11
1 Naruei bogo na Yesu mil batitig ban kiano naiagagoano nalo duelimo ba juo [12] nei bisi, ana naio jumolu den vio nei, naruei naio ban ka riverlogloglo a rioliolu vanlo ea komeli nalo na vio Kalele.
Jone Baruei kiano naiagagoano nalo abinimei
Luka 7:18-23
2 Kanio bogo nei, Jone Baruei joa yimo na tetavokoiano, a naio mijog lilianiano na im̃auano nalo napano Kristo jom̃a mim̃au kalo, naruei naio miila kiano naiagagoano tealo,
3 abano abika den Yesu, aberinavo “?Jum̃abe? ?Jau kobe toro na ajum̃a aberiio na nanua ruei aberinavo mia toro na toru tai naio rimei ka rivurim̃arabo ka kito, p̃elina jau maka kove toro nene kiana navo, ana monoka kumemi nuviturorea toro dolu bereio vo ka mia naio rimei?”
4 Naruei Yesu berdop̃e banlo, berinavo “Kamiu kuvan bereio, kuvial Jone, ana kamiu kuverial vanio vite nalo napano kamiu kumial napano kiniou nomim̃aukalo ea vio nei, a vite nalo na kumijog aberii ban kamiu ea kiniou, jibe ka vite nalo napano Naverialiano Aisea beriio na nanua ruei, napano naio berinavo:
5 ‘Merebono nalo, ajirarag bereio ruei,
a nalo napano abe jaba milalo a abe javuluku milalo, vonganei amiel bereio ruei,
a nalo napano burumieni milalo, vonganei niabele binimei meravo bo nonovio bereio ruei,
a nalo napano abe bulubau nalo, vonganei amijog vite bereio ruei,
a nalo napano am̃arm̃aro, vonganei nalo amemeul bereio ruei,
a nalo napano abe talim̃asa, vonganei kiniou nojom̃a neberial Lilianiano Vou banlo ruei.’ Ais 35:5,6
6 “A kamiu kuva kuver ka Jone bunu, kuver ‘Toro napano maka leleio kiano jidomiano riveve juo ea kiniou bogo tai, mia ilivuiano rimei van naio.’ ”
Yesu jukunu ka Jone Baruei
Luka 7:24-30
7 Bogo napano Jone Baruei kanano naiagagoano nalo ajumolu ka avan bereio, Yesu berii Jone nene ban tomu nalo, berinavo “?Bogo napano kamiu kubatavio ea vio yauo na beamu, kamiu kuban ka kuvial venia? !Maka ve tinieku ka kamiu kuban ka kuvial javiniu nalo napano jegi jom̃a buku biliviliglo janea vio julaka ga!
8 A kiniou maka ve tinieku bunu ka kamiu kuban ka kuvial toro na toru tai napano naio miya kuluniabele maraiu, bior tomu na jibe na nalo maka ajikia atua vio na miagiago jibe ka vio yauo kurano ga na, mia nalo bogo nonovio ajua yimo novo na tubo na toru kunuano.
9 ?Makanio, mia kiniou neber p̃eli kamiu kuban ka kuvial naverialiano tai, a? Mo nina bo ga, mia kiniou neber ka kamiu, neberinavo toro napano kamiu kumitumolu ka kuva kuvial naio, naio toru lie, juvulu naverialiano re nua nalo,
10 bior Atua naio berii Jone nene ea kiano Iliano Lu ruei, naio berinavo
‘Kiniou nemiila kanaku naverialiano jukamu kaso, ka naio rila vatitig kanamo m̃arabo.’ Malakai 3:1
11 “Riano, kiniou neber ka kamiu, neberinavo ea vio yetemeriba nei, Jone Baruei naio jo mave loa tomu dolu nalo abiniu. Mia nalo aviniu napano mia amei joomo ea navenatuboiano na Atua kiano, riva rivokar toro na maariano kalo nana jotano laka garuei, nalo na naruei aviniu atu mave loa Jone, ka mia nalo avar ilivuiano na Atua kiano tuvulu Jone.
12 Jikario ea bogo napano Jone Baruei jikar ka m̃a mioliolu, binimei bokar banei, tomu nalo ajum̃a amilidie navenatuboiano na Atua kiano, a uolu kouo na mira nalo bunu ajumolu m̃a amila vio ka atuvulio.
13 Be bogo binimei bokario bogo na Jone, naverialiano nalo a Mosis kiano tuboiano napano naio jirilo, aberial vite telabo napano mia amijikia ayotuba iorou.
14 A verenio kamiu kumisaaro ka kumonea vite nalo nei napano mia ayotuba iorou, mia kamiu kumijikia kuvitilubar ka kuver Jone Baruei naio be Elaija na nanua aberkario nua ruei ka mia naio rimei bereio.
15 A verenio be tiliniemiu, bo ka kuviagago vatitig ka kiaku iliano nei.”
Yesu mil kilkil ban taara nalo na ea kiano bogo
Luka 7:31-35
16-19 Ana na Yesu mil lie vo, berinavo “?Mia kiniou nemijikia never iliano vaio ka mia rivokar bajago na tomu na vonganei? Ea m̃arabo nonovio napano Atua milaio ka rila von ka mia rivu ka kamiu, mia kamiu maka lele kuvisidomio, kamiu kumitu bereio m̃a kumil niegeniege naio biorio. Bior bogo napano Jone naio jo, naio jom̃a mondulu ka sinaniano ka tom̃a rivolkouo, a naio jo bel bunu ka m̃arjum̃elm̃elu, ana tomu nalo amialio jibe na, ana nalo amiila naio, aber ‘Tete na niadu jua naio.’ Mia bogo napano Kulorinio Kenerinio naio binimei jo, naio jinan batitigio a naio munu batitigio, ana nalo amil ea naio, aber ‘Kuvialio vo, toro na naio be toro na jinan m̃ele, a miokovo ka sinaniano julaka, a naio be toro na munu m̃elea m̃arjum̃elm̃elu, a naio be toro tai napano kiano bilbilu nalo abe tomu na abarbijii takis a tomu na bova ga nalo.’
“Ka tenene, kiniou nemial kamiu tomu na vio banei, napano kamiu kuvitibe ka kiritete nalo napano ver ajum̃a ajerjere ea vio medave na komeli, mia nalo atu aviovio van kialo bilbilu sesa nalo, aver ‘!Oi, kamiu kubova ga! Verenio kumemi numitu numue bulaiu, mia kamiu maka kuvisidom kuvolu vija kumemi, a verenio numiou ka iou na m̃ariano, mia kamiu maka kuvisidom kuviteg vija kumemi.’
“Mia vite nonovio napano amalmaluvo ea Atua kiano masouano, beamu tomu telabo amilikue keanio, mia iorou ana mia naio rila rimeravo ka masouano nei keano, naio memedu ga a be riano laka.”
Yesu berkakar vatitigio bo ban nalo napano maka amonea naio
Luka 10:13-15
20 Naruei Yesu mil berkakar ban tomu nalo na ea komeli nalo napano naio mim̃auka burutomoluo telabo kalo, bior nalo amial kiano vite nalo nei, mia nalo maka leleio aviliglo.
21 Naio berenio “!Kulo Koresin nalo, naliko kulo Betsaeta nalo, kamiu kumila lelan kamiu toru laka! Verenio kulo Taia naliko kulo Saiton nanua aial burutomoluo nalo nei napano kamiu kumialio nei ruei, mia nalo aviliglo nua ruei. Nalo maka ave kulo Ju, mia aya kuluniabelo na be m̃adati a mia nalo avisivisii bulum̃aroro ea pariparilo ruei, ka tomu nalo avitilubario ka nalo amijog bova riano bior kialo kariano nalo.
22 Kiniou neber ka kamiu memedu, ea bogo na tibureiano, mia kenemiu vironiano tovulu nana ve kialo.
23 “!A kamiu kulo Kapeneam, napano m̃a kumitum̃a kubarvar ka kamiu, a kumisidom kuvitu mave laka, mia kamiu kuvitikar kamiu! Mia Atua naio rivuku kamiu kuvatove laka ea bulukusebi. A verenio kulo Sotomo nalo aial burutomoluo nalo napano kamiu kumialio nei, mia p̃eli aviliglo ka mia burum̃ara sebi na vio mave maka rijikia sisen kialo vio rivakovio. Mia kamiu kumial burutomoluo nalo nei ruei, mia kamiu maka kuvilig kamiu leleio vo.
24 Tenene na kiniou neber ka kamiu, ka bogo na tibureiano, mia Atua tinien riialo tovulu kamiu.”
Yesu ber siva ban karam̃ano
Luka 10:21-22
25 Mia ka bogo nei, Yesu bolkouo, ber “!Teta o, Tubo na vio mave, a Tubo na yetemeriba! Neber siva banso, bior jau koberloglog vite nalo napano ea kiniou, ban nalo napano kialo jidomiano jibe ka kiritete nalo ga, mia nalo napano ajidom ka abe masou laka, bija nalo napano ajidom aber amijikia vite, mia jau komilavan vite nalo nei kalo.
26 Riano, Teta, ninei javukia ga nana jau kojidomio.”
27 Karina Yesu ber bunu, berinavo “Karam̃aku juvan vite nonovio jua jum̃aku ruei. Mia Karam̃aku, naio ga takurano mijikia batitig kiniou, mia kiniou nei napano nebe kenerinio, kiniou ga takurano napano nemijikia batitig naio. Kiniou kumemliko nalo napano nebijauialo ka nesiloglog Karam̃aku kalo ka avarkar tinielo ea naio, kumemi nene naruei numijikia batitig naio napano be karamememi.”
“Kamiu kumei ea kiniou ka kuvijilimebi”
28 Ana Yesu berii bunu, berinavo “Kamiu nonovio napano tiniemiu maro m̃ele bior kamiu kumitum̃a kubar de kenemiu bagaro nalo na teremi ea kenemiu meuliano, bo ka kamiu kumei, kamiu kumei ea kiniou, ka mia kiniou nemijikia nejev jilimebiano van kamiu.
29 Kamiu kuvudu kiaku iliano nalo tibe ka vuu tai na kenemiu meuliano, a kamiu kuvudu kanaku bajago nalo, bior kiniou nebe toro na momavo ga, kanaku jidomiano batove. Tibe na, mia kamiu kuvileal ka kenemiu jidomiano nalo ajilimebi,
30 bior kanaku verloglogiano nalo, nalo amonm̃ai ga a amelala ga, a vite nalo napano mia kiniou navar van kamiu ka mia kuvario, mia ve temi laka re ka kamiu.”