgöra jiyöhi, miaŋgö kourukŋi kun qahö mötket.
10 Mewö jiiga nöŋön qesiba jial, ‘Kembu, mönö nöŋön denöwö akŋam?’ Jibiga jiyök, ‘Gi mönö dölki wahöta Damaskus sitinöŋ anöŋga Anutunöŋ wani yuaia akŋangö jimawi, mi kunŋan jiiga mötman.’
11 Asakmararaŋ miaŋön jeni qeiga jaŋjuŋ aka kinbiga azi nömbuk malgeri, yeŋön böröne memba noaŋgitketka Damaskus sitinöŋ anin.
12 “Miaŋgöreŋ azi kun qetŋi Ananaias malök. Yaŋön Anutu göda qeba Mosesgöreŋ Köna keu törörök wuataŋgöba malök. Miaŋgöra Juda ambazip Damaskus malgeri, yeŋön körek gödaŋi ölöpŋi ak waŋgiba malget.
13 Yaŋön nöŋgöreŋ kaba kösutne kinda nöŋgöra kewö jiyök, ‘Sol alani, jegi mönö kunbuk tohoyök.’ Mewö jiiga aua nalö miaŋgöreŋök jeni tohoiga uba ehal.
14 Ekiga Ananaiasnöŋ jiyök, ‘Göŋön ahakmeme diŋdiŋi solanŋaŋgö Toŋa eknöŋga keu jitŋan jii könömŋi mötnöŋ. Nanine ambösakonini yeŋgöreŋ Anutu yaŋön gi möwölöhöm gihiiga yaŋgö jitsihitŋi möt kutuman.
15 Gi wani yuai eka mötzani, mönö mi naŋgöba jiba yaŋgö jitŋe memeŋi aka gölmeŋi gölmeŋi ambazip jeŋine dangunu ewö kinda malman.
16 Mewögöra gi wuanöŋgöra mambötzan? Mönö wahöta yaŋgö qetŋi qeta köuluköba jinöŋga o melun mem gihiinga siŋgisöndoki saŋgoŋniga solanima.’ Ananaiasnöŋ mewö jiyök.”
Misin nup kian kantri yembuk memamgöra noholök.
17 “Damaskus siti mosöta Jerusalem sitinöŋ liliŋgöba jöwöwöl jikenöŋ köuluköbiga Kembugö alburupŋan (aŋsumbemŋan) nuŋgui kinda imut kun ehal.
18 Imut miaŋgöreŋ Jisös ekiga nöŋgöreŋ kaba kewö jiba jii möral, ‘Gi kantri kiaŋgöreŋ nöŋgö könani aka Buŋa keuni mi kude jiba malman. Mi naŋgöba jinöŋga nesampurek aka andö qeme. Miaŋgöra Jerusalem siti ki mönö ösumok mosöta anman.’
19 “Mewö jiiga jial, ‘Kembu, yeŋön könaŋamni mötze. Nöŋön mutuk liliköba ambazip gi möt narim gihizei, mi köuluk miriŋi miriŋi miaŋgöreŋ öŋgöba miwikŋaim eŋgiba jöhöba ihilek wahiŋambuknöŋ tauköm eŋgiba tosatŋi kösö mire al eŋgiba malal.
20 Göhöreŋ nupbauk azi Stiwenöŋ könagi naŋgöba jiiga qeget sepŋi mokoi eri nöŋön nalö miaŋgöreŋ mewöyök kösutŋine kinda imbi köla malukuŋini galöm memba kinbiga qeget kömuyök.’
21 Mewö jibiga Kembunöŋ nöŋgöra jiyök, ‘Nöŋön melaim gihizalawa gi mönö köröwen kian kantri ambazip yeŋgöreŋ anman.’ Mewö.”
Romgö yarö azi yeŋön Pol galöm kölget.
22 Polnöŋ keu likepŋi jiyöhi, mi ambazip kambu yeŋön kezap ala mötketmö, (Kembunöŋ kian kantri ambazip yeŋgöreŋ anmamgö jiiga jiyöhi,) keu mi möta miaŋgöreŋök köhöikŋanök silata jiget, “Yapmakek! Azi mewöŋi mi qeget kömuma. Mi gölmenöŋ nembuk malmawaŋgö dop qahö.”
23 Mewö jiba qeta opo kereŋ qeköba gila (könaŋinan börömböröm tiba) sömsöm urata könakemba laŋlaŋ gilget.
24 Mewö aketka Rom eŋgö suahö galöm bohonŋan jim kutuiga yarö azi yeŋön Pol waŋgita anda yarö azi yeŋgö ain kiripo uruŋe alget. Kiripo uruŋe algetka Juda yeŋön i wanigöra aka göju memba qetzei, miaŋgö könaŋi mötmamgöra kewö jim kutuyök, “Iŋini mönö Pol memba ihilek wahiŋambuknöŋ qeba qesim waŋgigetka könaŋi aukŋe jii mötpin.”
25 Mewö jim kutuyökmö, Pol memba jöhöba ihilek wahiŋambuknöŋ qebingö aketka Rom suahö galöm kunŋan kösutŋe kini Polnöŋ kewö jiyök, “Rom mindimindiri gawman yeŋön sel jöhöm niŋgigetka böröŋine maljal. Nöŋön miaŋgö (jimkutukutu) paspot memba maljal. Miaŋgöra iŋini nöŋgö keuni qahö möta kewöta laŋ jim teköba öne ihilek wahiŋambuknöŋ nuŋgumei, mi mönö Rom jimkutukutu toŋi yeŋgö jeŋine dop kölma me qahö?”
26 Polnöŋ mewö jiiga suahö galömnöŋ möta miaŋgöreŋök suahö galöm bohonŋi yaŋgöreŋ anda buzup waŋgiba kewö jiyök, “Azi miaŋön mönö Rom gawmangö (jimkutukutu) paspot memba malja. Miaŋgöra gi mönö denöwö akŋan?”
27 Mewö jiiga suahö galöm bohonŋan Polgöreŋ anda qesiba jiyök, “Gi ölŋa Rom gawmangö (jimkutukutu) paspot memba maljan me qahö? Mi jinöŋ mötpi.” Jiiga Polnöŋ meleŋnök, “Ölŋa, nöŋön mi memba maljal.”
28 Mewö meleŋniga jiyök, “Ni moneŋ ketaŋi gila Rom mindimindiri gawmangö (jimkutukutu) paspot bohonŋi membi niŋgigetka maljal.” Jiiga Polnöŋ jiyök, “Mi ölöpmö, nöŋgö iwinan Rom gawmangöreŋ paspot memba maliga nöŋön yaŋgö nahönŋi ahuba miaŋgöreŋök qet mi memba maljal.”
29 Mewö jiiga azi qesim waŋgibingö akeri, yeŋön miaŋgöreŋök mosöta liliŋgöba anget. Polnöŋ “Ni Rom gawmangö paspot memba maljal,” jiiga suahö galöm bohonŋan mi möta Rom azia gwaröhöm waŋgiyöhaŋgöra aka awöwöliba sömbuŋi mörök. Mewö.
Polnöŋ jike kaunsöl kambu yeŋgö jeŋine kinök.
30 Miri giaŋiiga suahö galöm bohonŋan wahöta Juda yeŋön wuanöŋgöra Pol keunöŋ al waŋgiba jigeri, miaŋgö könaŋi törörök mötmamgöra möta jike nup galöm bohonŋi aka jike kaunsöl kambu pakpak yeŋön tokomegöra jim kutum eŋgiyök. Mewö tokogetka jiiga Polgö tapepŋi (muŋgamuŋga) pösatketka waŋgita eta yeŋgö jemesoholŋine ali kinök. Mewö.